Mark 15
15
Yesu mai Judiya ahi Gavena au naona i mahiri
(Mat 27:1-2, 11-19; Luk 23:1-5; Jhn 18:28-38)
1Au maratomtom, piripirisi ghaeghaehi, babada ghehauhi, raugagayo tauvi haraharamanahi ma mai Jew ahi raugagayo babadahi anatapuhi hivi boru da Yesu me hita ghoanei. Tauhi hivi anina ma hi pani da hi amverenei Pilate awarina.
2Pilate Yesu i rau-bayadei, “Tam anina, mai Jew ahi guyau bo?” Yesu i pari-beyei, “Anina, u riwa nanaꞌarena.” 3Piripirisi ghaeghaehi Yesu ghoha maghamagha aubaina, hivi wavui. 4Pilate i rau-bayadana meyei, “ma inanai! Ghoha maghamagha aubaina hevivi wavum ma tam egha aiwaꞌi uta paripari-beyehi?” 5Yesu egha aiwai itapari beyei ma yamna aubaina Pilate i bahei.
Mai Jew hi ghohei da Yesu ina hiraghe
(Mat 27:15-38; Luk 23:13-25; Jhn 18:39–19:16)
6Mai Jew ahi vaivai da Raghona torehana au marana yamna, panipani tagogi, hevi viꞌinaghaniya ma hevivi bagheiya Pilate inavo tawanei. 7Oroto wavana Barabas yana au panipani ma tauna gabemani ahi au vighahighahiyawa, ivi hiraghena. 8Patara hi nae da Pilate hivi baghai da Raghona torehana, ma tauna maemae warihaghana ma apo ahi nuwahegoya ita kauwei. 9-10Pilate yana i haramanei da piripirisi, Yesu hi unuꞌunurei ma aubaina ma hi amverenei tauna awarina. Ma yamna aubaina da rava i rau-bayadehi, “O ghoheghohei da mai Jew ahi guyau ana votawanei bo?” 11Wate piripirisi ghaeghaehi patara hivi medihi da Pilate hivi baghai da Barabas ita votawanei ma egha Yesu.
12Pilate patara i rau-bayadehi, “Ma tauna o ghoreghoreiya, mai Jew ahi guyau, aiwaꞌi o ghoheghohei da ana ghohai awarina?” 13Hi garara ma hipa, “Ma tuparatui.” 14Ma Pilate tauhi i rau-bayadehi, “Aiwaꞌi aubaina? Aiwaꞌi apoapoena i ghohai?” Ma tauhi hi garara guraguratana, “Ma tuparatui!” 15Ma Pilat i ghohei da patara itavi nuwahubahi, yamna aubaina da Barabas ivo tawanei. Ma i riwa da Yesu hi kwapui ma i am verenei da hita tuparatui.
Ghavighaviyahi Yesu hivi diboghi
(Mat 27:27-31; Jhn 19:2-3)
16Ghavighaviyahi Yesu hi taravainanaiyei Pilate ana au numa (wavana Praetorium) ma kampa ghavighaviyahi ghehauhi maitehi hivi tagogiyehi. 17Ma gara vikabekaberona#15:17 pona English purple [me guyaguyau ahi gara], hivi oteni ma kunuteiya eyagi donadonana au koyana hi terei. 18Ma we nanaꞌarena hivivi diboghi, “Ona inanai mai Jew ahi guyau!” 19Kwapuweꞌi koyana hivi rau-rauwei, hi hovahovai, aetutuhi hi tapegharowei ma hivo hepahepa morumoruwei. 20Maranaina hivi dibogha vorovei, gara vikabekaberona hivo tawanei ma ana gara ohohina hivi otena meyei ma tuparatuna aubaina, hi taravainanaiyei.
Yesu hi tuparatui
(Mat 27:32-44; Luk 23:26-43; Jhn 19:17-37)
21Simon tauna Sairiniyei (Alexander ma Rufus amahi) dobu ghehauwei inenei ma au etanai hi tuhaghai. Mai Rome ahi tauvi ghaviya, hi hegaradubadubari da Yesu ana korosi ita avarai. 22Yesu hi taravainanaiyei au Golgota. (Golgota anona yamna unu gabuna) 23Kampa wine, bunama megh#15:23 Wine megh (English myrrh) viravirana yamna opi viyara bunama. maiteni hivi raviraiya hi verei da ita umai ma Yesu i geduaiyei. 24Ma kampa Yesu hi tuparatui ma ana gara hivi kasiyei#15:24 Kasi wavana dice hivi kasiyei da yamnei ana gara hi vainihi.
