Jân 4
4
1O Upangiyi a yowudě na Farisi ba diyakindi ba yoka na Jisus a handi na Mâ‐a baptaisa tepě beyokwedi wa na Jân, 2(ndi Jisus mětě a baptaisaka, 3kabo beyokwedi beaju,) ka Mâ‐a dika Judia, na vala o Galili. 4Ndi e lukaki na A pudunganake ja Sameria. 5Jâ ndi jaju ja pâ o mboka ya Sameria, e tubakwě na Saikar, piělě na epěhi ya ’hiki ya Jekâb e věkidi mwan‘ ’aju Josěf. 6Idango ja Jekâb i diyakind‘ omě. Ka Jisus a yěně nyolo vâhâ na ’kěndâ, ka Mâ‐a diya o idango: i diyakindi ja bě piělě na joba meolo. 7Omě o pâkindi mwajo ua Sameria ka toka miba: ka Jisus a vâ na ’ju, na, Vě ’Mba, Mbi mâte. 8(Ikabojana beyokwedi beaju be diyakindi bea valanidě o mboka ka hamba beja.) 9Ka mwad‘ ’a Sameria a vâ na ju, na, Yeně e lě nde âvě ua Jiu, nd‘ o jombaka ’mba miba, umba mwad‘ ’a Sameria? ’kabojana ba Jiu na ba Sameria ba jukaka. 10Jisus a yavwanakindi ka Mâ‐a vâ na ’ju, na, O jaka yowěngo ivě ja Anyambě, na A vâkě na nâvě, na, Věkě ’Mba, Mbi mâte; t‘ o uwi Mâ, na Mâ‐a vě âvě miba ma eměnâ. 11Ka mwajo tě a vâ na ’ju, na, Paia, o ’bě na elombo e tokanakě, na idango i tepě na ndiba: ndi o pahiye lě miba tě ma eměnâ maně ove? 12Âvě ndi boněně wa na hangw‘ ’ahu Jekâb, a věki hwě idango, mâ mětě a mâtâkiyětě omě, na‐bana baju, na bembe beaju? 13Jisus a yavwanaki mâ, na, Moto uěhěpi a mâtâkě miba těkama, a ka yokandi evělě njo ’pakwě. 14Ndi moto uěhěpi a ka mâtě miba mamě ma ka věyě mâ, a yoke pě evělě; ndi miba mamě ma ka věyě mâ, ma ka diyandi idango ja miba i vovolaka nala o eměnâ ya egombe yěhěpi. 15Ka mwajo a vâ na ’ju, na, Paia, věkě ’mba miba těkama, ovaně nd‘ umba‐mbi ka měndě mbi yoke pě evělě, n‘ umba‐mbi viye pě okava ka toka. 16Jisus a vâki na ’ju, na, Ka ndakiye momi ’âvě, na nâvě oa viya okava. 17Ka mwajo a yavwana, na, Mbi ’bě na momo. Jisus a vâki na ’ju, na, Oa vwi bwamu, na, Mbi ’bě na momo. 18Ikabojana o bango bamo batano, na mâ uâvě a janidi kya těkaně, a ’bě momi ’âvě: o yeně nd‘ eâvě e vâdi pâkwěpâkwě. 19Ka mwajo a vâ na ’ju, na, Paia, mbi yowudi na o ndi usâki. 20Bahangwě bahu ba ma kalakiyandi o ukodi těkamu; ndi inyěni mâ na o Jěrusalěm ndi iboko via bato vi lukakě o kaliya. 21Jisus a vâki na ju, na, Mwajo, kamakidě ’Mba, iwěla i vakandi, ijanyu i ka měndě o kaliyeni Hangwě, tombe o ukodi těkamu, tombe o Jěrusalěm. 22Inyěni o kalakiyandini eanyu e ha yowě: ho yowěngo elombo ’ahu e kalakiyě, ’kabojana iyonga i ndi ja Jiu. 23Ndi iwěla i vakandi, jâ nd‘ ekadi, o bakaliyi ba mbambaě ba ka kaliyě Hangwě n‘ ilina na pâkwěpâkwe: ’kabojana Hangwě a vahakandi jângâ tědině i kalakiyě Mâ. 24Anyambě a ndi Ilina: ba kalakiyě Mâ, ba lukakand‘ o kaliya Mâ n‘ ilina na pâkwěpâkwě. 25Mwajo a vâki na ju, na, Mbi yowěngo na Měsaias a vakandi, a tubakwě na, Kraist; o Mâ‐a ka pâyě, A ka pakuwi hwě belombo beěhěpi. 26Jisus a vâki na ju, na, Umba‐mbi kalakě na nâvě, Umbi Mâ.
