Luk 10
10
Jesu Gie Arhin Eva Yan Ekigbe Siyenẹ Ladian
1Vbe iyeke ọnọna, Jesu keghi zẹ arhin eva yan ekigbesiyenẹ, ọ keghi gie iran eveva ke odaro gha rrie ehe ne irẹn tobọ ẹre mu egbe nẹ ne ọ yo. 2Ọ tama iran wẹẹ, “Emwiorhọ wa bun sokpan emwa iwinna ni ra rhọ ẹre i bun. Wa gha na erhunmwu ghe ne ọ yan emwiorhọ ne ọ miẹn ehe na gie emwa ni bun sa yọ gha dee do rhọ emwiorhọ. 3Wa gha khian. Te I gie uwa zẹ vbe avbe oteghe ohuan la uwa ẹbu avbe oduma. 4Wa ghẹ rhie ẹsiso igho, ra ẹkpo ọvbuevbare, ra ibata, wa ghẹ mudia tuẹ ọmwa vbe odẹ. 5Ẹghẹ ne uwa a rhirhi ya la uwu owa, wa ghi ka kha wẹẹ, ‘Ọfumwegbe gu owa na rrọọ.’ 6Deghẹ ọmwa ne ọ ho ẹmwẹ ọfumwegbe rre evba, wa gie otuẹ ọfumwegbe uwa lele ẹe, a deghẹ ẹ i rrọọ, wa kie otuẹ ọfumwegbe rua werriegbe. 7Wa ghi di owa ọkpa ni ya, wa ghi gha re, wa ghi vbe gha da emwi ne iran rhie ne uwa, rhunmwuda ọ kere ne a gha ha osa ne ne ọ winna. Wa ghẹ gha si ke owa ọkpa la ọvbehe. 8Wa gha la ẹvbo ighe iran rhan obọ miẹn uwa, emwi ne a rhirhi rhie ne uwa, wa rriọe. 9Wa sinmwi avbe ọkhọnmwẹ ni rre ẹvbo nii, wa ghi vbe khama emwa ni rrọọ wẹẹ, ‘Arriọba Osanobua sikẹ uwa nẹ.’ 10Sokpan adeghẹ uwa la ẹvbo ighe iran ma rhan obọ miẹn uwa, wa laghe adesẹ ẹvbo iran ne uwa kha wẹẹ, 11‘Ya sẹ egbe ebubẹ ẹvbo uwa ne ọ te sikan mu ima owẹ, ma bọnmwẹ ọẹn kua ne uwa, sokpan wa yerre, Arriọba Osanobua sikẹ uwa!’ 12Ne I tama uwa, ọ gha sẹ Ẹdẹ Ibuohiẹn Osanobua gha tohan Sọdom sẹ ẹvbo nii!
Avbe Ẹvbo Ni Ma Yayi
(Matiu 11:20-24)
13“Ọ gha ba suẹ gbe Korazin! Ọ gha ba suẹ gbe Bẹtsaida! Rhunmwuda, akpawẹ a winna iwinna ọyunnuan ne a winnaẹn vbe uwu uwẹ vbe Taia kevbe Saidọn, ẹ i re eban emwa ni rrọọ gha ghi tota lele otọ, iran ghi silo osọnmwẹ ukpọn ye egbe, iran ghi gbe emuẹn ye egbe, ne iran ya rhie ma ighe iran roiro fi ekhọe werriẹ vbe orukhọ ne iran te ru. 14Osanobua gha tohan Taia kevbe Saidọn sẹ uwa vbe Ẹdẹ Ibuohiẹn. 15Wẹ ne Kapaniọn. U wẹ u ra mu egbe uẹ hin odukhunmwu gha rrie ẹrinmwi? A gha fi uẹ fi ẹrinmwi erhẹn.”
