मत्ती 9
9
1ओउःत तेआक्तीको येसु दोङ्गाताङ् पोक्ती लयःकोः कफर्नाहुम् त तोओ सहर्ताङ् वाङ्आकाय्। 2ओहाङः वाङ्आक्तीको यात्चाक् जुगाङ् वाह्सा खाय्मालो मान्ताकायः न्हाप्लावःहाङः लात्ती वानःआकानी। ओउःकायः वानःतोक्हाङः येसुइ इत हायःओ च्यवःती “लौ इमयःइ ङाकायः आन ङ्हाम्नाःताङः रैस बा” त चीःती ओउः जीक्ओकायः ल्हेःती “लौ हौय ल्हुङ् धोमाय्तोलेः मुअ दा। नाङ्इ जाङ्ह्ओ रेव्ओ काम् द्याह् क्युम्ह्तो वाय्ओ लेःआः बा” त दाय्ह्ती येसुइ तोआथै। 3ओउःत तोतोक्हाङः यात्नीस्चाक् धर्मा स्यान्ओमयःइ येसुइ तोओ कुरा सायःती “लौ इ मान्तापाय् ‘ङा परमेस्वर् लेःआः ङ’ त लयःकायः ताःनाःस बा” त दाय्ह्ती ओउःमयः ल्हुङ्हाङः म्हर्इतो 4येसुइ ओउःमयःकोः ल्हुङ्कोः कुरा चीःती झ्यान्ते “लौ दोह् हायःतीतेः इत रेव्ओ कुरा ल्हुङ्हाङः म्हर्तेःनै। 5‘गाव्खे सजीलो’ त ताःतेःचै। यात्चाक् वाह्सा खाय्मालोकायः ‘लौ नाङ्कोः रेव्ओ काम् क्युम्ह्ओआः’ त दाय्ह्साया ‘लौ च्योक्ती वाह्अ’ त दाय्ह्ती ओउः जीक्ओकायः स्याक्ताक्साया ‘गाव्खे सजीलो’ त तोनाङ्स दा। 6लौ ङा मान्ताकोः चोः त तोओ ल्हाव्ह्दैबाङ्हाङः रेव्ओ वाय्साकायः ग्वम्मा स्याक्ताक्साकायः ग्वम्मा दोःआलाङः त नीङ्कायः छ्यानःताक्साकायः ङाइ इकायः स्याक्ताक्लेःनाङः” त दाय्ह्ती येसुइ ओउः जीक्ओ मान्ताकःताङ् ल्हेःती “लौ च्योक्अ नाङ्कोः न्हाप्लावः लात्ती पाय्ह्अ दा” त दाय्ह्ती ओउःकायः तोआकान्। 7ओउःत तोआक्तीको ओउः मान्ता च्योक्ती लयःकोः कीम्ताङ् पाय्ह्आ। 8एतलेः ओउः ङ्हा वाह्सा खाय्आक्मालो मान्ता च्योक्ती वाह्ओ च्यवःती ओउः हुम्ती मुआ मान्तालम् एङःती “लौ मान्ताकायःपाय् परमेस्वर्इ ओउःच्युक् ग्वम् दोःताक्आथै बा” त दाय्ह्ती परमेस्वर्कायः झाह्ती ताङ्ह्ताक्आकानी।
9ओहाङःसैको कीम्सै आल्ती येसुइ यात्चाक् मत्ती त तोओ पैसा उथावओ मान्ताकायः लयःकोः आफीस्हाङः च्यवःती क्रुस्आकान्। ओउःकायः क्रुस्तोक्हाङः “लौ ङाकुस् वाह्अ” त दाय्ह्ती येसुइ तोआथै। तोआक्तीको उया मत्ती चीङ्ती येसुकुस् वाह्आकाच। 10ओहाङःसैको वाह्ती मत्तीकोः कीम्ताङ् आल्ती पोक्ती येसुकायःमा ओउःकुस् वाह्ओमयःमा भोस् जाङ्ह्आथास। ओउः भोस् जेःतोक्हाङः नाःतो अरु पैसा उथावओलम्मा पेमालो मान्तालम्मा येसुकुस् जेःलाङ् वाङ्आकाय्। 11ओहाङःसैको ओउः मान्तालम् येसुकुस् ब्रेङःतीलेः जेःती मुतोक्हाङः फरीसीलम्इ इत च्यवःती येसुकुस् वाह्ओमयःकःताङ् वाङ्ती “लौ नीङ्कोः गुरुपाय् इलो खेःओ पैसा माःती जेःओलम्कुस्मा रेव्तो जाङ्ह्ओलम्कुस्मा दोह् हायःतीलेः ब्रेङःकाय्ती जेःती तुङ्ती मुनाः” त दाय्ह्ती तोनीतो ती ओउःमयःइ तोओ कुरापाय् येसुइ सायःती 12“सेलः मुओ मान्तापाय् दाक्तर् स्याक्ताक्लाङ् वाङ्सा परल जीक्ओकःताङ् ह दाक्तर् वाङ्सा ज्योनाः। 13ओउःलो लेखालेः ङा पेओ मान्तालम्खेकायः खेःल पेमालो मान्ताखेकायः ह ‘लौ नीङ्कोः रेव्ओ काम् फेती ङाकोः पेओ काम् जाङ्ह्नु दा’ त दाय्ह्ती होम्ती तोलाङ् वाङ्ओआः ङ। लौ इ आखरःहाङः लेखओ कुरा स्यान्इसी दा। ‘ङाकायःपाय् स्याः ल्हाती बयःसा जवओ झाक्ङल नीङ्इ अरु मान्ताकायः योनःती योसा ओउःत हायःओलेः ह झाक्नाङः बा’ त दाय्ह्ती तोओ नीङ्इ चीःसा खेःतेःनै” त दाय्ह्ती येसुइ तोआथास।
