लुका 21
21
1ओहाङःसैको येसु मन्दीर्कोः पैसा काती गम्सा बकीस् द्याङ्तोलेः च्युङःती मुओ खेःतो। ओउः बेलाहाङः साहुलम्खेइ बकीस् च्योल्ती वाह्ती नाःतो पैसा काओ येसुइ च्यवःआकान्। 2ओहाङःसैको यात्चाक् दोह्मा नाःमालो बुधा सीती वाय्ओ मोमःचोःखे वाङ्ती नीस्ज्याङ् पैसा ह काआकान्। 3इत च्यवःती “दोङ्सीलेः अरु पैसा काती गम्ओ मान्तालम्सै इ ह्र्यात् मोमःचोःइपाय् न्हाङ्तोलेः नाःतो काआकान् रैस 4दोह् हायःती दाय्ह्सा ओउः साहुलम्खेइ लयःकोः वेओ पैसा ह कानीतो ती ओउः ह्र्यात् मोमःचोःखेइ लयःकोः पैसा सोय्ह्तीलेः काओआः बा। ओउःकोः जेःगा तुङ्गा लेःसा पैसा जुदालेः बयःआकान्” त दाय्ह्ती येसुइ ओउःकुस् मुओलम्कायः छ्यानःतीलेः तोआथास।
5ओहाङःसैको यात्नीस् मान्तालम्इ मन्दीर्कायः त्यास्ती योती “लौ इ दर्बाल्पाय् योसा गुच्युक् पेजेःनाः रैस। ओउःपाय् आन पेतो ङर्ओ बाङ्कोः देओ लेःआः बा” त दाय्ह्ती येसुकायः तोथातो 6“लौ इत पेओ ब्राव्ओ मन्दीर् दर्बाल् नाङ्इ द्याह् योती मुधाङ्तेःनाः लोनेकोः दीन्लम्हाङः ओउःपाय् जुगाङ् ह्र्योङःती वाय्तो स्याव्जेःनाः। ओउः ह्र्योङःती वाय्तोक्हाङःपाय् यातैज्याङ् बाङ्पाय् अरुकुस् द्योप्काय्ती मुबाय्ल” त दाय्ह्ती येसुइ तोआथास। 7ओउःकुस् वाह्ओमयः येसुकःताङ् वाङ्ती “अ गुरुय नाङ्इ मेस् तोओ मन्दीर् ह्र्योङःती वाय्सा कुरापाय् गलखा स्याव्लेःनाः। ओहाङःसै ओउः ह्र्योङःती वाय्सा स्याव्खेःओ दीन्लम् गत हायःती ङ्हासै तय्ह्चाङःसु” त दाय्ह्ती व्हत्थातो 8“नीङ्पाय् पेतो धय्ती मुजेःन दा ओहाङःसैको नीङ्कायः अरुलम्इ माःती होम्सा बोङःतेःनै त खेःया ओउःमयःइ नीङ्कायः ब्रःताक्सा खाय्नीली। लोनेः नाःतो मान्तालम् ‘लौ ओउः वाङ्सा खेःओ चाक्पाय् ङा लेःआः ङ’ त दाय्ह्ती माःती ङाकोः मय्ङ् पेह्ती वाङ्नै। अरुलम्इ ‘लौ ख्रीस्कोः द्यान्ह्ती वाङ्तोक् बेलाहाङः दाह्खेःआ’ तमा माःती तोनानी ओउःमयःकायः ङ्हाम्तेःचानी। 9फेरी लोनेःमा ‘लौ इहाङःपाय् लदाय् जाङ्ह्नानी’ ‘ओहाङः लदाय् जाङ्ह्सा बोङःनानी’ त दाय्ह्ती नोःओ सायःतेःनानी ओउः कुरा सायःतोक्हाङः रैतेःचनै इत हायःओ ङ्हालेः स्याव्सा खेःतो लेःआः ओउः बेलाहाङःपाय् ल्हाव्ह्दैबाङ्कोः द्युम्ओ दीन् वाङ्धाङ्ल। 10ओउःनम् दीन्हाङः यात्ज्योः देस्कोः मान्तालम् अरु देस्कोः मान्तालम्कुस् मीन्ह्काय्मानै यात्ज्योः राजामा अरु राजाकुस्मा काय्काय्मानै। 11थाव् थाव्हाङः ताङ्ह्ओ ल्याङ्लम्मा वाङ्नाः जोक्तो अनीकाल्मा छावःओ जीक्ओलम्मा स्याव्नाः। फेल्बाङ्हाङः ताङ्ह्ओ रैसीःओ खाल्मा थालेःनाः। 