16Ọ keghi tama avbe erhuanegbe ẹre wẹẹ, “Ọmwa ne ọ họn ọghe uwa, họn ọghomwẹ. Ọmwa ne ọ ma miẹn uwa yi, mẹ ọre ọ ma miẹn yi, ọmwa ne ọ ma miẹn uwa yi, ọ ma miẹn ọmwa ne ọ gie mwẹ yi.”
Urremwẹ Iran Ne Eva Yan Ekigbesiyenẹ Ni
17Iran eva yan ekigbesiyenẹ nii keghi ye oghọghọ gha die owa. Iran wẹẹ, “Nọyaẹnmwa, avbe orhiọn esu wa họn ẹmwẹ ima vbe ima ye eni ruẹn gu iran guan!”
18Jesu wanniẹn tama iran wẹẹ, “I miẹn vbe Setan de ke odukhunmwu dee vbe ayan. 19Wa danmwehọ, I rhie ẹtin ne uwa nẹ ne uwa ya gha rrilo ekpakpahuangan kevbe ẹyẹn muotọ, kevbe ẹtin vbe uhunmwu ẹtin hia ne Oghian ni mwẹ. Emwi ọkpa ne ọ gha kuan uwa, ẹ i rrọọ. 20Sokpan ẹ i re ne avbe orhiọn esu na họn ẹmwẹ ne uwa ọre uwa gha ghọghọ yi, sokpan wa gha ghọghọ ighe a gbennẹ eni uwa ye otọ vbe ẹrinmwi.”
Jesu Ghọghọe
(Matiu 11:25-27; 15:16-17)
21Ẹghẹ ni ọre Jesu na vuọn ne oghọghọ vbekpa Orhiọn Ne ọ huanrẹn, ọ wẹẹ, “Evbavba Nọyan ẹrinmwi kevbe agbọn, I kpọnmwẹ ọn rhunmwuda, emwi ne u mu lẹre ne iran ni rẹn emwi, ọre u do mu ma iran ni ma rẹn emwi rhọkpa na. Ekhọe obọ ruẹ Ọre u ya ru ẹe vbe ne ọ yẹ ruẹ.
22“Erha mwẹ viọ emwi hia mẹ nẹ. Ọmwa ne ọ rẹn ọmwa ne ọmọ khin i rrọọ, sokpan Evbavba, ọmwa ne ọ vbe rẹn ọmwa ne Evbavba khin ẹ i rrọọ, sokpan Ọmọ kevbe iran ne Ọmọ ho ne ọ rhie ẹre maa.”
23Jesu keghi werriẹ aro da avbe erhuanegbe ẹre, ọ keghi heko khama iran wẹẹ, “Uhunmwu uwa ma gbe ne aro uwa na sẹ emwi ne uwa miẹn na. 24Ne I khama uwa wẹẹ avbe Ọba kevbe akhasẹ ni bun ọre ọ te gha ho ne aro iran sẹ emwi ne uwa miẹn na, sokpan aro iran ma se ọe, kevbe ne iran vbe họn emwi ne uwa họn ẹn, sokpan iran ma họn ẹn.”
Itan Ọmwa Sameria Ne Ọ Maa
25Okpia ne ọ ma emwa Uhi ọkpa keghi do gualọ Jesu ẹmwẹ ne unu, ọ nọ rẹn wẹ, “Ọmamwaemwi, vbe i a gha ru ne a rrọọ etẹbitẹ miẹn ehe na sẹ mwẹ obọ?”
26Jesu wanniẹn wẹẹ, “Vbe Ebe a ta ẹe hẹẹ? Vbe uwẹ a zẹ edu ẹre hẹẹ?”
27Okpia ni wanniẹn wẹẹ, “Iwinna ruẹ nọ ne u ye orhiọn ruẹn hia, ekhọe ruẹ hia, ẹtin ruẹn hia kevbe ẹko ruẹ hia ho ẹmwẹ Osanobua Nọyan ruẹn kevbe ne u vbe ho ẹmwẹ ogieva ruẹ zẹ vbe egbe ruẹ.”
