Luk 20
20
Ime te lama a nitsunono tere Iesu?
(Matiu 21:23-27, Mak 11:27-33)
1-2Turu töa u lan, e Iesu e kaia tara Luman Lotu Pan me hatuts rena u katuun me hatei raneien u Bulungana u Niga. Ba u pris pan na u tson hihatuts tara Lo na u tsunono e la rima me mi poeier i tanen, “Hatei ramou lam, alö e ka mem a saha nitsunono ba lö te katoeiem a manka teka? Esi te hale ii lö a nitsunono?” 3-4Be Iesu e ranga palis ranen, “Alia e rangata has ragoui limiou u töa u harangata. Alimiou go hateie mumou lia, ime te lueia e Jon a nitsunono tega baptais meraien u katuun? Tere Sunahan, tsi tara katuun tuun?” 5Ba nori e hiararanga pouts ria i taren pouts me poeier, “Te pei rouara, ‘E Jon e ka mei a nitsunono tere Sunahan,’ be Iesu te pei nou i tarara, ‘Ga ha tsiponi tu ma hamana memi limiou e Jon?’ 6Na te pei rouara, ‘E Jon e ka mei a nitsunono tara katuun,’ ba u katuun hoboto te titi hatu rariou ra. Taraha? Nori e hamana koruer e Jon a töa propet tere Sunahan.” 7Ba nori e ranga paliser e Iesu, “Alam ema atei silemi ime te lama a nitsunono tere Jon.” 8Be Iesu e poeiena i taren, “Na lia has ema hatei ragou ii limiou esi te hale mei lia a nitsunono balia te katoegu a man toukui teka.”
U haharuei turu katuun u omi ti taratara kapiin a kuin grep
(Matiu 21:33-46, Mak 12:1-12)
9Be Iesu e ranga mera nei u katuun u haharuei teka, “A töa katuun e lebei a kuin grep, be hataratara kap raneien u tsonun kukui grep me hakuin moni nanen, ba hapalana moni e la uana tara katuun terena kui. Ba nonei e la uana tara töa han i lehana mena keiena a pöata a ngahangaha koru. 10Ba i murinen, te tangohoia a kui, ba nonei e hala mena nei a tsonun kui i tanen tara pal tson ti kui ia tara kuin grep. Nonei e ngilin lui ta tsi pala i tanen. Kaba nori i atungeien me tsuge ren ba nonei e lala puku poutsuna. 11Ba katuun terena kui e hala lelena a taina tson kui i tanen, ba nori e atung lel hase ren, me hamatsingole ren, ba nori e hala pukpuku poutse ren. 12Ba katuun terena kui e hala lel nena a hatopisana a tsonun kui, ba u katunun taratarakap e kato hakamkamits hase ren me tsuge ren.
13“Ba katuun terena kuin grep e poeiena, ‘Aha tego kati lia? Alia e hala nagou a pien tson a tsomi i tar. Nori e tatei tara mareie rouen.’ 14Ba nonei ena tukuna tara kuin grep. Nori a pal tson u omi i tareien me hiararangar, ‘A pien tara katuun terena kui teka te lue nou romana a kuin grep. Aragi atung hamatieien, ba kuin grep i tanen te ka uanou i tarara!’ 15Ba nori e lapo ba naren tara kui me atung hamatie ren.”
Be Iesu e rangatana, “Ga katuun terena kui e katoe nou aha turu katuun u omi teka? 16Nonei e la nama romana batemi atung hamate ranen, bate hala mena nei romana a kuin grep turu katuun u niga.” Ba pöata ti hengo naia u katuun a ka teka ba nori e poeier, “U katuun egima tatei kato homi uai teka!” 17Kaba e Iesu e tara uu i taren me poeiena, “Alimiou go hakats naiam u raranga turu Buku Göagono te kato here nanei lia a marats. E markato uana teka:
‘A marats ti raman u katunun hatakei luma bate hapiraka ba ner,
nonei a marats te niga balana tara toukuin luma.’
18“U katuun hoboto te tsia roua tara marats teka e taptapeko riou. Kaba te konena romana a marats teka ta katuun, ba nonei te kono bulbul here nanoien u köahu!”