12इत स्याव्ओ बेलाहाङःकोः ङ्हासै नीङ्कायः मान्तालम्इ चुम्ती पानःती पेमालो हायःतेःनै बा। नीङ्कायःपाय् थनःओ कीम्लम्हाङः गाल्तुम्आक्तीको झ्याल्खानहाङः कासाकायः ओउःमयःइ लात्ती दाक्तेःनै। ‘लौ इपाय् ख्रीस्कोः मान्तालेः’ त दाय्ह्ती नीङ्कायः गाल्तुम्ती नोःती नीङ्कायःपाय् राजाकःताङ्मा अन्चलादीस्लम्कःताङ्मा दाक्ती वानःतेःनै। 13ओउः बेलाहाङः ङाकोः पेओ कुरा नीङ्इ छ्यानःती तोसा दोःतेःनै। 14ओउः बेलाहाङःमा ‘लौ ङाइ नोःसा चीःङल इ गाल्तुम्ती तोओलम्कायः गत त्याङ्ती तोचाङः’ त ङ्हासै ल्हुङ् र्याङःतीलेः लाय्तेःचानी। 15पेतो व्हाय्तो नोःसा ग्वम्पाय् ङाइलेः नीङ्कायः बयःनेःनाङ्स बा ओहाङःसैको नीङ्कायः गाल्तुम्सा बोङःओलम्इ नीङ्इ तोओ कुरापाय् त्याङ्सा खाय्नीली। 16ओउः बेलाहाङःमा नीङ्कोः लयःकोः मान्तालम्पाय् नीङ्कोः लयःकोः आमा आपालम्इमा पुःचोङ् हौचोङ्लम्इमा क्वालम्इमा नीङ्कायः गाल्तुम्ती नीङ्कोः दुस्मान्लम्कःताङ् ल्हालाङ् दाक्तेःनै बा। दाक्ती ल्हाआक्तीको नीङ्कायःपाय् सु ना सु सात्मातेःनै। 17नीङ्कायःपाय् ‘ख्रीस्त तोओकोः मान्ता लेःआः’ त दाय्ह्ती नाःतो अरुलम् नीङ्कः ल्हुङ् मल्ह्तो स्याव्नै। 18ओउःमयःपाय् ल्हुङ् मल्ह्तो स्याव्सापाय् स्याव्लेःनै ओउःमयःइ नीङ्कायःपाय् ह्र्योङःती वाय्सा जुगाङ् खाय्नीली नीङ्कोःपाय् दोह्मा वाय्सा खाय्नीली। 19ओउःत स्याव्लेःनाः ङाकायःमा ङाकोः कुराकायःमा फेमाःत नीङ् ल्हुङ् ग्रमःत मुलेःतेःनै त खेःया नीङ्पाय् दल्तेःनै बा।
20ओहाङःसैको लोनेः यरुसालेम् सहर्कायः नाःतो सीपाही तोङःती मुओ नीङ्इ च्यवःतेःनानी ओउःत च्यवःतोक्हाङः यरुसालेम् सहर्कायः ह्र्योङःती वाय्सा दीन् दाह्खेःआ त नीङ्इ चीःसा खाय्तेःनानी। 21ओउःनम् दीन्हाङः यहुदीया देस्हाङः मुओलम्पाय् स्यालुङ्ताङ् क्रव्पै सहर्हाङः मुओलम्मा ओउः सहर्कायः जुगाङ् ग्ल्युङ्ह्ती फेपानी। सुसु सहर् बाहीरहाङः मुनै ओउःपाय् सहर्ताङ् गलमा द्यान्ह्ती पाय्ह्लाम्। 22ओउःत स्याव्ओ बेलाहाङःपाय् उय्ह्लेहाङः तोओ परमेस्वर्कोः आखरःहाङः लेखओ न्युम्ह्तो स्याव्सा कुरा ताप्लेःनाः। 23ओउः स्यालुङ्ताङ् क्रव्नम् दीन्कायः चोःतुक् लात्ओमा दुत् खोलःती बयःओ मान्तालम्मा आन लीह्तो स्याव्नै ओहाङःसैको इ देस्हाङः आन जोक्तो लीह्सीःओ बेला वाङ्लेःनाः परमेस्वर्इ ओहाङःकोः मान्तालम्कायः आन न्युम्ह्ताक्नाःथास। 24लदाय् जाङ्ह्तोक्हाङः इ यहुदीया देस्कोः मान्तालम्कायः अरुइ आन सात्नाःथास अरुलम्कायः चुम्ती पानःती नोकरी काम् जाङ्ह्साकायः लोक्तो देस् देस्लम्ताङ् लात्ती आलःनाःथास। यरुसालेम् सहर्कायः यहुदी खेःमालो मान्तालम्इ क्लीमःती ग्रक्नानी। ओउःमयःकोः बेला द्युम्धाङ्माःच्युक्कायः ओउः यहुदी खेःमालो मान्तालम् नाःतो दीन्कायः यरुसालेम्हाङः एत हायःती मुलेःनाः बा।
