Matthieu 28
28
Jésus amakunduga
(Bono na Marc 16:1–10, Luc 24:1–12, Jean 20:1–10)
1Nyee edunda aAjuif ômoota. Vamageeô manyaa tsono, Marie môsi Magdala na mavo Marie amakea na gô ngii. 2Tsina na tsina tsinane ématatéa pepe. Môsi g’ôba amavigédu na Nzambé na amakandanganéda étaé na va kôbangô angiine. Amadigaa gô ngongo etaé. 3Amaba na ngeengéyi ga môkadikadi na maduani medi mamabaka na vee ga ôbôngé. 4Migodemie mimatatéa na gomo na mimakoga ga oma amawani. 5Môsi g’ôba amabandôa évovo n’agetoe mbe: Gôndé anye navovo mbe nôneena gomo. Anye nôbuta Jésus, ône akomediôkô va gésuma sowa. 6Asabadô éva. Akundugi gameevédangô. Vigani nôviena tungune éyamédiôkô angô. 7Yavôgani ékea. Nôkebeenda aneengi edi mbe: Akundugi. Oobégéyi na gô Galilée. Nôngamôdenga te gône. Nôeni, te ené évigi n’ami gôénônigôa.
8Agetoe amayavôga énôtôga va ngiine. Amookô gomo. Ivô gô gomoe waô amatsôkéa na amakea pita gôétsua tsangône na gôndé aneengie aJésus. 9Tsina na tsina Jésus amawanya n’ahngô. Na amasambanéa n’ahngô. Agetoe amawesea na amagudama na gô tsina gôémôbanda makôdôme na gôémôneegeda. 10Jésus amasuméda ahngô mitémamie mbe: Nôneena gomo. Kiakani nôkebeenda ana aTétee n’ami mbe: Kiakani na gô Galilée. Nôngeena Jésus te gône.
Tsangô émanigôa migode
11Vamanika agetoe na gô mbôka, mivo migode dôta mimakea na gô mbôka gôénigôa tsesuye yadeekedi adigondoku mane mamabuéa vamabakahngô gôéwema ngiine éaJésus. 12Tsesuye yadeekedi adigondoku amadigaa gô kundu na peeye yAjuif. Amavangana mbe: Tôngeetsa migodemie ôkabô adode gôémivooto kabaga anigôa môma éne émeenahngô. 13Amatôma migode mbe: Nôvovo te mbe: Gômeeboga we na pitsi, aneengie aJésus amaviga gôéesua nzumbine. 14Okô môtômine atsenge ookiô tsangô nene, we avo tôndé na ngudi gôékônza n’edi ébégôe, na gôénôsungéa. 15Migode amabongo dodeye na amookô ndongi dimeetsô ahngô. T’ebandô tsangô nene ématsanzabana va gatse Ajuif ngu na deo noo.
Jésus amatsutsuga vandé aneengi edi
(Bono na Marc 16:14–18, Luc 24:36–49, Jean 20:19–23, Mayanzame 1:6–8)
16Aneengie, nzima na môvo amakea na gô Galilée gôébuéa gô ngongo amôkôdi gamavangana ahngô na Jésus va mbeego. 17Vameena aneengie Jésus amamôneegeda. Ivô avo va gatse aô amatsuma paga. 18Jésus amawesea na vandé ahngô na amanigôa ahngô mbe: Otômue wetso ava tsina na ône ag’ôba ômeetsô te me. 19Te ébandô nanôtôma mbe: Kiakani na gô tsengeye yetso. Ikédakani oma muetso gôéba aneengie ami gôékea nzéepo n’ami. Nôétsa ahngô bateme gô ina aTéta Nzambé, na Muanedi Jésus, na Gédidi sedi Sapie. 20Nôékédaka ahngô gôégobeda mabégô metso mamatôma me anye. Bangôani ébégôé édué. Me nandéké n’anye pitsiye yetso ngu na vangakôdéa tsengene.
Alliance Biblique du Gabon (Bible Society in Gabon) 1983
