Luc 7
7
Jésus amadôngéda môyanzi amôgode môsi Rome
(Bono na Matt. 8:5–13)
1Vamamana Jésus eekéda géômbége, amakea na gô Capernaüm. 2Gône gômabaka môsi Rome môtômi amôkama amigode. Môyanzi edi môvo amanyôngéô angô amabaka na beeaga éowa. 3Vamookô môtômi kumane éaJésus, amatôma avo peeye yAjuif gôémôwanyéda mbe aviga gôédôngéda môyanzine wedi. 4Peeye yAjuif amaviga na gôndé Jésus na amamôgondo na môvinéné mbe: Kokooye éwe. Môtômine ône, môsi Rome andé ti kuanakue n’asô. Buedi gôéviga gôémôwedéa na môyanzine wedi. 5Buéyé gandé angô môsi Rome anyôngéô we Ajuif. Te angô amaseedea we ebee wasô agéwanyéô. 6Vane Jésus amakea n’ane amamôwanyédani. Vamabangô aka ti gô buéaga gô eba amôtômine, ameena muene môma aviga gôéwanyéda ahngô. Amaviga n’ogie amôtômine eeséda amuene mbe: Ah Kumu, tsanyôngéô égôyungéda na mabégô mami. Me tsaba kuanakue gôébambéa éwe mbe: Oviga na gô ebami. 7T’ebandô me tsibuéa memuene na gôndé éwe, me tsaba kuanakue. Vovoko te n’ogi ôtévo. Môyanzine wami angadônga. 8Me dôta nandé gô tsina otômu apeeyami. Na me, nandé na migode g’ôtômue wami. Natôma môvo mbe: Kiaka. Akea. Natôma môvo mbe: Viga. Aviga. Natôma môyanzi ami mbe: Inda nani. Angô eenda. 9Vamookô Jésus ôgie ône amasôbasôbana gô mônongoe amôtômi nône, môsi Rome. Amanigôa ane amamôaandakani mbe: Buéyé gô éongo éetso éaIsraël, me madeo tsiena môma ga ôdôô asatsuma ngudi yami paga. 10Ane amawanyéda Jésus amanika na gô eba na amadenga môyanzine amadônga te aka môsiki.
Jésus amakundua g’ôwa muanee amôkué
11Vane Jésus amakea na gô mbôka étetu mbe: Naïn. Aneengie edi na oma ayekani amakea n’edi. 12Vamabuéa ahngô v’etumba éambôka, v’ombaa amôgômba, amawanya na oma atsua nzumbi na gô pesi. Nzumbine te muana amômôgôô ékika amôkué amôgeto. Ayekani asi mbôkane amabaka wangô na môkué. 13Vameena Kumu Jésus nane, amookô môgeto nône ngeba. Amamôénda mbe: Onadéa. 14Jésus amawesea gôébanda gô gégaage gémabaka nzumbine. Atsuayie anzumbine amatema. Jésus amavovo mbe: Mônzambu, me nagôénda mbe: Timôga. 15Nzumbine émadigaa na émabandôa évovo. Jésus amamôétsa yeedi. 16Muetso amatsôpu na gomo. Amakuméda Nzambé mbe: Oô mônongo amôpandôédi amatasa maNzambé amatsutsuga na gôndé we. Na avo dôta mbe: Bononi gavigi Nzambé gôéwedéa omedi. 17Tsangô éamane mamayanza Jésus émapaa gô tsengene éaJudée nyetso na gô dipo tsenge dimabambana na Judée.
Jean-Baptiste amakudéga oma na gôndé Jésus
(Bono na Matt. 11:2–19)
18Aneengie aJean amamônigôa metso mameenahngô mamabuéani. Jean amasevoa aneengi abaé 19na amakudéga ahngô na gôndé Kumu Jésus gôémôévôa mbe: ?One ookiô we mbe angaviga te éwe-a? ?Vo tôenéaka te muene-a? 20Vamatsigahngô na vandé Jésus amamônigôa mbe: Jean-Baptiste amakudéga we gôégôévôa mbe: ?One ookiô we mbe angaviga te éwe-a? ?Vo tôenéaka te muene-a? 21Vamatsigahngô gôéévôa Jésus nane, amamôdenga andé gôédôngéda oma ayekani amabaka na mabeea maô na pievia yaô. Amabaka dôta gôépatsa édidi ébévani na gôédôngéda asi pogu. 22Jésus amaabéa ane amakudéguku na Jean mbe: Nikani na gôndé Jean. Nôkenigôa mane mookiô anye na mane meeni anye. Nigôéni angô geeni anye mbe asi pogu eena, na ékonzo akea na makôdô manguene, na asi ébeea éagega adôngi na asi ndiba ookô, na ane awakini akundugi, na misuga miikédu Tsangô Eamôsôba. 23Ti gô gényônga géndé n’ewe ômeetsa me môtémoo wetso, na ôsakuéa gékôba gôénika na gô ngima.
24Ane amatômu na Jean amakea. Jésus amanigôa mabégô maJean gôndé géômbége. Jésus amavovo mbe: ?Gô tsenge émagasani anye nômakea gôéena ndaa? ?Nômeena ésingee épupédu n’opunga-a? Aé, nôsiene éne. 25?Tambô nômakea gôéena ndaa? ?Nômeena môma aata maduani mokumaka-a? Nôsabômu mbe môma amaduani mokumaka amasetu n’okitie wetso ônganyôngéô angô, na eenanô gô eba ôvôni amôtômi atsenge. 26?Nômakea gôéena ndaa? ?Nômakea gôéena môpandôédi amatasa maNzambé-a? Ii, nômeena te angô. Na ône ameenanye ootéa môvôni na môpandôédi. 27Menyani mbe Jean te ône ameevéda Matendeo MaNzambé mbe:
Nzambé amavovo mbe:
Me natôma peegi ami gôégôkukuéa nzéane.
