Lukasa 6
6
O Hiaini ma wangeoka de iwinii-niiki yomakokigutuku o redi ma hofokino
Matiusu 12:1-8; Maruku 2:23-28
1De ma moiukuoli o Hiaini ma wangeoka de naga o Yesusu de abe iwitobanii-niiki yotagi-tagi de o nyawa manga pine ma redika yoboa. De ona iwinii-niiki yahafini ho yotagi-tagi manga gogiriaka de ona homoi-homoi yomakokigutuku ma gosela de ihikanehaka manga giamoka la ma kai iborifelenga de ahao yaolomo. 2Masara o Farisi manga doomuino ma nyawa yamuruono naga yamake ma oraha yomaborigutuku de duru yataere onangika ma titi manga datoro gea. De o Farisi ma nyawa manga dodaere ma demo ato, “Adodoa ho ngini niatilakuru to ngone nanga pareta abe o Hiaini ma wange ma hiaturu?”
3Masara o Yesusu wapaluhu onangika wato, “Mode ngini ko nibasauahi o Dautu ai ade-ade Ma Jou ai Bukuoka? Abe ma oraha gea o Dautu duru iwihafini de ai dodiawo onangoo yahafini. 4Ho Ma Jou ai Tau ma goronaika wowohamika de wolomo o roti abe Ma Jouika iwidingakoka. Abe tanu ona manga hidemo ma nyawa dika ka idadi yaolomo ma roti gea, o nyawa utu duru ko idadiua yaolomo. Masara o Dautu una waolomo de wahikodokuoo ai dodiawoika la onangoo yaolomo. De gea utu yotemo ato una watilakuru ma paretaika, masara tanu una ko wahowonua Ma Jou ai himangoka, ngaro ma roti gea iwidingakoka Ma Jouika. Ho mode ngini ko nibasauahi ma ade-ade gea?” 5De o Yesusu wogila-gila wahitararono wato, “De Ngohi naa o Nyawa ma Ngofaka abe o Horogaka de tauku toboa, ho Ngohioo o Hiaini ma wange ma hibaluhu. Ho Ngohi dika naga de ahi kuahaka la tomaputuhu ma hiaturu o kia itiai haniiki o Hiaini ma wangeoka.” De hokogea o Yesusu wapaluhu onangika abe ma titi o Hiaini ma wange ma hiaturu.
O Yesusu wihitogumu ai giama iheluku o Hiaini ma wangeoka
Matiusu 12:9-14; Maruku 3:1-6
6De o Hiaini ma wange moiokali de o Yesusu wadotoko o dodotoko ma tauoka. De genangoka naga womatengo wotoihene abe ai giama ma nirakoka iheluku. 7De nagali o Farisi ma nyawa de ona abe yotobadoto-dotoko o Musa ai Paretaino yamuruono naga abe duru iwigoa-goana o Yesusu angamoi iwihideeoka la iwikalaki de iwiurusu o hiurusu ma ngioka. De iwigoana la ato iwidaene ma oraha watilakuru moi manga pareta de ka idadi ihititi genangino abe wahowonoka. Ho ona iwilega-lega la ihioriki nako o Yesusu ahao wihitogumu womatengoika gea abe ai giama iheluku, angamoi naa o Hiaini ma wangeoka.
8De o Yesusu duru wahioriki to ona manga hininga. De ahao Una wihuloko abe ai giama ihelu-helukika wato, “Nainohi la o nyawa manga himangoka nomaokoino!” De una gea woboaino. 9De ahao o Yesusu wotemo o nyawaika wato, “Naa tinileha, nako nanga pareta haniiki, o kia ka idadi hodiai o Hiaini ma wangeoka? Ka idadi hodiai irorahai ekola koaho hodiai itotorou? De o nyawa ka idadi haduhunu manga wowangoka ekola hatoma? O kiahi imakiniiki de nanga pareta?” 10De wotemo ipaha de womalega ona homoi-homoiika. De ahao witemo unangika gea wato, “Nagorakiye ani giama ihelu-heluku.” De ai giama wagorakiye de itogumoka ho idadi imakadaene abe hoka ai giama ma honongali. 11De abe iwilawa-lawana o Yesusika ona yamake ai datoro gea de manga hiningaka duru ifaeiye manga ngamo Unangika. Ho ona gea yomakoketemo abe hokokia ma ngekomo irahai la ka idadi o Yesusu iwitaoko.
