Лука 22
22
(Мт 26:2-5; Мк 14:1-2; Ин 11:45-53)
1Эһээбэригүй Хилээмэнэй Һайндэр, ондоогоор хэлэбэл Паасхын һайндэр дүтэлжэ байгаа. 2Түрүү санаартан, Хуули заадаг багшанар арад зонһоо айжа байһан дээрэһээ Иисүүсые нюусаар алаха арга бэдэржэ байба.
Иуда Иисүүсые барижа үгэхөөр болоно
3Арбан хоёр шабинарайнь нэгэн Искариот гэгдэдэг Иудын досоо сатана ороһон байгаа. 4Тиимэһээ тэрэ Иисүүсые хайшан гэжэ барижа үгэхэ тухайгаа түрүү санаартан болон харуулай дарганартай зүбшэхэеэ ошобо ха. 5Тэдэнь ерэһэндэнь ехээр баярлажа, Иудада мүнгэ үгэхэбди гэжэ амалба. 6Тиигээд тэрэ Иисүүсые хүнэй үгыдэ барижа үгэхэб гэжэ үгэеэ үгөөд, таарамжатай нүхэсэл харгалзадаг болоо.
Шабинар һайндэрэй шэрээ заһана
7Эһээгдээгүй хилээмэнэй һайндэр боложо, Һүмэдэ Паасхын хурьга гаргаба.
8– Ошожо, хамта эдихэ Паасхын хоол бэлдэгты, – гэһэн даабаритайгаар Иисүүс Пётр Иоанн хоёр шабияа эльгээбэ.
9– Хоол хаана бэлдэхэбибди? – гэжэ һурахадань, 10Иисүүс хэлэбэ:
– Иерусалим ороходотнай, домбо соо уһа абажа ябаһан хүн дайралдаха, тэрэниие дахаад ябаарайт. Тэрэ хүнэй ороһон гэртэ ороод: 11«Багшамнай шамда эльгээгээ. Шабинартаяа хамта Паасхын хоол ямар таһалгада барихабибди?» – гэжэ гэрэй эзэнһээ асуугаарайгты. 12Тэрэтнай танда ехэ уужам, зохидоор түхеэрэгдэһэн таһалга дээдэ дабхарта харуулжа үгэхэ. Тэндэл шэрээгээ заһагты.
13Хоёр шабинь ошожо, Иисүүсэй хэлэһэн бүхы юумые оложо, Паасхын хоол бэлдэбэ.
Эзэнэй Үдэшын хоол
14Һайндэрлэхэ саг ерэжэ, Иисүүс арбан хоёр элшэнэртэйгээ хоол барихаяа һууба. 15Иисүүс шабинартаа хэлэбэ:
– Ехэ зоболондо орохынгоо урда тээ Паасхын энэ хоол таанартаяа барихые Би тон ехээр хүсэһэн байнаб. 16Юуб гэхэдэ, Бурханай хаан ороной оршотор Би Паасхын хоол дахин барихагүйб гэжэ хэлэхэ байнаб.
17Иисүүс аяга абажа, Бурханда баяр баясхалан хүргөөд:
– Таанад энээниие хубаагаад уужархигты. 18Энээнһээ хойшо Бурханай хаан ороной оршотор үзэмэй дараһан архи уухагүйб гэжэ таанадтаа хэлэхэ байнаб.
19Иисүүс зүһэм хилээмэ абаад, Бурханда баяр баясхалан хүргөөд, хилээмэеэ хухалаад, шабинартаа хубаажа үгэхэ зуураа:
– Энэ танай түлөө үргэл болохо бэемни гээшэ. Намайе дурсан энээние эдижэ байгаарайгты, – гэжэ хэлэбэ. 20Хоол бариһанайнгаа һүүлдэ Иисүүс үзэмэй дараһан архитай аяга абаад хэлэбэ:
– Энэ аяга болбол танай түлөө адхарха Минии шуһаар баталагдаһан шэнэ хэлсээн гээшэ. 21Намайе барижа үгэхэ хүн энэ шэрээдэ Намтай хамта һууна. 22Хүн түрэлхитэнэй Хүбүүн уридшалан заяагдаһан ёһоор ами наһаа үгэхэнь, зүгөөр Тэрэниие барижа үгэһэн хүн аймшагтай гай зоболон амсаха.
23Шабинарынь:
– Хэмнай багшадаа урбахань гээшэб? – гэжэ бэе бэеһээн һураба.
