Matteyo 10
10
Anyimuna Yesu Aati ’Tomon Harrihai
Mk 3:13-19; Lk 6:12-16
1Iloŋu inyi leyiyanak honyi ’tomon harrihai jihonyi ette isyarana jihosi adwaran ifuhari ajohin hun orrohoji’to addi jyo laati. Isyo inyi bwo fe adwaran itaŋidaryere eŋwati wati iko arrohojarita hosi daŋ. 2Afureta lefahat#10:2 lefahatIsi laati hinya ijifatye Yesu bwo ittiyenio inyi isi. hulo ’tomon harrihai isi huna: ahosyere Simone al anya’to Petro, iko Andrea illanyi; Yakobo iko illanyi Yoane, isi bu lonyirok Sebedeyo; 3Filipo, Bartolomeo, Tomaso, Matteyo lamojoni musuru, Yakobo lonyi Alufayo, Tadeyo, 4Simone Selot#10:4 SelotArai isi laati hinya igyamai bebe ihouniere afau hosi jyo Roma. iko Yuda Iskariote, letinyyaŋani Yesu.
Efahina Yesu Leyiyanak Honyi ’Tomon Harrihai
Mk 6:7-13; Lk 9:1-6
5Ifak Yesu hulo ’tomon harrihai ette iramana isi ojo, Hefwatta imisihi paganohyen bwo fe hejiŋana imisihi huno laati Samaria. 6Ati ifwatta jyo laati Israele hul arai’to ihwa akyoro hun olitohini’to. 7Ifwatta, ittittoyete jo, Ilyaha olobye ono Hollum. 8Itaŋidarata aŋwak, itubuhuna layak, itaŋidarata laati ’tallulu, ifuhara ajohin hun orrohoji’to addi. Ihwa ifwotuna tai adwaran on obyaŋara te edumit oŋida isyatta jyo laati asai. 9Hettunana arobia, kuyya akamisa, hara dwo bu attarifa ikisi hatai. 10Heyatti akis hifwa te ewatara hatai ara dwo bu agamisi arrihai, kuyya amuha, kuyya bu elluhi, nyo oremik legyamani ifwotuna aŋiyo honyi. 11Al ijiŋana tai obo amiji, ottifyeuna atulo ol oyyu teyya. Itoŋoti ikonyi many ifwatti tai. 12Al ijiŋana tai obo aji, ifonyata laati. 13Kuyya oyiji laati hutto haji ania ijara nelik taji hatawana dia, ati al obeŋi isi oyiji ijara nelik taji harasa jihatai. 14Kuyya ihari omuk laati itai ara dwo bu ihari isi itaniŋuna ekyanita hatai, al ibusana tai aji ania kuyya amiji ania, iddiddyaŋara attuduha to hejek hatai. 15Ahode ekyana ni jihatai jo, iholoŋ ono aŋoco obolo adi abahyo jyo amiji ania agalik ninya to fau Sodoma iko Gomora.
Nettigemita hun Ofwonni’to
16Ihwania efak ni itai ihwa nakyoro ihiji lemyo. Itoŋoti iko olofyoro ihwa etojo bwo fe iko anyalami ihwa ahucari. 17Ihumata ’rirrya nyo iyarai adi laati itai jyo ewwak hirre bwo fe abahye adi isi itai ihasik imojiti hosi. 18Iyarai adi isi itai ihosyere mandiri iko hobwok te eram hoŋ. Iramana adi itai eram hoŋ jihosi iko jyo paganohyen. 19Al iyarai isi itai helafuhoti jo, ?efwo adi hohoi jaran aŋai? Nyo isyo adi Hollum nekyanita jihatai ta asaa ania. 20Obyaŋara itai hul ikyanati’to ati ara Oloyiri olo Monyatai al ikyana’to itwajin hatai. 21Isyo adi obo atulo illanyi iyeri, bwo fe isyo monye eito honyi iyeri. Odyotoi adi bwo fe aduri isyoryere esyok hosi ittohyere. 22Oliwarik adi itai laati daŋ ta afure hoŋ, ati lya al odihu’to many isidi, italahu adi Hollum inyi. 23Al ittigemye isi itai jyo amiji ana ofuhoti jyo obo, nyo eramak ni itai ahode jo ibyaŋata tai iremehina ’diddaha imisihi daŋ hutto Israele many ocohuniere Lonyi tulo.
