Matthieu 24
24
Jésus ameevéda oma mbe eba aNzambé ôngapanzô
(Bono na Marc 13:1–2, Luc 21:5–6)
1Jésus amakusa gô eba aNzambé. Gômakea angô aneengie amasôbasôbana mbe: Môékédi, bonoko ganyepa yeba yedi. Gamasaô yangô. Ti ôô mônongô ayeba. 2Jésus amaabéa ahngô mbe: Nôeni yebaye dipôni édi, gôsangasanéa ta n’etaé évo gô ngongo amôkedi. Metso mangapanzô.
Maguga mapitsi yamôyusumédu
(Bono na Marc 13:3–13, Luc 21:7–19)
3Jésus amadigaa va ngongo amôkôdi ôtetu mbe Olivier. Aneengi edi amaviga gôémôévôa mbe: Beenda we ndéône éngabuéa mabégôme mane. Nigôa we gémbégéage gengatubéda mbe Jésus asangaamba éviga, na tsinane éngabunganédu.
4Vane Jésus amakeneda angô mbe: Nôwema kabaga anya nôbômédu n’ene oma. 5Oma ahngaviga atsua inami na apata mbe: Me te Christ, namatômu na Nzambé. Ahngabôméda oma ayekani. 6Nôngookô nzongodi yamabadi mandé gôpégôpé n’anyô, na tsangô yamabadi magôdagôda n’anyô. Nôneena gomo. Mabadime mane mangagenyu. Ivô tsengene ésangakôdéa vane. 7Eongo évo éngagenya na évo éongo. Tsenge épo éngagenya na épo tsenge. Ayekani angookô nzaa gôsangabahngô na môyakô. Tsinane éngatatéa gô dipo tsenge disitaté yangô na mbeego. 8Mabégôme metso mane mangaba te gandé gégôngôta géôkô môgeto gébeenda mbe muanee amahiviga.
9Engaba mbe oma angakaba anye omami gôénôtubéda maguga na gôénôyôha. Muetso angavinga anye te gô inami. 10Gô ndéô nene ayekani amabaka n’ami môtémovo anganôtôga gôndé me na Mabégô Mami. Oma angavingana na angakabana anguene n’anguene. 11Gôngaba eekédi adiboe angabôméda ayekani. 12Mane mabévani mangatsanzabana. Na oma asangamenya étatôa mane mamisôba na mane mabévani. Ayekani asangaba na tsôvé éaNzambé gamamônyôngéô ahngô v’ebandô. 13Ivô ône angasipa gô Mabégô MaNzambé ngu na v’ekôdéô, angagoobou. 14Tsangô Eamôsôba éenyanga éndé n’ami éngeekédu gô tsengeye yetso yava tsina gômbe oma muetso angookô gamatômu me na Nzambé na gô tsina. Vane te vangaba ékôdéô éatsengene.
Ebégô éaSôma Géôtéa Ebévani
(Bono na Marc 13:14–23, Luc 21:20–24)
15Nôngeena ône atetu mbe Sôma Géôtéa Ebévani angatemedu gô tsongo éadisambô édigaa Nzambé gô eba aNzambé. Te ône amanigôa Daniel, môpandôédi amatasa maNzambé. Me Jésus nanôongô ndongi nedué mbe, ône atangani aditégé ébégéôe édué. 16Vane ane ahngaba gô Judée abusagé na gô ngongo amikôdi. 17One angaba gô ngongo eba, vasutuméa angô gôébusuga aseengéa na gô ebedi gôébongo éômee éedi gôétsua éangô na gôkeangô. 18Na ône angaba gô tsaga éedi asanika na gô mbôka gôébongo ngoyine éedi. 19Te ngeba épôni gô panda dingeena agetoe pitsiye dine ane ahnagadenganô andé na mimé n’ane angadenganô anyuéséda ana. 20Dukani Nzambé mbe mabégô mema kabaga matsiga gô ndéône éasodi gévôni vo gô nyaa edunda. 21Gôébégô gô pitsiye dine oma angeena maguga mamootéani. Ti mônongoe amaguga ône madeo masienanô, bandôa vamakana Nzambé tsina n’oba ngu na pitsi yedi. Ngu na vangakôdéa tsinane, gôsangadôba ga ône môngongoe amaguga. 22Mbéka mbe Kumu amatasa mbe: Nasusué pitsiye, mbe gôsangasanéa môma adôngani. Ivô Kumu angasusua pitsiye te gôndé omedi amasevôa angô.
23Okô nôbeendiô mbe: Bononi Christ te angôô. Vo Christ te angôône. Nômbiôôkô mane. 24Gôngaviga eekédi adiboe apata mbe: Me te Christ. Avo dôta angapata mbe: Me te môpandôédi amatasa maNzambé. Angayanza émbégéa na mabégô manyônganéôni masoongôa môma ésupua. Eetso éne te gôebôméda oma, buéyé mbe ti n’ane amasevôu na Nzambé. 25Tambô anye ôôkôni. Namani énôévéda ébégôe madeo ésibuéa.
