MATIUS 3
3
Puyan denga Yaya Guru Batis
(Un te neng Markus 1.1-8; Lukas 3.1-18; Yaya 1.19-28)
1Ngajan udip inaʹ nai Yaya Guru Batis nading pedenga katuk Tuhan neng tanaʹ lenga kaʹ tanaʹ Yudia. 2Un dau Yaya: “Nyepuleʹ ne kimet cem cen penyalaʹ kem. Abeʹ e majan laʹa kenai luhaʹ ne puyan pengaren Tuhan Allah ke ngaren ilu kelunan.” 3Un dau isiu pegawa Yesaya cen naʹaʹ sihoʹ neng puyan Yaya, iaʹ pekini dau ue:
“Un ca kelunan iaʹ ngelengap kaʹ tanaʹ lenga.
Un dau ue: ‘Petenup ne janan me Tuhan.
Petelit ne janan ukoʹ kenai ie.’ ”
4Un gelam Yaya cen bulu pun unta, ngan seketeng nge anit pun. Ngan penguman ne pahu ngan nyihoʹ layuk. 5Nai dulu cen lepoʹ Yerusalim ngan cen tanaʹ Yudia peging ngan ketoʹ dale pipa sungai Yardin. Nai re nuʹa Yaya Guru Batis. 6Kelunan dina are, ngahaʹ badaʹ puyan penyalaʹ de, sulo Yaya ngebatis ida kaʹ sungai Yardin.
7Dalau ina kun Yaya taʹan kadoʹ kenai kelunan Perisi ngan kelunan Seduki nai palaʹ ia, ke cuk ia ke ngebatis ida. Un dau Yaya neng ida: “Ikem diaʹ kimet ncung ulai, aheʹ iaʹ badaʹ mikem iaʹ un janan ncem senteng ke takau cen kenca Tuhan Allah iaʹ ke nai ʹo? 8Uyan ne pemuyan iaʹ ke badaʹ ban ncem lepa nyepuleʹ kimet cem cen penyalaʹ kem. 9Ayen ngata kuma ikem senteng ke peteneng puyan ncem man isiu hem kuma: ‘Ibrahim ina tepun meʹ.’ Akeʹ badaʹ mikem, Tuhan Allah senteng ke uyan mela Ibrahim cen batu dini. 10Asai lepa tenup neng puʹun kayu. Ketoʹ inan buaʹ iaʹ abeʹ un ke un buʹan iaʹ tiga, dulu ke nepeng nge ngan pet te kaʹ luten. 11Akeʹ ngebatis ikem man sungai, ke nedanaʹ ikem lepa nyepuleʹ kimet cem cen penyalaʹ kem. Ban ne un ca iaʹ kenai bayaʹ akeʹ ini ʹo, ia iaʹ ke ngebatis ikem man Berua Buheʹ ngan luten. Ia iaʹ atek bioʹ neng ʹo akeʹ, di pe ke ngkang sepatu ue, abeʹ pe akeʹ tekep. 12Un koʹ baʹan ca tapan are neng ujoʹ o, petenup ke napan mung padai ie. Padai ie ia ke pempun kaʹ dalem lepubung. Un sepe tang nge ia ke nutung kaʹ luten iaʹ abeʹ un tisen tai pataʹ.”
Yaya ngebatis Yesus
(Un te neng Markus 1.9-11; Lukas 3.21-22)
13Dalau ina, tai kun Yesus puke cen lepoʹ Galilia, tai palaʹ Yaya Guru Batis kaʹ sungai Yardin, apan Yaya ke ngebatis ia. 14Un sepuʹo Yaya ten ke ngaliu kimet Yesus man isiu iaʹ pekini dau: “Akeʹ iaʹ tekep ikoʹ ke ngebatis. Inu adeʹ akeʹ iaʹ ikoʹ cuk ke ngebatis ikoʹ?”
15Un dau Yesus mipa Yaya: “Talan ne. Inu pia pekini naʹkini, uban kuʹun puyan iaʹ pekini tua ke bayaʹ dau mung pengubaʹ Tuhan Allah.”
Sulo Yaya mayo dau Yesus. 16Lepa Yaya ngebatis Yesus, sulo Yesus pejakaʹ nai kempau cen sungai ina. Beliau pesik ne langit me Yesus, sulo ho taʹan kenai Berua Buheʹ cen mpau, koʹ baʹan puyan ca sui garaʹ are, penco ngedung neng Yesus. 17Uʹo ina un dau ca isiu cen langit iaʹ pekini dau ue: “Ini ne Anak keʹ iaʹ pengemalaʹ keʹ, ngan ia lete iaʹ atek sihoʹ neng pengubaʹ keʹ.”
Kenyah New Testament © Bible Society of Malaysia, 1984.
