LUK 14
14
Jisu Inut Keso Amonit Aphan Kepame
1Arnisi Sabbath arni Jisu Pharisi amonit keja abang ahem anke-choji aphan damlo; lapen monit atum Jisu aphan lang pamelo. 2Alangli ingno inut ari akeng kekang abang dolo, 3lapen Jisu aron thekser lapen pharisi atum aphan arjulo, “Sabbath arni keso kepameji aron doma avema?”
4Bonta halatum doklip-lo. Jisu hala keso amonit abang otsi pamelo, lapen toijuilo. 5Anke alangli halatum aphan pulo, “Nangtum angbong mane abang asopo, kalite achainong Sabbath arni lang jangchok lote la aphan Sabbath arni amat ke-en-edetji abang doma?”#Mat 12.11
6Bonta halatum thakdun thek thedet-lo.
Kechepabihek Lapen Alohi Kechak Alam
7Manene alohi atum akemenei adim kechongvai thek-longsi Jisu halatum aphan eson alamlir pen pulo. 8“Piso kepangri akecho amei along mane abang nangphan nang kepha ahut akemenei adim ingniri; pima nang par mane the muchot abang aphan phalo tahai,#Sar 25.5-7 9lapen nangtum banghini aphanta kepha abang vangsi nangpupo, ‘Bangso adim alangliphan pektha.’ Anke nang therak duksi aman kave adim ingni nangkokpo.#Sar 25.6-7 10Bonta nangphan nangkepha ahut aman kavenei adimle ingni damnon. Lasi nangphan kepha abang kevang ahut nangphan ‘Memuchot adim ingnidam iktha’ pusi nangpuji. Ansi nang long kangni rap-rap alohi atum angno nang man doji.#Sar 25.6-7 11Pima amethang kechepathe abangphutin aphan pabihekji, lapen amethang kechepabihek abang aphan pathedetji.”#Mat 23.12; Luk 18.14
12Lapen ke alangliphan kepha abang aphan Jisu pulo, “Anerlo kalite ajo apor kecho kejun amei kepathik ahut, nangjirpo atum, kalite nangkorte atum, kalite nang chepho chero atum, kalite tebok terei akeplang-o atum aphan phari; pima halatum nang-phathupo, lapen nang alar long thupo. 13Nang Kecho kejun kepathik ahut keduk, ketekok, kengkok, lapen amek kave atum aphanle phanon; 14lapen nang ahirjume longpo, pima halatum nangphan nangpithu thekthelo. Arnamsi mo monit keme atum kethi pen kethur ahut nangphan nangpi thudetpo.”
Kechopi Amei Alamlir
15Bangso alam arju longsi kangni rap-rap atum angbong pen inut abang Jisu aphan pulo, “Arnam Arat angbong an kecho kangni dunlongji atum ko-an akerengme!”
16Jisu alangliphan pulo, “Inut amonit kechopi amei pathik-lo, lapen alangli penang amonit aphan phalo. 17Ansi an kechoji aphan kadokave siktang-etsi alangli kephatang atum along aban aphan toisi papulo, ‘Vang iktha, kadokave nonke siktang-et-lo!’ 18Bonta halatum kadokaveta diya kechohangji pangcheng-lo. Aphrangsi abang ban aphan pulo, ‘Ne longle emo namlo, lapen ne langdamvek nangji; ne kechoningri dengtha.’ 19Anut kaprek abang pulo, ‘Ne chainong haipho namtang-lo, lapen ne la anem endam nangjilang; ne kechoningri dengtha.’ 20Akaprek inut abang pulo, ‘Ne nonhetsi piso kechepangrilang; la apotsi ne nangdun thekthelo.’
21“Aban hem vangsi kadokave alam ahemphu aphan than-et-lo. Ansi ahemphu aning thihaksi aban aphan pulo, ‘Rongsopi atovarpi lapen atovarso an damserak-ra, keduk kelak, ketekok, amek kave lapen kengkokjok atum an aphan van-etnon.’ 22Malomso aphi aban pulo, ‘Hemphu, nang hukum ateng akam klemtang-lo, bonta adim do-o lang.’ 23Lasi ahemphu abang aban aphan pulo, ‘Nehem kepaplengsetjile rat atovar lapen rit atovar damra monit atum nang kepalutjile bor-i non.’ 24Ne nangtum aphan nang pulang, kephatang atum angbong pen inut natta ne kepathik akecho kejun chomat longledetji!”
Sangho Keplang Anam
(Mat 10.37-38)
25Armu ake-ongpi Jisu along kedun bom ahut, alangli chepangnosi halatum aphan pulo. 26“Badutame amethang apo lapen apei, apiso lapen asomar, akorte lapen angjirmar atum, lapen amethang aphan chinghonmunak lote nelong vang setta alangli ne sangho plang un-e.#Mat 10.37 27Badutame amethang athengparpan cheponra ne phi phi nang dundete, alangli ne sangho plang un-e.#Mat 10.38; 16.24; Mar 8.34; Luk 9.23
28“Jongsi nangtum angbong mane abang hem chardon kekimji aning hang-lote, alangli aphrangke ingnisi, ko-an atangka nangjima, lapen kepatang-iji apoisa doloma avema, la lakhaji. 29Lapu kalite ahemthur chamdetsi patang thekthedette, kethek dun long atum ingnekchoisi puhurpo, 30‘Labangso amonit kekim pang-cheng-lo, bonta patang thekthedet lohe!’ 31Jongsi inut arecho akaprek arecho pen ron kechedanjisi damlo, lapen bang surikep amonit ponsi hala bang suri ingkoi kevan abang aphan parem unjima, un-ema, labangso alam aphan alangli aphrangsi ingnisi mathaji. 32Lapen un-edetji tangte, alangli pherangke atum aphan toisi, heloving kedo ahutsi kechepame thuji aphan choningri damji.” 33Jisu pajutsi pulo, “Lasonthotsi nangtum angbong badutame amethang amar atar che-o edette nesangho plang-un-e.”
Lamdak Angti
(Mat 5.13; Mar 9.50)
34“Ingti ke mesen, bonta, ingti jongsi lamdak tangte, la kopi pensi padokthumejima. 35Lake longle aphan kalite ho-or aphanta meme; la ingtan varchor chotpo. Tangte, karjuji ano kedo abang parjunang!”
Karbi Holy Bible © Bible Society of India, 2010.
Used by permission. All rights reserved worldwide.
