Atos 1
1
Deusũ Yushĩ Pepa Jesusũ hawẽ tsumabu hatu yubabainikiaki, na hãtxarã
1Ẽ haibu pepa Teófiloõ, ha dukũ una ẽ mia keneshũ bumaimarã, ha dukũ Jesusũ hatu yusĩkĩ ashũkĩ taewabiranimarã, haska dasibi hakiri ẽ mia keneshũ bumaimaki. 2Nai anu kariama Yushĩ Pepaki dasia nishũ hawẽ tsumabu kuxipayabu yusĩkĩ hau haska katushũ txanima akubaĩshanũbũ hatu yunuyabis shaba betsatiã nai anu inakainikiaki. 3Hanua ma mawabiaxina besteĩmashũ hawẽ yura kayabi ana shabakabi hatu kayatiwamakĩ hau unãtihairawanũbũ shaba 40 dia hatu uĩmakĩ haskai Deus nuku shanẽ ibushũshanaikiri hatu hãtxa wakubainikiaki.
4Hanua Jesus hawẽ kuxipayabube niyushũ hau Jerusalém anua kaĩbaĩyamayushanũbũ hatu nemakĩ yuikĩ:
—Haska Epa Deusũ matu yubani ẽ matu yuixinarã, hau matu inãkĩ yunushanũ nenua kaĩama habianushũs manayushãkãwẽ. 5Txanima Joãonẽ henewẽ dukũ hatu naximakubaĩyamaki. Hakia eãnã, habiaskari wakĩ samama duakabi Deusũ Yushĩ Pepawẽ ẽ matu naximashanaii, matu unãti wamakinã— hatu waya
Deusũ nai anu Jesus aniai hawẽ tsumabũ uĩnibukiaki, na hãtxarã
6hanushũ hatube itxabu betsã Jesus yukakĩ:
—Shanẽ Ibuũ, na habiatianã, nawabu nitxĩtã nukunabu Israelbu ana hatu pewakĩ kuxipa wai mĩ hatũ shanẽ ibui taei kai?— akabu
7Jesusũ hatu kemakĩ:
—Hatiãra ibubis hawẽ kuxipawẽ Epa Deusũ haska washanairã, matunamaki, mã unãtirubumarã. Hatũ besti unaĩkiki. 8Haska mã hawẽ unãtirurã, hawẽ Yushĩ Pepa matu anu huaya hawẽ kuxipa bitã Jerusalém anushũ inũ Judéia mai pakea inũ Samaria mai pakea ha dabe hirabi anushũ inũ txaihaira mai kesua anu hiwebaunabu anu bukubaũkĩ ekiri mã hatuki txanikũkaĩyushanaii— hatu wai 9nĩkakĩ uĩaĩbũ Jesus haskabiama nai anu Deusũ ainikĩ dũtãbainai nai kuĩ bekĩ bepukĩ huneaya ana uĩabumakẽ 10Jesus haska kaĩkĩ hatu henebainai uĩ naiuri teskãshũ uĩkĩ heneriabumakẽ huni dabe tima tari hushupa sawea damia hatu bebũ nituxitã 11hatu yuikĩ:
—Galiléia anuabuũ, haskakĩ mã naiuri uĩaĩ? Na habias Jesus matu anua nai anu Deusũ ainiairã, haskakainai mã dama uĩshu keskariai ana habiaskariakirãshanikiki, hauriarirã— hatu wabu
Jesusũ tsuma kuxipaya betsa wakĩ Matias katunibukiaki, na hãtxarã
12hanua Oliveiras Mati anua Jesusũ tsuma kuxipayabu Jerusalém anu ana txĩtũbirani quilômetro bestitxai hatishũ yununi besti anu huĩrukũtitiã katani 13haskabirani ha mae anu hikitã hanu ikabu hiwe keyatapa dĩtu merã mapekenibukiaki, Pedrorã, Joãonã, Tiagorã, Andrérã, Filiperã, Tomérã, Bartolomeurã, Mateurã, Alfeũ bake Tiagorã, Simão Zelote hatũ nawabu nitxĩkatsis imisrã, Tiagõ bake Judasrã. 14Habu haskabiranima ha dĩtu anu itxai Jesusũ betsabu inũ, hawẽ ewa Maria inũ, aĩbuaibu habũ ikũwaĩbu hatube itxashũ shaba tibi hau Deusũ hatu merabewanũ yukakubainibukiaki.
15Ha shaba tibi haskakubaĩkĩ shaba betsatiã 120 ikũwaĩbu hatube itxa maniabu Pedrõ hatu yuinũ ika benitã hatu yuikĩ:
16—Ẽ betsabu inũ ẽ puibuũ, haska bebũkiri Judaskiri Deusũ Yushĩ Pepatũ Davi yuia kenenirã, habias Judasĩ akĩ meneimaki. Haska wanikiri akĩ txanima hatũ hatu iyushũ Jesus hatu atximaimaki. 17Hamẽ Judasrã, ha dukũ Jesusũ nukube katushũ nukube daya inãriayama ikimaki. 18Haska Judasĩ txakabu xinãkĩ hawẽ Shanẽ Ibu hatu atximaxina ha pei pakabu hawẽ txakabuwẽ taeshũ bixiãwẽ taeshũ huni betsã bai ture bitã hanua Judas ibubis ikirã, manaũria maikiri besukirã tĩ iki pupeshekei puku haras iki keyutã mawanikiaki. 19Jerusalém anu hiweabũ nĩkatã ha bai kenakĩ: “Aceldamaki”, akĩ kenakinã, hatũ hãtxawẽ yuiarã: “Himi baiki”, anibu kenamisbuki. 20Txanima Salmos una merã Judaskiri Davĩ bebũkiri yuikĩ:
‘Hawẽ mae henebainaya ana tsua hanu hiweama ishanikiki’,
ani inũ:
‘Hawẽ daya henebaina huni betsã hau ibu washanũwẽ’,
aniki.
21—Haska Davĩ kenenikiri xinãnãkãwẽ. Nukubetã Jesus txibãmisbũ na hunibu nũ hatube pashkaisma Shanẽ Ibu Jesus nũ txibaĩtiã nukube ikubirãxinabu nũ hayaki. 22Joãonẽ Jesus naximai uĩtã ikũwãbiranibu inũ nai anu Jesus inai habũ uĩxinabu hau habu betsa nukuki dasitã hari hau haska Jesus mawa bestẽkainima hau nukube hakiri txanikũkaĩshanũ betsa katunãkãwẽ— Pedrõ hatu watã
23hanushũ huni dabe José Barsabás hawẽ kena betsa Justo inũ Matias katutã 24habũ eska Deus hatu yukashũkĩ:
—Shanẽ Ibu Deusuũ, dasibibũ xinã mĩ unaĩwẽ taeshũ na huni dabe pepa haratura mĩ katuai nuku uĩmawe, 25hau Judasĩ hawẽ txakabuwẽ taeshũ hawẽ kuxipa daya benutã hanu nuitapai kakẽ hau hawẽ daya kuxipa betsã binunã— atã 26unãkatsis ikĩ hawẽ unãtiwẽ katukatsi unãti watã putabu Matias unãti wabu kaĩayã ha katuabu Jesusũ 11 tsuma kuxipayabuki Matias dasitã hatube ikũkainikiaki.
Currently Selected:
Atos 1: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.