Masmur 10
10
Amisye anajo indamu Po wansapaya irati vatano mamune mai
1Sya AMISY, mbe animaibe winggwaravainyo reansai?
Muno Nyo reansaene jewen arono reana ana nsosobe rai?
2Weye vatano mamun mararine wo vatano matawanto mawatan tutir,
weti koveamo awa ana wo ratantona ti mamuno reansai mo taune makep.
3Weye vatano mamune umararino awa ubekere obo rai,
vatano utantunaube wo AMISY aura tantunawi muno wo kakai ratoro Ai.
4Vatano mamune umaso nawamo mansamuno mararine obo raen dirive mai,
weti wo Amisye akani jewen.
Wo ratantona ware Amisye pamo no ramu.
5Vatano mamune umaso awa anakotaro wo raijare mamo ama ine raen kobe.
Amisy Nya patimu moyare mamo ntiti rave, weramu onawamo unanta rai jewen.
Wo vatano matawanto umaso#10:5 vatano matawanto umaso: ayao Ibrani maisyare so: ‘‘awa marova.’’ Vatano matawanto so nawirati vatano mamune awa marova nanawije. matantona daradambe vayave.
6Wo raura no manuga, ware: ‘‘Risyamo inanto ana nsosobe inta rai ramu.
Ana ngkakai mamo inta nande rinai jewen ntoa nuge nuganui.’’
7Mawa mamo ntairi anaamatane,#10:7 Roma 3:14 anapamponae, muno ukantetoaro ayao rai,
manatantonave kakai rai me, ubekero wo vatane mave pabe obo mi wayao dai tutir.
8Ukaokaibe no kampo rai janyi indamu maroyaro vatane mai,
no varoro maninimbe ukaokaibe ri we, wo vatano ayao kakai meweno mai maubaisy bayave.
Wo vatano umayondi manyanyuti tutir.
9Onawamo maisyare make sivuinye#10:9 make sivuinye ranigwano ‘‘singa’’ rai. wemaisy,
ukaokaibe no insumai uga indamu wo vatane mansaman.
Wo mansaman indamu wo vatano umayondi maijar,#10:9 Ayao Ibrani maisyare so: ‘‘aijar no ename rai.’’ Weti ama ananeneae maisyare jiane raugav no ename rai muno ugeye aijar no aviri rai.
wo vatano mayondi maijar muno wo mansararambe ti uta.
10Maisyare make akiri mona ntararai ti pare pirak da po natao wemaisy,
onawamo ubambunin dave, ti wo vatano mayondi mataopon muno wo marisyi.
11Vatano mamune umaso wo ratantona no manuga, ware: ‘‘Amisye pamo animari wama ana wandave rai to!
Somaisyamo amije ntatuvi ti merere nto mamo, Po wansaeno rai ramu.’’
12AMISY, sya Amisy, syare mbeseo ra Nyo mangke raugaje vatano mamune mai,
yara naemeno vatano matawanto mai!
13Mbe animaibe vatano mamune wo Amisye aura tantunawi tutir,
muno wo raura no manuga ware Amisye pamo Po makewabe awa ana udave rai ramu!
14Weramu Winyo raen to, weye Winyirati vatano umayondi wakare usaroro Nai,
muno Winyirati Nyo arikainyo wawate mansayaranande.
Winyo awa siuri muno mansanuga njorame raen to,
indamu winanembe mai jakato.
15Nyo vatano mamune nawe, vatano awa ana udave ngkakainoanive awa vambunine radaut,
Nyo mansakewabe awa udave ti ngkakai rai vintabo muno Nyo mansopi rai.
16AMISY Wepi be Akari titive tutira ntoa nuge nuganui.
Susyo wanave Ai jewene nawamo indati Po maupaeta irati Apa munije rai.
17Sya AMISY, Winyirati Nyo vatano matawanto awa ana udanajo raraniv,
muno namarikoame rasakinavo mai muno Nyo mansanuga raijaseo ra mbambunin.
18Nyo patimu moyare raugaje arikainyo wawate muno vatano matakarasyo mai,
indamu vemo vatano mine so inta seo po vatano umayondi mave yanibe akato inya.
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)