लुका 19
19
1ओहाङःसैको येसुपाय् यरीखो सहर्ताङ् दाह्ती ओउः सहर्कोः ल्याम्हाङः वाह्ओ खेःतो। 2ओउः सहर्हाङःपाय् यात्चाक् जखैस् त मय्ङ्ओ ताङ्ह्ओ पैसा उथावओ जीमदार् मुओ खेःतो। ओउःपाय् आन पैसा नाःओ मान्तालेः खेःतो। 3ओउः जीमदार्पाय् येसु योसाकायः आन झाक्तो ओउःखे यास्माःत झ्यान्ते येसुकायः योलाङ् आल्ओ बेलाहाङः च्यवःसा खाय्उलु अरु मान्ताइ फुय्आथै। 4अरुलम्इ फुय्ती झ्यान्ते जखैस्पाय् येसुकोः ङ्हासै आल्ती न्याम्सी सीङःहाङः लन्ह्ती योती मुआ। 5ओहाङःसैको येसु वाङ्ती ओउः सीङःहाङः दाह्आक्तीको ओउःपाय् त्याव्ती जखैस्कायः च्यवःआथै। जखैस्कायः च्यवःआक्तीको येसु न्यास्ती “अ जखैस्य रेन्ह्तोलेः ग्ल्युङ्ह्ती वाङ्अ दा। तेन्पाय् ङा नाङ्कोः कीम्हाङः मुसा खेःनाङः” त दाय्ह्ती येसुइ तोआकान्। 6इःत तोओ कुरा सायःती जखैस्पाय् रेन्ह्तोलेः ग्ल्युङ्ह्ती येसुकुस् लयःकोः कीम्ताङ् पाय्ह्ती येसुकायः म्रोतीलेः रोम्आथै। 7ओउःत हायःओ च्यवःती अरु मान्तालम् “लौ इ येसुपाय् पैसा जेःओ रेव्ओ जीमदार्कोः कीम्ताङ्आः आल्ओआः रैस” त दाय्ह्ती लयःमयःकुस् नोःकाय्आकाय्। 8ओहाङःसैको ओउःकोः कीम्हाङः मुतोक् बेलाहाङः जखैस् चीङ्ती “लौ प्रभुय द्याह् ङाकोः गह्र्लम्पाय् गुच्युक् मुलेःनाः ओउः ङाइ वेःती आधाच्युक् ह्र्यात् मान्तालम्कायः बयःनाङःसु। फेरी गुच्युक् पैसा ङाइ अरुसै माःती जेःओआः ओउः पैसापाय् ङाइ चार् भाक् पाःतीलेः पाय्क्नाङःसु” त दाय्ह्ती जखैस् दाय्ह्आ। 9ओउःत दाय्ह्आक्तीको “लौ इ मान्तापाय् आब्राहाम्कोः प्लोमःदाने लेःआः द्याह् तेन्पाय् इ कीम्कोः मान्ता रेव्ओसै दल्तो स्याव्लेःआ बा। 10इतलेः परमेस्वर्कायः फेओ मान्तालम्कायः परमेस्वर्कःताङ् द्यान्ह्ताक्साकायः ङा मान्ताकोः चोः त तोओपाय् वाङ्ओ लेःआः बा” त दाय्ह्ती येसुइ तोआकान्।
11ओहाङःसैको येसुलम् यरुसालेम् द्याङ्तोलेः दाह्खेःओ खेःइतो। ओउःकुस् सायःती मुओलम् “परमेस्वर्कोः राजीपाय् देङे दाङ्खेःआ” त म्हर्आकाय्। इत चीःती येसुइ फेरीलेः वीनःराय् ताती स्यान्आथास। 12“यात्चाक् राजाकोः मन्तरी मान्ता खेःतो। यात् दीन् ओउः मान्तापाय् राजा स्याव्साकायः अरु देस्हाङः आल्सा खेःतो। ओउः देस्हाङः राजा स्याव्आक्तीको लयःकोः देस्ताङ् पाय्ह्सा खेःतो। 13ओउःत झ्यान्ते ओउः अरु देस् आल्सा चीङ्ओ बेलाहाङः ओउः राजाकोः मन्तरीइ लयःकोः काम् जाङ्ह्ओ नोकरीलम्कायः गोत्ती ओउःइ मान्ता मान्ताकायःपाय् याआःचाक्कायः यात्ज्योः सुन्कोः पैसा बयःआथास ‘ङा वाङ्धाङ्मालोहाङः इ पैसाइ लेःती वीनःती रीन् बयःती न्हाङ्तोलेः पैसा क्युताक्नाङ्स दा’ त दाय्ह्ती तोआथास। 