Luk 24
24
E Iesu e takei poutsia tara tou mate
(Matiu 28:1-10, Mak 16:1-8, Jon 20:1-10)
1Tara bongbong koru turu Sandei ba touhaliou e la uaier tara kiou me söater a manka a man soka haniga ti heroko mameien. 2-3Ba nori ena sabeier a hatu i hategele bane ii a matana a kiou, me la uaier iogana. Kaba nori ima sabe ii a tuenreina e Iesu a Tsunono. 4Nori i tuol ia tara kiou me hakats koru ner a ka teka, ba huol a tson e songots butur me tuol ria i rehiren, u hasobö i taren e kankanaha koru bate lilotona. 5A touhaliou i matout koru, ba nori e tuturukur, ba huol a katuun e poeier i taren, “Aha te sake sile milimiou a katuun a töatöa i gusur u katuun u mate? 6Nonei ema ka neia teka. Nonei e takei hakapa lala. Hakats pouts naiam a ka te ranga meraien limiou tara pöata te kaien i Galili. 7Nonei e pei, ‘Alia tu butun Katunuma egi hala menai turu katuun u omi, ba nori te nila naroua lia tara kuruse, ba lia te takei pouts megu u hatopisana u lan.’” 8-9Ba touhaliou e hakats sabe pouts ner u raranga tere Iesu, me kopis pouts uaier i han mena ranga naria a ka teka tara maloto na töa katunun tsitsilo na tara palai hoboto has. 10A touhaliou teka ere Maria Matalina mere Joana ne Maria, e tsinana e Jemis. Nori mera palair a touhaliou ti ka gono meraien ti ranga merai u aposol a manka teka. 11Kaba u aposol i hengo herenai u ranga tara touhaliou u ranga papala. Ba nori ema hamana ri. 12Kaba e Pita e takei me piata uana tara kiou, ba nonei e hakono uana iogana me tarena u labalaba u hiaka puku. Ba nonei e la pouts uana i han me hakats koru nena a saha ka te butu.
E Iesu e lau i Emaus
(Mak 16:12-13)
13Nonei noa has turu lan ba huol a katuun tere Iesu e la uar tara töa han a solonen i Emaus, e ka halehana hapopo banaia i Jerusalem tara maloto na töa a kilomita. 14Ba nori e hiararanga ner a manka hoboto te butu. 15Pöata ti la noaien, be Iesu e la hasusuku nama me tanian la gono mera nen. 16Nori i tareien, kaba a mataren i hasaha kap ba rai tegi marei menaien nonei e Iesu. 17Be Iesu e poeiena i taren, “Aha te hiararanga nami limiou te tataala mia limiou i maroro?” Ba nori e tuol hakakamotor me mata haharomanar. 18Ba töa i taren a solonen e Kliopas e ranga palise nen, “Alö lahas a töa puku a katununa i Jerusalem tema atei silemi a manka te butu tara man lan te la hakapa?” 19Be Iesu e rangatana, “A man saha manka?”
Ba nori e ranga palise ren me poeier, “A manka te butuia tere Iesu a toun Nasaret. A katuun teka a propet, na nonei e kato a man ranga man tagala na man mirakol has. Nonei a tson hihatuts a tagala i matana e Sunahan na u katuun hoboto. 20U pris pan na u tsunono i tarara i hala naien tegina kato hamate menaien, ba nori e nila narien tara kuruse. 21Alam u hamani: ‘Nonei a katuun temi sakahis poutsir u katunura i Israel.’ Aa, na u lan i romana u hatopisana u lan has i murina te butuia a manka teka. 22-23Na palair a touhaliou tara pala i tamulam i hasingoto raiou lam. Nori i la uu tara kioun mate, kaba nori ima sabe ii u tuenrei i tanen. Ba nori e kopis ruma me poeier nori i tarema u angelo ti hatei raien te töatöa pouts uaien. 24Ba palai tara pala i tamulam e la uaier tara kiou mena tara haseier a manka e marka uu timar ranga uu a touhaliou, kaba nori ima tarei e Iesu.”