26Okô môma anônigôa mbe: Nôeni Christ avigi. Aka gô tsenge émagasani. Nômbiakea na gône. Môma angeenda mbe: Christ andé gôésomo gô tungu asimbe na mbôkaye. Nômbiôôkô mane. 27Nôsabômu gakadima mikadikadi gésa na gésa bandôa gôviga kômbéne na gôpénda kômbéne. Menyani mbe génikéô sami, Muana Amôma na gô tsina géngaba te nane. 28Gô tungu édenganô ésenze, nyoeye diaa ésenze dikôvana na wangô.
Génikéô saJésus, Muana Amôma na gô tsina
(Bono na Marc 13:24–27, Luc 21:25–28)
29Gô pitsiye dine, va mbene andéône éamaguga, kômbéne éngeemédu na ngondene ésangadôtanéda midanga. Minangamie mingaaga g’ôba na bobokoboboko. Ane atôma ngudi yava gatse atsina n’oba angatatéa. 30Vane gémbégéa samemuene Muana Amôma géngatsutsuga g’ôba. Asi mongo metso mava tsina angadéa na mindônga. Ahngeena me, Muana Amôma natsutsuga va gatse adibôngé yag’ôba na ngudi yetso na ôkumaka ondômbami. 31Vangatoongu émbômba nangavigéda asi g’ôba ayanzie ami gôékôkéga omami andé gô ékoo na gô dongu na gésa na gésa amasevôu na Nzambé.
Meekédu maviga g’ôfiguier
(Bono na Marc 13:28–31, Luc 21:29–33)
32Menyani gémbégéage gétubéda géétété gééndô mbe ôfiguier. Mitabé miedi mibandôa égeenya na yabiye dipunzua nôsabômu mbe mbuuaye dimoba. 33Te mônongovo veenanye mabégôme metso éma mabuéa. Menyani mbe amuene aka gôpégôpé. Asabô gôpégôpé, aka ti v’omba. 34Me nanôbeenda na gô pie mbe muetso ahndé adôngani asangawa mbe mabégô mema masatsigaka. 35Diôba na tsinane éngoota na éngadimbana. Ivô Mabégô Mami te môgunanza.
Nzambé amuene asabômu pitsiye
(Bono na Marc 13:32–37, Luc 17:26–30,34–36)
36Gôsaba môma angoongôa émenya pitsi vo ndéô éngabuéa mabégô mema, ivô te gô mbene n’okendô. Béyé asi g’ôba ayanzi aNzambé asamenya. Na me, Muana ANzambé tsamenya. Te amuene Téta asabômuni. 37Mane mameenanô gô ndéô émabaka Noé, te mangô mangeenanô va génikéô same, Muana Amôma. 38Menyani mbe gô ndéô nene géningôge madeo gésiviga, oma amaaka na amanyuaka. Ahmabaaka na amabeedaka anaô ngu na nyee ômapeka Noé gô mbôngône. 39Ahsibaké na môkeda ngu na vamabuéa géningôge gôégudéda ahngô muetso. Engaba te mônongovo gô gévigéô same, Muana Amôma. 40Ekegea te nane. Amôgôô abaé angaba gôéwanga. Môvo angabongu. Môvo angatsikô. 41Ageto abaé angatsuaka gésô gévo. Môvo angabongu. Môvo angatsikô. 42Imbakani géembemba gôébégô nôsamenya nyee ôngaviga Kumu anyô. 43Vôtanganôni édué. Kumu eba mbe amenya pitsine éviga muisui, angô mbe angeemba géembemba mbe asangasinga ebedi ôpadô. 44T’ebandô anye dôta bakani nômakoamani kuanakue gôévéngéa me, gôébégô me Muana Amôma nangaviga gô ndéône ésangatasanye.
Môyanzi agobedani na môyanzi asagobedani
(Bono na Luc 12:41–48)
45Môyanzi agobendani andé n’eodo ?eenda nayee? Angô eetsô éyanza na môtômine wedi mbe: Okenea ayanzi n’oo. Gô ndéô yetso ôkabéaka ahngô môyakôe. 46Ti gô gényônga géngaba na môyanzi nône vanganika kumu éyanzee na adenga môyanzine andé gôékabéa n’akedi môyakôe. 47Nanôbeenda na gô pie mbe kumu éyanzee angeetsa môyanzi nône énvanga évôni gôékenea n’okitie wedi wetso. 48Ivô ôkô môyanzine asinyepa, angô atasa gô môtémedi mbe, môtômine wami adinga éviga. 49N’angô abandôa égenya n’ayanzi n’edi. Aaka na anyuaka n’asi édangi. 50Vane kumu éyanzee angaviga gô nyee ôsangatasa môyanzine na gô ndéône ésangamenya angô mbe kumu angaviga. 51Kumu éyanza angamôsiséda tsôgôô édagani gasisédu asi enyepa éamiônya. Vane vangadéa ahngô mindônga, na gô pievia yaô angagéa ngeko.
Alliance Biblique du Gabon (Bible Society in Gabon) 1983
