LUK 24
24
Jisu Kethur
(Mat 28.1-10; Mar 16.1-8; Jon 20.1-10)
1Bhomkuru arni adapprang arlosomar atum kesiktang kenemprujin amar ponsi tipit along damlo. 2Tipit pen arlong kepakong-longtang halatum thek-long-lo, 3lasi halatum tipit arlo lut damlo; bonta halatum hadak Hemphu Jisu abang arpum thek longledet-lo. 4Halatum labangso alam pen apot manghuphrongsi karjapphrongbom ahut men men mamat lir lir lor lor ape kelokkling kechingthang banghini amonit halatum adung arjapphrong-lo. 5Arlosomar atum kephere pen amahang longle anat ketongjuibom ahut halabangso amonit atum halatum aphan pulo, “Nanglitum kopi apotsi Kereng-et abang aphanle kethitang atum angbong riloma? 6Alangli dak avelo; Alangliphan pathurtang-lo. Galili adet kedo ahut alangli nanglitum along keningje kopi, lale chemathathutha:#Mat 16.21; 19.22-23; 20.18-19; Mar 8.31; 9.31; 10.33-34; Luk 9.22; 18.31-33 7‘Monit a-Sopo aphan papi atum arideng hodaidet nangji, thengparpan athak pathi nangji, lapen nithom aphi alangli thurthuji.’”#Mat 16.21; 19.22-23; 20.18-19; Mar 8.31; 9.31; 10.33-34; Luk 9.22; 18.31-33
8Ansi halatum alangli lam chema-thathusi tipit pen nangchevoilo, 9lapen hala bangkre-isi lapen kedo-an atum aphanta lahei hei alam thanlo. 10Labangso arlosomar atum ke Megdalene a-Meri, Joanna lapen Jems apei Meri; latum lapen halatum along kedun arlosomar atum ketoitang atum aphan la-hei hei alam thanlo. 11Bonta ketoitang atum lahei hei alam ke lam jong-jong chot pusi mathalo, lapen halatum aphan kroikredet-lo. 12Bonta Pitor thurphlutsi thiri anat kat-lo; alangli tipit ardik damlo, lapen keper-i alinen ape pen apar thangta thek longledet-lo. Ansi alangli keplangtang alam pen apot manghuhaksi hem chevoilo.
Emmaus Kedam Atovar Along Jisu Kecheklang
(Mar 16.12-13)
13Halabangso arni mamat halatum angbong pen banghini amonit Jerusalem pen kilomitar kre isi anbak akehelo, Emmaus pu arong anat damlo, 14lapen halatum keplangtang alamsi chingki ponbomlo. 15Halatum kechingki, kechingvai ahut Jisu amethang halatum adung patebok-lo, lapen halatum pen dam rappet-lo; 16halatum alangliphan thek long-lo, bonta kopuson lone alangliphan chinine det-lo. 17Jisu halatum aphan pulo, “Nangtum tovar kedambom ahut kopi alamsi chingki ponbomloma?”
Halatum sangkoksi amahang jang ik-ak-lo. 18Lapen inut Kleopas pu abang alangliphan arjulo, “Jerusalem kevang alohi atum angbong pen nangli anchot loma non malom keplangtang alam hei hei kechinine abang ke?”
19Alangli arjulo, “Kopi pi alamlo?”
Lapen halatum alangliphan thak-lo, “Najareth a-Jisu aphan keplangtang alamjir hei-hei. Labangso amonit ke inut Arnam amontrilo, lapen alangli Arnam lapen rat atum do-an angnota alam tame, akam tame ajakong kedo abang-lo. 20Nelitum a-Kurusar kethe atum lapen kangsai amei keja atum alangliphan kepathiji aphan hodaidet-lo, lapen alangliphan theng parpan athak pathilot-lo. 21Lapen Israel aphan kepajok abang alangli helo pusi nelitum ning thelo! La kadokave apar, nonke halabangso arni pen non an nithom arnilo. 22Nelitum angbong a-arlosomar atum nelitum aphan pamanghuhak-lo; halatum todap adapprang thiri damlo, 23bonta alangli bang arpum longledet-lo. Halatum vangthusi pulo, alanglitum amang ben asonsi pherangke atum aphan thek-long-lo, lapen pherangke atum pulo, Jisu ke rengthutang-lo. 24Lapen nelitum angbong pen manene atum thiri along damlo, lapen arlosomar atum kethan asonthotsi halatum thekdam long-lo, bonta halatum alangliphan thek longle det-lo.”
