JON KEPACHINI
KEPACHINI
Labangso a-Birta Keme ketok abangke Jisu asangho, Jon pu abang helo. Jisu Khristo ketoitang bang krehini angbong pen inut abangke alangli helo. Ephesas arongsopi kedo ahutsi alangli labangso aloh tok-lo.
Arnam aphrang pen kechak atengsi monit atum aphan kepajokji aphan Jisu aphan nangtoilo, lasi Jisuke kepajok abanglo, lapen Arnam a-Sopolo pu alam monit atum aphan kepakroiji, lapen monit atum alangliphan lapuson akekroi pen ajok kejut un-e achethe kelong thekji aphansi labangso a-Birta Keme tok-lo pusi labangso abirta keme aloh along than pachinilo.(20.3) Jisuke Arnam kejut un-e akai anta kedover alamlo, lapen alangli monit ason nangcheplangsi monit atum angbong nangdolo pu alam ladak tok-lo.
Jisu akaprek kaprek akemanghumeme akam paklangsi Kepajok a-Bang lapen Arnam a-Sopo angthek chepeklanglo pu alam aphrang angdeng malom tok-lo. Labangso aphi Jisu amethang asangho atum pen kechingki-chethan, lapen labangso akechingki-chethan pen Jisu keklemtang akemanghumeme akam hei hei alam athe than-pajirmidamlo. Penang atumke Jisu aphan kroisi alangli long dunlo, bonta akaprek atumke alangliphan kroikresi alangli be thurlo pu alam labangso angdeng along tok-lo. Jisu aphan keneppon aningve Jisu amethang asangho atum pen kechingrum, lapen alangliphan thengparpan athak kepathi aphrang alangli amethang asangho atum aphan kepachesiktoi lapen aning kepathe alam angdengpi 13-17 along tok-lo. Jisu aphan keneppon, kangsai, thengparpan athak kesak, Jisu kethi, kethi pen kerengthu lapen asangho atum aphan kecheklangdam alam hei heike kejut angdeng malom tok-lo.
Khristo pen ajok kejut un-e achethe adan kelong alamsi Jon labangso aloh along jasemet tok-lo. Non pen labangso adan kepi chenglo, lapen Jisu helo tovar, ahok lapen chethe pu kekroi atum anke labangso adan long pusi labangso aloh along than-pachinilo. Arni arni akenangsot amar hei hei pen, atheke lang, an, aketheang, biresak lapen kevi abang, drakha arong lapen athe hei hei pen kepangbardam alam pensi karjong anat ahokpet alam paklanglo. Labangso aloh ketok lake Khristo Aphi 60-90 aningkan malom, lapen ketok abangke Jon amat.
Athepi Alamthe Hei Hei
Kepachini 1.1-18
Jon Baptist lapen Jisu aphrangsi asangho atum 1.19-51
Jisu rat angbong keklem akam 2.1—12.50
Kejut arni hei hei ahut Jisu Jerusalem lapen adung arei along keklem akam 13.1—19.42
Jisu kethi, kerengthu lapen monit angno kecheklang 20.1-31
Kepajut: Galili along Jisu kecheklangdam 21.1-25
Karbi Holy Bible © Bible Society of India, 2010.
Used by permission. All rights reserved worldwide.