Medhetethi 24
24
Yisaaqi Macho Ekuwa
1Abrahaamey daro cimis. Goday iya ubbabanka anjis. 2Abrahaamey ba aylliya, ba soo asa ubbaas halaqatiya, ba aqo ubbaa bolla sunthetidaysa haysada yaagis, “Ne kushiyan ta gulbata oyka; 3taani enta giddon de7ida Kanaaneta macca naytape ta na7aas macho oychonna mela, Godan, salonne sa7a Xoossa sunthan taani nena caaqisayis; 4shin neeni ta yeletida biitta, ta dabbotako bada, ta na7a Yisaaqas macho oycha” yaagis.
5Iya aylley, “He maccasiya taara yaanaw dosona ixiko, ne na7a neeni yida biitta guye efo?” yaagidi oychis.
6Abrahaamey, “Ta na7a ay gaasonka yaa efonnaada nena era! 7Goday, saluwa Xoossay, tana ta aawa soopenne ta yeletida biittafe kessidaysi taw, ‘Ne zerethas taani ha biitta immana’ yaagidi caaqidaysi, neeni ta na7aas yaape macho demmana mela, I ba kiitanchuwa neepe sinthe kiittana. 8He maccasiya neera yaanaw dosona ixiko, ha taani nena caaqisida caaqoy new gome gidenna; shin ta na7a yaa ubbaka efopa” yaagis. 9Aylley ba godaa Abrahaame gulbata oykis; he odaas caaqis.
10Hessafe guye, aylley ba godaa gimaletape tamma ekidi, ba godaa miishiyapeka muruuta muruuta eki bidi Masephexoome biittan Nakoora katama gakis. 11Omarsi, maccasi haathe tikanaw yaa wode, katamaape gaxan haatha olla matan ba gimaleta gulbatisis.
12I woossishe, “Godaw, ta godaa Abrahaame Xoossaw, hachi taani qopada yidaysa taw giigisa; qassi ta godaa Abrahaames keehaba ootha. 13Heko, taani ha haatha pultuwa matan eqayis; ha katama macca nayti haatha tikanaw haa yoosona. 14Taani, ‘Ane otuwa ziqi oothada tana haathe ushsha’ giya wode, iya, ‘Heko uya; qassi ne gimaleta taani ushshana’ giyara, hinna ne aylliya Yisaaqas neeni dooridaro gido; neeni ta godaas keehaba oothidaysa taani hessan erana” yaagis.
15Buroo I woosa zaarona de7ishin, Irbiqa haatha oto tookada puttu gasu. Iya Batu7eela na7a, Batu7eeli Milka na7a, Milka Abrahaame isha Nakoora machiw. 16Irbiqii daro yegelsinne adde eronna geela7o. Pultuwa duge wodhada, ba otuwa kunthada baanaw dendasu. 17Yaanin, he aylley iiko woxi bidi iyo, “Ne tana guutha haathe ushsharki” yaagis.
18Iya, “Ero ta godaw, uya” yaagasu. Ellesada otuwa ba hashepe wothada, gedi ootha oykada iya ushshasu. 19Iya ushshidaape guye, “Ne gimaletika alana gakanaw taani entaw haatha duuqana” yaagasu. 20Attida haatha ellesada gongen tigada, hara haathe duuqanaw olla woxasu; gimaleti ubbay alana gakanaw, haatha ollafe duuqa duuqa ehada gongen tigada ushshasu. 21I qopidi yida qofa Goday injeyishe de7iyakonne eranaw addey si77i gidi iyo xeellees.
22Gimaleti haatha uyi simmin, addey ichashu giraame bagga siidhen aathiya worqa xeetanne tammu giraame gidiya nam7u worqa sagaayota giigisis. 23Iyo, “Neeni oodde na7ee? Ane taw oda; ne aawa son nuus aqiya bessi daanee?” yaagis.
24Iya, “Taani Batu7eela na7a; Batu7eeli Milka Naakoras yelida na7a. 25Nu son gidiya kaleynne harqoy de7ees; qassi hinte aqanaw bessi de7ees” yaagasu.
26Addey gulbatidi Godaa goyinnidi, 27haysada yaagis; “Ta godaas keeheysanne ammaneteysa aggiboonna Goday, ta godaa Abrahaame Xoossay galatetto; taani yishin, Goday tana ta godaa dabbota soo kaalethis” yaagis.
28Na7iya woxa bada, ba aaye son de7iya asaas hanidaba odasu. 29Irbiqas Laaba geetetiya ishay de7ees. Laabi kare keyidi haatha pultuwa matan de7iya addiyako woxis. 30Siidhe worqanne ba miche kushen de7iya sagaayota be7ida wode Irbiqa addey bana gidoysa odin si7ida wode, keyidi addiyako bis. Addeyka gimaletara pultuwa matan eqidaysa demmis. 31Iyako, “Goday nena anjidayso, haaya, neeni karen ayis eqadii? Taani new keethenne gimaletaska besse giigisas” yaagis.
32Yaatin addey soo gelis. Laabi gimaleta caana billidi, kalenne dhiille gimaletas immas. Toho meeccanaw iyasinne iyara de7iya asaas haathe ehis. 33Kathi iya sinthe aadhis. Shin, “Taani tana ehidaba hintew odonna de7ashe kathi miike” yaagis.
Laabi, “Yaako oda” yaagis.