28Jésus amanigôa mbe: Va gatse amuetso amabôtuni gôsaba môma ootéa môvôni ga Jean-Baptiste. Eébéyée nane, ône eendô mbe môma abobo g’ôkumu aNzambé angô ootéa môvôni na Jean-Baptiste.
29Oma muetso, buéyé n’abongi adepu amookô gameekéda Jean. Na amanigôgéô mbe: Nzembé te Kumu etsimama asaba n’oési na ameenda Jean mbe: We tônyôngéô ébatésu. 30Apharisien n’evovie amakékôa éne émakônzéô ahngô na Nzambé. Amakina éétsô bateme na Jean.
31Jésus amoomba énigôa oma mbe: ?Nagonéda oma apitsi yedi na ndaa? ?Angô andé ga ndaa? 32Nagonéda ahngô n’anéngé ande digaa gô mokii. Aadôngana anguene n’anguene mbe: We tôgobéyi anye ngomo mbe nôngagina, n’anye nôsigina. We tômanôtôéa mimbô mowa, n’anye nôsidéa miéngé. 33Endé te nane. Jean-Baptiste amaviga géé môyakô na gényué maduku na oma amavovo mbe: Jean andé na gédidi gébévani. 34Me, Muana Amôma namaviga. Me naa. Me nanyua. Na oma avovo mbe: Bononi angô, sedi gémba te aakagane, na sedi gémba te nyukagane. Angô avamba n’abongi adepu n’oma abévani. 35Ane avamba na Nzambé asabômu mbe éodo éedi ényepa.
Jésus amakea na gô eba aMôpharisien
36Môpharisien amabambéa Jésus mbe: Viga na gô ebami gôéaa môyakô. Jésus amakea na amadigaa n’edi va tabudé. 37Gô mbôka nene gômabaka môgeto amookanô mbe, andéké na môdigédi ôbévani. Vamookô môgeto nône mbe Jésus aka gô eba aMôpharisien gôéaa môyakô, amakea gôémôena. Amatsua na môyombo gô gévaa setaé ééndô mbe albâtre, émapakôni.#7:37 Te gatôénda mbe étaé éamikunduku. 38Amatema va kôbangô amakôdô maJésus. Amadéa. Keba yedi dimaobéda makôdôme maJésus. Na amakôbôa mangô na tsôgéye yedi. Amabanda mangô na gégeeba. Ameetéa môyombo gô makôdô maJésus gôéokeda mangô. 39Môpharisien, kumu eba amabono te bonogo. Na amatasa gô tsina amôtémedi mbe: Okô mbe ôdôô te na gô pie môpandôédi amatasa maNzambé, angamenya mbe môgetone oovôa makôdôme medi ôdôô, te môgeto môbévani. 40Jésus amabandôa évovo mbe: Simon, kumu eba, me nandé n’ogi gôévovo n’ewe. Simon amamôsingéa mbe: Kumu vovoko. 41Vane Jésus amavovo gô tsava mbe: Amôgôô abaé amasombo tsômbi gôndé môma môvo. One amapanga amasombo môtete ôvôvôni. Môvo dôta amasombo môtete av’okana. 42Angô muetso abaé asibé na ngudi gôévanéa kumu amôtete. Kumu amôtete ameena angô ngeba na amatsikéa ahngô mbe: Nôsangadôvana. ?Va gatse ahngô abaé ône angootéa ényôngéôni na angootéa étsôkéa kumu edi yôni? 43Simon amaabéa Jésus mbe: Me namenya mbe ône angootéa ényôngéôni te môsi môtetee ôvôvôni. Jésus amamôaabéa mbe: Ii, ôtsimi. 44Vane Jésus amabono môgetone na amavovo na Simon mbe: Oeni môgetone ôdôô. Me neengéyi na gô eboo. Ewe ôsiitsa me meba mbe noovôa makôdôme. Ivô môgetone ôôdô oovôi me makôdôme na kebaye yedi. Akôbôi mangô na tsôgéye yedi. 45Ewe, ôsibanda me na gényônga gôésambanéa n’ami gôéengéyi me gô eboo. Ivô môgetone ôdôô, geengéyi me gô eboo, andé gôébanda me makôdôme na gégeeba gôésambanéa n’ami. 46Ewe, kumu eba ôsineegeda me gôéetéa me madi gô môtsé. Géé môgeto noo eetéyi me môyombo gô makôdô. 47T’ebandô nagôbeenda mbe ti étondo ényôngéô angô me, étubéda mbe mabégô medi mayekani mabévani masingéyiô kokoo. Géé ône asingéô kokoo gô vipesu viebégô anyôngéô me te vipesu. 48Vane Jésus amavovo na môgetone mbe: Mabégôme moo mabévani masingéyiô kokoo. 49Ane amadenganô n’edi tabudé épo gôéaa môyakô ameevôana anguene n’anguene mbe: ?Mômôgôô noo vita indaa? Ayeega ésingéa ébéva éamôma kokoo. 50Na Jésus amoomba évovo na môgeto nône mbe: Kiaka na gétabé. Mabégô moo mabévani masingéô kokoo gôsitsuma éwe ngudi yami paga.
Alliance Biblique du Gabon (Bible Society in Gabon) 1983