A takis tere Sisa
(Matiu 22:15-22, Mak 12:13-17)
19U tson hihatuts tara Lo na u pris pan i ngilin pile kap hamanasein e Iesu. Taraha? Nori i atei sil e Iesu e saka raien u haharuei teka, kaba nori i matoutir u katuun. 20Nori i tara kap nitöa nen me hol raier u katuun u gamogamo me hala hamous rari men tegimi tara kap menaien. U katuun teka i gamo me katoeier u harangata u parpara tere Iesu. Nori i ngil e Iesu ega kato tu ranga tegi kout meien bate hala naren tara nitagala tere gamman. 21Ba nori e rangate ren me poeier, “O Tson Hihatuts, alam e atei silem alö a katununa turu mana. Alö e roron hihatuts hamana nem a maroro tere Sunahan. Taraha? Alö e mamala hakats silemi a nikapan turu katuun. 22Bara, alö go ranga mera moulam, e niga hasina tara Lo i tarara tegi takis uu ra tere Sisa, tsi e möa?” 23-24Kaba e Iesu e atei sil u gamo i taren me poeiena, “Hatara nemuma ta denarius moni. A bakune si na solone si te kana i tanen?” Ba nori e ranga palisir, “E Sisa.” 25Be Iesu e poeiena, “Bara, halemi e Sisa a manka tere Sisa, bate hala hasemi e Sunahan a manka tere Sunahan!” 26Nori ima antunan kout mei e Iesu tu töa tu ranga tu omi teka i matar u katuun, ba nori e asingoto koru ner te ranga palis haniga uaien me kakamotor.
Pöata te töatöa pouts ria romana u katuun
(Matiu 22:23-33, Mak 12:18-27)
27U palair u Sadiusi i la uama tere Iesu. Nori u katuun ti pei e möa ta tou takei pouts tara tou mate. 28Ba nori e poeier tere Iesu, “Tson Hihatuts, e Mosis e mar koloto menai a Lo teka i manasa: ‘Te mate ba nena a tson a tahol i tanen bate möana ta pien, e toulanen ega töli a amoaba ba nori te hatuhaner ta pien ga butu be a tson te mate.’ 29Bara. E kamei a tohit u mun toulana i ka. Ba hamua e hitöluna, me matena kaba ema hatuhane ii ta pien. 30Ba hahuol e töl lelena a tahol a amoaba mena mate hasina bate möa noahasina ta pien. 31Te mar kato has uaien tara hatopisa na turu munmun toulana hoboto teka. Nori i mate hoboto bate möar ta pien. 32Ba i murinen ba tahol e mate hasina. 33Na tara pöata te takei pouts ria romana u katuun tara tou mate i taren, ga tahol teka e tahol koru uana romana teresi? Taraha? A tohit hoboto u muntoulana ti töleien!”
34Be Iesu e ranga palis ranen, “A pal tson na touhaliou e hitöl ria i puta teka. 35Kaba pal tson na touhaliou te haniga rena e Sunahan te tatei takei poutsur romana tara pöata i murimuri, nori ema hitölri romana. 36Na nori ema mate lel has roui romana. Taraha? Nori e here roui u angelo tema tatei materi. Nori a galapien tere Sunahan te hatakei raria romana tara tou mate. 37Na e Mosis e haröto haniga koruni te takei pouts uaier romana u katuun ti mate bate töatöar. Turu raranga turu Buku u Göagono e hatei nena u ruei te kulupu, e Mosis e rangein a Tsunono me ngöe neien, ‘E Sunahan tere Abraham, ne Sunahan tere Aisak, na e Sunahan tere Jekop.’ 38A ka teka e ranga nena nonei e Sunahan uana turu katuun te töatöar. E ma Sunahan uanei turu katuun u mate. Taraha? I matana e Sunahan, nori hoboto e töatöa noar.” 39Ba palair u tson hihatuts tara Lo e ranga palisir me poeier, “U ranga palis u niga, o Tson Hihatuts!” 40Nori i raman rangata lele ii e Iesu tu harangata.
E Mesaia a pien teresi?
(Matiu 22:41-46, Mak 12:35-37)
41Be Iesu e poeiena i taren, “Gaha te poei sila naria e Mesaia a hatutubunei tere Devit? 42-43E Devit noa has te poei turu buku turu Sam:
‘A Tsunono e poei tara Tsunono i tar,
Gum ia tara pal matou i tar,
e antunana te katoe goii lia u katuun te paköe riou lö
u kaan tötö i tamölö.’
44“E Devit e ngöe ii e Mesaia ‘A Tsunono.’ Gime temar hatubuna uana e Mesaia tere Devit?” Kaba e möa ta katuun tega ranga palis.
Hanei sil raiam u tson hihatuts tara Lo
(Matiu 23:1-36, Mak 12:38-40)
45-46Pöata ti hengo hobotoia u katuun i tanen, be Iesu e poeiena turu katunun tsitsilo i tanen, “Hanei sil raiam u tson hihatuts tara Lo. Nori e ngilin hula la nitöa meier u hasobö pan u ngahangaha i taren, bate ngil koruer u katuun egi hapan raien tara töana. Na nori e ngil koru haser egi gum ia turu gumgum u niga i matar u katuun iahana luman lotu na turu gumgum has tara pal kapan tara kannou. 47Nori e roron katoeier u singona turu lotu u ngahangaha turu rung tuun, bate lu tsipon beri a peisaren a manka turu amoaba. Kaba nori e lueier romana a nihahuna pan koru.”
© (Active) Wycliffe Bible Translators, Inc. All rights reserved.
