लुका 23
23
1ओउःत नोःकाय्आक्तीको ओउः सभा कीम्हाङः हुम्ओ मान्तालम् सबै चीङ्ती येसुकायः पीलातस् त तोओ अन्चलादीस्कःताङ् दाक्ती वानःआकानी। 2पीलातस्कःताङ् वानःआक्तीको ओउःमयःइ येसुकायः गाल्तुम्ती नोःओ बोङःआकानी “इ मान्ताइपाय् ङीकोः इस्राएली मान्तालम्कायः आन पेमालो थ्योन्ह्ती होम्सा बोङःओ खेःतो। ओउःइपाय् ‘सीजर् राजाकायः कर् पैसापाय् पाय्क्लाम्’ त तोती लयःकायःलेः ‘ङापाय् ख्रीस् लेःआः ङ नीङ्कोः राजालेः’ त दाय्ह्ती तोआकास” त दाय्ह्ती ओउः यहुदीकोः ताङ्ह्ओ मान्तालम्इ तुम्ती तोआकानी। 3इत सायःती “लौ नाङ्पाय् यहुदीलम्कोः राजालेःतेः खेःतेःनाःया” त दाय्ह्ती पीलातस्इ येसुकायः व्हत्थातो “नाङ्इ तोओलो लेखा ओउःतलेः खेःनाङः” त दाय्ह्ती येसु त्याङ्आ। 4इत सायःती “इ मान्ताकायः सात्सा थेङा पेमालो काम् जाङ्ह्ओ त दोह्मा सायःङल” त दाय्ह्ती पीलातस्इ यहुदीकोः ताङ्ह्ओ मान्तालम्कायः तोआथास। 5इत सायःआक्तीको ओउः मान्तालम्इ न्हाङ्तोलेः येसुकायः गाल्तुम्ती तोआथै “इ येसुइ स्यान्ओ कुरा सायःआक्तीको ङीकोः यहुदीया देस्कोः मान्तालम्पाय् पेमालो हायःती कायःकाय्सा मीन्ह्काय्सा बोङःनानी। ङ्हापाय् गालील अन्चल्हाङः येसुइ एत पेमालो स्यान्आकान् द्याह् इहाङःमा स्यान्लाङ् वाङ्ओआः” त दाय्ह्ती ओउःमयःइ ज्योङःतीलेः तोआकानी।
6ओहाङःसैको “येसुपाय् गालील अन्चल्हाङः स्यान्ती तोओ खेःतो” त तोओ पीलातस्इ सायःती “लौ उया इ येसुपाय् गालीलसै वाङ्ओया” त दाय्ह्ती व्हत्आथास 7ओउःमयःइ “माः ओउःपाय् गालीलकोः मान्ता लेःआः” त त्याङ्ती झ्यान्ते पीलातस्इ येसुकायः हेरोद्त तोओ गालीलकोः राजाकःताङ् ल्होक्आथै। ओउःतोक् बेलाहाङः हेरोद् राजामा यरुसालेम् सहर्हाङः मुओ खेःतो। 8“येसुइ आन ग्याङ्ह्राय् जाङ्ह्सा खाय्नौ” त तोओ हेरोद्इ सायःआकान् ओउःत झ्यान्ते येसुकोः ग्याङ्ह्राय् “योपाङः” त दाय्ह्ती हेरोद् राजापाय् आन ज्याङःतोकायः येसुकायः क्रुस्सा झाह्ओ खेःतो। ओउःत झ्यान्ते येसु ओउःकःताङ् ल्होक्ओ बेलाहाङः हेरोद् राजाइ ओउःकायः आन म्रोतोलेः क्रुस्आथै। 9येसुकायः क्रुस्तोक्हाङः हेरोद् राजाइ आन ल्हुङ्तुक् कुःती व्हत्थातो येसुपाय् दोह्मा त्याङ्ल। 10ओउः ताङ्ह्ओ पुरोहीत्लम्मा धर्मा स्यान्ओमयःइमा येसुकुस् वाङ्ती ओउःकायः आन गाल्तुम्ती तोआकानी। 11ओहाङःसैको हेरोद् राजाखेइ लयःकोः सीपाहीलम्इ येसुकायः हेला क्लाःताक्आकान्। ओउःत हायःआक्तीको येसुकायः राजालो लेखालेः पेओ क्रमःनाय् लावताक्आक्तीको हेरोद्इ ओउःकायः पीलातस्कःताङ् द्यान्ह्ती ल्होक्आथै। 12हेरोद् राजामा पीलातस्मा ङ्हापाय् योगार्सीःमालो खेःचतो पीलातस्इ येसुकायः हेरोद् राजाकःताङ् ल्होक्तोक् बेलाहाङःसै ओउः नीस्चाक् खात्काय्आकाच।