25Madegha i tugheꞌetai me 9 koroki ma Yesu hi tuparatui. 26Ahi Viwavu riwana, we nanaꞌarena, hi girumi, “Mai Jew ahi Guyau.” 27-28Tau danedanene ruwagha maitehi hi tuparatuhi, tagogi au ahuohohinei ma ghehauna au ahukehakehanei#15:27-28 Giruma wadubohi au horana e ririwa da eghana 28 maiteni hi girumi: Ma aiwaꞌi hi tuhaghai da riwa peroveta aubaihi da i riwa, “Hi notai da tauna maiteni ghoha apoꞌapoe taughohaina.” (Isa 53:12)
29Rava ghehauhi hi veverauvirei ma hivi unukwadikwadi ma hi paripari-vaiapoapoeni, hipa, “Ha! Da! Tam u riwa da numa taparoro uta goruhi ma madegha tonugha au horana uta vowameyei 30mavi yawahana meyem ma ma hopui!”
31Piripirisi ahi babada ma raugagayo tauvi haraharamanahi we nanaꞌarena tauna hivivi diboghi, “Rava ghehauhi ivi yawahanihi ma egha tagotagogina da tauna inavi yawahana meyei. 32Korosiyei ita hopui da tata inanai ma tata vitumaghanei da tauna God ana vinevine, mai Israel ahi guyau.” Tauhi ruwagha Yesu maiteni hi tupatuparatuiya maitehi hivi diboghi.
Yesu i hiraghe
(Mat 27:45-56; Luk 23:44-49; Jhn 19:28-30)
33Ahubena au kayakayana ma dobuna ghaeghaenana i ravigimtonai ma nanaꞌarena i maꞌae da au hegoya, me 3 koroki nanaꞌarena. 34Au hegoya ma Yesu ponana ghaeghaenei i garara, “Eloi! Eloi! Lama sabatani?” Riwana anona yamna, “Aꞌu God, Aꞌu God aiwaꞌi aubaina u votereu.”#15:34 Psalm 22;1 35Taumahiri, hi nonora boꞌai ma hipa “Tauna Elijah e ghoreghorei.” 36Oroto tagogi i ruba da ani rauogha i vaini ma wain#15:36 Psalm 69:21 Riwa e maꞌamaꞌe da Keriso/God ana vinevine yana waira viꞌivohirahiragheni hina verei. viꞌivohirahiraghena awarina ivi gayoi, eyagi au mutuna i avehi ma ivi yoyoi da Yesu ita uma. Tauna maiteni ipa, “Tana vipaipai mepa da Elijah ina nei ma ina terehopunei tana inanai.” 37Yesu, ponana ghaeghaenei i garara ma i hiraghe. 38Gara numa taparoro au horana gabu au viyouyou ateꞌatena ani rughagharana, i wanatevai au tepana da au gabaurina da i rau-ruwaghei. 39Tauvi ghaviya ahi bada ghehauna korosi au naona i mahimahiri i inanai da Yesu me i hiraghenei ma ipa, “Riwa kauwa, weꞌi orotona anina God natuna.” 40Waivine ghehauhi au ririva hi mahiri ma hivi neneghana. Ma kampa taumahiri au horahi yamna Mary Magdalene, Mary James haburuna ma Joses#15:40 Au Matthew, Matthew Joseph i girumi ma egha Joses ayohi ma Salome. 41We waivinehi yana au Galili Yesu hivo votaghonaiyei ma hivo vohagui. Waivine ghehauhi, au Jerusalem Yesu hivo votaghonaiyei, yamna maitehi kampa.
Joseph Arimatiyei Yesu Tupuwana Au Kokowaga i terei
(Mat 27:57-61; Luk 23:50-56; Jhn 19:38-42)
42Paraide yana mai Jew ahi vokaukauwa marana, (au ibigabiga)#15:42 Jew ravahi ahi viyawahi yana Friday au bigaina evivi kareni ma Saturday au bigaina e kwahakwaha. Vokaukauwana au madeghana ma au ibigabiga 43yamna aubaina Joseph tauna Arimatheayei ma boru badana ghehauna, wate tauna God ana vibadana ivi paipaiyei. Tauna tepatorei i nae ma Pilate ivi baghai Yesu tupuwana ita vaini aubaina. 44Pilate Yesu hiraghena riwana i nonori ma egha itavi tumaghanei. Yamna aubaina da tauvi ghaviya badana, i ghorei ma i rau-bayadei da Yesu i hiraghe bo eꞌegha. 45Maranaina Pilate, Yesu hiraghena riwa kauwana i nonori, yana Joseph ivi aninei da Yesu tupuwana ita vaini. 46Anina ma Joseph gara araꞌarapoirina vouna i gimarai, Yesu tupuwana ivo tawanei, i humai ma au kokowaga me guba, kira au horana i gharagharaiyana kampa hivi enoi. Ma ghaꞌima ghaeghaena hivi toutouviranaiyei da metaeta hi rau-tomeni. 47Mary Magdalene ma Joses ayona Mary hi inanai mepa Yesu hivi enoi.
Currently Selected:
Mark 15: WEDT
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved