JON 6
6
Jisu Bang Suri Pho Amonit Aphan An Kepacho
(Mat 14.13-21; Mar 6.30-44; Luk 9.10-17)
1Labangso aphi Jisu Galili atalo, atheke Taiberia atalo kapsi hapu parai damlo. 2Armu ake-ongpi atum alangli phi phi dunlo, pima alangli keso kepame akemanghumeme akam hei hei halatum thek dunlong-lo. 3Jisu inglong arludamsi asangho atum pen pen ingnilo. 4Halabangso ahut Kejok Achojun a-Meipi tebok-het-lo. 5Jisu aphu chingthursi talavir lang-lo. Armu ake-ongpi alangli long kevang thek-longsi alangli Philip aphan pulo, “La kadokave amonit aphan kepachoji aphan ili konatsi him nam-damlongpoma?” 6Philip aphan asat kelangjisi Jisu la pulo. Pima alangli kopisi klemji, lake alangli chinilo.
7Philip thakdunsi pulo, “Abangphutin aphan asap sap ahim kepachoji aphan anta him kenamji aphan rup atangka pharo hini sose an nangji.”
8Jisu asangho atum angbong pen Andriu pu Simon akorte abang alangliphan thakdunlo. 9“Ladak pinso a-oso inut along him plangpho lapen ok jonni do. Bonta la anvetke kopusi la kadokave amonit kechodorpoma?”
10Jisu halatum aphan pulo, “Halatum aphan papangninon.” (Hadak bapso do-o.) Ansi kadokave amonit hadak ingnilo. Hadak pinsomar bang suri pho anbak dolo. 11Jisu him enpetsi Arnam aphan kero pilo, lapen hadak kangniphrong amonit atum aphan la paronlo. Lang a-ok penta alangli lasonsi klemlo. Halatum un-an cholo. 12Halatum ingkrangling aphi alangli asangho atum aphan pulo. “Hala ke-ik-un-e ahin an pangrumnon, ilitum la asapta pavir nangne.” 13Lasi halatum la kadokave pangrumlo. La monit atum hala plangpho ahim kecho ke-ik-un-e ahin pangrumsi ton krehini papleng-lo.
14Ansi halabangso amonit atum la alangli keklemtang akemanghumeme akam thek-longsi pulo, “Ahok-lo, pirthe athak kevang nangji abang, Arnam amontri alangli helo.” 15Ansi halatum alangliphan recho kebatjisi kebor-i kebor-a pen setta alangliphan kenepjisi vangji dokdok-lo pu Jisu chinilo. Lasi alangli inglong anat katthujuilo.
Jisu Lang Athak Akeng Pen Kedam
(Mat 14.22-33; Mar 6.45-52)
16Arni kangsam ahut Jisu asangho atum talo akung damlo. 17Halatum hadak telong ehum chethapsi Keparnaum arongsopi anat talo pen kekapjisi barlo. Arni nangningvebomlo. Halabangso ahut anta Jisu halatum along vangvelang. 18Halabangso ahut tomon kethe vangsi lang paplikplak-olo. 19Sangho atum mali kethom-phli anbak akehelo telong vekdet aphi Jisu lang athak akeng pen damsi telong anat kevangbom halatum thek-long-lo, lapen halatum pherelo. 20Ansi Jisu halatum aphan pulo, “Phere nangne, ne lema!” 21Lasi halatum aning arong pen Jisu aphan telong pachethap-lo, lapen hala mamat halatum kepaleji adim telong pen nanglelo.
Monit Atum Jisu Aphan Keri
22Puthot arni talo hapu parai kedo a-armu atum hadak telong kedo ehumnat pu chinilo. Ansi Jisu ke asangho atum along chethapdunde, asangho atumdetsi damchot-lo pu halatum chinilo. 23Ansi Taiberias pen kevang akaprek atelong hei hei talo akung nanglelo. Hala Hemphu Arnam aphan kero pidetsi keron ahim monit atum kecho adim pen labangso adim ke tebok-het-lo. 24Jisu lapen asangho atum hadak ave thek-longsi armu atum Jisu aphan ridunsi halabangso atelong hei hei chethap-lo lapen Kapernaum arongsopi anat damjuilo.
Chethe Ahim Jisu Helo
25Monit atum Jisu aphan talo hapu parai longdamsi alangliphan pulo, “Kuru, nangli ladak komantusi nangkelerok-loma?”