13ओहाङःसैको येसुपाय् पीलातस्कःताङ् द्यान्ह्ती ल्होक्आक्तीको पीलातस्इ ओउः ताङ्ह्ओ पुरोहीत्लम्मा अरु यहुदीकोः ताङ्ह्ओ मान्तालम्मा सबै हुम्ओ मान्तालम्कायः गोत्आथास। 14ओउःमयःकायः गोत्ती हुम्ती वानःआक्तीको “लौ इ ङाकःताङ् वानःओ मान्ताकायःपाय् ‘ओउःइ अरुलम्कायः पेमालो कुरा थ्योन्ह्ती होम्सा बोङःओ खेःतो’ त दाय्ह्ती नीङ्इ ओउःकायः गाल्तुम्ती तोतेःनाङ्सतो ओउःइ तोओ कुरा सायःआक्तीको इ मान्ताइ रेव्ओ काम् जाङ्ह्आकान् त ङाइ गलमा सायःङल। 15हेरोद् राजाइमा रेव्तोपाय् दोह्मा सायःउलु ओउःकायः ङीकःताङ् द्यान्ह्ती ल्होक्आकान्। इ येसुकायः सात्सा खेःओ काम्पाय् ओउःइ दोह्मा जाङ्ह्उलु 16ओउःत झ्यान्ते ओउःकायः लाइ स्राप्आक्तीको ङाइ फेलेःनाङः” त दाय्ह्ती पीलातस्इ हुम्ती मुओलम्कायः तोआथास। 17यहुदीलम्कोः च्योल्ओ दीन् त तोओ छ्यात्हाङः पीलातस्इ यात्चाक् झ्याल्खानहाङः राक्ती गम्ओ मान्ताकायः फेसा त जवओ खेःतो। ओउः छ्यात् फेरी स्याव्ती झ्यान्ते येसुकायः फेसा बोङःआकान्। 18पीलातस्खेइ येसुकायः फेसा बोङःथातो ओउः हुम्ती मुओ मान्तालम्खेइ सबैइ “ओउःखेकायः सात्साकायः आलःउ बरबा त तोओखेकायः फेती ल्होक्उ” त दाय्ह्ती ओउःमयःइ ब्रक्तलेः सोतो गोःआकाय्। 19ओउः बरबा त तोओपाय् सर्कार्कोः मान्तालम्कुस् यरुसालेम्हाङः मीन्ह्काय्आकाय् मीन्ह्काय्तोक्हाङः ओउःइ यात्नीस्चाक्कायः सात्आकान् ओउःत झ्यान्ते बरबापाय् झ्याल्खानहाङः काती गम्ओ खेःतो। 20ओहाङःसैको पीलातस्खे “येसुकायः फेसा” म्हर्ती फेरीलेः हुम्ओ मान्तालम्कायः तोसा बोङःउतो 21ओउःमयःखेइ न्हाङ्तोलेः सोतो दाय्ह्ती “ओउःकायः क्ल्याय्ओ सीङःहाङः योकोःती सात्पाःथै। ओउःकायः क्ल्याय्ओ सीङःहाङः योकोःती सात्पाःथै” त दाय्ह्ती आन गोःआकानी। 22पीलातस्इ फेरीलेः “लौ इइपाय् दोह् रेव्तो जाङ्ह्आकान्। सात्सा खेःओ काम्पाय् ओउःइ जाङ्ह्ओ ङाइ दोह्मा सायःङल बा। लौ उया ओउःकायः ङाइ लाइ स्राप्आक्तीको फेनाङः” त दाय्ह्ती तोथासतो 23ओउः हुम्ओ मान्तालम्इ फेरीलेः सोतोलेः गोःती “ओउःकायः क्ल्याय्ओ सीङःहाङः योकोःती सात्पाःथै” त दाय्ह्ती तोआकानी। 