25Anke Jisu halatum aphan pulo, “Nanglitum ko-an akelu! Montri atum keputang alam an kekroiji aphan nanglitum ko-an panglen loma! 26Khristo lahei hei akesung chechakdet aphisi alangli adak atur angbong kelut damji a-ot dolo, kalima?” 27Moses ketok aloh hei hei lapen montri do-an aketok hei hei pen pangchengsi, alangli halatum aphan amethang alamjir Hastro along keputang alam an than-pachinilo.
28Halatum kepaleji arong an nang-lesi, Jisu ke apar kedam pikji ason klemlo; 29bonta halatum alangliphan khangsi pulo, “Nelitum alongle sakok non; keningve aporlo, lapen ingtingta ingting tang-lo.” Lasi halatum along kedoji aphan alangli lutdunlo. 30Alangli halatum pen pen an kechoji aphan ingnilo; him ensi ahirjume hang-lo lapen ke him bengsi halatum aphan pilo. 31Anke halatum amek ingpudet-lo lapen halatum alangliphan chininedet-lo, bonta alangli halatum amek angden pen chepavedet-lo. 32Halatum chepulo, “Alangli etum pen tovar kechingki bom ahut, lapen Hastro alam ekethan-pachini ahut ening arlo kekar-ang ame asonlo, kalima?”
33Halabangso ahut mamat halatum thursi, aphi thot Jerusalem chevoithu-juilo, lapen hadak bangkre isi asangho lapen halatum along kedodun atum kechingrum thek damlong-lo. 34Lapen pulo, “Ahok-lo, Hemphu thurtang-lo! Alangli Simon aphan cheklang-lo!”
35Anke latum tovar pi cheplang loma, lapen Hemphu him kebeng ahut latum kopusonsi chinidet-loma, lahei hei alam an than-pachinidet-lo.
Sangho Kethe Atum Along Jisu Kecheklang
(Mat 28.16-20; Mar 16.14-18; Jon 20.19-23; Akam 1.6-8)
36Hala banghini halatum aphan lahei alam kethan bom ahut, men men amat Hemphu amethang halatum angbong arjaptherlo, lapen halatum aphan pulo, “Nangtum along ning kangsam padonang!”
37Halatum thiriksi phere-olo; cham-buruksosi thek-long-lo pusi halatum mathalo. 38Bonta alangli halatum aphan pulo, “Kopi apotsi nangtum a-ok klem hur loma? Nangtum aning arlo kopi apotsi lahei hei kekroi athir chepave bomlangma? 39Ne ri lapen nekengta langtha, lapen chini non, lake neli methang amat-lo. Ne otnon, anke nangtum chinipo, pima chamburukso ke angsi lapen arrepi ave, bonta neke dolo, lake nangtum thek long-lo.”
40Alangli la pudet pen ari lapen akeng halatum aphan chepaklang-lo. 41Lapu-an anta halatum kroithekthe det-lo; halatum kemanghu lapen aning arong pen plengset-lo; lasi Jisu halatum aphan arjulo, “Kopine kecho ahormu ladak nangtum along doma?” 42Halatum ketuntang alang a-ok ethan alangliphan pilo, 43alangli la ensi halatum angno cholo.
44Anke alangli halatum aphan pulo, “Nangtum along kedo ahut ne nangtum aphan kethantang alam lahei hei helo: Ne lamjir Moses aron angbong, montri atum ketok, lapen Lun along hei hei ketoktang alam an chekokpet nangji.”
45Ansi halatum Hastro hei hei kechiniji aphan alangli halatum aning ingpulo, 46lapen halatum aphan pulo, “Ketoktang alam lahelo: Khristo kesung chechakvek nangji, lapen nithom arni kethi pen thurvek nangji, 47lapen alangli men pen ajok ning kecherui alam lapen pap hei hei kediya alam, Jerusalem pen pangchengsi kadokave adet an pachethangdet nangji. 48Nang-tum ke lahei hei alam ahaki atumlo. 49Lapen ne-Po kechaktang asonthotsi nemethang amatsi la nangtum aphuthak nangtoipo. Bonta angsong pen nangtum aphuthak jakong vangve tik ke rongsopi angbongle dobomtha.”#Akam 1.4
Jisu Aphan Sining Angsong Kepon
(Mar 16.19-20; Akam 1.9-11)
50Anke alangli halatum aphan Bethani an japonlo, lapen hadaksi alangli ari hongni chirungsi halatum aphuthak ahirjume pilo.#Akam 1.9-11 51Alangli halatum aphan ahirjume kepibom ahut, alangli halatum pen chekak-lo, lapen alangliphan sining angsong pondet-lo.#Akam 1.9-11 52Halatum alangliphan ingduk-ardomlo, lapen aning arong-piksi Jerusalem chevoithulo, 53lapen kaiketa Kardom ahem arlo dosi Arnam aphan kero piverlo.
Karbi Holy Bible © Bible Society of India, 2010.
Used by permission. All rights reserved worldwide.
