Phŭn Blŭng 6
6
Klơi set nă mơnuih
1Pah nă mơnuih lal đĭ lô mơ̆ng lŏn kơnah, dăp pơpôn r̂ai nă đahmơi-đahmơi, 2pah anŭn môt nă yang#6:2 Môt nă yang lơ «Môt nă đahkơi Ơi Adai.» Mơnuih pơanah khư̆t laĭ môt ne môt ling-jang, pơanah dŏng khư̆t laĭ môt ne nă čo Sêt môt ngư̆ Ơi Adai, pơanah dŏng khư̆t laĭ môt ne môt mơnuih ngă khua wai-lăng mơ̆ng lŏn kơnah. ƀôh nă đahmơi mơnuih hiam-hiam, nŭn gơñu r̂ih đahmơi tui bŭt gơñu čiăng, tô̆ ngă bơnai gơñu. 3Jr̂ŏng nŭn Yêhôwa laĭ: «Yang Bơngăt kâo#6:3 Yang Bơngăt kâo lơ «Angĭn să pr̂an kâo.» bĭ dŏ hr̂ŏm nă mơnuih hayoh ôh, yua gơñu săl đơč. Kâo čr̂oh br̂ơi mơnuih dŏ dĭp 120 thŭn đơč.» 4Pah anŭn hmâo mơnuih pơanah dŭt-dŭt jat mơ̆ng lŏn kơnah, dăp dơdơi mơ̆ng anŭn dŏng hmâo mơ̆n. Pah anŭn mơ̆n, nă yang#6:4 Nă yang lơ «Môt nă đahkơi Ơi Adai.» An Phŭn 6:2. jĕ jiăm hr̂ŏm nă đahmơi mơnuih, nŭn gơñu pơpôn r̂ai nă-bă, nă-bă gơñu yơh mơnuih kơtang r̂ăng pơ-i-bli mơ̆ng đim.
5Nŭn Yêhôwa ƀôh klơi set nă mơnuih lal đĭ lô tui mơ̆ng lŏn kơnah, wŏt klơi gơñu ƀlŏng tăm bŭt r̂ĭm r̂ơi r̂ĭm mlăm, gơñu khư̆t ti ngă set soh-sel. 6Jr̂ŏng nŭn Yêhôwa, ñu uah jat ñu ngă mơnuih mơ̆ng lŏn kơnah, wŏt ñu wă bŭt. 7Nŭn Yêhôwa laĭ: «Kâo ti bơlŏm lôi mơnuih kâo bơjr̂ŏng br̂ơi bih mơ̆ng kơnah, tô̆ mơ̆ng mơnuih tr̂uh pơ čĭm-br̂ĭm, čĭm thâo r̂ôi čĭm thâo hr̂o, wŏt čĭm thâo pŏl ngŏ adai he, kâo uah jat kâo ngă gơñu.» 8Plai Nô-ê dŏng, Yêhôwa bŏ bŭt mơ̆ng ñu.
Ơi Adai bŏ bŭt mơ̆ng Nô-ê
9Ne yơh klơi a čih čr̂oh mơ̆ng buă khŭl-khap Nô-ê.
Mơ̆ng nôk ñu, Nô-ê yơh mơnuih kơpă-hnŏng dăp hiam tôm-tĕč, ñu mơnuih bat hr̂ŏm Ơi Adai. 10Nô-ê hmâo nă đahkơi klâo r̂ăng, Sĕm, Hăm, dăp Yaphet.