14इत तोआक्तीको ओउः मन्तरीपाय् अरु देस्ताङ् आल्आकाय्। ओहाङः आल्ती मुतोक्हाङः ओउःकोः लयःकोः देस्कोः मान्तालम्इ ओउःकः ल्हुङ् मल्ह्तो स्याव्ती ‘लौ ओउःकः ङी झाक्तय्हीली। ओउःपाय् ङीकोः राजा स्याव्ताक्लाम्’ त दाय्ह्ती ओउः अरु लोक्तो देस्कोः ताङ्ह्ओ माहाराजाकायः दर्कास् ल्होक्नीतो 15ओउःमयःकोः दर्कास् सायःमाःत ओउः मन्तरीकायःपाय् राजा जाङ्ह्आकानी। ओहाङःसैको राजा स्याव्आक्तीको ओउः मान्तापाय् द्यान्ह्ती पाय्ह्आक्तीको ओउःकोः दस्जन नोकरीलम्कायः फेरीलेः गोत्आकान् ‘लौ ङाइ ङ्हा बयःओ पैसाइ नीङ्इ गुच्युक्तेः क्युआकानी त द्याह् छ्यानःनाङ्स’ त दाय्ह्ती तोआथास। 16यात्चाक् नोकरीइ वाङ्ती ‘लौ प्रभुय नाङ्इ यात्ज्योः सुन्कोः पैसा बयःतेःआची ओउः पैसाकुस् ङाइ द्याह् अरु दस् सुन्कोः पैसा क्युती वानःती पाय्क्चेःनाङ्’ त दाय्ह्ती एघार पैसा ल्हाती पाय्क्आथै। 17‘नाङ्इ पेतोतेः हायःतेःआकान् रैस। लौ नाङ्इ इ मीओ काम् पेतो जाङ्ह्तेःआकान् त झ्यान्ते ङाइ नाङ्कायः दस् सहर्कोः मन्तरी काम् बयःनेःनाङ्’ त दाय्ह्ती ओउः राजाइ तोआकान्। 18ओहाङःसैको यात्चाक् अरु नोकरी वाङ्ती ‘लौ प्रभुय नाङ्इ यात्ज्योः सुन्कोः पैसा बयःतेःआची ओउः पैसाकुस् ङाइ पास् अरु पैसा क्युती वानःती पाय्क्नेःनाङ्’ त दाय्ह्ती तोआथै। 19‘लौ उया नाङ्खेकायः पास् सहर्कोः मन्तरी काम् बयःनेःनाङ्’ त दाय्ह्ती ओउः राजाइ तोआकान्। 20ओहाङःसैको यात्चाक् अरु नोकरी वाङ्ती ‘लौ प्रभुय नाङ्इ बयःओ यात्ज्याङ् सुन्कोः पैसा इलेःआः। ओउः पैसा नाय्हाङः पोतोलःती पेतोलेः गम्आलाङः। 21नाङ्पाय् खह्र्ओ मान्ता लेःतेःआः त चीःलेःनाङः। अरु मान्ताकोः रीन्कोः ब्यास्लम् तात्ती वाय्साकायः नाङ्इ ओउः मान्ताकोः राङ्लम् राङ्सै त्युम्ह्ओ थोक्लम् त्याक्तेःनौ ओउःत झ्यान्ते इ पैसा “वाय्चाङः” त रैती म्हर्ती नुस्तीलेः गम्आलाङः’ त दाय्ह्ती ओउः नोकरीइ तोआथै। 22‘अ नाङ्पाय् रेव्तो पेमालो नोकरी लेःतेःआः। इत नाङ् लयःकायः गाल्तुम्ती तोतेःनाःस रैस। ङाकायःपाय् “खह्र्ओ मान्ता लेःआः” त नाङ्इ तय्ह्तेःआची “अरु मान्ताकोः राङ्लम् राङ्कोः थोक्लम् त्याक्ओआः तेःआः” ततेः तोतेःआची। 23ओउःत झ्यान्ते दोह् हायःतीतेः ओउः पैसा त्याक्आक्तीको रीन्लम् बयःतेःउलु। ओउः पैसाइ रीन् बयःओ त खेःया ङा पाय्ह्ती वाङ्तोक्हाङः रीन्कोः ब्यास्मा त्याक्चाः खेःतो’ त दाय्ह्ती ओउः नोकरीकायः जान्ती तोआथै। 