Luke 21
21
'Kwiziŋɔnɔ 'na bɔbɔli
(Matie 12.41-45)
1Zezu libhi- 'wli "ku. 'Ɔ 'wolo -wa 'piɛ bɔbɔli -dɔkɔ "me -wɛ "ku. Lɛkɛlenya yoa 'awɔ -lɔ. 2'Ɔ 'ye- -me 'nyɛze 'kwiziŋɔnɔ -bholo 'ylime, 'ɔ 'piɛ- "bhle 'tamayɛ "sɔ. 3Zezu nɛɛ: «Gbɛklɛklɛ 'ye 'e bhulɛle lɛ 'anye, 'nyɛze 'kwiziŋɔnɔ 'na -ye 'ɔ 'piɛ- -dɔkɔ "me -zu "ne 'ɛ -zi 'wawɛ 'klekle -nɛ "ku.» 4"Naa-, 'wayi, 'dlasi -ɛ "noa 'yliku -bɛɛ' -noɔ -wɛ, 'wa "zo- -lɔ bɔbɔli "ku -dɔkɔ "me. -Mɔ, 'ɔyi -ye 'ɔ -kɛ gou "ne 'ɔ "kɛ nɛ li -wɛ 'ye 'ɔ "zo- -lɔ -dɔkɔ "me.
Zezu nɛɛ "Mebɔbɔlebhudu yi 'wlɔ-
(Matie 24.1-2; Malke 13.1-2)
5'Nyakpa 'na -bedia bhulɛ 'awɔ "Mebɔbɔlebhudu, 'nane -tiyi -ye 'wa 'sɛbhɛle- 'nu "ne bɔbɔli -ye 'wa 'nyɛ- Lagɔ wɛ 'na "ku 'na weli. Zezu nɛɛ: 6«-Ye 'a ylɛ doɔ -wɛ, 'yli 'na -vinɛ yi yi, "ne "ɛ 'tiyi -wɛ 'wɔ -ka -la "ku 'pepele-. 'Ɛyi 'klekle yi 'wlɔ-.»
Zikpɛ -gba 'ɛ "kɛ "kubhiɛ 'na -ɛ "kɛ yi -wɛ
(Matie 24.3-14; Malke 13.3-13)
7Gɛlenya 'yɔbhɔ- Zezu lo nɛɛ: «"Bhenyɔ, -sɔɔdɛku 'ɛ "kɛ bhɔ yi, 'ɛ "kɛ bhɔ yi tɛɛ?» 8Zezu nɛɛ: «'A 'luɔle- -kɛ 'ayi "ku, 'nyɔkpɔ te -kɛ 'anye ylo no.» "Naa-, 'nyakpa -kwleyia yi 'ce yi 'neɛ 'tɔ "me, ne 'wa yi no nɛɛ: «'Mɔɔ ne lɛ, lɔbhɔ -ylɛ, 'a toa 'ce 'gɛle-. 9-Sɔɔdɛku 'wa "kɛ 'ce to 'na weli bhulɛ-, "ne "kpokponya kɛ lɔbhɔ -ylɛ, 'a te "gu. "Naa-, -ɛwɛ ne, 'ɛɛ "kɛ -lɔ lɔbhɔ ylɛ 'tɛ-. Zikpɛ 'na "kubhiɛ dɛku 'ɛ "ne -kɛ -noɔ cuu.» 10"Ne 'ɔ yua -lɔ bhulɛle- nɛɛ: «'du 'na -ɛwɛ -nyɛ 'du 'na -ɛwɛ "bhaa 'wa yi 'ce gwe "ne -Klɔgbɔdu -nyɛ -klɔgbɔdu "bhaa yi 'ce gwe.» 11Dodo yi tɛtɛle- "yitɛ "ku, "ne 'guŋɔŋo yi 'du 'wɔ "ku yi. "Ne gu yi 'du 'klekle "ku 'gblɔle-, "ne -nyanɔ yi 'du yiɛ. "Ne 'be 'na "yitɛ yi "nɔgɔ "me 'bhale-.