34Hessa gisho, I, “Taani Abrahaame aylliya. 35Goday ta godaa daro anjida gisho I duretis. Dorse, miizi, bira, worqa, adde aylleta, macca aylleta, gimaletanne hareta iyaw immis. 36Ta godaa machiya Saara ba cimatetha laythan iyaw adde na7a yelasu. Yaatin I baw de7iyaba ubba iyaw immis. 37Ta goday tana haysada caaqisis, ‘Taani de7iya Kanaane biitta macca naytape ta na7aas macho oychofa. 38Shin ta aawa asaako, ta dabbotako bada ta na7aas macho oycha’ yaagis. 39Taani ta godaa, ‘Na7iya taara yaanaw dosona ixikochi?’ yaagada oychas. 40Ika, taani iya sinthan kiitetida Goday ba kiitanchuwa kiittana; neeni ta na7aas ta aawa asaape, ta kochaafe macho demmana mela, ne beysaka injeyana. 41Neeni ta kochatako bin, enti new iyo immonna ixiko, he wode new caaqoy gome gidenna” yaagis.
42“Taani hachi he pultuwako yaa wode yaagas; ‘Godaw, ta godaa Abrahaame Xoossaw, ne shene gidiko, taani biya allalliya giigisa. 43Heko, taani ha pultuwa matan eqayis; geela7o issinniya haathe tikanaw yiiko, taani iyo, tana ne otuwape guutha haathe ushsharki’ yaagana. 44Iya, ‘Ero uya, qassi ne gimaletaska taani haathe duuqana’ giyara, Goday ta godaa na7aas dooridaro gido” yaagas.
45“Taani ta wozanan wooseysa zaarona de7ishin, Irbiqa ba otuwa tookada, puttu gasu; pultuwa duge wodhada haatha duuqasu; taani iyo, ‘Tana haathe ushsharki’ yaagas.
46“Yaagin iya ellesada ba hashiyape otuwa wothada, ‘Heko uya; qassi taani ne gimaleta ushshana’ yaagasu. Yaatin taani uyas; qassi ta gimaleta iya ushshasu.
47“Taani iyo, ‘Neeni oodde na7ee?’ yaagas.
“Iya zaarada, ‘Taani Batu7eela na7aa; Batu7eeli, Milka Naakoras yelida na7a’ yaagasu. Taani worqa I siidhen, sagaayota I kushen aathas. 48Hessafe guye, taani gulbatada, Godaas goyinnas. Taani Godaa, ta godaa Abrahaame Xoossa, ta godaa isha na7a na7iw iya na7aas ekanaw tana like ogiya kaalethidaysas galatayis. 49Ha77ika hinte ta godaas keehanabanne ammanetanaba gidiko, taw odite; gidonna ixikoka odite; hessafe guye taani hananaba erana” yaagis.
50Laabinne Batu7eeli zaaridi yaagidosona; “Ha oday Godaape yis; nuuni yaa haa gaanaw danda7oko. 51Irbiqo hanno be7a; ekada ba; Goday gidaysada ne godaa na7aas macho gido” yaagidosona.
52Abrahaame aylley enti giyaba si7ida wode, sa7an gulbatidi Godaas goyinnis. 53Aylley bira alleeqo, worqa alleeqo, ma7onne kessidi Irbiqas immis. Qassi al7o miisheta I ishaasinne I aayes immis.
54Hessafe guye, inne iyara de7eysati midosona uyidosona; yan aqidosona. Enti guura dendin, I, “Tana ta godaako yeddite” yaagis.
55Yaatin I ishaynne I aayiya, “Na7iya issi tammu gallasa mela nuura tako, hessafe guye iya baana” yaagidosona.
56Shin I, “Goday ta yidaysa injeyin, hinte tana gam7isopite. Taani ta godaako baana mela tana moyzite” yaagis.
57Enti, “Na7iw xeegidi ane iyo oychoos” yaagidosona. 58Irbiqa xeegidi, “Ha addiyara baanee?” yaagidi oychidosona.
Iya, “Ee; taani baana” yaagasu.
59Yaanin, enti banta michiw Irbiqa, iyo dichidaaro, Abrahaame aylliyanne iya asata moyzidosona. 60Enti Irbiqa,
“Nu miche Irbiqe,
mukulupe mukulu gakanaw dara;
ne kochay banta morketa katamata laatto”
yaagidi anjidosona. 61Hessafe guye, Irbiqinne I macca aylleti dendidi, gimaleta toggidi, addiyara bidosona. Yaatin aylley Irbiqa ekidi bis.
62He wode Yisaaqi, “Tana Be7iya De7o Xoossa Pultuwa” geetetiya pultuwa mata bidi, Negebe mela biittan de7ees. 63Issi gallas omarsi Yisaaqi ba wozanan qopishe demba keyidi yuuyees; I dhoqu gidi xeelliya wode, gimaleti yeyisata be7is. 64Irbiqaka dhoqu gada xeelliya wode, Yisaaqa be7asu; gimaletape wodhasu. 65Abrahaame aylliyako, “Ha nuura gahetanaw dembara yaa addey oonee?” yaagasu.
Aylley, “I, ta godaa” yaagis. Iya ba laxana ekada guuluntasu.
66Qassi aylley ba oothidaba ubba Yisaaqas odis. 67Yisaaqi Irbiqa ba aaye Saara dunkaaniya giddo efis. Iyo machis; iyaka iyaw macho gidasu. I iyo dosis; ba aaye kayuwa wothis.
The Word for the World International and The Word for the World Ethiopia