24ओउःमयःइ इत गोःओकायः फेनीली त चीःती पीलातस्इ “लौ उया नीङ्इ तेती तोओलेः ङाइ जाङ्ह्नाङः। क्ल्याय्ओ सीङःहाङः सात्पाःथै” त दाय्ह्ती ओउः गोःओ मान्तालम्कायः तोआथास। 25ओउःतलेः पीलातस्इ ओउः मीन्ह्काय्ती मान्ताकायः सात्ओ बरबा त तोओखेकायः “ओउःकायः फेनु” त तोउतो येसुखेकायः “ओउःमयः सात्ताक्सा झाक्ओ मान्ताकायः सात्पाःथै” त दाय्ह्ती लयःकोः सीपाहीलम्कायः ताआकान्।
26ओहाङःसैको येसुकायः सहर् बाहीरताङ् लात्ती क्लाःतोक् बेलाहाङः सीपाहीलम्इ यात्चाक् क्युरीनी देस्सै वाङ्ओ मान्ता सीमोन् त तोओ च्यवःती ओउःकायः चुम्ती ओउः क्ल्याय्ओ सीङःपाय् येसुकायः गुल्ह्ताक्ती लात्ताक्आकान्। ओउः सीङः लात्आक्तीको येसुकायः गुल्ह्ताक्आथै। 27ओउःमयः वाह्तोक् बेलाहाङः नाःतो अरु मान्तालम्इ येसुकायः गुल्ह्आकानी मोमःचोःलम्इमा र्याःती र्याःती गुल्ह्नीतो ओउःमयःकःताङ् येसुइ ल्हेःती 28“अ यरुसालेम्कोः नाःचोङ्य ङाखेकायः क्रेस्चाःनाङ्स नीङ् लयःकायःमा नीङ्कोः चोःलम् याङ्लम्खेकायःमा क्रेस्नु दा। 29दोह् हायःती दाय्ह्सा यरुसालेम्कोः मान्तालम्इ लोन्दोहाङः आन जोक्तो लीह्सीःओ च्यवःती झ्यान्ते ‘लौ चोः लात्मालोमा दुत् खोलःती बयःमालो मोमःचोःलम् अरुसै पेतोलेः स्याव्लेःनाः बा’ त दाय्ह्ती दाय्ह्ओलेः लोने स्याव्नाः 30ओउः लीह्सीःओ बेलाहाङःमा मान्तालम्इ स्यालुङ्कायःमा ‘लौ ङीकायः क्लीमःताङी दा’ त दाय्ह्तीमा बुम्लम्कायःमा ‘ङीकायःपाय् नुस्ताङी दा’ त दाय्ह्तीमा नोःनानी बा। 31दोङ्सीलेः स्याक्सीङःसै सीओ सीङःकायः म्हेःइ न्हाङ्तोलेः न्युमःनाःथै। ओउःलो लेखालेः तेन्पाय् लीह्सीःओ वाङ्नाः त खेःया लोने न्हाङ्तोलेः वाङ्नाः बा” त दाय्ह्ती येसुइ ओउः मोमःचोःलम्कायः तोआथास। 32ओहाङःसैको येसुकायः सात्लाङ् आलःतोक् बेलाहाङः येसुकुस् नीस् कुःर्यव् मान्तालम्कायःमा आलःओ खेःतो। 33ओउःमयः सबै आल्ती यात्ज्योः पुह्रुमःराङ् त तोओ बुम्ताङ् येसुकायः दाक्आथै। ओहाङः दाक्आक्तीको यात्ज्योः यास्ओ सीङः पोत्ती अरुकोः सीङः बान्ह्अग घ्यालःती क्ल्याय्ती गम्आक्तीको ओउः क्ल्याय्ओ सीङःहाङः येसुकायः दोम्क्रुत्हाङः खील्इ थाक्ती योकोःती गम्आथै। फेरी ओउः नीस्चाक् कुःर्यव् मान्तानीस्कायःमा अरु क्ल्याय्ओ सीङःहाङःमा येसुकोः ङोय्सैमा यात्चाक् ओउःकोः वेःसैमा यात्चाक् योकोःती गम्आकानी। 