Lukasi 3
3
I Yohane Mpupodolo
1Ai taꞌu hopulo ka olimo tendamo pomparentano i Datu Langkai Tiberiu, tempono i Gubenuru Pontiu Pilatu gagi kapala daera ai Yudea, i Datu Herode momparenta ai wute Galilea. I Pilipu petiano i Datu Herode momparenta ai wute Iturea ka Tarakoniti, ka i Lisania momparenta ai Abilene. 2Henu gagi Petewawo Pesomba Langkai ooto i Hanasi ka i Kayapa. Ai taꞌu laꞌa Ue Ala mepau ndi Yohane anano i Sakaria ai konde one. 3Lumeko i Yohane tumondaꞌo wute wiwi korono Yarade ka pauꞌo oliwiRo Ue Ala. I Yohane kokora-kora, “Mentesisito umbu ai winowaumiu henu mosaꞌa ka peweangakeoto koroimiu dinolo, ka Ue Ala minggi umoninio halamiu.” 4Mbio henu winowauno i Yohane menggena henu teꞌuki ai surano nabi Yesaya,
“Nio mia kokora-kora ai konde one,
Palenaꞌoto sala tiaRo i Ue, pokomomoliꞌo sala tiaRo.
5Lowono bangkano minggi hinowui,
lowono tamungku ka mungku pinoko melembo.
Sala henu monggedo-nggedo pinokomomoli,
ka sala henu mebingkoso hinowui.
6Lowono mia aso wawontolino minggi sumueꞌo
Mpupongkadudui umbu ndi Ue Ala!”
7Orao mia hawe moꞌema karo dinolo. I Yohane mepauꞌakero, “Ikomiu mia henu mosaꞌa gaumiu menggena ule meꞌeto! Ainei motae ikomiu telipahako umbu podosaRo Ue Ala henu amba ramai? 8Pokoꞌenaho ai laro tinuwumiu bano ikomiuto tesisi umbu winowaumiu henu mosaꞌa. Indo koaraꞌaraa, ikomiu lano dinosa akono ikomiu inuleno i Burahima. Pewowoloꞌo, umbu ai wasu-wasu nie Ue Ala poli mowowau mia gagi inuleno tiano i Burahima. 9PodosaRo Ue Ala menggena ndamu henuto tepalena minggi pontuehi kau hawe ai haka-hakano. Lowono kau henu lano moiko wueno minggi tinuehi ka sinunu.”
10Mia orao mpesikeno ndi Yohane, “Gagi mbiokee kimpowowau?” 11Sumangki i Yohane, “Mia mompeꞌue oruo kalambino, weeꞌakeo aso mia henu tainio kalambi, ka mia henu orao kaangano tia-tiaꞌo ndi mia henu tainio kaangano.” 12Toposima mboꞌu hawe ndi Yohane moꞌema dinolo, rompesikeno “Guru, mbiokee kimpowowau?” 13Sumangki i Yohane, “Indo poꞌema torea umbu henu pinatantu.” 14Nio mboꞌu sorodadu mesikeno, “Helinde menggena ikami? Mbio henu kiwowauo?” Sumangki i Yohane, “Indo rukuhio baineitokaa, indo porukuhi ako pau lano mentee. Sangka oto umbu ai gadimu!”
15Tempo laꞌa orao mia momperorohi kaa kosike-sikeno menteekee i Yohane Datu Pongkadudui henu romeꞌeꞌemango. 16Oto kano potae i Yohane ndi umboro, “Iaku dumolo komiu ako uwoi, kanggo minggi hawe mia henu takau langkai pabawaNo kaseko iaku. Sekonopo mowowo onggono sipatuNo mboꞌu iaku lano koono. Umono minggi dumolo komiu ako Penao Mempori ka apui. 17Ai kaeNo nio duku minggi dumukuꞌo pae hawe moroa. Pae henuto moroa minggi nonaaꞌo ai tuꞌora, kanggo ota olo sinunu ai apui henu lano huru maate!”
18I Yohane mompowea orao oliwi mesueno, kaa paleleꞌo Kareba Moiko ndi mia orao. 19I Yohane tumeguruꞌo i Datu Herode akono norampasio i Herodia somborino petiano ka mboꞌu akono mowowau gau mosaꞌa henu mesue. 20Kanggo i Datu Herode notambaio mboꞌu halano, nopondamoho i Yohane ai laro tarungku.
I Yesu dinolo
21Masano lowono mia siire umari medinolo, i Yesu mboꞌu hawe kano dinolo. Ka tekonaiNo mekakai langi tewungge, 22ka Penao Mempori metii ai wawoNo menggena manu-manu marapati. Ka terongoi pauRo Ue Ala motae, “Ikoto AnaNggu henu Kupehohawaꞌo. Ikoto henu mokomangaꞌuo aroaNggu.”
Petondano ue mpuꞌu i Yesu
23Tempono i Yesu pamulaꞌo anggaꞌano, baraꞌura tolupulu ntaꞌuno. Motonda pohawero mia, Umono anano i Yusupu. Yusupu anano i Eli, 24anano i Matati, anano i Lewi, anano i Malaki, anano i Yanai, anano i Yusupu, 25anano i Matika, anano i Amosi, anano i Nahumi, anano i Heseli, anano i Nagai, 26anano i Maati, anano i Matika, anano i Simei, anano i Yoseki, anano i Yoda, 27anano i Yohana, anano i Resa, anano i Serubabe, anano i Sealitie, anano i Neri, 28anano i Malaki, anano i Adi, anano i Kosami, anano i Elimada, anano i Ere, 29anano i Yesua, anano i Eliese, anano i Yorimi, anano i Matati, anano i Lewi, 30anano i Simeo, anano i Yahuda, anano i Yusupu, anano i Yonami, anano i Eliaki, 31anano i Melea, anano i Mina, anano i Matata, anano i Nata, anano i Daudi, 32anano i Isai, anano i Obe, anano i Boasi, anano i Salamo, anano i Nahaso, 33anano i Abinada, anano i Adimini, anano i Arini, anano i Heseroni, anano i Peresi, anano i Yahuda, 34anano i Yako, anano i Isaki, anano i Burahima, anano i Tera, anano i Nahori, 35anano i Serugi, anano i Rehu, anano i Pelegi, anano i Ebere, anano i Salamo, 36anano i Kenani, anano i Arapasa, anano i Semu, anano i Noha, anano i Lameki, 37anano i Metusala, anano i Heno, anano i Yaredi, anano i Mahaleli, anano i Kenani, 38anano i Enosi, anano i Seti, anano i Adama, anaRo Ue Ala.
©2025 Yayasan Kartidaya Sahabat Indonesia
