Lukasa 8
8
Abe ma titi o ngo-ngofeka abe iwinii-niiki o Yesusika
1De ipahainoli de o Yesusu wotagi-tagi de wotulu-tulu o kapongo de o kota amomoiika la wahingahu-ngahu o Abari ma Rorahai ma titi hokokia idadi ma oraha Ma Jou wahikoano ai nyawaika. De ona yangimoi de yahinooto abe iwitobaniiki ona yomakiniiki de Una ai dodagioka, 2de nagali o ngo-ngofeka yamuruono naga yomakiniiki de ona. Abe ma ngo-ngofeka gea ona ma dihiraino de utu yakokitokata de utu naga de manga popanyakeoka, masara o Yesusu wahikokitogumoka. De onangino gea naga o ngo Maria Madalena abe ma dihiraino de o tokata yatumidi watitoko munangino. 3De nagali o ngo Yohana abe muna o Kusa ngoi fekata. Abe to muna ami rokata gea wodadi o Herodese ai duduhunu ma haeke. Ho muna o ngo Yohana munangoo yomakiniiki de o Yesusu. De nagali o ngo Susaana, de naga o ngo-ngofeka utuoli manga ngoe abe iwitobaduhunu o Yesusu de yangimoi de yahinootoika abe ma titi to ona ma hirete manga tiwino yahidoaka la yaduhunu.
O Yesusu ai hiketero ma ade-ade abe womatengo o bibiti wohibarihi
Matiusu 13:1-23; Maruku 4:1-20
4De o wange moiukuoli naga o nyawa ko manga ngoe abe yoboaino o kapongo amomoiino la ka idadi yotoihene o Yesusu ai demoika. De Una wodiai o hiketero ma ade-ade moi abe wotemo wato, 5“Naga womatengo woiki ai redika la wato wohibarihi o bibiti. Ho o bibiti ma gogiriaka wohibarihi de utu ipuraraha ka ma ngekomuku, de gea yadoko-doko o nyawa, de ahao o totaleo iboaino de aolomoka. 6De utu ipuraraha ka o hakaruku abe ma tonaka ko ipirinukua, de o bibiti gea iwangoiye. Masara ka de yodihiwara de o pine gea amaai ho ikokimoraaka angamoi to ena ma akere ko iwedonua. 7De utu gea ipuraraha o hihikauku de imahidawango ka ma moi de ma hihika. Ho o hihika gea adehoroka enangika hiadono ko ihofokua. 8De o bibiti utu ipuraraha o tonaka ma hohailoauku de iwango de hiadono duru ihofoko abe to ena ma hofoko o ratuhu moi ho gea ma titi duru kohatohofokoholi.” De gea o Yesusu wohiketero ibooto de wotemo onangika wato, “Onagona dika de manga ngaukoka kiani ihigihene.”
9De ahao abe iwitobanii-niiki ona iwileha Unangika ato, “Gea ani hiketero ma ade-adeoka de nohiketero ma titi o kia?”
10De o Yesusu wapaluhu onangika wato, “Ma dihiraino o nyawa ko ihiorikuahi Ma Jou ai dogogono abe ma titi hokokia Una wahikoano ai nyawaika. Masara ma oraha naa de Una winihimatoko ai dogogono gea ka nginika dika abe nidadi ahi nyawa la wato ngini naa ka idadi nihioriki. Masara ona abe ka iwiporetohi Unangika, borotaua de ona ihioriki abe ma titi hokokia ai nyawaika wahikoano Ma Jou. Ho gea ma titi hiadono Ngohi tadotoko o nyawaika de o hiketero ma ade-ade, la ona abe ka iwiporetohi ahao idadi onangika duru imaketero hoka ma dihira Ma Jou wotemoka wato,
‘Ona gea barikua yomalega-lega de manga lako ahi datorino masara ko ihiorikua ma titi genangino,
de barikua ona yotoihene de manga ngauku to Ngohi ahi demoino masara ko ihiorikua to ena ma titi.’”
“Hokogea Ma Jou ai demo ma dihiraino, de duru hokogea idadi onangika abe yotoihene ahi hiketero ma ade-ade, angamoi ko yakunua yataoko ma titi genangino.”