'Wa yi 'klecɛnya 'gbapea kpɛnyee
(Matie 10.17-22; Malke 13.9-13)
12-Mɔ, "ɛ -li -wɛ 'klekle -gba "kɛ 'ce yi ne, 'wa yi 'anye "sa "ne 'wa yi 'anye 'nyɛze ziɛ-. 'Wa yi 'anye gbobhlele- "mebhubhɔlebhudu "me, 'wa yi 'anye -jiɛ "me 'pɔ. 'Neɛ 'tɔ "me 'wa yi 'anye gbobhlele- klɔgbɔnya -nyɛ "kamalenya "bhaa 'yliku. 13Lɔbhɔ 'ye 'a "kɛ -lɔ 'neɛ -wayeɛdɛ "zo. 14'Dlebhɛ te 'anye 'lɔbhɔ -see 'a "kɛ lɛ -wɛ za. 15"Naa-, -ame, 'e yi 'anye 'naneweli nu "pɔ. "Ne -wa "kɛ 'anye gbobhlele- -wɛ -kɛ 'ɛnɛɛ keyi -sɛɛ 'bhɛle-. 16'A 'to 'wɔ 'nabhɛ, "ne 'a "nɔ 'wɔ, "ne 'a 'nɔwlia 'wɔ, "ne 'anyɛɛ 'nyoa 'wɔ, "ne 'anyɛɛ 'titoa 'wɔ yi 'anye gbo 'wlime "gbli, "ne 'anyɛɛ 'glɛme 'na -bedia 'yi 'kwiɛ "me ylele-. 17'Neɛ 'tɔ "me 'nyakpa 'klekle yi 'anye 'gble. 18-Mɔ, 'anyɛɛ 'wli 'na 'nyi 'na yɛ -bholo -ka 'ce zɔ bhli. 19'A "mɔ 'gu-, "ne 'a "mɔ 'guɔ -yli, 'a yi 'ce zikpɛ 'na -ɛ -ka "kubhiɛ -wɛ yle.
Zezu nɛɛ 'wa yi Zeluzalɛme 'wlɛ
(Matie 24.15-21; Malke 13.14-19)
20Zle 'a kɛ "slojanya 'ylime 'ye- "ne 'wa kɛ Zeluzalɛme -bli ne, 'a yibhlele- sɛ -gbɔ 'wa 'cɛ 'wlɛ za yɛ 'ce -lɔ. 21Zaa, -wa kɛ 'ce Zude -glɔ "me -ko, 'wa 'fɔtɔle- tlo 'vli, -wa kɛ 'du "me -ko, 'wa 'wlo zɔ. -Wa kɛ 'kwlɛme -ko, 'wa te zoku yi! 22"Naa-, 'ɛ 'yli -wɛ, kpɛsɛzle yɛ 'ce -lɔ. -Se, -ɛ kɛleɔ- 'klekle -wɛ "kɛ 'yli 'wlole. 23"Ɛ -zlewɛ, gokɛleŋwenea "ne gwaŋwenea yi 'ce 'nyɛze "ku lele- kpɛnyee. "Naa-, kpulɛkpulɛ "yitɛ yi 'ce 'du ne "me 'plɛ, "ne Lagɔ 'na kɛle yi 'ce -glɔnya 'na za 'yli 'diɔ. 24'Wa yi 'ce -bedia 'lɔbhɔ -jijigbɛlɛ 'nu, 'wawɛ yi 'ce 'juyua "zo -glɔ 'klekle "ku. -Glɔ yi Zeluzalɛme dutɛmɛ "ku 'sule- "ne "ɛ 'yli -ye Lagɔ 'diloa- -wɛ "kɛ 'ce -lɔ bhiɛ.
