JOHAN 21
21
Kenieme Hangsename dage Isua Liâbe
1Chipau chângge Tiberias sungkling taige kenieme dage pe runne Isua liâ kadai de lei; zai aigum ze pa lia de lei. 2Simon Peterbe, ’Mpinlungbe ze kûpeu Thomasbe, Nathanaelbe, chi Galili ge Kana keloa’mpeu, Zebedaibe name zai pe gu kenieme kêdame hangna penui bâm kat ge herua ze bam lei. 3Simon Peterbe ne penui je, “Hekâ nîm ra I tat tu lei,” kacheu de lei. Penui ne pechu, “Anui du ning dage tat ku lei,” kacheu de lei. Penui pat lu, ’nnei ge gut kai di de lei; kane chipau mai tingmuî ge penui mâ de nîmpat mak lei. 4Tingbapatgap dege, Isua depûloa ge saplaleu de lei; leusede Isua lei be kenieme â chî mak lei. 5Isua ne penui je, “Hename ramme gau, ningnui dage hekâ nungge â la mei?” kacheu de lei. Penui ne pechu kak ze, “Ga lei,” kacheu de lei. 6Zai pa ne penui je, “Nnei hezat’mbia chiâk keliam gai lau, dezai ningnui gêsa chui gu lei,” kacheu de lei. Dadege penui keliam gai ze, hekâ misongga chuibe ziegene chiâk ze penui zupat lak ti de lei. 7Chi kenie’mpeu Isua ne hungpeu zene Peterbe je, “Chize Heguang de lei!” kacheu de lei. Heguang lei be Simon Peterbe seu lu dege, mechua pa kai de lei, pa â tâtew ze pe pumrua bam di dadegeu, zai sungkling ge ’nsiamkeu gai de lei. 8Kane kenieme kêdame â ’nnei gene pat ze, chîak ze hekâ ramme ne puigit bambe ze zukakereu de lei, ’nneigiam gene deu makse sâu haî na gumbe ge penui bam dadegeu.
9’Nneigiam penui patchang dege, chige hegeikâng ne hemitewheigiegaibe peireige hekâ benai tingku ’ngkinggaibe penui ngau de lei. 10Isua ne penui je, “Ningnui hekâ chuna nîmlube gene gêsa teiwang lau,” kacheu de lei. 11Chidadege Simon Peterbe ne ’nnei ’mbe tat ti ze, hekâ kedibe ramme, haî kat ze rengeu ze kechum chiâk ge puigit ze ’nneigiam zukereupat kai de lei; misongga bam sedu chiâk ze ri mak lei. 12Isua ne penui je, “Wang ze hechua teseu teu zu lau,” kacheu de lei. Chunage kenieme ruagene pechu, “Nang châu lau?” ze ’nneukiaku mak lei. Chize Heguang lei be penui chî lei. 13Isua wang lu, tingku lu lu ze, penui je pei de lei, zai chigum hekâ ze du pei de lei. 14Chaidime ruagene pechu kuakchudailube chângge kenieme dage Isua liâgaibe aize lua pakechumbe de lei.
Isua benai Peterbe
15Hechua teseu penui teu lu dege, Isua ne Simon Peterbe je, “Johanbe na Simonbai, airamme je suadu nang achu hung mei?” kacheu de lei. Pa ne pechu, “Eu lei, Heguang gau; I ne ningchu hung lei be nang chî lei,” kacheu de lei. Pa ne pechu, “A gu meilipoine ramme je guî lau,” kacheu de lei. 16Pakenabe ge pa ne pechu, “Johanbe na Simonbai, nang achu hung mei?” kacheu de lei. Pa ne pechu, “Eu lei, Heguang gau, I ne ningchu hung lei be nang chî lei,” kacheu de lei. Pa ne, pechu, “A gu meli ramme je reî lau,” kacheu de lei. 17Pakechumbe ge pa ne pechu, “Johanbe na Simonbai, nang achu hung mei?” kacheu de lei. Peterbe â pechu lua pakechumbe ge “Nang achu hung mei?” acheubeibe ziegene pe lunghereu di de lei. Dadege pa ne pechu, “Heguang gau, nang ne getaleine chî kam lei; I ne ningchu hung lei be nang chî lei,” acheu bei de lei. Isua ne pechu, “A gu meli ramme je guî lau. 18Pelingsing, pelingsing ze ningchu I rang lei, nang hena’ngka ge â ning runne ning kia ’ngkang gai lu, nang tatnei-neibe ge tatrua de lei; kane nang chîng dezai ning ba kena nang getuapat ku lei, zai miramme ne ningchu ret lu ze nang tatneimakbe bâm ge ningchu puatat kai gu lei,” ze kacheu de lei. 19(Aize ’ndaigumbe chit gene pa chai ze Hera ngeu-tew’ndi ra mei be teilia ra pa sa de lei.) Zai aipau chângge, pa ne pechu, “A chai sui lau,” kacheu de lei.
Isua benai Kenie’mpeu Kêdapeu
20Peterbe ’nrei wang dege, Isua ne hungbe kenie’mpeu, chi muîteseu teube luage Isua ga ge ’mbeî lu sa ze, “Heguang gau, ningchu zuarapeu ze châu lau?” kacheupeu, penai chai suitatbambe ngau de lei. 21Peterbe ne chipaupeu je ngau lu dege, pa ne Isua je, “Heguang gau, aipaupeu deu ge ’ndaigum ra lau?” kacheu de lei. 22Isua ne pechu, “I wang mak tâne pa bam bam ra I ne nei dizai â, chize nang ’ndaitew ra lau? Nang â a chai sui lau,” acheu bei de lei. 23Chidadege mipuiname ruage, aipau kenie’mpeu â chai ra mak lei be sa-batat ti de lei; kane pa chai ra mak lei be Isua ne pechu salia me lei, kane I wang dai mak tâne pa bam bam ra I ne nei dizai â chize nang ’ndaikautew ra lau? ze kacheube lei.
24Ai kenie’mpeu zene airamme sakkitew gai ze pa ne airamme raw gai de lei; zai pa sakkitewgaibe sam â peling lei be anui chî lei.
Samkamgaibe
25Zai Isua ne tâ kêdabe zat ramme tewgaibe du misongga la lei; chiramme ze raw kam ra dizaine â, rawgairabe leisikuak ne du kedeirei ge kaigut kam lak ku lei be I ’nnum gai lei.
Currently Selected:
JOHAN 21: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.