34येसुपाय् ओउःकायः योकोःती गम्तोक्हाङः “लौ परमेस्वर् आपाय इ ङाकायः सात्ओ मान्तालम्इ ‘ङीइ आन पेमालो हायःनाङःसु’ त चीःनीली ओउःत झ्यान्ते ओउःमयःकः योनःती योती नाङ्कोः ल्हुङ्पाय् मल्ह्तो स्याव्लाम् दै” त दाय्ह्ती येसुइ परमेस्वर्कायः तोआकान्। ओउःत तोतोक् बेलाहाङः येसुकोः नाय्लम् वेःसाकायः सीपाहीलम्इ बाङ् खेलती योआकानी। 35अरु मान्तालम् द्याङ्तोलेः योती मुओ खेःतो। ओहाङःसैको ओउः यहुदीलम्कोः ताङ्ह्ओ मान्तालम्खेइ येसुकायः हेला क्लाःधै मुती “इ मान्ताइपाय् अरुलम्कायः दल्ताक्आकान् त दाय्ह्ओ लेःआः ओउःपाय् दोङ् परमेस्वर्इ छ्युङ्ह्ती गम्ओ ख्रीस् लेःआः त खेःया ओउःइ लयःकायः दल्ताक्पाःस” त दाय्ह्ती तोआकानी। 36ओउः सीपाहीलम्इमा येसुकायः हेला क्लाःती ओउःकायः क्रीम्ओ धाक्सायःकोः तीः तुङ्साकायः ल्हाती 37“लौ नाङ्जा यहुदीलम्कोः राजालेःतेः खेःतेःनाः त खेःया लयःकायः दल्ताक्स” त दाय्ह्ती आलावःती तोआकानी। 38ओहाङःसैको येसुकोः थाराय्सै ओउः पोत्ओ सीङःहाङः “इपाय् यहुदीलम्कोः राजा लेःआः” त दाय्ह्ओ लेखती गम्आकानी। 39ओहाङःसैको यात्चाक् येसु द्याङ्तोलेः योकोःती गम्ओ कुःर्यव् मान्ताइमा “नाङ्पाय् ओउः ख्रीस्लेःतेः खेःतेःनाः त खेःया लयःकायःमा नीचीकायःमा दल्ताक्ताङःच” त दाय्ह्ती येसुकायः तोथातो 40ओउः अरु योकोःती गम्ओ कुःर्यव् मान्ताखेइ ओउः ङ्हा तोओकायः जान्आकान् “नाङ्पाय् परमेस्वर्कः रैतेःल यादो। ङी सुम्चाक्कायः ब्राङःतीलेः योकोःती गम्तय्हीतो 41नीचीखेकायः स्याव्लेःनाः दोह् हायःती दाय्ह्सा नीची रेव्तो जाङ्ह्झ्याङ्कायः इत न्युम्ह्नाःतय्ह्च इखेइजा रेव्तोपाय् दोह्मा जाङ्ह्उलु बा” त दाय्ह्ती तोआकान्। 42ओहाङःसैको येसुकः ल्हेःती “अ येसुय नाङ् राजालो लेखा द्यान्ह्ती वाङ्तोक्हाङः ङाकायः योनःतीलेः गीलचाक्ची दा” त दाय्ह्ती तोआकान्। 43इत तोआक्तीको “लौ दोङ्सीलेः तोनेःनाङ् बा। नाङ्पाय् तेन्लेः ङाकुस् लाङ्काहाङः मुतेःनाः” त दाय्ह्ती येसुइ तोआथै।