24ओहाङःसैको अरु द्याङ्तो मुओलम्कःताङ् ल्हेःती ‘लौ इखेकोः यातैज्योः पैसा त्याक्ती ओउः दस्गोता सुन्कोः पैसा नाःओ नोकरीखेकायः बयःनु’ त दाय्ह्ती ओउः राजाइ तोआथास। 25‘ओउःकोः दस् पैसा मुलेःनाः’ त दाय्ह्ती ओउःमयः बल ग्याङ्ह्ती नोःआकाय् 26‘दोङ्सीलेः सुसु नाःओलेः मुलेःनाः ओउःपाय् न्हाङ्तोलेः दोःलेःनाः बा। सुसु नाःमालो मुलेःनाः ओउःकोः दोह् मुनाः ओउःमा लाती आलःसाआः। 27ओहाङःसैको इ ङा राजा स्याव्सा झाक्मालोलम्पाय् ओउःमयःकायः ङाकःताङ् सात्साकायः वानःपाःथास’ त दाय्ह्तीमा ओउः राजाइ तोआथास” त दाय्ह्ती येसुइ ओउःकुस् मुओलम्कायः स्यान्ती तोआथास।
28ओहाङःसैको इत स्यान्ती तोआक्तीको येसुपाय् यरुसालेम् सहर्ताङ् लन्ह्ती आल्ओ ल्याम्हाङः वाह्ती अरुकोः ङ्हासै स्यालःती आल्आ। 29ओहाङः लन्ह्ती आल्तोक् बेलाहाङः ओउःमयः जैथुन्सायः बुम् त तोओ थाव्हाङः मुओ बेथ्फागेमा बेथानी नीस् गाव्हाङः दाह्ती वाङ्खेःआकाय्। ओहाङः दाह्ती वाङ्खेःतोक्हाङः येसुइ नीस्चाक् लयःकुस् वाह्ओमयःकायः गोत्ती 30“लौ नीङ्जी उःनोको गाव्ताङ् आल्ज। ओहाङः दाह्ती वाङ्आक्तीको यात्ज्योः घोराकोः चोः पेन्ह्ती मुओ च्यवःतेःनाःजु। ओउः घोराकोः चोःहाङः सुमा लन्ह्ती च्युङःधाङ्इली। ओउःकायःपाय् फेन्ती इहाङः ताह्ती लात्ती वानःजु। 31ओहाङःसैको फेन्तोक् बेलाहाङः सुलाङःइ नीङ्जीकायः च्यवःती ‘इ घोराकायः दोह् हायःतीतेः इत फेन्तेःनाःजु’ त दाय्ह्ती रेक्तीलेः व्हत्तेःनाःज त खेःया ‘इपाय् प्रभुकायः चाहनाः’ त दाय्ह्ती त्याङ्ज दा” त दाय्ह्ती येसुइ स्यान्ती तोती ल्होक्आथाच। 32ओउः ल्होक्ओ मान्तानीस्पाय् आल्ती गाव्हाङः दाह्आक्तीको प्रभु येसुइ तोओभनाङ्लेः घोराकोः चोःलेः च्यवःआकाचु। 33ओउः घोराकोः चोःकायः फेन्ती ल्होक्तोक् बेलाहाङः घोराकोः धनीलम् वाङ्ती “दोह् हायःतीतेः इकायः फेन्ती ल्होक्तेःनाःजु” त दाय्ह्ती व्हत्थाचतो 34“इपाय् प्रभुकायः चाहनाः” त दाय्ह्ती त्याङ्आकाच। 35ओहाङःसैको फेन्आक्तीको ओउःनीस्इ ओउः घोराकोः चोःकायः येसुकःताङ् वानःती ओउः घोराकोः गीङ्हाङः लयःकोः क्रमःनाय्इ न्हाप्ती गम्ती येसुकायः लन्ह्ताक्आथै। 36येसु घोराहाङः लन्ह्ती वाह्तोक्हाङः अरु मान्तालम्इ लःलयःकोः क्रमःनाय्लम् ओउःकोः ङ्हासै ल्याम्हाङः न्हाप्ती गम्आकानी। 37ओहाङःसैको जैथुन्सायः बुम् ग्ल्युङ्ह्ती यरुसालेम् सहर् दाह्खेःतोक् बेलाहाङः येसुकुस् वाह्ओलम्इ सबै ओउःमयःइ च्यवःओ ताङ्ह्ओ ग्याङ्ह्राय्लम्कायः चोङाय्तोलेः परमेस्वर्कायः लुङ्ती ताङ्ह्ताक्ती तोआकानी। 38“भालातेः वाङ्तेःआ नाङ् परमेस्वर्इ ल्होक्ओ राजातेःआः। लाङ्काहाङः पेतो स्याव्ती परमेस्वर्कायः ताङ्ह्ताक्पानी” त दाय्ह्ती ओउः नाःतो हुम्ती मुओलम्इ सोतोलेः तोआकानी। 