Medhetethi 31
31
Yayqoobi Laabape Baqatuwa
1Laaba adde nayti, “Yayqoobi nu aawaba ubba ekidigis. Ha shalo ubba nu aawabape demmis” yaagishin Yayqoobi si7is. 2Yayqoobi Laaba som7oy iyaw kase mela gidonaysa be7is.
3He wode Goday Yayqooba, “Neeni ne aawata biitta, ne dabbotako guye simma. Taani neera gidana” yaagis.
4Yayqoobi Raheelonne Liya ba wudey heemetiya bessaa yaana mela kiittidi xeegisis. 5I entako, “Hinte aawa som7oy taw kase mela gidonaysa taani be7ayis. Shin ta aawa Xoossay taara de7ees. 6Taani ta kumetha wolqan hinte aawas oothidaysa hinte ereeta. 7Shin hinte aaway tana cimmidi, ta damooziya tammu toho laammis. Gidikoka Xoossay tana I qohonnaada diggis. 8I, ‘Puncareti ne damooze gido’ gin wude ubbay puncare yelis. Qassi I, ‘Kalaadeti ne damooze gido’ gin wude ubbay kalaade yelis. 9Xoossay hessan hinte aawa mehiya wothi ekidi taw immis.
10“Meheti biraysas keyiya ageenan taani issi amuho amuhas. He amuhuwan taani xeelliya wode mehiya biraysiya deesha urgeti kalaade, puncarenne gazza. 11Xoossa kiitanchoy amuhon tana, ‘Yayqooba’ yaagis. Taani, ‘Yee’ gada koyas. 12Ika, ‘Dhoqu gada mehiya biraysiya deesha urge ubba kalaade, puncarenne gazza be7a. Laabi ne bolla oothiyaba ubba taani be7ida gisho hessa oothas. 13Neeni essida shucha zayte tiyada taw caaqida Beetele Xoossay tana. Ha7i dendada ha biittafe keya. Guye ne yeletida biitta simma’ gis” yaagis.
14Hessafe guye, Raheeliranne Liyara “Nu aawabape nuna gakiyabay aybee? 15I nuna allagada xeellees gidennee? I nuna bayzi ekis. Bayzi ekidaba ubbaa midi dhaysis. 16Xoossay nu aawape wothi ekida shalo ubbay tumaka nubaanne nu naytabaa. Hessa gisho, Xoossay new odidaba ubba ootha” yaagi zaaridosona.
17-18Yayqoobi Kanaane biittan de7iya ba aawa Yisaaqako baanaw dendis. I ba naytanne ba macheta gimale togisis. Wude ubba laaggidi, Masephexoomen de7ishe shiishida shalo ubba ekidi bis. 19Laabi ba dorsata ikisiya qanxanaw bidashin, Raheela ba aawa soo eeqa misileta kaysotasu. 20Qassi Yayqoobi Araame addiya Laabas ba buussaa odonna ixidi cimmis. 21I baw de7iyaba ubba ekidi ellesidi Efraxiisa shaafa pinnidi, derey dariya Galada biitta bis.
Laabi Yayqooba Kaallidi Buussaa
22Heedzu gallasape guye, Yayqoobi baqatidi bidaysa Laabi si7is. 23Ba dabbota baara ekidi, laapun gallasa oge Yayqooba geedo kaalli derey dariya Galada biittan iya gakis. 24He wode Xoossay qamma Soore Laabako amuhon qoncidi, “Neeni Yayqooba bolla iitaba gidin lo77oba, aybibaaka odetiko nena era” yaagis. 25Laabi gakiya wode Yayqoobi derey dariya Galada biittan dunkaane tokidi uttis. Laabika dabbotara yan dunkaanidosona.
26Hessafe guye, Laabi Yayqooba, “Neeni haysada tana ayis cimmadii? Ta macca naytaka olan di7etidabada ayis laagga kessadii? 27Neeni ayis qosan taape kessa ekada tana cimmadii? Taani nena ufaysaninne yethan, karaaboninne diithan moyzana mela ayis taw odabikii? 28Neeni hari attoshin, ta nayta naytanne ta macca nayta taani yeera ekona mela diggadasa. Neeni iita oothadasa. 29Taani nena genanaw taw wolqi de7ees shin ne aawa Xoossay zine qamma tana, ‘Yayqooba bolla iitaba gidin lo77oba aybibaaka odetonaada nena era’ yaagidi taw odis. 30Ha7i neeni ne aawa soo baanaw daro laamotida gisho keyadasa. Shin ta soo eeqa misileta ayis kaysotadii?” yaagis.