28Jesu wanniẹn wẹẹ, “Ewanniẹn ruẹn gbae, ya gha ru vberriọ, u gha fe.”
29Sokpan ne ọmaemwa uhi ni keghi ho ne irẹn rhie maa ighẹ rẹn yin ẹse, ọ keghi rhunmwuda ọnii nọ Jesu wẹẹ, “Gha ọre ogieva mwẹ?”
30Jesu wanniẹn wẹẹ, “Okpia ọkpa kegha ke Jerusalẹm tuorre rrie Jẹriko, avbe izigan keghi mu ẹn, iran bannọ ẹre ukpọn, iran keghi mama ẹn, ẹmwẹ kherhe iran ghi fi ye ọre unu, iran keghi sẹ ọe rae. 31Emwi ghi wa ho aro, ohẹn ọkpa keghi la odẹ ni, ugbẹn vbe ọ ghi bẹghe ẹre, ọ keghi gban egbe la obọ nọkpa. 32Erriọ zẹẹ, e Livai ọkpa keghi vbe gha dee, ọ ghi ya yọn ghe okpia ni nẹ, ọ na vbe gban egbe la obọ nọkpa. 33Sokpan ovbi e Sameria ọkpa ghi la odẹ nii khian, ọ keghi do dekun ẹnrẹn, ugbẹn vbe ọ bẹghe okpia nii, ohan rẹn to ẹe ẹsẹse. 34Ọ keghi bu ẹre gha khian, ọ keghi gbe ofigbọn kevbe ayọn ye ọre ẹwẹn, ọ na gbalọe, ọ na mu ọmwa nii yan ẹsin ẹnrẹn, ọ na mu ẹn gha rrie owa ekhẹn, ọ na ya gbe aro ghe ẹre vbe evba. 35Ẹdẹ ghi gbee, ọ keghi viọ ikọbọ eva ne ne ọ gbe aro ghe owa ekhẹn ni. Ọ tama rẹn wẹẹ, ‘Gha gbe aro ghe ẹre, I gha dọlegbe dee, I gha ha ruẹ igho ne u rhirhi lo nẹẹn.’ ”
36Jesu keghi kha wẹẹ, “Vbe uwu iran eha na, de ọmwa ne uwẹ roro ighẹ ọ mudia ye ihe ogieva ọmwa ne avbe izigan gu gbinna ni?”
37Ọmamwaemwi uhi keghi wanniẹn wẹẹ, “Ne ọ tohan rẹn.” Jesu wanniẹn wẹẹ, “Wẹ vbe ya gha ru vberriọ khekherriọ.”
Jesu Ya Tuẹ Mata Kevbe Meri
38Ugbẹn vbe Jesu vbe erhuanegbe ẹre ghi rre okhian, iran keghi do sẹ igue ọkpa, okhuo ọkpa ne a tie ẹre Mata keghi miẹn iran yi vbe owa ẹre. 39Rẹn keghi mwẹ ọtẹn okhuo ọkpa ne a tie ẹre Meri, ọ na wa ya tota ye akharha Nọyaẹnmwa gha danmwehọ emwi ne ọ ma iran re. 40Egbe izozo ghi wọ Mata vbe iwinna ne ọ winna, ọ kegha dee, ọ wẹẹ, “Nọyaẹnmwa, ọ maa ra ne ọtẹn mwẹ na wa sẹ emwi hia rae ne imẹ ọkpa gha ru? Tama rẹn ne ọ do rhie iyobọ mẹ.”
41Nọyaẹnmwa wanniẹn tama rẹn wẹẹ. “Mata, Mata, emwi ne u si osi kpokpo egbe baa bun gbe. 42Sokpan emwi ọkpa kẹkan sẹe, Meri zẹ emwi ne ọ kere nẹ, a i ghi miẹn ẹre re ọvbehe.”
@ The Bible Society of Nigeria, 1996