11De ahao o Yesusu wotemohi iwinii-niikika wato, “De naa tinihitararono nginika o hiketero ma ade-ade kangano abe ma titi womatengo o bibiti wohibarihi. De o bibiti gea ena Ma Jou ai Demo-demo. 12Ho ma bibiti abe ipuraraha ma ngekomuku gea ma titi abe o nyawa yoihenino Ma Jou ai Abari. Masara ko itedekanuahi de o Ibilihi ma haeke iboaino onangika de idiai la yawohanga Ma Jou ai Demo-demo abe yoihenoka. De gea ma demo agoraka onangino ato done ahao yangaku enangika de Ma Jou waduhunu manga hohowonino. Ho gea imaketero hoka ena yagorakino ma bibiti gea de ihiloarika ma nyawaka de aino.”
13“De utu yoihene Ma Jou ai Demo-demo imaketero hoka o bibiti gea ipuraraha o hakaruku. Ho gea imaketero hoka ona abe yoihene Ma Jou ai Demo-demoino de yodafongo ka de manga garagoka ho hiadono jai-jai dika yongaku enangika. Masara angamoi manga hiningaka ko imahingutukua ho nako o huha yamake eko naga yahikangela onangika, gea itaitino de hiadono ona ko yaniikokaua.”
14“De naga utuohi yoihene Ma Jou ai Demo-demo imaketero hoka o bibiti ipuraraha o hihikauku. Abe ngaro yoihenoka masara manga hininga itagi ilamoko o duniaika dika, abe ma titi yopusingi de o dunia ma perelu de o kiahonanga de abe hokokia yowango yososanangi dika. Ho ko itedekanuahi de Ma Jou ai Demo-demo adehoroka de o dunia naa ma hininga. Ho to ona manga wowango Ma Jouika gea imaketero hoka o datomo abe ko ihofokua.”
15“Masara utu yoihene ai Demo-demo de ona gea hoka o bibiti ipuraraha o tonaka ma rorahaiuku. Abe ona gea yodafongo Ma Jou ai Demo-demo de manga hininga ma rorahai de ma gou-goungu. De ona duru yomajojoika ai Demo-demoika manga hiningaka de yomatongohono genangoka ka hiadono yahihofoko de o hofoko ma rorahai manga wowangoka abe ma titi manga datoro ma totiai yotobadiai.” De hokogea o Yesusu ai ade-ade ma hitararono abe iwinii-niikika.
O posi ma hiketero
Matiusu 5:15; Maruku 4:21-25; Lukasa 11:33
16De o Yesusu wogila-gilali wodotoko abe ma titi o abari ma gou-goungu Ma Jouino gea kiani ihingahu-ngahu o nyawa utuika de ufa hiadono atamunuku dika o nyawa manga hiningaka. Ho Una wodotoko de o hiketero moioli wodiai wato, “Nako o nyawa o posi yatufukika, gea ona ko ihidatamunua de o kiarono de o koi ma timioka ko ihingohamua done to ena ma dararono atatokoka. Ko hokogenangua yodiai, masara gea kiani yateruiye to ena ma ngioka la o nyawa abe yowohamino ka idadi to ena ma dararono yamake de yomahioriki. 17Abe ma oraha naa nagahi abe Ma Jou ko winihimatokuahi nginika, masara ika-ika de ahao ena gea mata-mata nginika winihimatoko. Abe o kia dika atamunokahi de ifufutuokahi nia hiningaka, ahao naga ma oraha Una wafelenga la ka idadi niataoko ma titi gea. 18Ho gea Ngohi tinihigaro tato abe ahi demo niihene, gea kiani nitotoihene de nimafikiri! De nako nitotoihene, gea ahao nia tobahioriki ka idogo. Nia tobahioriki idogo de ahao ma titi utuohi ka idadi niataoko itiai. Ho onagona dika ma hohutulu yotoihene de ma titi yataoko itiai ahao ka idogo-dogo manga tobahioriki. Masara naga utu abe barikua ko yotoihenua ahi demoino ma ona yomahiromanga ato manga tobahioriki naga ma hohutulu. De mangale ma titi ko yotoihenua ho ipahaino de manga tobahioriki gea ka yawohanga ho ma bahauku de manga tobahioriki duru ko iwaka.”