25ओहाङःसैको लोने फेल्बाङ्कोः न्याम्हाङःमा लाह् कार्लम्हाङःमा आन ग्याङ्ह्सीःओ च्यवःनानी। ल्हाव्ह्दैबाङ्कोः द्युम्मालो तीःपाय् ओउःच्युक् साङ्ह्तीमा मुक्तीमा देस् देस्कोः मान्तालम् आन रैनै। 26फेल्बाङ्हाङः मुओ थोक्लम्पाय् ओउःत ह्रान्ह्ओ च्यवःती ‘इ ल्हाव्ह्दैबाङ्हाङः द्याह् दोह् दोह् स्याव्नाः’ त म्हर्ती मान्तालम् रैतीमा लीह्तीमा मुनै। 27ओहाङःसैको ओउःत हायःआक्तीको ओउः मान्ताकोः चोःत तोओ आन ग्वम् दोःती आन पेतो अङ्ग थङ्गत एङःसीःतो थोङ्तीमा मुस्हाङः वाङ्सा च्यवःनाः। 28इत स्याव्ओ बेलाहाङःपाय् लाङ्काताङ् त्याव्ती योती मुन नीङ्कायः दल्सा दीन्पाय् दाह्खेःनाः” त दाय्ह्ती येसुइ तोआथास।
29-30एत तोआक्तीको येसुइ न्याम्सीकोः कुरा तोती स्यान्आथास। “न्याम्सी सीङःमा अरु सीङःमा मात् तुरःतोक् बेलाहाङः ‘न्याम् राव्ओ वाङ्नाः’ त नीङ्इ चीःसा खाय्तेःनानी। 31ओउःलो लेखालेः ङाइ मेस् तोओ कुरा स्याव्तोक्हाङः ‘परमेस्वर्कोः राजीलेः दाह्खेःआ’ तमा चीःसा खाय्तेःनानी। 32दोङ्सी दाय्ह्भनाङ् तेन्छ्याङ्कोः मान्तालम् सोय्ह्ती सीधाङ्माःच्युक्हाङःपाय् इ कुरा सबै ताप्तो स्याव्नाः। 33फेरी ल्हाव्ह्दैबाङ्मा फेल्बाङ्मा ओउःखे लोन्ते म्हीत्लेःनाः ङाइ तोओ कुराखे गलमा मीह्ती वाय्ल।
34लौ पेतो धय्ती मुन दा। नीङ् धय्ती ल्युङ्ह्ती मुमाःत लुङ्ह्जेःती हान् तुङ्ती लयःकोः काम्लम्कायः ल्हुङ् रुःती मुतेःनै त खेःया नीङ्इ जुगाङ् चीःमालो दीन्हाङः ओउः मान्ताकोः चोःपाय् याव्छीत्हाङः ग्रीनःरुसीत दाह्ती वाङ्लेःनाः। 35ओउः दीन्पाय् सबै ल्हाव्ह्दैबाङ्कोः मान्तालम्कायः ग्रीनःताक्नाःथास। 36ओउःत झ्यान्ते ओउः दीन् वाङ्साकायः पेतो धय्तीलेः ल्युङ्ह्ती मुन। ‘लौ इ लीह्सीःओ गोरःसाकायः ङाकायः ल्हुङ् क्रोङ्तोलेः मुताक्ची पेमालोसै दल्ताक्ची दा’ त परमेस्वर्कायः तेतीलेः तोनु दा। ओहाङःसैको ओउः मान्ताकोः चोः त तोओकोः वाङ्तोक् बेलाहाङः नीङ् ओउःकायः रोम्ती त्याक्साकायः चीङ्ती मुसा दोःतेःनै” त दाय्ह्ती येसुइ लयःकुस् वाह्ओ मान्तालम्कायः स्यान्ती तोआथास। 37ओहाङःसैको न्हीदीङ् न्हीदीङ्हाङः येसुइ मन्दीर्ताङ् आल्ती ओहाङः मान्तालम्कायः स्यान्ती मुओ खेःतो याह्दीङ् याह्दीङ्हाङः ओउःपाय् जैथुन्सायः त तोओ बुम्ताङ् द्यान्ह्ती एनःआकाय्। 38बीहान प्रीमा च्योक्ती सबै मान्तालम् मन्दीर्ताङ् वाङ्ती येसुइ स्यान्ओ कुरा सायःती मुओ खेःइतो।
© 1993 Wycliffe Bible Translators Inc., All Rights Reserved.
