Ticuna - 1986 WBT (NT) Drama

Rü yemawena ga Ngechuchu rü Gariréaanewa yexmagüne ga ĩanegügu nixũãgüchigü. Rü tama Yudéaanewa nayexmachaü̃ yerü yémacüã̱x ga Yudíugüarü ãẽ̱xgacügü rü naxca̱x nadaugü nax yama̱xgüãxü̃ca̱x.
Natürü marü ningaica ga yema Yudíugüarü peta ga Düxenügüarü Petagu naxãégaxü̃ ga nagu norü düxenügü yaxǘgüxü̃.
Rü yemaca̱x ga naenexẽgü ga Ngechuchu rü ñanagürügü nüxü̃: —Tama name i nuxã Gariréaanegu curüxã̱ũ̱x. Rü name nixĩ i petaca̱x Yudéaanewa cuxũ, nax ngẽma duü̃xü̃gü i cuwe rüxĩxü̃ i ngéma ngẽxmagüxü̃ nüxü̃ daugüxü̃ca̱x i ngẽma cua̱xruü̃gü i mexü̃gü i Tupanaarü poramaxã cuxüxü̃.
Erü ngẽxguma chi wüxi ya yatü rü duü̃xü̃güxü̃ nügü nacua̱xẽẽchaü̃gu rü tama cúãcü nanaxü i ta̱xacü i naxüxü̃. Rü ñu̱xma nax cunaxüxü̃ i muxü̃ma i mexü̃gü i Tupanaarü poramaxã cuxüxü̃, rü name nixĩ i guxü̃ i duü̃xü̃güpe̱xewa cunaxü —﻿ñanagürügü.
Rü yema ñanagürügü ga naenexẽgü yerü woo ga nümagü rü ta tama nüxü̃́ nayaxõgü.
Rü yexguma ga Ngechuchu rü nanangãxü̃, rü ñanagürü nüxü̃: —Tauta nawa nangu i ora nax ngẽma petawa chaxũxü̃. Natürü pexca̱x rü ngexü̃rüüxü̃mare i ora nixĩ i mexü̃ nax ngéma pexĩxü̃.
Ngẽma duü̃xü̃gü i ñoma i naanecüã̱x rü tama pexchi naxaie. Natürü chauxchi naxaie erü chanango̱xẽxẽ nax nachixexü̃ i ngẽma naxügüxü̃.
Name nixĩ i ngẽma petawa pexĩ i pemax. Natürü i chomax, rü tauta ngéma chaxũ erü tauta nawa nangu i ora i nagu ngéma chaxũxü̃ —﻿ñanagürü ga Ngechuchu.
Rü yexguma yema ñaxguwena, rü Gariréaanegu narüxã̱ũ̱x.