26Jisu halatum aphan pulo, “Neli nanglitum aphan ahokpetsi nang-pulang, la neli keklem kemanghumeme akam hei hei alam athe nanglitum kechini apot-le nanglitum neliphan keri kali, bonta nanglitum halabangso ahim cholo, lapen nangning hang an cholo apotsi nanglitum neliphan rilo. 27Kevirdetji a-an kelongji aphan klem chepadukri bonta kejut un-e achethe kelongji aphan kevir un-epin a-an kelongji aphanle klem chepaduknon. Monit a-Sopo nanglitum aphan labangso a-ansi nangpipo. Pima labangso akam kepaklemji aphan Po Arnam alanglithak sap thengtang-lo.”
28Lasi halatum alangliphan arjulo, “Arnam aning kehang akam keklemji aphan nelitum kopisi klem nangjima?”
29Jisu thakdunsi pulo, “Arnam aning kehang akam ke alangli nangketoitang abang aphan kekroi helo.”
30Halatum thakdunsi pulo, “Tangte nangli keklem akemanghumeme akam nelitum thek-longsi nangliphan kekroithekji aphan nangli kopi kemanghumeme akam klemjima? Nangli kopisi klemjima? 31Hastro along ketok, ‘Halatum kechoji aphan alangli sining angsong pen him pilo,’ pu alam asonthotsi nelitum aphusar atum kejejangtang ajo mana a-an cholo.”#Keba 16.4,15; Lun 78.24
32Jisu halatum aphan pulo, “Neli nanglitum aphan ahokpetsi nang-pulang, Mosesle nanglitum aphan sining pen kevang ahim nangkepi kali, ne-Posi nanglitum aphan sining pen kevang ahim binong nangpilo. 33Pima sining angsong pen vangsi pirthe amonit atum aphan chethe kepibom abang helo Arnam kepi ahimlo.”
34Ansi halatum alangliphan arjulo, “Nelitum aphan labangso ahim nepivertha, Hemphu.”
35Jisu halatum aphan pulo, “Chethe ahim neli helo, neli long kevang abang aling kaita ingchirchedetji; neliphan kekroi abang aling kaita ingit-edetji. 36Bonta neli nanglitum aphan kepu asonthotsi nanglitum neliphan thek-long-lo setta kroikrelo. 37Neli-Po neliphan neli kepi atum an neli long vangji, lapen neli long kevang abang aling aphan neli phlungphledetji. 38Pima neli nelimethang aning kehang akam keklemji aphanle sining pen nangkehir kali, bonta neliphan neketoi abang aning kehang akam keklemji aphansi neli sining angsong pen nanghirlo. 39Neliphan neketoi abang aning kehangke la helo, neliphan nekepitang atum an angbong pen inutnat aphanta neli pangbobedet nangji, bonta mo kejut arni neli halatum kadokave aphan pathursi pareng nangji. 40Pima ne-Po aning kehangke lahelo, Sopo aphan kethek-long lapen kekroi atum an kejut un-e achethe long nangji. Lapen mo kejut arni neli halatum aphan pa-rengsi pathurji.” 41Ansi monit atum alangli bethursi pasimutur tarlo. Pima, “Sining pen kevang ahim ke neli helo,” pusi alangli pulo. 42Lasi halatum pulo, “Labangso amonit ke Joseph asopo, Jisulo, kalima? Nelitum labangso amonit api-apo aphan chinilo. Tangte non alangli kopusi sining pen nanghirtang-lo pu keputhekma?”
43Jisu thakdunsi pulo, “Nanglitum hijan angbong chepasimuri. 44Neliphan neketoi abang, Po-le nangtum aphan nelong nang-pateboktoitete baduta nelong vang un-e. Lapen mo kejut arni neli alangliphan parengsi pathurji. 45‘Arnam abangphutin aphan thanji,’ pusi Arnam amontri atum tok-lo. Po alam karju lapen alangli pen kecharli abang aling neli long vangji.#Isa 54.13 46Tebonta komane abang Po Arnam aphan thek-long tang-lo pule neli kepudam kali. Arnam pen kevang abang inutsi Po aphan thek-longchot. 47Neli nanglitum aphan ahokpetsi nangpulang, Kekroi abang kejut-un-e achethe do. 48Chethe ahim neli helo. 49Nanglitum aphusar atum ke kejejangtang ajo mana a-an cholo setta thikoilo. 50Bonta sining pen kevang ahim ke lapuson helo; la kecho abang aling thithedetji. 51La sining pen kevang chethe kepi ahim ke neli helo. Labangso ahim kecho abang aling ke kejut un-e akai anta rengji. Neli alangliphan kepiji ahim ke nelimethang abang a-ok helo. Pirthe kerengthekji aphan neli labangso ahim pi.”