39ओउःमयःइ तोओ कुरा सायःती यात्नीस् हुम्ओ मान्तालम्कुस् मुओ फरीसीलम् येसुकःताङ् वाङ्ती “अ गुरुय इ नाङ्कुस् वाह्ओलम्इ नाङ्कायः इत स्यवसा स्याव्ल ओउःमयःकायः जान्ती तोती त्याःउसु दा” त दाय्ह्ती तोथातो 40“खेःल बा दोङ्सीलेः दाय्ह्भनाङ् इ मान्तालम्पाय् इत तोसा दोःल त खेःयाकायः इ ल्याम्हाङः मुओ बाङ्लम्पाय् ताङ्ह्ताक्ती गोःसाकायः चीङ्लेःनाः बाती” त दाय्ह्ती येसु त्याङ्आ।
41ओहाङःसैको यरुसालेम् सहर्ताङ् दाह्ती च्यवःआक्तीको येसु ल्हुङ् लीह्तीलेः र्याःआ 42“अ नीङ् यरुसालेम्हाङः मुओ मान्तालम्पाय् नीङ् पेतोलेः स्याव्साकायः तय्ह्ती चीःचानी खेःतो रैस। द्याह्हाङःपाय् नीङ्इ इत चीःसा दोःतेःइली बा। 43लोनेःहाङः नीङ्कोः दुस्मान्लम्पाय् दाह्ती वाङ्ती ओउःनम् दीन्हाङः ओउःमयःइ नीङ्कोः सहर् तोङःती नीङ्कायः थुनतेःनै। 44ओहाङःसैको सहर् पोक्ती नीङ्कायःमा नीङ्कोः मान्तालम्कायःमा जुदालेः सात्तेःनै। ओउःत हायःआक्तीको नीङ्कोः सहर्पाय् जुगाङ् वाय्तोलेः स्याव्नाः ह्र्योङःती वाय्आक्तीको यातैज्योः देती मुओ बाङ्पाय् च्यवःल बा। इत दोह् हायःती स्याव्लेःनाः दाय्ह्सा परमेस्वर्इ ल्होक्ओ नीङ्कायः दल्सा खाय्ओचाक् वाङ्ओ बेलाहाङःपाय् नीङ्इ तय्ह्तेःनीली ओउःत झ्यान्ते नीङ् वाय्तोलेः स्याव्तेःनै” त दाय्ह्ती येसु दाय्ह्आ।
45ओहाङःसैको यरुसालेम् सहर्ताङ् दाह्ती पोक्आक्तीको येसु मन्दीर्हाङः आल्आ। ओउः मन्दीर् आङ्गन्हाङः चीस् वीनःओमा लेःओ मान्तालम् च्युङःती मुओ खेःतो। ओउःमयःकायः येसुइ आन जान्ती तोती मन्दीर्सै रुनःती क्लाःआथास 46“लौ ‘ङाकोः मन्दीर्पाय् ङाकायः झाह्ती तोसा कीम्लेः स्याव्नाः’ त दाय्ह्ती परमेस्वर् दाय्ह्ओ ओउःकोः आखरःहाङः लेखती मुलेःनाः बा। ओउःत लेखती मुलेःनाः नीङ्खेइ इ मन्दीर्कायः कुःरेव् मान्ताकोः कीम्लो लेखालेः जाङ्ह्तेःआकानी रैस” त दाय्ह्ती येसुइ तोथास। 47ओहाङःसैको दीन्का दीन् येसुइ मन्दीर्हाङः स्यान्ती मुओ खेःतो। ओउः ताङ्ह्ओ पुरोहीत्लम्मा धर्मा स्यान्ओमयःमा अरु यहुदीलम्कोः ताङ्ह्ओ मान्तालम्कुस्इ येसुकायः सात्सा बोङःनीतो 48येसुकःताङ् नाःतो मान्तालम् हुम्ती ओउःइ स्यान्ओ कुराकायः “दोङ्सीलेः इ सायःसा आन पेलेःनाः” त दाय्ह्ती नोःकाय्ती मुआकाय् ओउःत झ्यान्ते ओउः ताङ्ह्ओ पुरोहीत्लम्इमा धर्मा स्यान्ओलम्इमा ओउः हुम्ती मुओलम्कः रैती येसुकायः चुम्सा दोःइली।
© 1993 Wycliffe Bible Translators Inc., All Rights Reserved.
