KECHENG 8
8
Langthepi Kejut
1Noah lapen alanglilong telong arlo kedo api atum an aphan Arnam tengnenelang; Alangli tomon pajap-lo, lapen anke lang kethep pangcheng-lo. 2Pirthe alongle arlo pen lang amek an lapen sining angsong langthepi anghap-heihei ingkir-et-lo. Arve ingtonkok-lo, 3lapen ni pharo isira ni phokep an lang kethep apor enlo. 4Throksi achiklo ni kre throksi arni Ararat Anglongpi aren along telong nangsakok-lo. 5Lang nangthep-bomlang, lapen kep achiklo kecheng arni Inglongpi aphuchong-heihei nangklang-lo.
6Ni phlikep arni aphi Noah inghapso ingpulo, 7lapen vo-ak lo pangcheng-lo. La nangchiruiredet-lo, bonta lang hamhetik an la adung-arei kangjar pakongvaibomlo. 8Puthot lang ham loma hamhelangma kelangjisi Noah vothung ejon lothulo, 9bonta lang pirthe kedipthip-bomlang thek-longsi vothung kesangji adim longledet-lo, la puthot telong along chevang-thujuilo, lapen Noah nepdunsi arlo vandet-lo. 10Alangli ni throksi inghongthulo, lapen puthot vothung alangli lo thulo. 11Laso avothung arnikangsam apor alanglilong puthot angho jit arvo angjok ing-omdongsi vanlo. Ansi lang theptang-lo pu Noah chinilo. 12Puthot ni throksi alangli inghongsi vothung lothulo. Laso aphong abang ke la nang-chiruiredet-lo.
13Noah arta ningkan 601 an ahut, kecheng achiklo kecheng arni, lang kreng-lo. Noah telong asarnung oi-lo, lapen lang-lo, lapen longle kekreng thek-long-lo. 14Hini achiklo ni ingkoira throksi arni an pirthe alongle krengpamelo.
15Noah aphan Arnam pulo, 16“Nangpiso, nangsomar atum lapen nangmunpi atum penpen telong pen barnon. 17Achethe kedo, nanglong kedo vo, pi atum, pirthe athak keklim api an pirthe athak kechanjile nang pon-et non, lapen pirthe athak pachanri-pachanjai lonang.” 18Lasi Noah damlo, lapen asomar lapen apiso lapen asomar apiso atum anta damlo. 19Lapen pi ajat an, keklim api an, vo ajat an, lapen pirthe athak keklim api an telong pen achor achor barlo.
Noah Athok Kepajir
20Anke Hemphu aphan Noah isi adovan bui pilo, lapen kangthir-et api ajattin, lapen vo kangthir ajattin, dovan athak athok pilo. 21Lapen Hemphu mesen angnim ingnimlongsi, aning arlo Hemphu chepulo, “Monit pen apot Ne longle aphan ahir-pajunonelo, athema monit aning kemathatap ke ha ok-kengjang ahut pen; Ne keklemtang ason puthot achethe kedo api aphan lang pen pavirvelo. 22Pirthe dotik ke chili kerik apor, lapen kerot-kerim apor, kechung lapen kephang-ok, barla lapen ningkreng, ajo lapen anerlo, dobompo.”
Karbi Holy Bible © Bible Society of India, 2010.
Used by permission. All rights reserved worldwide.