52Labangso alam pen apot halatum chebohongseisi lahin lahin chepulo, “Labangso amonit kopusi ilitum kechoji aphan amethang abang a-ok epithekpoma?”
53Jisu halatum aphan pulo, “Neli nanglitum aphan ahokpetsi nangpulang, nanglitum jongsi Monit a-Sopo abang a-ok choche lapen avi junje tangte nanglitum chethe avedetji. 54Neli bang a-ok kecho lapen neli vi kejun abang ke kejut un-e achethe do, lapen mo kejut arni neli alangliphan parengsi pathurji. 55Pima neli bang a-ok ke an binong-lo, lapen neli vi ke kejun ahormu binong-lo. 56Neli bang a-ok kecho lapen neli vi kejun abang ke neli pen chelangpetver, lapen neli alangli pen chelangpetver. 57Kerengver abang Posi neliphan netoilo, lapen alangli pen ajoksi neli reng-lo. Lasonthotsi neliphan nekecho abangta ne pen ajok rengji. 58Tangte sining pen kevang ahim lahelo; labangso ahim ke nanglitum aphusar atum kecho ahim ason kali. Pima nanglitum aphusar atum kecho ahim ke halatum cholo setta thikoilo. Bonta labangso ahim kecho abang ke kejut un-e akai anta rengji.”
59Keparnaum arongsopi asinagog along Jisu lam kethan ahutsi alangli labangso alam pulo.
Kejut Un-e Achethe
60Jisu along kedun atum angbong pen ake-ongpi atum labangso alam arjulongsi pulo, “Labangso alam kedengji sungkrung. Komatsi la arju-thek-poma?”
61Alangliphan thanthepin setta, labangso alam apotsi halatum pasimu-turtarlo pu Jisu chinilo. Lasi alangli halatum aphan pulo, “Labangso alam pen apot nanglitum aning oilak-loma? 62Tangte Monit a-Sopo aphrang kedo adim kecharludamthu thek-long lote nanglitum kopi pupoma? 63Arnam a-Karjongsi chethe pi. Monit ajakong penke la thangta klem un-e. Neli nanglitum aphan nangkeputang alam hei hei ke chethe kepi a-Karjong vanlo. 64Bonta nanglitum angbong manene atum ke kroikrelo.” Alangliphan komat mat atum kroikrejima, lapen komat abangsi alangliphan hotur arideng hodaijima, lake kecheng ahut penta Jisu chinilo. 65Lapen alangli puthulo, “Lasi Po-le jakong pipete baduta nelong vangthekthe pu neli nanglitum aphan nangpulo.”
66Labangso alam pen apotsi Jisu along kedun penang atum ke alang-liphan obupsi hala pen apara alangli long chelang dundedet-lo. 67Lasi alangli asangho bangkrehini atum aphan arjulo, “Nangtumta nephan ne-orupjima?”
68Simon Pitor alangliphan thakdunsi pulo, “Netum komat alongsi kedam-jilangma, Hemphu? Kejut un-e achethe alam hei hei ke nanglongsi do.#Mat 16.16; Mar 8.29; Luk 9.20 69Lapen Kangthir, Arnam pen kevang abang ke nang helo pu nonke netum kroilo lapen chinilo.”#Mat 16.16; Mar 8.29; Luk 9.20
70Jisu thakdunsi pulo, “Nesi nang-tum bangkrehini aphan nang-ingvailo, kalima? Bonta nangtum angbong inut abang ke hi-ilo.” 71Alangli Simon Iskariot asopo, Judas aphansi labangso alam pudamlo. Pima Judasta sangho bangkrehini angbong inut-lo setta alangli Jisu aphan hotur arideng hodaiji dokdok-lo.
Karbi Holy Bible © Bible Society of India, 2010.
Used by permission. All rights reserved worldwide.