Abe ma titi o Yesusu ngoi meme de ai doo-dodoto idodutu
Matiusu 12:46-50; Maruku 3:31-35
19De o wange moiukuoli de o Yesusu naga o tau ma goronaka de o nyawa ko manga ngoe naga Unangoka. De ipaha to Una ngoi meme de ai doo-dodoto yoboa ma tauino la ato iwitutumu o Yesusika. De ona yoboaino masara ko idadiua yogila-gilaika Unangika angamoi o nyawa manga ngoe. 20Ho ona o tau ma poretoka dika de ka iwibehehongo dika la ato wohupuohi onangino la watutumohi ngoi meme de ai doo-dodoto. De doka o tau ma goronaka de naga womatengo wihingahu o Yesusika wato, “Abeika, naga ngoni meme de ani doo-dodoto yoboaka doka ma poretoka de ona inibehehongo.”
21De o Yesusu ko watutumuahi de ihira naga ai dodotoko ma demo o nyawa manga ngoeika abe naga genangoka. Abe Una wato, “Abeika ngini nimafikirohi ahi demoika naa. To Ngohi ngohi meme de ahi doo-dodoto idodutuoo, gea ngaro onagona dika abe Ma Jou ai Demo-demo yotoihene de yatobaniiki manga wowangoka. Angamoi onagona dika manga hininga hokogea de ona yodadioka to Ngohi ahi dutu adaene.” Hokogea o Yesusu ai demo onangika.
O rato o Yesusu wohitogumu
Matiusu 8:23-27; Maruku 4:35-41
22De o wange moiukuoli o Yesusu de abe iwinii-niiki yofare-fareniye o ngotiri moioka de Una wotemo onangika wato, “Abeika ngone hoiki homahihora doka o ngooto ma honongaika gea.” De ahao ona yosoboka. 23De manga dodagi ma goronaka de Una iwikiooko. De abe ai giooko ma gogiriaka de ka itodokanino yadarato ho italoko kohabuturungu o akere ma ngootoka gea ma goronaka. De ma lulu naga ma ago-agomo hiadono yabarene manga ngotiruku de ngade-ngade yahidowooro, ho ona manga bodito yaohana.
24De abe iwinii-niiki yoboa Unangino de iwitumomiki de yotemo ato, “Mia Baluhu, mia Baluhu, ngone naa inakokilutu!”
De ahao Una womomiki ai giookino de wataere ma hidalokika de ma lulu ma ago-agomika gea. Ho ka de wotemo de ma hidaloko itogumoka de ma ngooto duru iriidoka! 25De ahao Una waleha onangika wato, “Ho ngini naa o kiaka nia ngongaku?”
De abe iwinii-niiki ona gea duru yohawana de yokokiheranga ho yomakokeleha ato, “Nanga Baluhu naa done onaguna? Abe ngone hamakeoka ai kuaha o popanyakeika de o toka-tokatika, masara naa Una wahuloko o hidaloko de o luluika de enangoo mata-mata iwihingounu Unangika!”
Womatengo iwikitokata de o Yesusu wihititoko
Matiusu 8:28-34; Maruku 5:1-20
26De ma rato o Yesusu wohitogumoka de ahao yogila-gilali yomahihora abe yohidete doka ma honongaika o Gerasa ma tonakika, abe gea o Galilea ma tonaka ma daanika. 27Ho o Yesusu ka de woutiha de womatengo o kota ma nyawa abe iwikokitokata wibuhuku ma dudungoka. De iwikitokata una gea ai dekanoka ko iwaka ai pakeanga ho ka ai bululunokahi, de womanoa ko o tauokaua masara o arukoka abe o nyawa manga honenge ihingoha-ngohama o arukika gea. 28-29De una gea ma ngoeoka iwilufungu de o tokata ma kuaha hiadono ai hininga ko itiaiokaua. De o nyawa iwitaokino de iwihidapakiti de o rante o behino ai giamoka de ai louoka. De ngaro hokogea masara una ka watoaka ma rante la wato womahiluasa gea ma papakitino. De nako hiadono watoakoka de biaha ma tokata iwihihira-hira o tonaka ma kakaahaika gea abe ko iwa o nyawa genangoka.
