Luc 4
4
Yabédé amakanéga Jésus
(Bono na Matt. 4:1–11, Marc 1:12–13)
1Jésus ameenôga gô Jourdain môtémedi ômayôa na Gédidi SaNzambé. Amakedu na sangô na gô tsenge émagasani ésadigaa oma. 2Amakanégu na yabédé gô nzima dinayi yapitsi. Pitsiye yetso dine asiéé môyakô. Vamoota yangô amookô nzaa. 3Yabédé amamôkanéga mbe: Okô mbe éwe na gô pie Muana ANzambé, koa mataé mema maka mipemba. 4Jésus amasiia mbe: Matendeo MaNzambé matônigôa mbe: Môma asadônga gô mipemba mitévo.
5Yabédé amamôbatéda na gô ngongo ngongo. Amamôtubéda tsengeye yetso yava tsina gôémiena pesu andéô gakadima môkadikadi. 6Yabédé amavooto Jésus mbe: Oeni, tsengeye yedi yetso, na ditômuye yaô, n’okitie wetso, ômeetsô te me. Me dôta nangamikaba n’one anganyôngéô me éétsa. 7Okô ôsibi mabongome moo va tsina gôéneegeda me, éetso éngaba te éoo. 8Jésus amamôsiia mbe: Matendeo MaNzambé matôbeenda mbe: Neegeda Kumu Nzambé éoo, na ôyanzéa te angô môtévo.
9Yabédé amakea na Jésus na gô Jérusalem. Amabata n’edi na gô ngongo eba aNzambé. Amavovo na Jésus mbe: Okô mbe éwe na gô pie Muana ANzambé, tséda na gô tsina. 10Matendeo MaNzambé matônigôa mbe: Nzambé angatôma ayanzi edi asi g’ôba aviga gôékenea éwe. 11Na Matendeo moomba évovo mbe: Asi g’ôba angagôtsua gô mogo maô. Kabaga makôdô moo mooka ébaku. 12Jésus amamônikéda mbe: Ematendu dôta mbe: Ombiakanéga Kumu Nzambé éoo. 13Vamamana yabédé ékanéga Jésus gô minongo mietso, yabédé amatongonéa n’edi gôéenéa nyene ndéô.
Jésus amabandôa gésoo sedi gô Galilée
(Bono na Matt. 4:12–17, Marc 1:14–15)
14Jésus amanika na gô Galilée. Amabaka na môtémedi ômayôa na ngudi yetso yaGédidi SaNzambé. Tsangône yedi ématsanzabana tsengene nyetso. 15Ameekéda gô yebaye yewanyéô. Kumane yedi émookanô n’oma muetso.
Jésus amakinô gô mbôkedi
(Bono na Matt. 13:53–58, Marc 6:1–6)
16Jésus amabuéa na gô Nazareth, te mbôkane émoongôgangô. Gô nyee edunda ameengéa na gô eba agéwanyéô gamabaka gésima sedi. Amatema gôétanga Matendeo MaNzambé. 17Ameetsô gésangô gématenda Esaïe, môpandôédi amatasame maNzambé. Amakonyo môvutégue ômatenduni na amatanga mabégô mema. Angô mbe:
18Gédidi SaKumu Nzambé géndéké gôndé me.
Amasevôa me gôétsua Tsangône yedi Eamôsôba na gôndé misuga.
Amatôma me gôédôngéda mitéma mindé gô panda.
Amatôma me gôénigôa géobogeo sedi na gôndé asi tsôgôô.
Amatôma me gôépôéda miso masi pogu, ôbiia.
Amatôma me gôénzeegeda ane andé gô tsina otômu akumu édagani.
19Amatôma me gôéevéda oma ndéône éngeenanô mabégô mamisôba maKumu Nzambé.
