INLAHEN 3
3
Lööken Ök Tökaròk Tarik
1Ngaich nāṅ Pītör, nāṅ Yôhan, nö chuh el ngam töhet chūök, hē el ṙētak vine-eṅkūötēv, i tö lūöi köṅny ṙô. 2Ngaich hĕng taka ök umuh tarik tökeuntu, tökaròk ök nö ṙā-ang ellōn yöngre, ök töṙātu nö i kūö inkūp ngam töhet chūök; öp Tövai ngö invëka; nö havëkökūö yip kumhēthötre nö el ngam töhet chūök. 3Ngaich meūkö nāṅ Pītör anga-aṅ, nāṅ Yôhan, nö ṙòngmö kuhēthötre nö ël ngam töhet chūök; ngaich havëkökūö cha. 4Ngaich Pītör nö haköpmatre nö in ò, Yôhan inrē, ngaich ngö ṙô, Ngëichkökūö ai. 5Ngaich ngam tarik nö hangihtöre, meukkenre nö teūngen nö in cha. 6Ngö ṙô pöri Pītör, Öt īnu chin tö rupīö, humlum inrē; kē-ĕkūö meh pöri chū-ö töp mī-in chu. Choholre man, kiröönngöre i Mine-eny Yēsū Kristū, ngam aṅ Nāsaret. 7Ngaich kēḵ ök lāhāmö anga-aṅ kël ò; ngaich hachohlen ò. Ilööṙen ngaich nuk kalröön ök tarik, tö nuk linkölngö ò inrē, nö ngëḵ. 8Ngaich tisòklöre anga-aṅ, söklöre, ngaich kiröönngöre. Ngaich kuhēthötre nö hol cha, nö ël ngam töhet chūök; kiröönngöre, tisôköre inrē, nö ha-öiny ngam Tēv. 9Ṙòkhöre yik tarik nö meūkan nö kiröönngöre, nö ha-öiny ngam Tēv. 10Ngaich akahakūö cha-a tö ò nö amūichhak sin nö i kūö öp Tövai Inkūp ngam töhet chūök, nö havë-a; ngaich cha-a nö uṙeh, pingangkūö inrē, tö inlahen ò nö ngaich.
Ṙô Pītör Nö-el Ök Töhet Chūök
11Ngaich haköpngöre anga-aṅ nö in nā Pītör, nāṅ Yôhan; ngaich ṙòkhöre yik tarik nö faltöre nö in cha, nö ël ök rittūi, ök tö Sòlòmön invëka, nö pōi pinngangkūö 12Ngaich hē Pītör nö meūkö e, ngaich ngö ṙô anga-aṅ tö yik tarik, Yī-ö tarik aṅ Israĕl, kūöyòh öi pingangkūö i ngòh tarik? Kūöyòh öi inrē haköpmatre tö ai, ai sā mī-ip kanô-òṅre, lanöököre inrē, ai tī-iv tö ngòh tarik nö kiröönngöre? 13Ngam Tēv Aprahām, Tēv Isak, Tēv Yāköp, Tēv yik muvöhngö hī inrē, nö hapōilö ngam Kūönre Yēsū, ngam tö kē-ĕyö tö yīö, ngaich mahayö nö i kūö Pailĕt, hē ò nö ṙāngen Ò lang. 14Ngaich pöri yī-ö mahngen ngam Töhet, ngam Tölöök inrē; ngaich havëkö ök famël tarik nö kētu nö in yīö. 15Ngaich fëlngö ngam löknnyö nômö, ngam tö hachohlöng nö ngaich tö ngam Tēv; ihö in ṙòkhöre mameūkö e. 16Ngaich lökten imikah im mine-eny ò nö ngëḵ ngòh tarik, ngòh maheuṅk yīö töngamuh, mikahlōn yīö inrē. Ngam mikah lamökten in Ò, kamëtö lanööken ò takô, nö i kūö yīö ṙòkhöre.
17Kahōlö; akahalōn chin tö yīö, kūö ötmikahre, öi ngatī la-en; ngatī inrē yip mākūö yīö. 18Ngaich ngam Tēv nö ngatī nö hateungngö ngam hameuktö Ò nö lā-urĕh, nö löktö elvāng yik pròfĕt, tö ngam Kristū Ò nö tökihngen. 19Lökten yin havöötö ellōnre, havantöre inrē; hòṅ nup tökööl yīö nö sīchiyö, hòn ṙāngö i kūö ngam Mā Tēv nö yih öp ṙētak munfōvö. 20Hòṅ Ò nö tīnten Kristū, ngam hachöngten Ò tö pòkūö yīö, Ang Yēsū, 21Ngam kahëḵ ngam halīöngö, hanöng saha inlööktö nup taṙòkhöre, nup ṙô ngam Tēv, nö löktö elvāng yik töhet pròfĕt Ò, hēten tö ranehlö ngih panam. 22Ngö ṙô inrē Môsös, Hĕng taka öp min pròfĕt vahīlö ngam Mā Tēv nö in yīö, aṅ i yip hol yīö, tö sā chu. Anga-aṅ min ahang ṙô yīö, i nup taṙòkhöre, töng ṙô Ò min tö yīö. 23Ngaich ngòh töthamang ṙô öp pròfĕt min, fëli mīnö nö ṙā-ang i yip tarik. 24Ṙòkhöre yip pròfĕt, löktökūö in Samuĕl, söl i yik mū-unôich inrē, i tum tak ṙô yik tö ṙô-òv; ahangkö inlahen në sakāmö, cha-a. 25Yī-ö yin, kūön yik pròfĕt, kūön ngam kinlēḵngô ngam Tēv inrē, nö i yik muvöhngö yīö, nö ngö ṙô tö Aprahām, Ip kūön meh yin min nö kôlò, vē taṙòkhöre aṅ ngih panam. 26Pò ngam Tēv nö vīlö ngam Kūönre, ngaich tīnten Ò nö urĕh nö in yīö, nö hakôlò yīö nö havööngökūö yīö, ṙā-ang i nup tökööl yīö.
Currently Selected:
INLAHEN 3: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.