Genesis 3
3
Iñuk Kamaksriŋiñman
1 #
Rev 12.9; 20.2. Nimiġiagguuq pisaasuġniqsrauŋaruq niġrun Atanġum God-auruam savaaġiŋaraŋiññiñ. Nimiġiam apiġigaa aġnaq, “God-im tavra uqallautipiaqpatin niġitquŋił̣ł̣utin nallipayaaŋanniñ napaaqtut nautchiaqagvigmi?”
2“Niġiyumiñaqtuguk siiġñaŋiñiñ nallipayaaŋisa napaaqtut nautchiaqaġvigmi,” aġnam kiugaa, 3“aglaan napaaqtumiñ qitqaniittuamiñ. God-im uqallautiŋagaatiguk niġitquŋił̣ł̣unuk siiġñaŋanik, aksiquŋitkaa unnii; niġituaġumnugguuq, tuquniaqtuguk.”
4Nimiġiam kiugaa, “Taamna iḷumun inŋitchuq; tuquniaŋitchusik. 5God uqallaŋaruq tainna qanukkii iḷisimaruq niġiguvsik irrasik agmaġniaqtut, aasii iḷiñiaqtusik God-itun iḷisimallasiḷusik nakuuruamiglu nakuuŋitchuamiglu.”
6Aġnam tautuŋagaa qanutun qiñiyunaqtilaaŋa napaaqtuq qanutullu siiġñaŋich nakuuniaqtilaaŋich niġiruni, suli isumaŋaruq aliuġnaqtuaguniaqtilaaŋa isumaturuaġuġumik. Tavraasii tigusivḷuni siiġñamik iḷaŋa niġiŋagaa. Aitchuqługuasii iḷaŋanik uiñi, piqatigirani, aasii uiŋata niġimmigaa. 7Niġianigluqqaaqtumiŋ, kaŋiqsimmatiniŋaruk iḷitchuġivlutiglu annuġaisilaamignik; tavraasii miquŋagaich akutuqpaŋich fig-gich atautchimun aasii taluvlutik ilimignun.
8Tavra tusaagaak Ataniq God pisuaqtuaq nautchiaqaġvigmi anaqamman aasii iriŋaruk akunġannun napaaqtut. 9Aglaan Atanġum God-im ququulagaa aŋun, “Sumiitpich?”
10Aŋutim kiugaa, “Tusaaraqpiñ nautchiaqaġvigmi; aasii iqsitchakłuŋa iriqtuaŋa iliŋniñ, qanukkii annuġaitchuŋa.”
11“Kia uqallautivatin annuġaiññivḷutin?” God-im apiġigaa. “Niġiran siiġñaq niġitquŋitchaġa?”
12Aŋutim kiugaa, “Aġnam qaisaqpich itqatigitquvluŋa aitchuqtaani siiġñamik, aasii niġiraġa.”
13 #
2 Co 11.3; 1 Ti 2.14. Atanġum God-auruam apiġigaa aġnaq, “Summan tainna piruatin?”
Aġnam kiugaa, “Nimiġiam pisaasuġmiaġunmigun sagluqivluŋa niġipkaġaaŋa.”
God-im Quliaġaa Isivġiun
14Atanġum God-im uqallautigaa nimiġiaq, “Tatavsaqtauniaqtutin taaptumuuna; kisivitualuk niġrutipayaaniñ igḷutuqtaksraġigiñ una tatavsaun: Tavraŋŋaaglaan paamġuġniaqtutin narraaġniñ, aasii niġiruksrauniaqtutin avyumik iñuuniqtutilaaqtun. 15#Rev 12.17.Uumikkutigiiksinniaġivsik aġnaġlu; iluqasik kiŋuvaasik uumikkutigiiguuniaqtut. Kiŋuvaaŋata karugniaġaa niaqqun, aasiiḷi kiŋuvaaqpich kiiñiaġaa kimmiŋa.”
16Aasiiḷi uqallaktuq aġnamun, “Agliḷaaġniaġiga siġġaġniuġniksran siŋaiyauguvich suli anniġñaġniksran iġñiguvich. Tainnaitkaluaqtillugu, nakuaġilugu pigisugniaġisuli uigiran, aglaan ilaan atanniqsuġniaġaatin.”
17 #
He 6.8. Aasii uqallaktuq aŋunmun, “Naalaġnivḷugu tuvaaqatin niġiŋagiñ siiġñaq niġitquŋisaġa. Taamna savaan pisigilugu, nuna piaġiiḷiñiaqtuq. Siġġaqilutin savaktuksrauniaqtutin iñuuniqtutilaaġni naupkaiñiaġlutin naamasisaġlugu niqiksran. 18Nauniaqtut kakiḷḷaġnaqtuat, aasii niġiruksrauniaqtutin nauruanik nunami. 19Siġġaqilutillu siiqsipkaġlutillu nauripkaġniatagniaġiñ nuna, utiġataġniġnun nunamun savaaguvigñun. Piḷiaguŋarutin nunaġruiññaġmiñ, tavra aasii nunaġutqigñiaġmiutin.”
20Adam-gum atchiŋagaa tuvaaqatini Eve-mik, qanukkii aakauruq iluqaiññun iñuuruaguruanun.#3.20 Adam-gum sivuniŋa “iñuich” Eve-guvli sivuniŋa “iñuggun” Hebrew-t uqaluŋanni. 21Tavragguuq Ataniq God annuġaaliuŋaruq niġrutit amiŋiññik Adam-mullu tuvaaqataanullu, aasii annuġaaqługik.
Adam-lu Eve-lu Aullaqtitauruk Nautchiaqaġvigmiñ
22 #
Rev 22.14. Tavraasii Ataniq God uqallaktuq, “Tavra ukuak iññuk iḷiruk uvaptiktun suli iḷisimmatiniktuk suna nakuutilaaŋanik naakka nakuuŋisilaaŋanik. Niġiruksrauŋiñmiuk napaaqtumiñ qaitchiḷḷaruamiñ iñuggunmik, aasii iñuulutik isuitchuamun.” 23Tavraasii Atanġum God-auruam aninŋagaik Nautchiaqaġvigmiñ Eden-mi nautchirriitquvlugik nunamik iliŋiksa iñuguqtitauviagniñ. 24Kivaliñġanun nautchiaqaġvium qaunaksriḷiŋaruq cherubim-nik ikualaruamiglu savikpagmik saatqataaqtuamik suŋnamulliqaa. Tavra taaptuma kiñaliqaa qallipkaġniaŋitkaa napaaqtumun qaitchiḷḷaruamun iñuggunmik.
Currently Selected:
Genesis 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)