JON 8
8
Inut Abeisapi Aphan Kangsai
1Ansi halatum kadokaveta amethang methang ahem chedamlo. Bonta Jisu ke Oliv anglong alongsi damlo. 2Puthot adap Jisu Kardomhemthepi arlo damthulo. Kadokave amonit atum alangli dung vangsi alangliphan komsarlo. Ansi alangli ingnilunsi lam kethanji pangcheng-lo. 3Bonta aron thekser atum lapen Pharisi atum alangli dung inut abeisapi vansi halatum angno paparjaptherlo. Beisa kechoklem ahutsi labangpi aphan nepdunlongchek-lo. 4Halatum Jisu aphan pulo, “Kuru, labangso arloso beisa kechoklem phodunloksi nepchek-lo. 5Moses kepi Aron ateng ke lason arloso aphan ke arlong pen arbubop nangji. Tangte nangli kopi pujima?”#Levi 20.10; Keth 22.22-24 6Jisu aphan papholasi alangliphan adai kenep longji aphansi halatum labangso alam pulo. Bonta Jisu ingkupdisi ari chimun pen longle athak tok-lo. 7Halatum alangliphan lam karjubom apot alangli arjapthersi halatum aphan pulo, “Nanglitum angbong apap kavepin abangle labangpi aphan arlong pen paparbu paphrangnang.” 8Ansi alangli puthot ingkupdisi longle athak tokthulo. 9Halatum labangso alam arjulongsi hadak pen inut pen aphi inut damsi kadokaveta dam-et-lo. Akesar atum dam paphrangneilo. Ansi hadak kedo paduke Jisu lapen alangli ingno karjapther arloso anchot-lo. 10Jisu arjapthersi labangpi aphan pulo, “Halatum ke konat nat-lo? Halatum baduta nangliphan adai nangpadodema?”
11Labangpi thakdunsi pulo, “Inutta avelo, Hemphu!” Jisu pulo, “Nelita nangliphan adai nangpadodelo. Damnon da, bonta non pen apara pap klemrinon.”
Pirthe Akethe-ang
12Jisu Pharisi atum aphan puthulo, “Ne helo pirthe akethe-ang. Ne long nangkedunkri abang ke chethe akethe-ang longji, lapen alangli kangting angbong jonghe setta damdedetji.”#Mat 5.14; Jon 9.5
13Pharisi atum alangliphan pulo, “Nanglisi nangli methang ahaki chepilo. Nangli kepi ahaki ke ahok kali.”#Jon 5.31
14Jisu thakdunsi pulo, “Nelisi neli methang ahaki chepilo setta neli kethan alam ke ahok, pima neli konat pensi kevang, lapen konatsi kedamjima, lake nanglitum chinine. 15Nanglitum ke monit aron ateng pensi ingsaichot, bonta neli ke badu aphanta ingsaise. 16Nelile ingsai nangji setta neli akangsai ke chokpameji. Pima neli inutpet-le kangsaiji kali, neliphan neketoi abang, Po penpensi neli la ingsaiji. 17Banghini ahaki atum ethepet ahaki pilote halatum kepi ahaki ke ahok ahakilo pusi nanglitum aron along ketok do. 18Nelita nelimethang ahaki chepilo, lapen neliphan neketoi abang, ne-Pota neliphan haki nangchodunlo.”
19Halatum alangliphan pulo, “Nanglipo komat-lo?”
Jisu thakdunsi pulo, “Nanglitum neli-phan lapen Neli Po aphanta chinine. Nanglitum neliphanle chini asonte neli-Po aphanta chiniji apot-lo.”
20Kardomhemthepi arlo dan atangka kethap Asinduk kebi angdeng along lam kethan ahutsi Jisu labangso alam pulo. Lapen alangliphan baduta nepnedet-lo. Pima alangliphan kenepji ahut nanglelelang.