Ho naa o Yesusu Una wohuloko o tokata ma dorouika la iwinoaka ma nauru gea. De abe iwikokitokata una gea womalega o Yesusika de wopoaka de womamotumuku ai himangoka. De gea wopoaka de ai ilingi duru ma amokiye wato, “Yesusu, abe Ngona Ma Jou Wokokurutiye ai Ngofaka, done o kia ahao Ngona nodiai ngohino? De naa ngohi duru tomagahoko tato ufa nohihiodiri ngohino!”
30De ahao o Yesusu woleha wato, “Ani romanga onaguna?”
De ipaluhu ato, “Mia romanga o Legiono.” De hokogea ipaluhu angamoi o Legiono ma romanga gea ma titi ko manga ngoe, de gea igoungu abe o tokata ma ngoe naga iwibarene iwikokitokatika gea. 31De ma tokata gea ihigali-gali imagahoko la ufa o Yesusu wohidingoto o haara ma gogurutuku. 32De abe itigi-tigino naga o ode duru kohangoe o loku ma geleforino itotimiono genangoka, ho ma toka-tokata imagaho-gahoko o Yesusika la ato wahidingoto o odeika gea la imahipooteke genangikali. De o Yesusu ai hiningaka wohimoteke ho wahidingoto ma odeika. 33Ho ma tokata gea ikokihupuoka ma nauru ai badangino de yokokibarene o odeikali. Masara ka de o toka-tokata yokokibarenoka o odeika gea de o ode imapopaata o bakoruku de imakokingumo o akere ma ngootuku hiadono akokilutuoka.
34De o ode ma gogoana ka de yamake de ona yokokiloaroka ma kapongika de ma nyawa mata-mataika abe hatoli yotigi-tigino ma tonakoka gea de yahioabari abe ma titi mata-mata yamakeoka. 35De duru ko itedekanuahi de o nyawa ko manga ngoe yoboaino o Yesusino la ato ihioriki hokokia idadi genangoka. De yomahiadonika o Yesusino de yamake Una de ma nauru gea abe kanganoino de iwikokitokata, abe una wogogere o Yesusu ai himangoka. Masara una gea womahinoaukuoka de o baju de ai hininga itiaiokali hoka ma dihirainoli, ho ona mata-mata duru yokokihawanoka. 36De ahao ona abe yamake de manga lako abe hokokia idadioka, ona gea yoade-ade o nyawa yowoe-woeika abe ma titi womatengo iwikokitokata gea de o Yesusu wihititokoka ho wihitogumoka. 37De yoade-ade ibootino de ahao o nyawa abe yogogere o Gerasa ma tonakoka gea de abe ma tonaka imakadatekino onangika, ona mata-mataika yogahoko o Yesusika la Una wanoaka manga tonaka angamoi ona gea duru yalufungoka de manga hawana.
De o Yesusu wogilio ma ngotiroko de wofareniye la wato yogilioli doka ma honongaika. 38Masara ko yosobouahi de ma nauru abe o Yesusu wihititokoka ma tokata unangino, una gea woboaino de womahidemo wato ka idadi unangoo yomakiniiki de o Yesusu. Masara o Yesusu wipaluhu wato, 39“Tomahilooa, ma koaho ngona nolio dika ani tauika de noade-ade o nyawaika abe ma titi hokokia Ma Jou woniduhunoka.” Ho una gea wosobo wolio de wahingahu-ngahu o nyawa mata-mataika ai kotaka gea abe ma titi hokokia o Yesusu widuhunoka.
O Yesusu wahitogumu o ngofeka yahinooto
Matiusu 9:18-26; Maruku 5:21-43
40De o Yesusu ona yogilio de yomahiadonoka o akere ma ngooto ma honongaika gea. De ma nyawa yowoe-woe genangoka duru iwidafongo de manga hininga ma sanangi angamoi ona nengokadauinohi iwidodamaa. 41De ahao naga womatengo ai romanga o Yairusu abe una wodadi o dodotoko ma tau manga hidimono. De una woboaino de womamotumuku o Yesusu ai louoka la womagaho-gahoko o duduhunu Unangika. Abe womagahoko wato kiani o Yesusu winiiki ai tauika, 42angamoi to una ngoi ora abe momatengo dika de ami taongo ngimoi de hinooto, muna gea itigioka ami baha adono. De o Yesusu womodeke ho yosoboka manga dumutu to Yairusu ai tauika gea.
