Matteyo 19
19
Esyarana Yesu Efahi ono Apyaha
Mk 10:1-12; Lk 16:18
1Ninya atuhok Yesu nekyanita hunia idyaharu inyi Galilea ette leten ifau Yudea ihosyere Yordano. 2Ijifaro eluluŋ wati arryai inyi ette inyi itaŋida eŋwati hosi.
3Ofwonni Farisei jihonyi ikemyere inyi ette ifiyo inyi ojori, ?Oremik atulo pyaharo jyo ŋorwoi honyi te erre asai? 4Itarraŋ inyi ojo, ?Ibyaŋata tai ihenuna jo, “Many t’etteri oyyeu ayyani hirre alle iko aŋotte?” 5Ojo inyi bwo fe, “Te eram ana obusak adi atulo monyonyi iko honyonyi ette manya iko ŋorwoi honyi, attati isi arrihai ratan ihwa ahwan abotye.” 6Ihwania obeŋi isi inyyahi rahan arrihai ati arai isi ihwa ahwan abotye. Hul inosok Hollum arabotye helaha obo itapek. 7Ifiye isi inyi jo, ?Nyo ati ojo nya Mose, “Oremik habi isyaraniere awaraga an itamijanak’to apyaha honyi iko ŋorwoi ette pyaha ikonyi?” 8Ati ojo inyi jihosi, Iruk nya Mose itai ipyahati iko aŋorwo hatai nyo odwari atajya hatai, ati many t’etteri fau obyaŋara ihwo nya. 9Ajo ni jihatai jo, lya al opyahai’to iko ŋorwoi honyi arari te eram ono asomon ette yama obo, oroto inyi roto.
10Ojori leyiyanak honyi jihonyi jo, Kuyya ara ihwania jyo alle iko ŋorwoi honyi, oyyu kuyya obeŋi laati ayamai. 11Ojo inyi jihosi ojo, Ittallihi laati daŋ ifwotuna nekyanita hunia arari hya hul onyimuni. 12Nyo owoni laati hul ittallihi’to yama ta ahwattek hosi, owoni bwo fe laati hul ittallihi’to yama te ehanita wati, owoni bwo fe laati hul ihari ayama te eram lobye ono Hollum. Ijara lya ol oremik’to itayiruna hetetayiru.
Amuno Yesu Aduri
Mk 10:13-16; Lk 18:15-17
13Tania iyaŋunie isi aduri hun odihara’to jihonyi jo oŋida inyi iyyabak ahas honyi jihosi bwo omojo tesi. Awahi leyiyanak itik aduri hwa, 14ati ojo Yesu jihosi, Obusana aduri ofwonni jihoŋ. Hetihoto isi nyo ara Hollum a Hobu hosi. 15Iyyabak inyi ahas honyi jihosi ette inyi idyaharu amaji ania.
Abarani al Awak’to Nesu
Mk 10:17-31; Lk 18:18-30
16Ottu obo jihonyi ette jaran, Hettiyanani, ?ehanio adi ni aŋai inyuraniere nesu on osyo fur? 17Ojo Yesu jihonyi, ?Nyo ifiyo iye ani itahutaniere erre hun oyiji’to? Owon abotye ol oyyu. Al iwak iye nyurana nesu, ifahai efahita. 18Itarraŋ inyi jihonyi ojo, ?Anani efahi? Ojo Yesu jihonyi jojo, “Hettoho, hehanio erre somon, hehoholyo, henyobyo, 19itahabuye monyohoi iko honyohoi, bwo fe omunoi hutto lonyihari hoi ihwa ahwan hoi.” 20Itarraŋ atulo alya jihonyi ojo, Efaha ni hunia daŋ, ?anyo an ebuha’to? 21Attati Yesu jaran jihonyi, Al iwak iye abisan ihosyere Hollum, ilo itinyyaŋak asaŋ hoi, isyarak agurusi jyo alocaŋak bwo owoni adi ebariti hoi idou. Bwo ihalu, waŋ, ijifatye ani. 22Itaniŋu atulo alya nekyanita hunia ette inyi leten addi al ijiriŋa bebe nyo olwaji ebariti honyi.
23Ojo Yesu jyo leyiyanak honyi, Ahode eramak ni itai, ogol adi jyo abarani ijiŋaniere ilobye ono Hollum. 24Enyyak ni iramana itai jo, ogol bebe jyo abarani ijiŋaniere ilobye Hollum agalik ajiŋana konnikonni ittulit libira. 25Illillihai leyiyanak honyi bebe al itaniŋuni isi nekyanita hunia ette jaran, ?Ŋai ’tadi al italahuni? 26Omijo Yesu jihosi ette jaran, Obeŋi laati oremehini italahuna ahwattek hosi ta ahwattek hosi, ati oremik Hollum ihanio erre daŋ. 27Itarraŋ Petro jihonyi ojo, Imijye, ebusak hohoi erre hohoi daŋ ette jifatyo iye, ?enyurak adi hohoi anyo? 28Ojo Yesu jihosi, Ahode eramak ni itai jo, ta afau aŋejuk itoŋo adi Lonyi tulo ikurus ono akwatan honyi. Itai hul ijifatyete’to ani itoŋoti adi bwo fe itai jyo akurusi ’tomon harrihai iŋocere awoi ’tomon harrihai huno Israele. 29Bwo fe lya al obusak’to asik honyi kuyya illarak honyi, haniarak honyi, monyonyi, honyonyi, ŋorwoi honyi, aduri honyi, kuyya bu afau hosi ta afure hoŋ ifwotu adi inyi erre hun olwaji agalihini huna, bwo fe orumak adi inyi nesu on osyo fur. 30Ati laati arryai huttohosyere ofwonni adi ehalu bwo huttehalu ofwoi adi ahosyere.
This text was originally published by the British and Foreign Bible Society in 1969.