14ओउःतलेः तोआथास ओहाङःसैको येसुकःताङ् बाप्तीस्मा बयःओ युहनाकुस् वाह्ओमयः वाङ्आकाय्। वाङ्ती “लौ ङीखेइमा फरीसीलम्खेइमा आन उपाङ् काःओ जवनाङःसु नाङ्कुस् वाह्ओमयःखेइ दोह् हायःतीलेः ङीलो लेखा उपाङ् काःइसीली” त दाय्ह्ती येसुकायः व्हत्नीतो 15“लौ बीहाताङ् वाङ्ओ पहुनालम् भाव् मुतोक्हाङः भोस् जेःती लीह्माःत चोङाय्ती मुनै माःदै। लोने वाङ्सा दीन्हाङः ओउः भाव्पाय् ओउःमयःकःसै आलःआक्तीको ह उपाङ् काःसा ज्योनाः। इलो लेखा ङा मुमुबालेहाङः ङाकुस् वाह्ओमयःइ उपाङ् काःसा परइली। ङा आल्आक्तीको ह उपाङ् काःनाःइसी” त दाय्ह्ती येसु त्याङ्आ। 16“लौ आय् नाय्हाङः सुइमा रौ नाय्इ काप्नीली। रौ नाय्इ काप्ओ त खेःया ओउः रौ नाय्इ प्रान्ह्ती आय् नाय्कायः न्हाङ्तोलेः पङःताक्ती वाय्ताक्नौ। 17फेरी रौ धाक्सायःकोः तीः वङ्ह्ओ पोम्हाङः सुइमा बोमःती कानीली उया पक्ताक्ती पोम्मा तीःमा वाय्चाः। रौ धाक्सायःकोः तीः रौ पोम्हाङः ह कानानी ओहाङःसैको पेतोलेः स्याव्नाः। इलो लेखालेः ङाकोः नया कुरा आय् जवओ कुराकुस् ब्राङ्चल” त दाय्ह्तीमा येसु दाय्ह्आ।
18ओहाङःसैको एतलेः तोतोबालेहाङः यात्चाक् यहुदीलम्कोः ताङ्ह्ओ मान्ता येसुकःताङ् वाङ्ती ओउःकायः बाःती स्यवती “लौ ङाकोः चोःद्याङ्जा देङी सीआ रैस। सीसापाय् सीलेःतो लौ ओउःकायः क्रुत्इ झाम्ह्ती दीन्ह्लाङ् वाङ्अ ओहाङःसै स्याक्ती ओउःपाय् उह्ती च्योक्लेःनाः” त दाय्ह्ती येसुकः काःहाल्ती तेआ। 19ओउःत तेआक्तीको येसुमा ओउःकुस् वाह्ओमयःमा चीङ्ती ओउः सीओ मोमःचोःचोःकोः आपाकुस् पाय्ह्आकाय्। 20कीम्ताङ् पाय्ह्ती वाह्तोक्हाङः यात्चाक् वयः वयःओ पीर्इ ङायःओ मोमःचोः येसुकःताङ् वाङ्आ। ओउः मोमःचोःपाय् बार बर्सच्युक्कायः आङ्रयःबाङ् जीक्ओ खेःतो। 21ओहाङःसैको ओउः मोमःचोः येसुकोः काह्सै वाङ्ती “लौ ओउःकोः नाय् ह दीन्ह्चाङः त खेःया स्याक्लेःनाङः” त दाय्ह्ती म्हर्ती येसुकोः नाय्कोः च्योनःतेङ् दीन्ह्आकान्। 22ओउःत नाय् दीन्ह्तोक्हाङः येसुइ ल्हेःती ओउःकायः च्यवःती “लौ हौद्याङ् ल्हुङ् धोमाय्तोलेः पाय्ह्अ। ङाकायः ङ्हाम्तेःआची बा ओउःत झ्यान्ते नाङ् सेलः स्याव्तेःनाः” त दाय्ह्ती येसुइ तोआथै। तोआक्तीको ओउः मोमःचोः ओउःत तोओहाङःसै सेलः स्याव्ती पाय्ह्आ।