Хэмнай агууехэб гэһэн зүрилдөөн
24Тэдэнэр эгээн агууехэмнай хэн бэ гэжэ хоорондоо арсалдажа оробо. 25Иисүүс хэлэбэ:
– Бусад арадуудай хаашуул албатанаа зонхилжо байдаг, һүр хүсэтэй засаглагшад өөһэдыгөө улад зоной нүхэр гэжэ нэрлэдэг. 26Харин таанад тэдэниие бү һажаагты: таанадай агууехэтнай эгэл юрын хүн байха ёһотой; хүтэлэгшэтнай зарасада адли байха ёһотой. 27Хүнүүд хэниие дээгүүр гэжэ тоолодог бэ, хоол барижа байһан хүниие гү, али тэрээндэ заруулжа байһан хүниие гү? Хоол барижа байһан хүниие шухала гэжэ бододог бэзэ даа! Харин Би танай дунда зарасада мэтэ байнаб. 28Таанад булта Минии зоболон амсахада Намтай байһан хүнүүд болонот. 29Хаандал адли захирха эрхэ Эсэгымни Намда үгэһэндэл адли Бишье таанадта хаандал адли захиржа байха эрхэ үгэнэб. 30Таанад хаан орондомни шэрээдэ һуугаад, Намтай эдижэ, уужа байхат. Таанад хаан шэрээдэ һуугаад, Израилиин арбан хоёр угсаатаниие шүүбэрилхэт.
Иисүүс Пётрой арсаха тухай уридшалан хэлэнэ
31Тиигээд Иисүүс хэлэбэ:
– Симон аа, Симон, шагна даа намайе! Таряашанай орооһо һагшан мэхиинэһээ илгадагтал адляар шолмос хүн бүхэнииетнай туршажа шалгаха эрхэ өөртөө шаардаба. 32Гэбэшье, Симон, һүзэгэйншни буурахагүйн тула Би зальбарааб. Тиигээд ши Намдаа бусажа ерэхэдээ, аха дүүнэрээ зоригжуулан батадхаарай!
33– Эзэмни, би Тантай хамта түрмэдэшье орохоор, ами бэеэшье үгэхөөр бэлэнби! – гэжэ Пётр Иисүүстэ харюусаба.
34– Пётр, шамда хэлэнэб, энэ үдэр эрэ тахяагай дуугархаһаань урда ши Намһаа гурба дахин арсахалши даа, – гэжэ Иисүүс хэлэбэ.
Туулмаг, сумаа, һэлмэ
35– Таанадые туулмаг сумаагүйгөөр, гуталгүйгөөр зондо номнохыетнай эльгээхэдэмни, юумээр дуталдаа һэн гүт? – гэжэ Иисүүс шабинарһаа һураба.
– Юугээршье дуталдаагүй һэмди! – гэжэ тэдэнь харюусаба.
36– Харин мүнөө туулмагтай хүн туулмагаа, сумаатай хүн сумаагаа абагты. Хубсаһа хунараа худалдаад, һэлмэ худалдажа абагты. 37Юундэб гэхэдэ, Нангин Бэшэг соо: «Тэрэниие гэмтэн гэжэ тоолоо», – гэжэ Нам тухай бэшэгдэһэн үгэ бэелхэнь гэжэ танда хэлэнэб, – гээд Иисүүс хэлэбэ.
38– Эзэн, эндээ хоёр һэлмэтэй байнабди, – гэжэ шабинарынь хэлэбэ.
– Тэрэтнай болохо, – гэжэ Иисүүс харюусаба.
Иисүүс Элеон хада дээрэ зальбарна
39Иисүүс хотоһоо заншалта ёһоороо Элеон хадада гараба. Шабинарыньшье хамта ябалсаа. 40Хада дээрэ гараад:
– Хорхойтуулгада абтахагүйн тула зальбарагты! – гэжэ шабинартаа хэлэбэ.
41Тиигээд Иисүүс шэдэһэн шулуунай хүрэхэ зайда тэдэнһээ холодожо, үбдэглэн һуугаад, Бурхандаа мүргэбэ:
42– Эсэгэ Бурхамни, хэрбээ хүсэбэл, энэ аягаһаа амсуулангүй, иимэ ехэ зоболон Намһаа зайлуулыт даа! Гэбэшье энэ Минии мэдэхэ хэрэг бэшэ, Өөрынтнай эрхэ хүсэлөөр болог лэ.
43Тэнгэриһээ Бурханай Эльгээмэл ерэжэ, зоригынь үргэбэ. 44Иисүүс дабашагүй гашуудалда абтажа, улам ехээр зальбарба; хүлһэниинь шуһанай дуһал мэтээр газарта дуһаба.
45Мүргэлөө дүүргээд, хүл дээрээ бодожо, шабинартаа бусажа ерэхэдэнь, тэдэнь ехээр уйдаһандаа унташанхай байгаа.
46– Юундэ унтанабта? Бодогты! Хорхойтуулгада абтахагүйн тула зальбарагты! – гэбэ.
Иисүүсые бариба
47Иисүүсэй иигэжэ хэлэжэ байтарнь, арбан хоёр шабинарайнь нэгэн болохо Иудын хүтэлбэри доро хүнүүд ерэбэ. Иудын Иисүүсые таалаха гэжэ дүтэлхэдэнь, 48Иисүүс тэрээнһээ:
– Иуда аа! Ши Хүн түрэлхитэнэй Хүбүүниие таалан барижа үгэнэ аалши? – гэжэ һураба.
