प्रेरित 1
1
येशूको स्वर्गरोहण
1प्रिय थियोफिलस, मिर पहिलो किताबमे मए तुमके बे सब बातके बारेमे बताओ जो येशू करन और कहानके सुरु करी। 2येशू परमेश्वरद्वारा स्वर्गमे उठाए लैजानसे पहिले अपने चुनेभए चेलनके पबित्र आत्माकी मदतसे आज्ञा दइ। 3येशूके दुख उठान और मरनके बाद बहुतसे पक्को प्रमाणसे अपनएके जिन्दा हओं कहिके दिखाइ। और चालिस दिनतक बा अपनो चुनेभए चेलनके दिखाइ देत रहो, और परमेश्वरकी राज्यकी बात करतए रहो।
पबित्र आत्माकी प्रतिज्ञा
4एकचोटी जब बे एकए सँग रहएं, तओ येशू चेलनसे भेँटके उनके आज्ञा दइ, “यरूशलेम सहरसे कहुँ मत् जैयओ, पर बो बरदानके आसरा करियओ जो मिर दौवा तुमके देनके प्रतिज्ञा करी रहए।” 5काहेकी बप्तिस्मा देन बारो यूहन्ना त पानीमे बप्तिस्मा दइ हए, पर थोरी दिन पिच्छु परमेश्वर तुमर सँग रहनके ताहीं पबित्र आत्मा पठाबैगो।
6अइसियए, पच्छु जब येशूसे चुनेभए चेला दुबारा येशूसे भेँट भए तओ बे बासे पुँछीं, “हे प्रभु, का इस्राएल देशके स्वतन्त्र करन और हमर राज्यके फिरसे बनानके ताहीं तुम्रो समय आइगओ हए?” 7येशू बिनके जबाफ दइके कही, “बो समय या बे चीज कब होमंगी कहिके जाननके सिरफ मिर दौवाके ठिन बोकी फैसला करनके अधिकार हए, जा तुमके जाननके जरुरी नाए हए। 8पर जब पबित्र आत्मा तुमरमे आबैगो तओ तुम शक्ति पाबैगे, और तुम यरूशलेम सहरमे और पुरो यहूदिया परदेशमे और सामरिया परदेशमे और बाँकी पुरो संसार तक आदमीनके मिर बारेमे बताबैगे।”
येशूको स्वर्गरोहण
9इतका कहिके येशूसे चुनेभए चेला येशूके देखतए देखत परमेश्वर बाके स्वर्गमे उठाए लैगओ, और एक बद्रिके कारण चुनेभए चेला बाके औ नाए देख पाइं। 10और जब येशू जात रहए तओ चेला बादर घेन देखत रहएं, तओ अचानक दुई आदमी सेते लत्ता पैँधेभए उनके ठिन आएके ठाणीगए। 11और बे कहीं, “हे गालील परदेशके आदमी, तुम काहे ठाणके बादर घेन देख रहेहओ? जहे येशू, जौनके परमेश्वर तुमर ठिनसे स्वर्गमे लैगओ हए। ठिक जहे कता दुबारा आबैगो, जैसे तुम अभए बाके स्वर्गमे जात देखे हओ।”
सामुहिक प्राथना
12जब स्वर्गदूत चलेगए तओ येशूसे चुनेभए चेला जैतून कहान बारो पहाडसे यरूशलेम सहरमे लौटे, जो यरूशलेम सहरसे पबित्र दिन, लगभग एक किलो मिटरकी दुरीमे रहए। 13और जब यरूशलेम सहरमे पुगे तओ बे घरको उपरको कोठामे गए। जो आदमी हुवाँ उपस्थित रहएं, बे जे रहएं; पत्रुस, यूहन्ना, याकूब, अन्द्रियास, फिलिप और थोमा, बारथोलोमाइ और मत्ती, अल्फयसको लौंणा याकूब और उग्रपन्थी दलको सिमोन कनानी और याकूबको लौंणा यहूदा रहएं। 14जे सब और हुवाँ औ बैयर रहएं जौन येशूके मदत करी रहएं, और येशूकी अइया मरियम और बाके भइया सँग, मनमे एकए उदेश्यके साथ एकजुट हुइके प्राथना करत रहएं।
मतियासके चुनी
15और बे दिनमे पत्रुस, बिश्वासी ददाभइयनके बीचमे पत्रुस ठाणो (जो लगभग: एक सओ बीस बिश्वासी इकट्ठा रहएं) और कही, 16“बिश्वासी ददाभइया, पबित्र आत्मासे बहुत समय अग्गु राजा दाऊदके द्वारा यहूदा इस्करियोतके बारेमे बताओ गओ रहए, जोकी येशूके पकणान बारे आदमीनको अगुवा बनोगओ। जा जरुरी रहए, कि यहूदाके बारेमे पबित्र-शास्त्रमे लिखो भओ पुरा होए। 17बो त हमरीए कता प्रभुको बाह्र चुनेभए चेला मैसे एक रहए। और हमरीए कता प्रभुको काम करन बो फिर चुनो गओ रहए।
18जैसे कि तुम जानत हओ, यहूदा अधर्मसे कमाओ भओ रुपैयासे एक खेत खरीदी। बहे खेतमे बो अपनए फाँसी लगाएलै और बोको शरीर जमीनमे गिरिगओ और बोको पेट फुटके आँती निकरीगए। 19यरूशलेम सहरके आदमी जाके बारेमे जानीगए, और जहेमारे बे आदमी बो ठाउँके अपनी भाषामे ‘आखेल्दामा’ कहान लागे। जाको अर्थ हए ‘खुनको खेत।’ 20काहेकी दाऊद भजनसँग्रहके किताबमे लिखी हए,
‘बोको घर उजड जाए,
और बोमे कोइ नाएबैठए।’
और जा फिर लिखो हए,
‘कोइ दुस्रे आदमी बोको पद लैलेबए।’”
21-22बहेमारे जा जरुरी हए, कि एक अइसो आदमीके चुनो जाए, जो प्रभु येशूको करोभओ कामके हर समय गवाही देबए। और प्रभु येशूके यूहन्नाके माध्यमसे बप्तिस्माके दिनसेलैके येशूके स्वर्गमे उठाओ लैजानके दिनतक, जा आदमी हमर सँग प्रभु येशू मरके फिरसे जिन्दा भओ हए कहिके गवाही बनए।
23तभीमारे बिन मैसे दुई नाउँ प्रस्तावमे धरीं: एक बारसाबास कहान बारो योसेफ जौनके युस्तस कहात रहएं और दुस्रो आदमी मतियास रहए। 24बे अइसे प्राथना करीं, “सब आदमीको ह्रदयको बात जानन बारो प्रभु, जे दुई मैसे तुम कौनके चुनेहओ सो हमके दिखाएदेओ, 25और बो जा सेवा और ख्रीष्टसे चुनेभए चेलाको पद लइ, जोसे मुक्ति हुइके यहूदा इस्करियोत अपनो नियुक्त करो भओ ठाउँमे चलो गओ” 26तओ बे दुईके बीचमे चिट्टा डारीं, और चिट्टा मतियासके नाउँमे निकरी गओ, और अइसियए बे एघार चुनेभए चेला सँग बो गिनोगओ।
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
