ZLI VIRZI 15
15
Buymisemuŋ mujumˀay ati Abram
1A dirba gwat tayna migam na, Bumbulvuŋ a biga vu da Abram ar musuwun, a ɓaŋ na: «Ki zluwun ta Abram, yi mbaray ɗiki, i sa vuluw migir ɗike haɗi.» 2Abram a mbiɗaŋ di: «Bumbulvuŋ Buymisemuŋ ɗu, kisa vuliy mike? Vi ɗu ara cuh, ki vuliy yi ta, yo masa zuma hay ɗu i gawla ɗu Eliyezer ngi Damas.» 3A ɓi ma: «Ani ki vuliy yi ta, i mbur ngi wuzla mizli ngi hay ɗuwoy masa zuma hay ɗu.» 4Dar Bumbulvuŋ a ɓaŋ so na: «Masa zuma hay ɗik i Eliyezer ta, amma i mbur masa bo ti kwacay ɗik masa zuma hay ɗike.» 5A bo ti Abrama ng'avra, a ɓaŋ: «Singila muŋ, slufa wurzlaŋhay na, da ki slufa taŋ gu kwani.» Dar a ɓaŋ ma: «Dideˀ ɗikey a sa jam haɗi kahana ya.» 6Abram a tiɓa Bumbulvuŋ le, vurˀe, Bumbulvuŋ a puraŋ i mbur mijeŋŋe a mbuŋ naŋ. 7Buymisemuŋ a ɓa Abrama na: «I ya Bumbulvuŋ mubo ti ka ti Ur, hirwuy Babiloŋ, ɓa i vuluw hirwuy hana, a ndir da ka.» 8Abram a mbiɗaŋ di: «Bumbulvuŋ Buymisemuŋ, i sa si na a vi mi, a sa ndir da ya vuna ka?» 9Bumbulvuŋ a ɓaŋ: «Siy ti sla bulkoŋ ngi vi makir, ˀaw ngi vi makir, zlengerek ngi vi makir, gonok waɗ zuŋ ɗiyuw dirgwaɗ.» 10Abram a saŋ taŋ gar, a wursla taŋ a wuzla cuw cuw, a pa taŋ kuɓ kuɓ, pulaˀ ng'ar cala, pulaˀ ng'ar cala, wala taŋ faw faw, a wursla ɗiyuwoyo ta ɓula. 11Mogodokoy a ndilam vu ar maarahay tuwa, amma Abrama a ɓula taŋ. 12Hirak ti pas madiɗ na, hinje bebezem a zlumbura Abrama wuɗ wuɗ, a zla a zluwun haɗi, yo luvuŋ mititim titim magi zluwun, a sirtaŋ ngbulum. 13Buymisemuŋ a ɓa Abrama: «Sina kuy kuy, dideˀ ɗikey a sa cifam a ruwuy mulak, a sa tiram taŋ beke a diga, a sa guzuvuraka taŋ hã vi skat skat mufaɗa. 14Amma sukwi nah, mitiri beke ti dideˀ ɗikey vuna, ya misa kutaŋ le ti bonoy na, a dirba nah a sa bam, a cohom ti zlili haɗa. 15Amma ka, a dirba ka muzum ɗaf le zuy zuy na, kisa muc ti jam, ki ra luuma dideˀ ɗikeye. 16Dideˀ ɗikey a sa moko ng'aka sey dideˀ mukutur ti kutur mufaɗ. Asi moˀore mukuyta wãˀ ngi Amoriheye, a ndila ɓa hã i ɓula taŋ avra t'aruŋ.» 17A dirba pas midiɗ na, luvuŋ a gi titimtitim. Neˀ na, magayak misi irne vu njilim njilim waɗ cunju, a cuh ti wuzla useˀ muwursluka tuwa. 18Tapas nah na, Bumbulvuuŋ a jumˀay ati Abrama: «Hirwuy misenna zle a mizaw Ezipte hã sesẽŋ a mizaw madiɗa mazilaka Efrat na, yi sa vula da dideˀ ɗikey. 19I hirwuy ngi Kenihey, ngi Kenizihey, ngi Katmonihey, 20Hitihey, Perizihey, Refayihey, 21Amorihey, Kanaˀanay, Girgasihey waɗ Zebusihey.»
Bible en Langue Guiziga © L’Alliance Biblique du Cameroun, 2011.