24Obeŋ obo leyiyanani agalik ettiyanani honyi, bwo fe obo apit obeŋ agalik eleittok honyi. 25Oremik leyiyanani itoŋo ihwa ettiyanani honyi bwo fe apit itoŋo ihwa eleittok honyi. Al iloŋoi isi monye haji Belsebuli#10:25 BelsebuliAfure obo ono Sitan. iloŋoi adi isi bwo fe aati hutta haŋ ihwo nya.
26Tania hebaŋata laati. Erre daŋ hun imuhoni igonyuni adi laati ihalu, bwo fe erre hun idimani oleye adi. 27Erre hun ekyana ni jihatai idumele, ikyanati lifaŋan; bwo fe erre hun itaniŋuna tai ta ayyaha hatai, iramana ihosyere wati. 28Hebaŋata attok hwattek nyo ittallihi isi ’tohoro oloyiri. Ati abaŋata Hollum ol oremik’to ibironia ahwan iko oloyiri ihima on osyo fur. 29?Ilahi laati itinyyaŋai aheny arrihai ta attarifa? Ati obeŋ obo ahenyi oremik kwaharo ifau ol obeŋ Monyatai omijak. 30Itai bwo fe, ara dwo bu ofir hutto hosi hatai ihen Hollum daŋ. 31Tania hebaŋata nyo igigilo Hollum tetai agalik aheny.
Iruhoto Kristo Ihosyere Wati
Lk 12:8-9
32Aati daŋ hul iruhi’to ani ihosyere wati, eruk adi bwo fe ni isi ihosyere Monyoŋ ette dou. 33Ati laati daŋ hul ihari’to ani ihosyere wati, eha adi bwo fe ni isi ihosyere Monyoŋ ette dou.
Abyaŋan Yesu Iyaŋuno Nelik Taji
Lk 12:51-53; 14:26-27
34Hegigiloti jo attu ni iyaŋuniere nelik tajya ifau. Abeŋ ni eyaŋuno nelik tajya ati eyaŋuno ni arrem. 35Attu ni italiwahiniere atulo iko monye, bwo ŋarri iko honye, bwo hamoni iko hamoni. 36Bwo oliwarik adi aati hutta haŋ monye haji. 37Lya ol omuno’to monyonyi kuyya honyonyi agalik ani, obeŋ bwo fe osiru jihonyi irari ahito hoŋ, bwo fe lya ol omuno’to lonyi honyi kuyya ŋarri honyi agalik ani, obeŋ bwo fe osiru jihonyi irari ahito hoŋ. 38Lya ol obeŋ’to olororo akruce honyi ette jifaro ani obeŋ osiru jihonyi irari ahito hoŋ. 39Lya al onyurak’to nesu honyi italitohi adi inyi, bwo fe lya al isyo’to nesu honyi ta afure hoŋ onyurak adi.
Edumiti
Mk 9:41
40Lya al ifwotu’to itai ifwotu ani, bwo fe lya al ifwotu’to ani ifwotu inyi lya al ifahu’to ani. 41Lya al ifwotu’to leyani sayyo nyo ara inyi leyani sayyo, onyurak adi inyi edumit ono leyani sayyo. Bwo fe lya al ifwotu’to atulo ol oyyu’to nyo oyyu inyi, onyurak adi lya edumit ono ayijon. 42Ahode eramak ni itai jo, lya al isyo’to akos hari hun ilihi’to jyo obo eito nyo ara inyi eyiyanani hoŋ, obeŋ adi edumit honyi olitohi.
This text was originally published by the British and Foreign Bible Society in 1969.