20Vane Jésus amanikéa évutéga môvutégue gôédeekeda angô môyanzine eba agéwanyéô. Amadigaa. Oma muetso amadenganôni amamôbono na nzôô. 21Na vane Jésus amabandôa épandôéda mbe: Ene étangi me gô Matendeo MaNzambé nôeni éangô n’atsatsee vandé anye gôéokô éangô étangôni. 22Muetso amasôbasôbana na gényônga gômanigôa angô nane. Na ahmatsapéô gô mavovia medi manyônganéôni. Ahngô mbe: ?Odôô ka te muanee aJoseph-ma? 23Jésus amaabéa ahngô mbe: Mavooe nôngagunya me tsava gatôvovo mbe: Môbôgine, panga éadôngéda ômuene. N’anye mavooe nôngeenda me mbe: Tômani éôkô metso mamayanzewe gô Capernaüm. Tambô indaka mangô mônogovo gô mbôkane yoo émabôtu éwe, tôena mangô. 24Jésus amoomba mbe: Me nanôbeenda ébégô édué éapie. Gôsaba môpandôédi amatasa maNzambé anyônganéô gô mbôkane émabôtu angô. 25Ekegea te nane. Gô ndéône émadônga tétasô Elie, mbuuane ésinyogé gô mipuma mitatô na gébéndéké. Asi tsengene nyetso amookô nzaa. Gô tsenge éaIsraël gômabaka mikué miyekani gô ndéô nene. 26Ivô Nzambé asitômé Elie na gôndé mikué miageto miagô tsengene yedi gôédiia môyakô. Elie amatômu na gôndé môkué amôgeto amadigaa gô mbôka éaSarepta gô tsenge éaSidon. 27Gô ndéône dôta émadônga Elisée, môpandôédi amatasa maNzambé, gômadenganô oma ayekani asi ébeea éagega gô tsengene yedi. Tambô gôndé ahngô gôsidôngédu ta na môvo. One amadôngéduni te Naaman, môsi tsenge étetu mbe Syrie.
28Muetso amadenganô gô eba agéwanyéô amakambôga n’opisa gô mane mamavovo Jésus. 29Ahmatimôga muetso na amakeda Jésus na gô ngongo amôkôdie av’etumba éambôkane yaô. Ahmanyôngéô émôtinda na gô dongu amôkôdie. 30Ivô Jésus amoota va gatse aô na amakea.
Môma amayungédu n’edidi ébévani
(Bono na Marc 1:21–28)
31Jésus amakea na gô mbôka éaCapernaüm, éndéké gô Galilée. Gô nyee edunda ameekéda oma. 32Ane ahmookôni amatsapéô gô meekédu mamisôba maJésus. Meekédu medi gébômu mbe môma andé n’enyanga. 33Gô eba agéwanyéô gômabaka mômôgôô na gédidi gébévani. Amaadôngana mbe: 34?Ah Jésus môsi Nazareth ôbé nayee n’aso? ?Omaviga gôédimbanéda wea? Me tsabômu mbe éwe te Muana Amatsimamani ômatômu na Nzambé. 35Jésus amadékéda sangô mbe: Kôda vane. Kusa gôndé môma nône. Sangô gémagunya môma na va tsina va miso moma muetso. Na sangô gémakusa gôndé mômôgôô nône gésimôôkédu pievia. 36Muetso amatsapéô na ameevôana anguene n’anguene mbe: ?O te wene mônongo ameekédu-a? Mômane ôdôô atôma édidi ébévani ti n’enyangee na ngudiye, na éangô te kusaga. 37Tsangône éaJésus émapaa tsengene nyetso.
Jésus amadôngéda abeeyi ayekani
(Bono na Matt. 8:14–17, Marc 1:29–34)
38Jésus amanôtôga gô eba agéwanyéô gôékea na gô eba aSimon. Ogoyi aSimon, yeene amôgayedi, amabeea nzônzônzô. Amabambéa Jésus gôémôdôngéda. 39Jésus amakotomo vandé môbeene na amakangéa sodige mbe: Nôtôga gôndé môgetone ôdôô. Sodige gémanôtôga. Môgetone amatimôga tsina na tsina na amaambéa ahngô muetso môyakô.
40Na dikoo kômbéne émapénda, muetso ane amabaka n’abeeyi aô ahmatsua ahngô na gôndé Jésus. Jésus amatsakéga ahngô mogo, môvo môvo gôéahdôngéda. 41Edidi ébévani émakusa gôndé abeeyi ayekani. Emakusa émaadôngana mbe: Ewe te Muana ANzambé. Jésus amadékéda éangô mbe: Nômbiavovo. Gôébégô édidie ésibômu mbe Jésus te Christ ône amatômu na Nzambé.
Jésus ameekéda gô Judée
(Bono na Marc 1:35–39)
42Vamaagiia nyee, Jésus amapénda gô môsenge gôékea na gô tungu ésibé oma. Ivô oma ayekani amabandôa émôbuta. Vamamôena ahngô amamôsikaméda mbe: Ombiakea na gô nyene tungu. 43Ivô Jésus amanigôa ahngô mbe: Tsikani me nakea dôta na gô mivo misenge gôéékéda Tsangô Eamôsôba éokumu aNzambé. Me namatômu na Nzambé te gô éne. 44Vane Jésus ameekéda gô yeba yewanyéô yagô Judée.
Alliance Biblique du Gabon (Bible Society in Gabon) 1983