31Yayqoobi Laaba, “Neeni ne nayta taape wolqan wosisa ekanekonne gada qopida gisho yayada haysada oothas. 32Shin ne soo eeqa misileta ekida asi oonaka neeni demmiko, he uray hayqo. Nu dabbota sinthan nebaa gididaba ubba koyada eka” yaagis. Yayqoobi Raheela ba aawa soo eeqa misileta kaysotidaysa eribeenna.
33Hessa gisho, Laabi Yayqooba dunkaaniya giddo, Liya dunkaaniya giddonne nam7u aylleta dunkaaniya giddo gelidi koyis. Shin aykoka demmibeenna. Liya dunkaaniyape keyidi, Raheeli dunkaaniya gelis. 34Raheela soo eeqa misileta ekada gimale koora garsan qosada iya bolla uttasu. Laabi dunkaaniyan de7iyaba ubba pilgidi koyis. Shin aykoka demmibeenna. 35Raheela ba aawa, “Ta godaw, tana hanqetofa. Taani new denda eqanaw danda7ike, ta kushe metora de7ayis” yaagasu. I koyidi soo eeqa misileta demmibeenna.
36Yayqoobi yilotidi Laabako, “Taani ay iissadina? Haysa neeni tana kaallanaw ta ay qoho oothadina? 37Ha7i neeni ta miishe ubba pilgada koyadasa. Ne soo eeqa misiletape ay demmadii? Enti nu nam7a giddon pirdana mela ne dabbota sinthaninne ta dabbota sinthan haysan wotha.
38“Taani neera laatamu laythi kumethi de7as. Ne dorsatinne deeshati awucaybokona woyko ne wudiyape issuwaka qottada mabike. 39Do7i mida gawuxaka ta new eha erike; taani taape ciggayis. Gallas woyko qamma kaysotetidaysata qanxisaasa. 40Gallasa suulan, qamma meegon taani qohetas. Maara dhisko dhiska erike. 41Taani haysada hanada ne son laatamu laythi de7as. Tammanne oyddu laythi ne nam7u macca nayta gisho, usupun laythi ne mehiya gisho new oothas. Shin neeni ta damooziya tammu toho laammadasa. 42Ta aawa Xoossay, Abrahaame Xoossay, Yisaaqi Xoossay taara gidonaba gidiyako, sidhey bayna neeni tana mela kushe kessa yeddadasa. Shin Xoossay ta metuwanne ta daabursa be7idi zine qamma nena hanqis” yaagis.
Yayqoobanne Laaba Caaquwa
43Laabi zaaridi Yayqooba, “Maccasati ta macca nayta, enta nayti ta nayta, ha meheyka ta mehiya, neeni be7iya ubbay taba. Hachi ha macca nayta bollanne enta nayta bolla ay oothanaw danda7ayna? 44Ane haaya, neeranne taara wolla ane caaqoos. Hessi ne giddoninne ta giddon marka gido” yaagis.
45Hessa gisho, Yayqoobi issi shucha ekidi tuussatho essis. 46Ba dabbota, “Shucha shiishite” yaagis. Enti shucha shiishidi keelidosona. He keela matan kathi midosona. 47Laabi he keela, Yigar-Sahaduta#31:47 Yigar-Sahaduta: Aramike doonan “Marka keela” guussu. gidi sunthis. Yayqoobi qassi iya Galada#31:47 Galada: Ibraawetho doonan “Marka Keela” guussu. gidi sunthis. 48Laabi, “Ha keelay neepenne taape giddon hachi marka” yaagis. Hessa gisho, iya sunthay Galada geetetis.
49Laabi, “Nuuni issoy issuwafe haakidi de7iya bessan Goday nenanne tana naago” gidi he bessa Mixipha#31:49 Mixipha: Ibraawetho doona naago bessi guussu. gidi sunthis. 50Laabi, “Neeni ta macca nayta naaqiko, woyko neeni ta macca nayta bolla hara macco ekiko, ta eronna ixikoka ne giddoninne ta giddon Xoossay marka gideysa akeeka” yaagis.
51Laabi qassika, “Keeletida shuchaynne taani ne giddoninne ta giddon essida shucha tuussay haysish. 52Taani ha keelape nena genanaw neeko kanthonnaada, neka tana genanaw ha keelapenne ha shucha tuussafe haa aadhonada ha keelaynne ha shucha tuussay marka. 53Abrahaame Xoossay, Nakoora Xoossay, enta aawa Xoossay, nu giddon pirdo” yaagis. Yayqoobi ba aawa Yisaaqa Xoossa sunthan caaqis. 54Yayqoobi zuma bolla yarsho yarshis. Ba dabbota kathi maanaw xeegis. Enti midi zuma bolla aqidosona.
55Wontetha gallas guura Laabi dendidi ba nayta naytanne ba macca nayta anjidi, yeeridi ba soo simmis.
The Word for the World International and The Word for the World Ethiopia