44ओउःत तोतोक् बेलाहाङःपाय् बार बजे न्याम् दोपारे स्याव्ओ बेलाहाङः खेःतो। ओउः बेलाहाङःसै तीन् बजे योहोरीच्युक्हाङःकायः न्याम् थोङ्माःत झ्यान्ते ओउः देस्हाङः जुगाङ् च्याक्तो स्याव्आ। 45यरुसालेम्कोः मन्दीर् कीम् दुङ्हाङः हेङ्केती खोओ नाय्पाय् त्यावःअसै कामःताङ्लेः क्रत्ती नीस् फाक् स्याव्आ। 46ओहाङःसैको येसु सोतोलेः गोःती “अ आपाय ङाकोः नामे रुआङ् नाङ्कायः ल्हालेःनाङः” त दाय्ह्ती परमेस्वर्कायः तोआकान्। ओउःत तोआक्तीको येसुकोः सास् ज्याल्आ। 47ओहाङःसैको ओउः सीपाहीकोः हवल्दार् इ सबै च्यवःती ओउःइ परमेस्वर्कायः मानती “इपाय् जुगाङ् पेओ मान्ता लेःआः बा” त दाय्ह्ती दाय्ह्आ। 48ओउः हुम्ती योलाङ् वाङ्ओ मान्तालम्इमा येसुपाय् सीओ च्यवःती आन लीह्ती लःलयःकोः कीम्ताङ् द्यान्ह्ती पाय्ह्आकाय्। 49येसुकुस् गलकायःमा ब्राङ्ती वाह्ओलम्इमा गालीलसै गुल्ह्ती वाङ्ओ मोमःचोःलम्इमा येसुकायः सात्ओ बेलाहाङः बल लोक्तो चीङ्ती मुती सबै स्याव्ओ च्यवःआकानी।
50-51ओहाङःसैको यात्चाक् यहुदीया देस्कोः अरीमाथीया गाव्सै वाङ्ओ मान्ता युसेफ् त तोओ खेःतो। ओउःपाय् पेओ मान्ता खेःतो परमेस्वर्कोः कुरालेः सबै जाङ्ह्सा बोङःती परमेस्वर्कोः राजी दाङ्तोक् बेलाकायः गलमा ल्युङ्ह्ती मुओ खेःतो। फेरी युसेफ् त तोओपाय् यहुदीलम्कोः ताङ्ह्ओ मान्ता खेःतो ओहाङःसैको सभा काम्हाङः हुम्ती मुतोक् बेलाहाङः अरु ताङ्ह्ओ मान्तालम्खेइ येसुकायः सात्सा बोङःओ कुरा नोःकाय्ओ सायःती युसेफ्खेइ “सात्लाम्” त दाय्ह्ती अरुलम्कुस् ङ्र्याःल। 52ओहाङःसैको येसुकायः सात्नम् दीन्हाङः युसेफ्पाय् अन्चलादीस् पीलातस्कःताङ् आल्ती “येसुकोः म्हाङ् ल्हाचाक्ची दा” त दाय्ह्ती तेआ। 53इत हायःसा पीलातस् ग्याआ त झ्यान्ते युसेफ्इ येसुकोः म्हाङ्पाय् ओउः क्ल्याय्ओ सीङःसै क्लाःती नाय्इ खुप्आकान्। खुप्आक्तीको येसुकोः म्हाङ्कायः युसेफ्इ लात्ती आलःती चेनःबाङ्हाङः व्हह्र्ती द्यावःओ ल्युमःपुक् घाङ्हाङः काती गम्आकान्। ओउः घाङ्हाङःपाय् अरु सीओ मान्ता सुमा पाम्ह्आक्ल। 54ओउः दीन्पाय् सुक्रबार्लेः ओउःकोः स्याङ्ह्लोपाय् यहुदीलम्कोः धोओ दीन् खेःतो। 55ओहाङःसैको द्याह्मयःलोहाङः ओउः येसुकायः गुल्ह्ती वाह्ओ गालीलसै वाङ्ओ मोमःचोःलम्इ अरीमाथीयाकोः युसेफ्कायः गुल्ह्ती येसुकोः म्हाङ् घाङ्हाङः पाम्ह्ओ योआकानी। 56योआक्तीको ओउःमयः द्यान्ह्ती पाय्ह्ती म्हाङ्कायः ल्यानःसा पेतो सय्ङ्ओ सातीलम् र्ययःआकानी। ओउः पेओ सातीलम् र्ययःती खाय्आक्तीको मोसाइ बयःओ ऐन्हाङः लेखओ कुरा ग्याती जवती स्याङ्ह्लोकोः धोओ दीन्हाङः काम् धोती मुआकाय्।
© 1993 Wycliffe Bible Translators Inc., All Rights Reserved.