'Nyɔkpɔ yowli 'na yisɛ
(Matie 24.29-31; Malke 13.24-27)
25'Be yi ylo "klo zɔ 'wlole, 'ce "klo "ne -zeli "klo, "ne jinyɛ 'na 'kple za, "ne -see 'ɛ zigbɔ "ku -wɛ za, dodo ne "ku 'na 'nyakpa 'klekle -nyanɔ yua 'ce 'lɔbhɔ. 26'Nyakpa -ce -mlɛ "ku -nyanɔ za. Gbɛmɛnɛdodo ne zɔ 'na tɛtɛ, -zizi, -badego -ɛ yi "bhle -wɛ za. "Naa-, "nɔgɔ "me 'na 'bhɛloɛ 'klekle tluɔ zɛ. 27Zaa, 'wa yi 'ce 'Nyɔkpɔ Yowli 'na yiyinɔ "nɔgɔjatlɛ "me 'ylime 'yele. 'Ɔnɛɛ 'bhɛloɛ 'klekle -nyɛ 'ɔnɛɛ 'ŋlu "bhaa. 28-Sɔɔdɛku "ɛ -li -wɛ 'klekle "kɛ "ku 'ci -wɛ, 'a 'nyegble 'ya, -se 'a 'libhi 'wli "ku. "Naa-, 'anyɛɛ Fuenyɔ "ne -la dɛtlo zɛ.
Lagɔ 'na 'Kamalezikpɛ "ne -la dɛtlo
(Matie 24.32-35; Malke 13.28-31)
29Zezu 'pɔloa- nunɛ nɛɛ: «'A -gɛ figesu "ne su -wɛ 'klekle 'yli 'ɛ 'slu kpe siɛ.» 30-Dee 'ɛ 'tɔle "ku -wɛ, 'a -gɛ yli, 'anye 'nabhɛ, 'a -yi sɛ -gbɔ 'ylobɛlele "ne -la dɛtlo. 31Sɔbhɔ 'anye 'lelee, 'a kɛ "ɛ -li -wɛ 'ylime 'ye ne, 'a no -gbɔ Lagɔ 'na 'Kamalezikpɛ "ne -la dɛtlo. 32Gbɛklɛklɛ 'e bhulɛle lɛ 'anye, 'nyakpa ne 'na -zakpɛ -ka -na 'ple 'klekle, "ne "ɛ -li ne 'klekle "kɛ -lɔ 'yli 'wlole. 33"Nɔgɔ -nyɛ dodo "bhaa yi 'ce "kubhiɛ, -mɔ, 'neɛ weli -ka 'ce "kubhiɛ.
'A 'ple 'yli
34Zezu nɛɛ: «'A 'luɔle- -kɛ 'ayi "ku, 'a te -kɛ 'ayi 'dle nuɔ 'yiɛ, no -nɛmɛ -mɔ, "ne zikpɛ ne "ku 'na -li za. -Ɛ "kɛ yi -wɛ te kɛ 'anye vu zɛ.» 35'Ɛ te -kɛ 'anye vu 'ŋudɔsokwli 'nasɛ. "Naa- -wa -ko dodo ne "ku 'klekle -wɛ 'ye 'ɛ "kɛ -lɔ 'wlime gbli 'sokwli 'nasɛ. 36'A 'ple 'yli -se 'a ko lɔbhɔ, 'a bhubhɔ- 'yiɛ -se "ɛ -li -nyɛnye -wɛ 'klekle te -kɛ 'anye yle. 'Nyɔkpɔ Yowli kɛ -yi 'a "kɔ 'yliku 'nyegbe -me. 37'Ylokwɛ, "Mebɔbɔlebhudu "me Zezu 'slole- nɛ -lɔ, "ne sabo, 'ɔ 'wlo- nɛ zɔ "ne 'ɔ me -lɔ olivietlo 'vli ŋɔŋo -ka. 38"Ne 'zegbakpɔme 'nyakpa yu nɛ -lɔ 'yukwli fo -ka "Mebɔbɔlebhudu "me.
© 2024 (Active), Wycliffe Bible Translators, Inc. All rights reserved.