Natürü nawena ga naenexẽgü nax petawa naxĩxü̃, rü Ngechuchu rü cúãcü yéma naxũ. Rü tama duü̃xü̃güxü̃ nügü nadauxẽxẽ.
Rü yema Yudíugüarü ãẽ̱xgacügü rü Ngechuchuca̱x nadaugü ga yema petawa, rü ñanagürügü: —¿Ngextá nangẽxma i ngẽma yatü? —﻿ñanagürügü.
Rü yema duü̃xü̃gü ga yéma yexmagüxü̃, rü nügütanüwa poraãcü Ngechuchuchiga nidexagü. Rü ñuxre ga yema duü̃xü̃gü rü ñanagürügü: —Yimá rü wüxi ya yatü ya mecü nixĩ —﻿ñanagürügü. Natürü ga togü rü ñanagürügü: —Ngẽma yatü rü tama name erü duü̃xü̃güxü̃ nawomüxẽxẽ —﻿ñanagürügü.
Natürü taxuxü̃ma ga duü̃xü̃gü rü mea togüpe̱xewa Ngechuchuxü̃ nicua̱xüü̃güchaü̃, yerü yema Yudíugüarü ãẽ̱xgacügüxü̃ namuü̃e.
Rü yexguma marü yema petaarü ngãxü̃wa nanguxgu, rü Ngechuchu rü Tupanapata ga taxü̃negu naxücu. Rü inanaxügü nax nangu̱xẽẽtaexü̃.
Rü yema Yudíugüarü ãẽ̱xgacügü, rü naba̱i̱xãchie namaxã ga yema ore ga Ngechuchu nüxü̃ ixuxü̃. Rü ñanagürügü: —¿Ñuxãcü i ngẽmaãcü poraãcü nüxü̃ nacuáxü̃, rü taguma ngextá nangu̱x? —﻿ñanagürügü.
Rü Ngechuchu nanangãxü̃ rü ñanagürü nüxü̃: —Ñaa chorü ngu̱xẽẽtae rü tama choxrü nixĩ, erü Chaunatü ya núma choxü̃ mucüarü nixĩ.
Ngẽxguma texé naxüxchaü̃gu i Tupanaarü ngúchaü̃ rü tá nüxü̃ tacua̱x rü aixcüma Tupanaxü̃tawa chanayaxu i ngẽma chorü ngu̱xẽẽtae rü ẽ̱xna chaugüxü̃tawatama chanayaxu i ngẽma.
Yíxema tügütama ixuchigaxe rü naxca̱x tadau nax duü̃xü̃gü tüxü̃ icua̱xüü̃güxü̃. Natürü yíxema naxca̱x dauxe nax nüxü̃ ticua̱xüxü̃ ya yimá tüxü̃ mucü, rü aixcüma nixĩ i tümaarü ore. Rü tama dora nixĩ i ngẽma nüxü̃ tixuxü̃.
¿Tama ẽ̱xna aixcüma yixĩxü̃ ga Tupanaarü mugü ga Moiché pexna ãxü̃? Natürü taxúema i pema naga pexĩnüe i ngẽma mugü. ¿Rü ñu̱xma rü tü̱xcüü̃ nixĩ i choxü̃ pima̱xgüchaü̃xü̃? —﻿ñanagürü.
Rü yema duü̃xü̃gü nanangãxü̃gü, rü ñanagürügü: —Cuma rü ngo̱xo cuwa nangẽxmamare. ¿Ẽ̱xna texé cuxü̃ tima̱xgüchaü̃? —﻿ñanagürügü.
Natürü ga Ngechuchu rü ñanagürü nüxü̃: —Choma rü ngü̃xchigaarü ngunexü̃gu chanamexẽxẽ ga wüxi ga yatü. Rü guxãma i pemax rü penuãẽgü naxca̱x ga yema wüxitama ga mexü̃ ga ngü̃xchigaarü ngunexü̃gu chaxüxü̃.
Natürü i pemax, rü tama nagu pexĩ ga Moichéarü mugü, erü ngü̃xchigaarü ngunexü̃gu pepuracüe. Rü Moiché pemaxã nüxü̃ nixu nax tüxü̃ ípewíecha̱xmüü̃pe̱xechiraü̃xü̃ ya guxãma ya yatüxe ya buxe. (Natürü tama Moiché nixĩ ga inaxügücü ga yema, yerü nũxcümaü̃güxü̃ ga perü o̱xigüwa nixĩ ga ne naxũxü̃.) Rü ñu̱xmax i pemax, rü tüxü̃ ípewiecha̱xmüü̃pe̱xechiraü̃ ya guxãma ya buxe ya yatüxe woo ngü̃xchigaarü ngunexü̃ yixĩxgu.
Rü ngẽmaãcü i pemax rü ngü̃xchigaarü ngunexü̃gu buxexü̃ ípewiecha̱xmüü̃pe̱xechiraü̃ erü naga pexĩnüechaü̃ i Moichéarü mugü. ¿Rü ñu̱xma rü tü̱xcüü̃ yixĩxü̃ i chomaxã penuexü̃ naxca̱x nax ngü̃xchigaarü ngunexü̃gu chanamexẽẽxü̃ i wüxi ya yatü ya ida̱xawecü?
Rü ngẽmaca̱x tama name i tama nüxü̃ pecua̱xãcüma penangugümare i ngẽma chaxüxü̃. Rü penaxwa̱xe i mea nagu perüxĩnüeãcü aixcüma mea penangugü —﻿ñanagürü ga Ngechuchu.