23ओहाङःसैको येसु आल्ती ओउः यहुदीकोः ताङ्ह्ओ मान्ताकोः कीम्ताङ् दाह्ती वाङ्आकाय्। दाह्ती वाङ्तोक्हाङः ओहाङः क्रेस्ती मुओलम्मा झ्यामे ताय्क्ती मुओलम्मा च्यवःती 24“लौ पाय्ह्न ओउः मोमःचोःचोः सीमाःत एनःतीलेः मुओ ह” त दाय्ह्ती तोथासतो ओउःमयःइ येसुकायः “लौ इइपाय् ‘ओउः चोःपाय् सीओ लेःआः’ त चीःउलु” त दाय्ह्ती येसुकायः ङीःती गाक्आकानी। 25ओहाङःसैको ओउः ङीःती गाक्ओलम्कायः सबै बाहीरताङ् क्लाःआक्तीको येसु कीम्ताङ् पोक्ती ओउः मोमःचोःचोःकायः क्रुत् चुम्ती उह्ताक्ती त्यती च्योक्ताक्आकान्। च्योक्आक्तीको ओउः मोमःचोः चीङ्लेःआ। 26ओहाङःसै ओउःत ग्याङ्ह्सीःओ कुरा सबै देस्हाङः ल्हाक्ती नोःकाय्आकाय्।
27ओहाङःसैको येसु ओउः कीम्सै ग्ल्युङ्ह्ती आल्ती वाह्तोक्हाङः नीस्चाक् मीक् लोक्ओइ ओउःकायः गुल्ह्ती “अ नाङ् दावुद्कोः प्लोमःदानेय नीचीकायः योनःती योताङःच दा” त दाय्ह्ती गोःआकाचु। ओउःत येसुकायः गोःती गुल्ह्आकाचु। 28येसु कीम्ताङ् दाह्ती पोक्आक्तीको ओउःनीस्मा पोक्ती ओउःकःताङ् वाङ्आकाच। ओउःनीस् वाङ्आक्तीको “लौ नीङ्जीकायः ङाइ स्याक्ताक्सा खाय्नेःनाङ्च त ङ्हाम्तेःनाःजुया ङ्हाम्तेःजुलुया” त दाय्ह्ती येसुइ व्हत्आथाच “माः नीची ङ्हाम्नाङःचु” त दाय्ह्ती त्याङ्ती झ्यान्ते 29येसुइ ओउःनीस्कोः मीक् दीन्ह्ती “लौ उया गतलोतेः ङ्हाम्तेःनाङःजु ओउःतलेः स्याव्पाः” त दाय्ह्ती तोथाचतो ती 30ओउःनीस् मीक् च्यवःसा दोःआकाच। “लौ इ कुरा सुकायःमा छ्यानःतेःचाःजु” त दाय्ह्ती येसुइ गानाक्ती तोथाचतो ती 31ओउःनीस्इ आल्ती येसुइ जाङ्ह्ओ ग्याङ्ह्राय् सबैकायः ल्हाक्ती तोआकाचु। 32ओहाङःसैको ओउःनीस् आल्आक्तीको यात्चाक् लान्इ ङायःओ नोःसा खाय्मालो मान्ताकायः येसुकःताङ् वानःआकानी। 33वानःआक्तीको येसुइ ओउः लान्कायः ल्हेस्ती वाय्आकान्। ओहाङःसैको ओउः मान्ता नोःसा खाय्ओ खेःतो। एत हायःओ च्यवःती ओउः हुम्ती मुओलम्खे “लौ इलो हायःओजा ङीकोः इस्राएल् देस्हाङः गलमा च्यवःआक्ल बा” त दाय्ह्ती नोःकाय्इतो 34ओउः फरीसीलम्खे “येसुपाय् लान्कोः राजाइ बास्ओआः त खेःओ लान्इ ल्हेस्सा खाय्नौ” त दाय्ह्ती नोःआकाय्।
35ओहाङःसैको येसु आल्ती वाह्दा वाह्दा सबै सहर् गाव्गन तोमःती आल्धै थनःओ कीम् कीम्हाङः स्यान्ती परमेस्वर्कोः पेओ समचार् थोल्ह्ती तोओमा नाःतो जीक्ओकायः स्याक्ताक्ओमा खेःतो। 36ओहाङःसैको नाःतो हुम्लाङ् वाङ्ओलम् च्यवःती “लौ इमयःपाय् ह्रामःओ मान्ता नाःमालो मेत्छ्याःलो लेखा ब्रःतीमा ल्हुङ् र्याङःतीमा मुनै” त म्हर्ती येसुइ योनःती योआथास। 37“लौ राङ्हाङः भुङ्ह्ती मीन्ओ सायःलो लेखालेः इ मान्तालम्पाय् नाःतो लेःआः ओउःमयःकायः परमेस्वर्कोः राजीहाङः त्युम्ह्ती वानःसा मान्तालम्पाय् नाःतो नाःइली। 38ओउःत खेःया ‘लौ प्रभुय त्युम्ह्ती वानःसा मान्तालम्पाय् ल्होक्चाक्उ दै’ त दाय्ह्ती परमेस्वर्कायः तेती तोनु दा” त दाय्ह्ती येसुइ लयःकुस् वाह्ओमयःकायः तोआकान्।
© 1993 Wycliffe Bible Translators Inc., All Rights Reserved.