27Kakana ka beyokwedi beaju bea pâ, ka bâ‐ba mama na A kalakindi na mwajo tě: ndi o ’bě na moto a vâki, na, O vahaka lě nde? na ba, na, E lě nd‘ eâvě e kalakě na ju? 28Ka mwajo a dika evondo ’aju, ka mâ‐a vala o mboka, ka mâ‐a vâ na bamo, 29na, Okani, ka yěněkeni Momo, a di ’mba pakuwango belombo beěhěpi ibeamě be di hango: a ’bě Kraist ekaně? 30Ka bâ‐ba vala oviya mboka, na ’la o Mâ‐a jadi. 31O egombe těeně beyokwedi beaju be kalakindi, na, Uyokwidi, jaka. 32Ndi A vâki na bâ, na, Mbi na beja be jakě ibeanyu be ha ’wě. 33Ovaně nd‘ o beyokwedi be vâki bâ mětě na bâ mětě, na, Moto a ma vani Mâ elombo e jakě? 34Jisus a vâki na bâ, na, Beja beamě ndi iha ja upango mua A lomaki ’Mba, n‘ ihânjâbidě ja ehavu ’aju. 35Oa vâkâni, na, Ngândě inai, vâkâna ndonda e pândi? umbwakiyateni, Mbi vâki n‘ inyěni, na, Betakěni mihâ, oa ’mbuwani o behiki; bea bě ndi botano mětě na ndonda. 36A benjakě a pahakiyandi mahomano, na mâ‐a yolakě bebuma o eměnâ ya ’gombe yěhěpi: ovaně nd‘ o bâ babale, a liyakě na a benjakě, ba ka peyě ta. 37Okava nd‘ o ndaga těně e di pâkwěpâkwě, na, Umbâkâ a liyaka, upâkwě a benjaka. 38Mbi lomindi inyěni ka benja, o inyěni o ha hakidi ehavu: bato bapâkwě ndi ba hakidi, inyěni o ngiyendini o behavu beabu.
39Ba Sameria baitě ba mboka těně ba kamakidi Mâ na nyanga ya mwajo e vâkidi, na, A ma pakuwi ’mba belombo beamě be di hango beěhěpi. 40O ba Sameria ba pâkidi o Mâ‐a jadi, ba hâhâlâkidi Mâ na A t‘ o diya na bâ: ka Mâ‐a diya omě hwi ibale. 41Baitě bapâkwě ba kamakiděndi, ’kabojana ndaga jaju mětě; 42ka bâ‐ba vâ na wa mwajo, na, Nandi ho kamiděndi, hanga ’kabojana âvě o ma pakuwa hwě; ho yoki Mâ‐aa kalaka hwě mětě, ho yowuděndi mbambaě na ekaně a ndi Kraist, Uhungini mua he.
43Hwi ibale tombango ka Mâ‐a věngěmě omě, na vala o Galili. 44Ikabojana Jisus mâ mětě A vâki, na, usâki a hekakudwě o ’hiki ’aju mětě. 45O Mâ‐a pâkidi o Galili, ba Galili ba věhělěkidi Mâ, ba yěněkindi belombo beěhěpi ibeaju be hakidi o Jěrusalěm o isango: ’kabojana bâ‐ba kěki tepě isango.
46Nonaně ka Jisus a pâpě epâkwě njo o Kena ya Galili, o Mâ‐a ’lwakidě miba wain. E diyakindi na momo n‘ uhuhu uněně, mwan‘ ’aju a diyakindi a běkě o Kapěrnaum. 47O mâ‐a yokakidi na Jisus a vakandi oviya Judia na ’la o Galili, ka mâ‐a vala o Mâ‐a jadi, a ka hâhâlâkidi Mâ na A vake ka yongě mwan‘ ’aju: ’kabojana a diyakindi a bě o bowaka. 48Jâ ndi ja Jisus ja vâ na ju, na, Oa kamiděni kabo oa yěněni ndembo na belombo be mamanakwě. 49Momo t‘ uněně a vâki na ju, na, Paia, vaka na mwan‘ ’amě na taka wa. 50Jisus a vâki na ju, na, Kěkě o njea ’vě; mwan‘ ’âvě a te mihâ. Ka momo tě a kamidě ndaga ya Jisus e kalaki na ju, ka mâ‐a vala o njea ’aju. 51O mâ‐a diyakidi a kěkě, ka bahayi baju ba lata na ju, ka bâ‐ba languwa mâ, na, Mwan‘ ’âvě a mihâ. 52Ka mâ‐a uwa bâ iwěla jaju i yalakidě iyonga. Ka bâ‐ba vâ, na, Vaiko o iwěla jâkâ ndi ivěvu i dikaki mâ. 53Nonaně nd‘ o hangwě a yowakidě na i diyakite iwěla ja Jisus i vâki na ju, na, Mwan‘ ’âvě a te mihâ: ka mâ mětě a kamidě na ndabo ’aju yěhěpi. 54Elembo epâkwě ya bebale nd‘ ekae ya Jisus e hakidi, o Mâ‐a valakidi o Galili oviya Judia.
Published by the American Bible Society in 1895.
