Marc 12
12
Tsava éayanzi abévani
(Bono na Matt. 21:33–46, Luc 20:9–19)
1Jésus amagunya ahngô tsava. Angô mbe: Môma amagaaba tsaga éedi éétété éamiônda ééndô mbe ôvigne. Amamiguga môgômba. Amasaa gépénda gôégama miôndamie. Na amasaa gédigéôge gô ngongongongo samôkenene atsagane. Amavangana n’ayanzie. Amanôtôga gô tsengedi. 2Gô ndéône émoombo miôndamie, kumu éatsaga amatôma môyanzi edi na gôndé akeneyie atsagane gôéétsô ôkabô edi amiônda. 3Akeneyie amatsôpa ône amatômukuni. Ahmamôbômôa. Ahmamônikéda mogo matévo. 4Kumu éatsaga amoomba étôma muene. Akeneyie ahmamôyogo na bôpeeo gô môtsé. 5Kumu éatsaga amoomba étôma ône amôtatô. Akeneyie ahmamôyôha. Akeneyie ahmabômôa avo na ahmayôha avo amatômukuni. 6One amôyusumédu amasanéakani na kumu te muanedi amômôgôô amôtéma. Amamôtôma môyusumédue na gô tsaga. Ameenda mbe: akeneyie angameweda muanami. 7Ivô akeneyie ahmavovo anguene n’anguene mbe: Nôeni ône angaviagana n’enyangee éatsagane vangawa kooko asô. Tôbémôyôhani. Buta mbe tsagane éba éasô n’anyô. 8Ahmamôtsôpa. Ahmamôyôha. Na ahmagunya nzumbine gô piakô atsagane.
9Jésus angô mbe: ?Kumu éatsagane angeenda nayee? Angaviga gôédimbanéda akeneyie. Na angeetsadô tsagane ene akeneyie. 10Anye nôsabômu ébégô édué ématendu gô Matendeo MaNzambé, mbe:
Etaé émakina assayi eba
Te éangô émakoga étaé éav’epandaka.
11Tôena geenda Kumu.
Te ébégô évôni ésôbasôbana we.
12Peeye yAjuif asibômu mbe Jésus agunyi tsavane te gôndé ahngô. T’ebandô ahmabuta mônongo gôétsôpéda Jésus. Ivô ahmookô gomoe agéômbége. Ahmatsika Jésus na ahmakea.
Depu émavanéda môtômi atsenge
(Bono na Matt. 22:15–22, Luc 20:20–26)
13Apharisien n’avo ava géômbé saHérode ahmaviga na gôndé Jésus. Ahmatatôu n’akaô gôétambéa Jésus pagô na nyivô gôémôkubéda. 14Ahmaviga na gôndé Jésus. Ahngô mbe: Môékédi, tôsabômu mbe éwe ôvovo te mane mapie matévo. Gô meekédu moo ôsaba n’onzenze gôndé môma. Ahnyôngéôyee mangô vo ahsanyôngéôyee mangô, ébégôe te éanguene. Osatatôa oma. Avoni na ageage ôsabono gô éne. Oékéda môdigédi apie ônyôngéô Nzambé. Beenda we gô mitôma mimatsikéô we ?we tôvanéa César, môtômi atsenge depune vo tôsavana? 15Ivô Jésus asibômu buembee waô. Angô mbe: ?Anye nôviga gôétambéa me pagô nayee? Tsua me dode. Naviena yangô. 16Amaviga na dode. Jésus ameevôa ahngô mbe: ?Gégonige soso ége saanda? ?Na ina ématenduni éanda? Ahmaabéa Jésus mbe: Eetso te éaCésar, môtômi atsenge. 17Vane Jésus amavovo n’ahngô mbe: Ene éndé éamôtômi atsenge nikéda na gôndé angô. Ene éndé éaNzambé nikéda na gôndé Nzambé. Ahmasôbasôbana mbe: Oô môma aseebéôkôni.
Nyivô éagékundugéô sowa
(Bono na Matt. 22:23–33, Luc 20:27–40)
18Avo Asadducéen ahmaviga na gôndé Jésus. (Asadducéen te asi gésôga géékéda mbe ane amawani asangakunduga.) Ahmeevôa Jésus mbe: 19Môékédi, ôsabômu ndongi dimatendéô we na Moïse ditôbeenda mbe: Okô muanayoo amômôgôô awéyi, atsika môgayedi gékômba, ôviagana môkuée. Obôta n’edi ana gô ina amuanayoo amawani. 20Oôkô ébégô édué. Gômabaka aneyee tsambué amôgôô. Pene amabaa môgeto. Na amawa amatsika môgayedi gébé na muana. 21Môdimine amaviagana môkuée. Amawa te gébôté na môgetone muana. Môdimine amôbaé te mônongovo. 22Gôndé ahngô muetso tsambué te mônongovo. Ahmabongo môgetone na ahmawa, ahngô muetso gébôté muana. Gô ngima amôgôôe muetso na môgetone amawa. 23Gô nyee ôngakunduga ane amawani ?môgeto nône angaba waanda? Bonoko, muetso tsambué ahmamana émôbaa. 24Jésus amaabéa angô mbe: Anye nôbômu. ?Gôébégô ndé me navovi mbe anye nôbômu‐a? Te gôébégô anye nôsamenya Matendeo MaNzambé. Buéyé na ngudi yaNzambé nôsamenya yangô. 25Bangôani mbe vangakunduga ane amawani amôgôô n’ageto gôsangabadô yômba. Angadigaa gadigaa asi g’ôba ayanzi aNzambé. 26Gôébégô éagékundugéô sowa ?anye madeo nôsitanga éne ématenda Moise‐a? Gô ndéône émavovo Nzambé n’edi te ôgi aNzambé ômakusa gô géétété gémayôakani. Nzambé amavovo na Moïse mbe: Me te Nzambé éneegeda Abraham na Isaac na Jacob. 27Nzambé te Nzambé ane adôngani, kaka Nzambé ane amawani. Anye nobômu ti bômugu.