49Хажуудань байһан шабинарынь юунэй болохоо байһые ойлгоод:
– Эзэн аа! Эдээниие һэлмээрээ сабшахамнай гү? – гэжэ асууба. 50Нэгэ шабинь добтолон, ахамад санаартын зарасын баруун шэхые һэлмээрээ таһа сабшажархиба.
51– Болигты, хүрөө! – гэжэ Иисүүс хэлээд, зарасын шэхые гараараа хүрөөд эдэгээбэ.
52Ойронь ерэһэн түрүү санаартанда, Һүмын харуулай дарганарта, ахамадуудта хандажа, Иисүүс иигэжэ хэлэбэ:
– Таанар дээрмэшэниие барихаяа гараһандал һэлмэ, шиидам һаднагтайгаар Намайе барихаяа ерэбэ гүт? 53Теэд үдэр бүхэн таанадтай хамта Һүмэ соо байхадамни Намайе бариха гэжэ забдаагүй һэнта. Харин мүнөө харанхы хара хүсэнэй эзэрхэхэдэ, танай саг ерээ.
Пётр Иисүүсһээ арсаба
54Иисүүсые барижа, ахамад санаартын гэртэ абаашаба. Пётр зай баряад хойноһоонь гэтэн ябаа. 55Гэрэй хашаа соо ехэ түүдэг носоожо, зарасанарай тойроод һуухадань, Пётр тэдэнэй дунда һуулсаба. 56Нэгэ зараса эхэнэр галай хажууда һууһан Пётрые анхаралтайгаар хараад, һайнаар шэртэһэнэйнгээ удаа:
– Энэ хүн баһа Иисүүстэй суг ябадаг һэмнай, – гэжэ хэлэбэ. 57Пётр буруушаажа:
– Эхэнэр аа, би Тэрэниие мэдэхэшьегүйб! – гэжэ хэлэбэ. 58Удангүй ондоо нэгэ хүн Пётрые хараад:
– Ши тэдэнэй нэгэн ха юмши, – гэжэ хэлэбэ. Тиихэдэнь:
– Эрэ хүн аа, би тэдэнэй нэгэн бэшэб! – гэжэ Пётр мэлзэбэ. 59Нэгэ сагай үнгэрһэн хойно ондоо нэгэ хүн:
– Нээрээшье, энэ хүн Тэрээнтэй ябаа һэн. Тиигээдшье Галилейн хүн байна, – гэжэ һалан һандангүй хэлэжэ оробо.
60– Эрэ хүн аа, юун тухай хэлэнэш? Би шамайе ойлгоногүйб! – гэжэ Пётр хэлэбэ. Иигэжэ хэлэхэтэйнь адли эрэ тахяа донгодобо.
61Эзэн эрьежэ, Пётр тээшэ хараад абаба. Тиихэдэнь: «Эрэ тахяагай дуугархаһаань урда ши Намһаа гурба дахин арсахалши даа», – гэжэ хэлэһыень Пётр һанаандаа оруулаадхиба. 62Тиигээд тэндэһээ гараад, гунигтайгаар уйлаба.
Иисүүсые наада бариба, сохибо
63Иисүүсые харууһалжа байһан хүнүүд Тэрэниие наада бариба, тиигээд сохибо. 64Тэрэнэй нюдыень боогоод, нюурыень альгадан:
– Таниие хэн сохёоб, хэлэгтыл даа! – гэлдэбэ. 65Тэрэ мэтээр Иисүүсые нилээд удаан наадалба, шоолобо, доромжолбо.
Иисүүсые Зүблэлэй гэшүүд мүшхэнэ
66Тиигээд үүр сайха үеэр ахамадууд, түрүү санаартан, Хуули заадаг багшанар сугларжа, зүблөө хэбэ. Тэрэ Зүблэлэй гэшүүдтэ Иисүүсые асарба.
67– Манда хэлэ даа, Та Бурханай табисуурта гүт? – гэжэ тэдэ һурабад.
– Танда хэлээшье һаам, таанад этигэхэгүйт. 68Юумэ һураашье һаам, таанад харюусахагүйт. 69Зүгөөр энэ сагһаа хойшо Хүн түрэлхитэнэй Хүбүүн Һүр жабхаланта Бурханай баруун талада һууха, – гэжэ Иисүүс харюусаба.
70– Тиихэдээ Та Бурханай Хүбүүн гүт? – гэжэ булта асууба.
– Хэн байһыемни таанад өөһэдөө хэлэнэт, – гэжэ Иисүүс тэдээндэ харюусаба.
71– Манда үшөө ямар гэршэлгэ хэрэгтэй юм? Бидэ өөһэдөө хэлэһыень булта дуулаабди, – гэжэ тэдэнэр хэлэбэ.
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