Jisu Ke Sining Pensi Kevang
21Jisu halatum aphan puthulo, “Neli damjuiji, lapen nanglitum neliphan neriji. Bonta nanglitum nangmethang methang apap pen apot thiji. Neli kedamji adim nanglitum nangdun un-e.”
22Lasi Jihudi atum angbong keja atum chepulo, “Alangli kedamji adim ilitum dun un-e pusi alangli pulo. Alangli amethang chepathilotji putong kepudamma?”
23Jisu thakdunsi pulo, “Nanglitumke ladak aber amonit-lo, bonta neli ke angsong pensi kevang. Nanglitumke labangso apirthe amonit-lo, bonta neli ke kali. 24Lasi neli nanglitum aphan nangpulo, nanglitum nangmethang methang apap pen apot thiji. ‘Neli helo alanglilo,’ pu nanglitum neliphan kroikrete nanglitum nangmethang methang apap pen apot thiji.”
25Halatum alangliphan arjulo, “Nangli komat-lo?”
Jisu thakdunsi pulo, “Neli komatma, lake neli kecheng ahut penta nanglitum aphan nangthanlo. Neli ke halabangso abang-lo. 26Neli nanglitum alamjir kepujilang do-olang, lapen neli nanglitum aphan nangkangsaijilang do-olang. Tebonta neliphan neketoi abang ke ahokpet abang-lo, lapen alangli long pen karjulongtang alamsi neli pirthe aso aphan thanchot.”
27Jisu halatum aphan Po alamjirsi kethanlo puke halatum chininedet-lo. 28Lasi alangli halatum aphan pulo, “Nanglitum Monit a-Sopo aphan kerung ahutsi ‘Neli helo alanglilo,’ pu nanglitum neliphan chiniji. Ansi neli ke nelimethang abidi pen thangta klemkle, bonta Po neliphan nekethan alingsi neli ke ningjechot pu nanglitum chiniji. 29Lapen neliphan neketoi abang neli long dover, pima neli ke alangli ning kehang alingsi klemver.”
30Jisu lahei hei keningje karju-dunlong ake-ongpi atum alangliphan kroilo.
Ban Lapen Ban Kalidet Atum
31Lasi alangliphan kekroi atum aphan Jisu pulo, “Nanglitum jongsi neli kethan alam kroibom tangte nanglitum ke neli sangho binong atumlo. 32Nanglitum ahok aphan chiniji, lapen ahok nanglitum aphan pajok-phlotji.” 33Halatum thakdunsi pulo, “Nelitumke Abraham asumarlo, lapen nelitum ke badu amonit aban plangple-pinlang. Tangte, ‘Nanglitum jokphlotji,’ pu nangli nelitum aphan kopisi kepudamma?”#Mat 3.9; Luk 3.8
34Jisu halatum aphan pulo, “Neli nanglitum aphan ahokpetsi nangpulang, pap keklembom abang ke pap abanlo. 35Ban ke ahemphu ahem amonit plangverve, bonta asopo ke apo ahem amonit plangver. 36Sopole nanglitum aphan nangpajokphlot lote nanglitum jokphlot binongji. 37Nanglitumke Abraham asumarlo puke neli chini. Bonta nanglitum neliphan kepathiji abidi ribomlo, pima neli kethan alam nanglitum kroikre. 38Ne-Po nephan nekepaklangtang alamjirsi neli thanlo, bonta nanglitum ke nanglitum apo nangkethan atengsi klemlo.”
39Halatum thakdunsi pulo, “Nelitum apo ke Abraham helo.”
Jisu pulo, “Nanglitumle Abraham asomar binong-lo asonte nanglitum alangli keklem asonthotsi klemji apot-lo. 40Ne Arnam along pen ahok alam karjulongtang ason an nangkethanjisi la kadokave klemlo, bonta nanglitum ke neliphan kepathijisi abidi ribomlo. Abraham ke lason ke thangta klemkle. 41Nanglitumke nanglitum apo keklem asonthotsi klembomlo.”