Môtôma ôôtéa mitôma mietso
(Bono na Matt. 22:34–40, Luc 10:25–28)
28Môvo mônigôi amige miaNzambé amookô gamatsundahngô. Amookô gamaabéa Jésus Asadducéen n’eodo évôni. Amawesea na gôndé Jésus gôémôbambéa nyivô. Angô mbe: ?Gô migemie na mitômamie mietso, ône ôôtéa ôvôni yôni? 29Jésus amamôaabéa mbe: Oeni, môtôma ôôtéani te ôdôô. Oôkôni anye ana aIsraël. Kumu asô Nzambé, te Nzambé épo ésaba gégoni. 30Nyôngéô Kumu Nzambé éoo na môtémoo wetso, na matasa moo metso, na gédidi soo setso na ngudi yoo yetso. 31Oeni môtômee ava ngima one. Nyôngéô môkoo ganyôngéô éwe ôtôe omuene. Gôsaba miene mitôma miôtéa mibaé mine. 32Mônigôi amige amavovo na Jésus mbe: Na gô pie Môékédi asô, éne évovi éwe te kuanakue. Kumu te Kumu Nzambé épo asaba na gégoni. Gôsaba muene. 33Me tsabômu mbe ényepa gôéétsa Nzambé ôbiia, te digondoku ditumbuni na digondoku digôngani. Ivô na gô pie, éne éôtéa ényepani te mbe môma anyôngéô Nzambé na môtémedi wetso, na gédidi sedi setso na ngudi yedi yetso. Buedi mbe môma anyôngéô dôta môkedi ganyôngéô angô amuene. 34Jésus amookô gamavovo mômôgôô nône n’eodo. Amasénga angô ôséngu mbe: Osanéa ti vi pesu gôéengéa g’okumu aNzambé.
Vane gôsiyeegedô môma émôévôa nyivô.
Ebégô éaChrist na David
(Bono na Matt. 22:41–46, Luc 20:41–44)
35Vameekéda Jésus gô eba aNzambé amabambéa nyivône éne. Angô mbe: ?Nayee anigôi amige miaNzambé avovo mbe Christ te Muana aDavid? 36Amuene David amatévédu na Gédidi SaNzambé amavovo mbe:
Kumu Nzambé amavovo na Kumu ami mbe:
Ewe digaa gô géeyo sami gémôgôô.
Na me nangagudaméda adudeoe woo
Gô tsina amakôdô moo.
37Jésus angô mbe: Amuene David amateta môma nône mbe: Kumu ami. ?Mbe muanedi angamôénda mbe Kumu ami nayee?
Jésus amakeneda oma gôndé anigôi amige miaNzambé
(Bono na Matt. 23:1–36, Luc 20:45–47)
Géômbé gévôni soma amookô Jésus na gényônga gévôni. 38Vameekéda Jésus amakeneda oma mbe: Nôwema anigôi amige miaNzambé. Ahnyôngéô ékenga gô édénga éaô étongoni. Ahnyôngéô ékômbôu na géneega gô étungue éyeka oma. 39Ahsevôa édigaa éokumaka gô eba agéwanyéô sAjuif. Gô môambô te mônongovo. Ahnyôngéô édigaa va kôbangô akumu éasueti. 40Ahnyôngéô émana éetso éndé gô yeba yamikué. Ahvovo disambô ditongoni gôéôkanô n’oma. Gésisédéô saô géngootéa gédagani.
Môkué ômakuya ôbiia
(Bono na Luc 21:1–4)
41Vane Jésus amadigaa va kôbangô agégaa sagô eba aNzambé gémakuyuku mane mameetsô ôbiia magô eba aNzambé. Amabono gamakuya oma dibiia yadode. Evo ékiti émakuya gô ôkitie waô dode diyekani. 42Môkué amôgeto ômabaka n’osuga amaviga na amakuya tôdode tôbaé takunga tosunu asuda dibaé. 43Jésus amabambéa aneengi edi. Na amavovo n’ahngô mbe: Nanôbeenda na gô pie mbe môkuée ôdôô, éne ékuyi angô gô gégaa sadibiia, éôtéa éne éakedi muetso. 44Muetso akuyi te ôkabô okitie waô ôsaba n’eyanza évôni gôndé ahngô. Ahsikuya wetso. Géé ti môgeto noo, g’ôsugee wedi akuyi ti éetso. Asisanéa na sôma.
Alliance Biblique du Gabon (Bible Society in Gabon) 1983