Rü ñuxre ga yema duü̃xü̃gü ga Yerucharéü̃gu ãchiü̃güxü̃ rü nügüna nacagüe, rü ñanagürügü: —¿Taux ẽ̱xna daa yixĩxü̃ ya yimá yatü ya ãẽ̱xgacügü naxca̱x daugücü nax yama̱xgüãxü̃ca̱x?
¡Dücax! Gua nixĩ rü yea guxü̃ i duü̃xü̃güpe̱xewa nidexa rü taxúema ñuxũ ñatarügü nüxü̃. ¿Taux ẽ̱xna i tórü ãẽ̱xgacügü i marü nüxü̃́ yaxõgüãxü̃ nax aixcüma Cristu yixĩxü̃ i nümax?
Natürü i yixema rü nüxü̃ tacua̱xgü nax ngextá ne naxũxü̃ i nüma. Natürü ngẽxguma aixcüma Cristu núma ũxgu rü taxúetama nüxü̃ tacua̱x nax ngextá ne naxũxü̃ —﻿ñanagürügü.
Rü nüma ga Ngechuchu rü Tupanapata ga taxü̃newa ínanangúexẽxẽ ga duü̃xü̃gü. Rü tagaãcü ñanagürü: —Pema rü marü choxü̃ pecua̱x rü nüxü̃ pecua̱x nax ngextá ne chaxũxü̃. Natürü tama chaugagu núma chaxũ. Rü núma chaxũ yerü núma choxü̃ namu ya yimá Tupana ya aixcümacü ixĩcü. Natürü i pema rü tama nüxü̃ pecua̱x.
Rü yimá Tupana nixĩ ya núma choxü̃ namucü. Rü choma rü meama nüxü̃ chacua̱x yerü naxü̃tawa nixĩ i ne chaxũxü̃ —﻿ñanagürü.
Rü yexguma ga yema ãẽ̱xgacügü rü Ngechuchuxü̃ niyauxgüchaü̃. Natürü taxuxü̃ma nayayauxgü, yerü tauta nawa nangu ga ora nax yayauxgüãxü̃ rü yama̱xgüãxü̃ca̱x.
Natürü muxü̃ma ga duü̃xü̃gü rü nüxü̃́ nayaxõgü. Rü ñanagürügü: —¿Ngẽxguma ínanguxgu ya Cristu rü ta̱xacürü cua̱xruxü̃ i daa yatü üxü̃arü yexera tá naxü? —﻿ñanagürügü.

Rü yema Parichéugü rü duü̃xü̃güxü̃ naxĩnüe nax Ngechuchuchiga yadexagüxü̃. Rü yemaca̱x ga yema Parichéugü rü yema chacherdótegüarü ãẽ̱xgacügü rü nanamugü ga ñuxre ga Tupanapata ga taxü̃nearü purichíagü nax Ngechuchuxü̃ yanayauxgüxü̃ca̱x.
Rü yexguma ga Ngechuchu rü ñanagürü nüxü̃: —Paxaãchi tátama nixĩ i petanüwa changexmaxü̃, rü ñu̱xũchi tá chataegu naxü̃tawa ya yimá núma choxü̃ mucü.
Pema rü tá cha̱u̱xca̱x pedaugü, natürü taxũtáma choxü̃ ipeyangaugü. Erü ngẽma tá íchangexmaxü̃wa rü taxuacü ngéma pengugü —﻿ñanagürü nüxü̃
Rü yexguma ga yema Yudíugüarü ãẽ̱xgacügü rü nügüna nacagüe, rü ñanagürügü: —¿Ngextá tá naxũ ega taxuacütáma nüxü̃ iyarüngaugügu? ¿Ẽ̱xna ngẽma Yudíugü i to i nachixü̃anewa ngẽxmagüxü̃tanüwa tá naxũ nax ngẽma tama Yudíugü ixĩgüxü̃xü̃ yangúexẽẽxü̃ca̱x?
¿Rü ta̱xacüchiga nixĩ nax ngẽma ñaxü̃: “Tá cha̱u̱xca̱x pedaugü natürü taxũtáma choxü̃ ipeyangaugü, erü taxuacütáma ngéma pexĩ i ngẽma tá íchangexmaxü̃wa”, ñaxü̃? —﻿ñanagürügü.