11Pah anŭn, nă mơnuih dŏ mơ̆ng lŏn kơnah ngă set jat ti năp Ơi Adai, dăp lŏn kơnah bŏ mơ̆ng klơi khui ƀiah. 12Ơi Adai ƀôh lŏn kơnah r̂ăm dơdi,#An Phŭn 1:31. yua tơgr̂ư̆ mơnuih#6:12 Tơgr̂ư̆ mơnuih Hêbrơ laĭ «Tơgr̂ư̆ săl.» ngă bơr̂ăm lôi glan gơñu pô mơ̆ng lŏn kơnah. 13Jr̂ŏng nŭn Ơi Adai pơhiăp hr̂ŏm Nô-ê: «Kâo ti ngă bơlŭč lôi bih mơnuih dăp čĭm-br̂ĭm,#6:13 Bih mơnuih dăp čĭm-br̂ĭm Hêbrơ laĭ «Tơgr̂ư̆ săl.» yua lŏn kơnah bŏ mơ̆ng klơi khui ƀiah r̂ai mơ̆ng buă gơñu ngă. Nêne kâo iă ti bơr̂ăm lôi gơñu dăp lŏn kơnah he mơ̆n. 14Br̂ơi ih tô̆ kơyâo maisă ngă kŏmpăn wŏ, ih mơ̆ng mŭt kơđap. Br̂ơi ih ngă nih lô, wŏt tô̆ kơtăk mañ kŏmpăn, mañ đah-lăm he, gah ia-wang he mơ̆n. 15Ih ti ngă kŏmpăn hla ne: Yong ñu klâo tuh haih, da ñu ma pluh haih, glong đĭ klâo pluh haih.#6:15 Klâo tuh haih dơmô 135 mĕt, ma pluh haih dơmô 22 mĕt, klâo pluh haih dơmô 13 mĕt. 16Ih ti ngă bŭng bơdit đĭ hloh mơ̆ng kŏmpăn ha haih.#6:16 Ngă bŭng bơdit đĭ hloh mơ̆ng kŏmpăn ha haih lơ «Ngă amăng phă gah yô̆ mơ̆ng bŭng ha haih.» Ih ti ngă bah amăng ha boh đơč čr̂oh gah yong ñu, jr̂ŏng nŭn ngă br̂ơi kŏmpăn hmâo klâo tăl: Gah yô̆ ha tăl, tŏng-kr̂ah ha tăl, gah ngŏ ha tăl. 17Plai kâo dŏng, ep hŏ! Kâo iă ti ba r̂ai ia br̂ơi lip lôi mơ̆ng lŏn kơnah, čiăng bơr̂ăm lôi tơgr̂ư̆ mơnuih dăp čĭm-br̂ĭm thâo să pr̂an dŏ dĭp gah yô̆ adai. Bih-tih nŏ yĕt-yĕt dŏ mơ̆ng lŏn kơnah ti tĕ pr̂an. 18Plai dŏng, kâo ti kă klơi uăn bơgop#6:18 Kâo ti kă klơi uăn bơgop lơ «Kâo ti ngă bơjr̂ŏng lôi klơi uăn bơgop.» hr̂ŏm ih. Ih ti mŭt tăm kŏmpăn, dăp nă, dăp bơnai, wŏt bơnai nă ih ti mŭt hr̂ŏm ih mơ̆n. 19Čĭm-br̂ĭm thâo să pr̂an tơgr̂ư̆ neo, ih ti tô̆ ha ku ha ku, ba mŭt tăm kŏmpăn, kơno ña kơno ña, čiăng r̂ăk čr̂oh klơi hơdĭp ñu hr̂ŏm ih. 20Čĭm-br̂ĭm tơgr̂ư̆ neo ti r̂ai pơ ih ha ku ha ku, čĭm thâo pŏl tui tam djuoi ñu, dăp čĭm plơi čĭm glai tui tam djuoi ñu, wŏt čĭm thâo r̂ôi čĭm thâo hr̂o mơ̆ng kơnah tui tam djuoi ñu mơ̆n, čiăng r̂ăk čr̂oh klơi hơdĭp ñu. 21Plai ih dŏng, br̂ơi ih tô̆ hnă ƀŏng tơgr̂ư̆ neo ba nao pr̂ăp čr̂oh, ih mơ̆ng hmâo nŏ ƀŏng, wŏt čĭm-br̂ĭm he mơ̆n.» 22Jr̂ŏng nŭn Nô-ê ngă tui tơgr̂ư̆ klơi Ơi Adai pơtă br̂ơi ñu. Nô-ê ngă tui hla nŭn yơh.#An Hêb 11:7.
© 2024, Wycliffe Bible Translators, Inc.