Halatum thakdunsi pulo, “Nelitumke sorongro aso kali. Nelitum apo ke inutnat. Lake Arnam helo.”
42Jisu halatum aphan pulo, “Arnamle nanglitum a-Po binong-lo asonte nanglitum neliphan ne inghonji apot-lo, pima neli ke Arnam along pensi vang-lo, lapen nonke neli daksi dolo. Neli ke neli methang aning kehang penle kevang kali, alanglisi neliphan netoilo. 43Nanglitum kopi apotsi neli keningje alam chininedetma? Atheke la helo, neli kepu alam nanglitum arjuthekthe. 44Nanglitumke nanglitum apo, Hi-i Sarpo asomarlo, lapen nanglitum apo aning kehang akam keklemjisi nanglitum ning hang-lo, kechengsi ahut penta alangli ke pran ke-en abang-lo, lapen ahok penke alangli thangta klemkle, pima alangli ning arlo ahok ave. Alangli kechobei alam keningje ke amethang a-ot binong pensi keningjelo, pima alangli ke kechobei abang-lo. Lapen alangli ke kechobei an apolo. 45Bonta neli ke ahok alamsi thanlo. Lasi nanglitum neliphan kroikrelo. 46Nanglitum komatsi neli do paklangthekma? Neli ke ahok alamsi nangkethanle nang-litum kopisi nekroikredetma? 47Arnam pen kevang abang ke Arnam alam hei hei arju. Nanglitumke Arnam along penle kevang kalidet apotsi Arnam alam arjuje.”
Jisu Lapen Abraham
48Jihudi atum Jisu aphan thakdunsi pulo, “Nanglike Samaria asor lapen hi-i kepho abang-lo pu nangkepu ke chokpamelo, kalima?”
49Jisu thakdunsi pulo, “Neli ke hi-ile kepho kali. Neli ke ne-Po anong pathebomlo, bonta nanglitum ke neli nong jobomlo. 50Neli ke nelimethang anong rire. Bonta neli nong the nangji pu aning kehang abang do. Kangsai abang alangli helo. 51Neli ahokpetsi nangpulang, neli kethan alam karju abang ke kaita thithepinji.”
52Halatum alangliphan pulo, “Nangli hi-i pholok-lo pu nonke nelitum chinipamelo. Abraham lapen Arnam amontri atumta thilo. Bonta nangli kethan alam kekroi abang ke kaita thithedetji pusi nangli pulo. 53Nelitum apo Abrahamta thi-lo. Abraham mute nangli themu, lapu kali, kalima? Arnam amontri atumta thikoilo. Nanglike komat pusi kechemathama?”
54Jisu thakdunsi pulo, “Nelisi neli methang anong chepathelo asonte labangso anong ke thang kalidetji apot-lo. Neli Posi neli nong pathelo. Alang ke nanglitum a-Arnamlo pusi nanglitum chepulo. 55Nanglitumke alangliphan chinine, bonta neli ke chini. Nelile alangliphan chininedet asonte nelita nanglitum asonthak thaksi kechobei abangchotji apot-lo. Bonta neli ke alangliphan chini lapen alangli lam kroi. 56Neli kevangji arni thek-longji pu chinisi nanglitum apo, Abraham ke aning arongpik-lo. Alangli la non thek-long-lo, lapen lasi alangli chehokpik-lo.”
57Halatum alangliphan pulo, “Nangli arta ningke ningkan phokep anta kavedetlangle kopusi Abraham aphan thek-long-lo pu nangli kepu-thekma?”
58Jisu thakdunsi pulo, “Neli nang-litum aphan ahokpetsi nangpulang, Abraham amahang thekthe ako penta neli ke dolo.”
59Ansi halatum alangliphan karbujisi arlong rungrep-lo. Bonta Jisu chepatulo, lapen Kardomhemthepi pen damjuilo.
Karbi Holy Bible © Bible Society of India, 2010.
Used by permission. All rights reserved worldwide.