25Be Iesu e poeiena i taren, “Alimiou ema hakats hanigami. U hakhakats i tamilimiou ema hasese korunei tego hamana mena milimiou a mamanaka ti rangein u propet i manasa! 26E matskö noa hasina tega sagoho menai e Mesaia a kamits teka bate töan luena a nitsunono i tanen.” 27Be Iesu e hatarare raneien u mamana u raranga turu Buku u Göagono te hatei nanen, e taniama tara man buku te kolotein e Mosis batemi noana tara man raranga ti kolotein u propet hoboto. 28Pöata ti la hasusukuien tara han ti la uaien, be Iesu e hohou la saluhe ranen. 29Ba nori e ranga hapiou meren me poeier, “Ka gono mera moulam. A ka e katsin kuhil hamanasa.” Ba nonei e tasuna mena ka gono mera nen. 30Ba nonei e gum gono mera nen ti katsin nou uaien me luena a beret, me haniga uana tere Sunahan. Ba nonei e poseiena a beret me hala raneien. 31Ba mataren e töan kalatana me alesalana ba nori e mareie ren, kaba nonei e songots taiaia i rehiren.
32Ba nori e hiararanga ria i taren pouts, “U mana, a torirara e sagohe nama te mana uana u raranga i tanen, tara pöata te ranga namen i maroro me hatuts ranei ra u Buku u Göagono.” 33Ba nori e takei hobotor me la pouts uar i Jerusalem mena sabe rer a maloto na töa katunun tsitsilo na palai has ti ka gono meraien. 34Ba nori e poeier tara huol, “A Tsunono e takei hamana lala na nonei e butu has lala tere Saimon!” 35Ba nori a huol e hatei rarien a ka te butuia i maroro, na timar marei menaien e Iesu te pose menaien a beret.
E Iesu e butuia turu katunun tsitsilo i tanen
(Matiu 28:16-20, Mak 16:14-18, Jon 20:19-23, Aposol 1:6-8)
36Ba tara pöata ti hatei naien a manka teka, be Iesu e songots butuna me tuolna i gusuren me poeiena i taren, “A masalohana e tatei ka gono mera nou limiou.” 37Kaba nori i asingoto koru me matoutur. Nori i pei lasi a mate. 38Ba nonei e poeiena i taren, “Aha te toku memi limiou bate hula tori miou? 39Tareiam a man limar na man mour bate mareie miou a peisar. Alia siba! Sebele moulia ba limiou te atei mou. A mate ema ka menei tu benö na tu tsinö te kato uagu lia.” 40Pöata te rangaien ba nonei e haröto raneien a man limanen na man mounen. 41Kaba nori ima hamana noahas ii. Taraha? Nori i sasaala koru me hula hakatsir. Ba nonei e rangata ranen, “Ta kannou e kana?” 42-43Ba nori e hale rien a makumun iena a mösa, ba nonei e lue nen me noue nen ti taraien.
44Ba nonei e poeiena i taren, “Nonei koru a manka teka tu ranga merai lia limiou tara pöata tu ka gono noa meraia lia limiou: a mamanaka ti koloto naia lia tara Lo tere Mosis na tara man buku turu propet na turu Sam ega butu hamana koru.” 45-46Ba nonei e kalatena u hakhakats i taren tegi atei sil menaien u Buku u Göagono, me poeiena i taren, “A manka teka i kolotein: e Mesaia ega sagohi a kamits na ega mate bate takei poutsuna turu hatopisana u lan. 47Na ka teka i koloto hasiin: u bulungana egi hatei la naia turu hun katuun hoboto i puta bate taniana i Jerusalem. Ba u katuun te palis ba ner a man markato a man omi bate hamana uaier tere Mesaia, e Sunahan e tatei luba nena a markato a omi i taren. 48Na limiou tu tara hakapeiam a manka teka ena habulungana namouen turu katuun. 49Hengoiam. Alia e hala nagou a ka te ranga hamanein e Tamar i manasa tegi hala rai limiou. Kaba limiou go hahaloso bumia teka i Jerusalem e antunana te butu nama romana a nitagala i Kolö bate kopo kap ranou limiou.”
E Iesu i lu menai i Kolö
(Mak 16:19-20, Aposol 1:9-11)
50Be Iesu e la mera neien tara taun i Betani, ba nonei e hasoa sei nena a limanen me kalala ranen. 51Pöata te kalala noa raien e Iesu, ba nonei e laba ranen ti lu sei menaien i Kolö. 52Ba nori e hatsunone ren me la pouts mer a nisasaala pan i Jerusalem. 53Na tara mamana pöata nori i kaia i Luman Lotu Pan bate haniga uaier tere Sunahan.
© (Active) Wycliffe Bible Translators, Inc. All rights reserved.