Rü yema nawa iyacuáxü̃ ga petaarü ngunexü̃ nixĩ ga guxü̃ ga togü ga ngunexü̃arü yexera rümemaexü̃. Rü yema ngunexü̃gu nixĩ ga inachixü̃ ga Ngechuchu rü tagaãcü ñaxü̃: —Ngẽxguma texé ita̱xawaxgu rü ¡nua chauxü̃tawa taxũ rü tayaxaxe!
Rü texé ya choxü̃́ yaxṍxe rü ñoma natürüxü̃ tümawa tá ínayaxüchi i dexá i maxẽẽruxü̃, ngẽma Tupanaarü ore i ümatüxü̃ nüxü̃ ixuxü̃rüxü̃ —﻿ñanagürü.
Rü yexguma yema ñaxgu ga Ngechuchu rü nüxü̃ nixu nax guxü̃ma ga yema nüxü̃́ yaxõgüxü̃ rü tá nayauxgüãxü̃ i Naãxẽ ya Üünexü̃. Natürü tama yexgumatama nanayauxgü, yerü tauta wenaxarü daxũguxü̃ ga naaneca̱x nataegu ga Ngechuchu nax guxü̃arü ãẽ̱xgacü yixĩxü̃ca̱x.

Rü nümaxü̃ ga yema duü̃xü̃gü rü yexguma nüxü̃ naxĩnüegu ga yema Ngechuchu nüxü̃ ixuxü̃, rü ñanagürügü: —Aixcüma daa yatü nixĩ ya yimá Tupanaarü orearü uruxü̃ ya ínanguxẽẽcü —﻿ñanagürügü.
Rü togü rü ñanagürügü: —Daa nixĩ ya Cristu —﻿ñanagürügü. Natürü togü rü ñanagürügü: —Tama nixĩ, erü taxũtáma Gariréaanecüã̱x nixĩ ya Cristu.
Erü Tupanaarü ore i ümatüxü̃wa rü ñanagürü:
“Cristu rü tá Dabítaxa nixĩ, rü tá nango̱x nawa ya yima ĩane ya Beréü̃ ga Dabí íbuxü̃wa”,
—﻿ñanagürügü.
Rü yemaacü Ngechuchugagu nügü nitoye ga duü̃xü̃gü.
Rü ñuxre ga yema duü̃xü̃gü rü Ngechuchuxü̃ niyauxgüchaü̃, natürü taxuxü̃ma nayayauxgü.

Rü yema Tupanapata ga taxü̃nearü purichíagü, rü Parichéugüca̱x rü chacherdótegüarü ãẽ̱xgacügüca̱x nawoegu. Rü yema ãẽ̱xgacügü rü nüxna nacagü, rü ñanagürügü: —¿Tü̱xcüü̃ tama nua penaga? —﻿ñanagürügü.
Rü yema purichíagü rü nanangãxü̃gü rü ñanagürügü: —Taguma texé tidexa i ngẽma yatü idexaxü̃rüxü̃ —﻿ñanagürügü.
Rü yexguma ga Parichéugü rü ñanagürügü nüxü̃: —¿Ẽ̱xna pema rü ta pexü̃ nawomüxẽxẽ i nümax?
Dücax, rü taxúema i tomax i Parichéugü rü taxuxü̃ma i tórü ãẽ̱xgacügü rü nüxü̃́ nayaxõgü i ngẽma Ngechuchu.
Natürü ñaa duü̃xü̃gü i tama Tupanaarü mugüxü̃ cua̱xgüxü̃ rü marü nachixexü̃gugü —﻿ñanagürügü.
Natürü Nicodému ga Parichéu ixĩcü ga wüxicana Ngechuchuxü̃tagu naxũanecü, rü ñanagürü nüxü̃:
—Ngẽma tórü mugü i ümatüxü̃wa rü ñanagürü: “Taxuacüma wüxi i yatüxü̃ tapoxcu ega tama nüxü̃ ixĩnüexíragu i norü dexa nax nüxü̃ icuáxü̃ca̱x nax ta̱xacüca̱x napoxcuxü̃” —﻿ñanagürü.
Rü yexguma ga natanüxü̃ rü nanangãxü̃gü, rü ñanagürügü nüxü̃: —¿Ẽ̱xna cuma rü ta Gariréaanecüã̱x quixĩ? ¡Nawa nangu̱x i Tupanaarü ore i ümatüxü̃ rü ngéma tá nüxü̃ cudau rü taxuxü̃táma i Tupanaarü orearü uruxü̃ i Gariréaanewa ne ũxü̃! —﻿ñanagürügü.
Rü yexguma ga wüxichigü rü nachiü̃wa naxĩ.

Listen to Ore i mexü̃ ga Cuáü̃ ümatüxü̃ 7