Ranehlö 7
7
Ṙanööi-ngö
1Ngaich ngöṙô ngam Mā Tēv tö Nō-a, Keuhēthötre man ël ngam chōng tö yip aṅ patī meh inrē nö ṙòkhöre; tön meūkö meh Chin chiplö ikūö Chu i ngih tumköl chap. 2Kēḵ pömchö inup tölöök töfënö kalröön nö sat, sat nòng; tö kōiny tö kan ò inrē; aṅ inup töfënö kalröön nup töthet nët nòng, tö kōiny tö kan ò inrē; 3Inup chehechōn inrē el kuföt, sat, sat nòng, kōiny kan inrē: nö haköp nup kūön nö aṅ ikūö ngam tumlat nö ṙòkhöre. 4Tön sattöre nup sakāmö, ngaich Chū-ö min vīten e nö kumṙah ikui ngam tumlat, fën anāi sakāmö, fën anāi hatööm inrē; keuheūtngöre tö-aṅ chehen min nö piyāyi nö ṙā-ang ikūö ngam tumlat nup vahī Chu. 5Ngaich Nō-a nö asā nup taṙòkhöre tinöölô ò töngam Mā Tēv.
6Tafūölòng samyeūheu ṙēti Nō-a nö köiny hē ngam ṙanöingö aṅ minë mak nö ikui ngam tumlat. 7Kuhēthötre ngaich Nō-a, yik kūön ò inrē nyīö kikōnyö, ök pīhö ò, töyik pīhö yik kūön ò nyīö kikōnyö hol ò, nö ël ök chōng, kūö minë mak ngam ṙanöingö. 8Aṅ inup töhet töfënö kalröön, ane inrē aṅ inup töthet töfënö kalröön, aṅ inup chehechōn, aṅ inup chëhen töṙeūla inrē tökeuheūttöre, 9Nët nët nòng nuk kumhëthötre nö in Nō-a nö ël ök chōng, kōiny kan inrē, sā ṙô ngam Tēv nö tölṙô Nō-a. 10Chalô ngaich tö e unôichrit tö sat sakāmö tö minë mak ṙanöingö nö ngaich nö ikui ngam tumlat.
11Im tinfūölòng samyeūheu nômö Nō-a, im innët chumngëṅtö, im sinatsīön sakāmö ngam chingëṅt, im sakāmö angū-ö; ṙòkhöre nuk töhëmlö mak aṅ im tö-aṙū nö lakukköinykūö, minë inkūp ngam halīöngö inrē nö löpnyukūö. 12Ngaich ngam kumṙah nö ikui ngam tumlat fën anāi sakāmö fën anāi hatööm inrē. 13Hē ngam sakāmö angū-ö ang Nō-a, nö yôklö, Sem, Hem, Yafet inrē, yik nyīö kikōnyö kūön Nō-a, tök pīhö Nō-a, töyik tö lūöi tak pīhö yik nyīö kikōnyö in cha, nö ël ök chōng; 14Chā-a, keuheūtlöre töfënö kalröön kö i mihëṙöre, ṙòkhöre nuā, kö i mihëṙöre, keuheūtlöre töṙeula chehen nup ikūö ngam tumlat ṙameūla, keuheūtlöre chehechōn kö i mihëṙöre, keuheūttör mihëṙö nup tösanëòku chehechōn. 15Ngaich anū-ö nö kuhēthötre nö in Nō-a nö ël ök chōng, nët nòng nö ṙòkhöre, tö-alahav tö-aṅhav-in tö unhôṅmö. 16Ngaich anū-ö nuk kumhēthötre, kōiny kan inrē nö kuhēthötre, aṅ inup taṙòkhöre tö-alahav sā ṙô ngam Tēv nö tölṙô ò: ngaich öpngökūö ò ngam Mā Tēv.
17Ngaich ngam ṙanöingö nö fën anāi sakāmö nö ikui ngam tumlat; ṙūöhölre ṙôken ngam mak, ngaich hatöhlö ök chōng, kachöötlöng ngaich angā-aṅ nö i ngam tumlat. 18Mihôiṅ ngaich minë mak, ṙūöhölre ngaich nö kiröngen nö ikuö ngam tumlat; ngaich ök chōng nö kiröönngöre nö ikui minë mak. 19Ngaich minë mak nö yahlö nö mihôiṅ nö ikui ngam tumlat; ngaich ṙòkhöre nup tömarô-òlkui rôngö keuheūtngöre elkatòh ngam halīöngö nö kahūli. 20Saṙaklöngkūö tö tö taneuisīön mikëlö minë mak nö mihôiṅ; kahūli ngaich nuk rôngö. 21Kapah nuk alaha ngaich nö ṙòkhöre nuk mahalöinyköre nö ikūö ngam tumlat, hĕnghöre chehechōn nuā, töfënö kalröön, keuheūtngöre töṙeūla chehen nup ṙameūla nö ikui ngam tumlat, keuheūtngöre inrē tarik: 22Ṙòkhöre nup tö-aṅhav elmeh tö unhôṅmö aṅ im mā-alaha ṙòkhöre nuk el tanyô nö kapah. 23Keuheūtngöre inrē nuk tö-aṅ chehen nö pisū-uyö nuk mī-ikūö ngam tumlat, hĕnghöre tarik, nuā, töṙeūla chehen inrē, chehechōn ël ngam halīöngö inrē; pisū-uyö anū-ö nö ṙā-ang im tumlat: ngaich höng Nō-a tö ṙa-ai, chā-a inrē yik hol ò nö ël ök chōng. 24Mihôiṅ ngaich minë mak nö ikūö ngam tumlat, hēngòng taneui anāi sakāmö.
Currently Selected:
Ranehlö 7: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.