De abe manga dodagi ma goronaka de o nyawa yowoe-woe duru iwihideefotino o Yesusino. 43De naga o nyawa yowoe-woeoka o ngofeka momatengo abe duru mokangela ma titi ami mede. De muna gea ami taongo ngimoi de hinootoino ibooto mokangela. De muna gea ma ngoe momahibau yohou-hourika hiadono ami tiwi ko iwaka. De ngaro hokogea ma ngoe momahibau, masara ko mamakeuahi o duduhunu onangino. 44Ho manga dodagi ma goronaka de muna moboa o Yesusu ai poretino de ai baju ma barenika maso. De ka de maso enangika de motogumoka ami kangelaino gea, abe ami awunu ko ihupuokaua.
45De gea masoika de o Yesusu womadogilioro de woleha o nyawa-nyawaika gea wato, “Ka onagona ihiso?”
Masara o nyawa ko moiua yomangaku abe iwiso Unangika. De ahao o Peturusu wotemo wato, “Abeika ona ko manga ngoe yomahiefotika Ngonaika, ho done sarakia ani leleha ma demo gea?”
46De o Yesusu wipaluhu wato, “Koua, naga yomatengo abe manga hiningaka ato ihiso la o duduhunu yomamake. De gea tohioriki angamoi tamao abe ahi kuaha ihupu ahi badangoka de aino onangika.” 47De ma ngofeka gea mamake abe o Yesusu womihiorikoka ho momahitigino Unangino masara ami badanga ifa-fafara ma titi ami hawana. De momahitigino de momamotumuku ai himangoka, de genangoka o nyawa mata-mata manga hima-himangoka de momahitararono abe ma titi ami kangela hokokia hiadono miso o Yesusu ai bajuika gea, de abe hokokia duru ma oraha misoika de motogumoka. 48De o Yesusu womitemo munangika wato, “Ngohi ora, ma titi ani ngongakuino hiadono naa ngona notogumoka. Ho ngaro ka nolio de ani hininga ma miriidi.”
49De abe ma oraha o Yesusu de ma ngofeka gea yomakoketemo manga gogiriakahi de naga woboaino womatengo o Yairusu ai tauoka de waino. De una gea wao o abari abe wihingahu o Yairusika ma titi to una ngoi ora, abe wotemo wato, “Ahi baluhu, tomahilooa, ma ngoni ora kanganohi mopahaka, ho marai ngaro ufa dika de nanga guru naa wogila-gila ani tauika gea.”
50Masara ka de o Yesusu woihene ma abari ma demo gea de witemo o Yairusika wato, “Ngaro ufa nohawana, ma kiani nohingaku Ngohino. De ahao muna ka idadi motogumu ami panyakeino.”
51De ka de yomahiadonika ai tauika gea de yogila-gilaika yowohamika. Masara o Yesusu ko wahigunoaua la iwinii-niiki mata-mata yowohamika. Ho o Peturusu, o Yohanese, o Yakobusu, de ma ngofaka ami baba de ngomi meme, ka ona dika yomakiniiki de Una munangika. 52De manga tau ma goronaka gea de naga o nyawa manga ngoe duru yoari-ari ma titi ma ngofaka gea mohonengoka. De Una ko womimakeuahi de wotemo onangika wato, “Ngini naa ngaro ufa niari ma titi muna, angamoi ka momaiduoka dika, ko mohonengua.”
53De o nyawa yowoe-woe gea yoihene ai demo de iwigie-giete de iwimia-mia angamoi duru ihioriki de yonganono abe ma ngofaka gea mohonengoka. 54De o Yesusu de ona yamuruono naga abe wahigunoa la yomakiniiki, ona yogila-gila de imitutumu ma ngofaka gea. De Una womiso ami giamika de womitemo de ai ilingi ma amokiye wato, “Ahi ngofaka, nomomikoka!” 55De duru ma oraha gea dika de ami womaha ilio munangika de momaokoino! De momaokoino de ahao o Yesusu wahuloko onangika la imihidoaka o inomo la ka idadi muna molomo. 56De ma ngofaka gea ami dimono duru yokokiheranga abe ma titi gea idadioka, masara o Yesusu duru wahitiari onangika wato ko idadiua yoade-ade ma titi abe womihimomikoka manga ora.
Gereja Firman Allah, Yayasan Misi Masyarakat di Pedalaman