Abe iwinii-niikino o Yesusu wairiki yangimoi de yahinooto la yodadi ai hidingoto ma nyawa
Matiusu 10:1-4; Maruku 3:13-19
12De ipahainoli de o Yesusu woiki wodoa o loku moiiye la dakenangoka womaniata. De Una ka iwihidetebiniye abe ko wotogu-togumua womaniata Ma Jouiye. 13De abe ma dawange ipotokaiha de wahokino ona ko manga ngoe abe ka ihikaika iwinii-niiki Unangika. De ona manga ngoe-ngoeino gea wairiki yangimoi de yahinooto la ona gea yodadi ai hidingoto ma nyawa. De ona naa abe wairiki. 14O Simono abe o Yesusu wihiromangoli o Peturusu, de o Andareasa o Peturusu ai dodoto, de o Yakobusu, de o Yohanese, de o Filipusu, de o Batolomeusu. 15De nagali o Matiusu, de o Tomasa, de o Yakobusu to Alefeusu ai ngofaka, de o Simono abe una o Seloto ma doomuino ma nyawa. 16De nagahi o Yudasa abe ai baba o Yakobusu womatengoli, de nagali o Yudasa Isikarioto, una gea abe ahao wihidoaka o Yesusu o nyawaika la iwitoma. De hokogea to ona yangimoi de yahinooto manga roma-romanga abe o Yesusu wairiki de wahidadi ai hidingoto ma nyawa.
O Yesusu o tonaka ma dolaka de wadotoko o nyawaika de o hiowa ma demo de o hiketero ma ade-ade
Matiusu 5:2-12
17De wairiki ibooto de ona yomakutuono youti ma geleforino ka hiadono o tonaka ma dolauku yomahiadonoka abe duru itiaiika ma tonaka genangoka. De naga Unangoka ona abe iwinii-niiki de o nyawa utu yowoe-woeoka. Abe naga o Yudea ma kapo-kapongino mata-mata yoboaino, de nagali o Yerusaleeme ma kotaino, de utuoli dai o gahi ma ngigoroka de yaiha yoboa abe ona gea o Tirusu de o Sidono ma kotaka ma nyawa. 18De ona mata-mata yokokiboaino la ato yotoihene ai demoino de la wahitogumu manga popanyakeino. De naga yamuruono naga onangoka abe yakokitokata, de o Yesusu wakokiditoko ma tokata gea ho wahitogumoka. 19De o nyawa mata-mata gea manga hininga la ato iwiso Unangika, angamoi naga ai kuaha Unangoka de aino itagi o nyawaika la yahitogumu onangika. De ona mata-mata o Yesusu wahikokitogumoka.
20De ahao o Yesusu womalega iwinii-niikika de wadotoko wato, “Ngini abe nihu-huha o duniaka naa, ngini gea niamake ma hiowa Ma Jouino, angamoi Una ka idadi winihikoano nginika.”
21“De ngini abe inihafini ma oraha naa, nginioo niamakeoka ma hiowa Ma Jouino, angamoi ipahaino ahao ngini inikokiwedonoka ho hiadono naga de nia bunuhoka.”
“De ngini abe niari-ari ma oraha naa, ngini ka idadi nigogarago angamoi ipahaino ahao ko iwaka nia gari masara ka nigie-giete dika.”
22-23“De ngini abe o nyawa inidohata de inioluku de initae nginika, de abe nia roma-romanga iniwea-weara mangale ma titi nihiniiki Ngohi naa o Nyawa ma Ngofaka abe o Horogaka de tauku toboa. Nako hokogea idadi nginika de gea nginioo niamakeoka ma hiowa Ma Jouino abe hiadono ka idadi nimapaa-paata ma titi nia garago ifoloiholi. De gea ka idadi nigogarago angamoi ti ngini nia utumu duru ma hohailoa naga inidodamaa o Horogaka.”
“De nako o nyawa iniao itorou, gea ka imakadaene dika hoka ti ngini nia totofora manga datoro abe yodiai itorou Ma Jou ai uru ma dodofangika abe ma dodihiraka.”
24De o Yesusu wogila-gila wadotoko wato, “Masara hiokoo ngini abe de nia tiwi-tiwioka ma titi nia hininga duru itagi ilamoko nia kiahonangika. Angamoi ngini gea niamake ma rorahai dika ma oraha naa, masara ahao dokengika de o kokangela dika ngini niamake.”
25“De hiokoo ngini abe ka ihikaika de nia bunuhoka ma oraha naa, angamoi ngini ahao duru inihafini.”
“De hiokoo ngini abe ma oraha naa ka nigie-giete dika, angamoi ahao dokengika duru niari abe nia hininga ma huha ma amoko.”
26“De hiokoo ngini abe o nyawa mata-mata inihigiriiri nginika. Angamoi ona gea inihigiriiri ma titi moi dika, abe ti ngini nia wowango ka imakadaene dika de to onangoli manga wowango ma ngekomo abe ngini de ona ka ma moi niwilawana Ma Jouika. Masara ngaro ona gea inihigiriiri, gea ko ma titiua abe Ma Jou Unangoo winihigiriiri nginika. Duru hokogenangua! De gea ngini nimaketero dika hoka ona ma dodihiraka abe yomafetongo ato Ma Jou ai uru ma dodofanga masara ko to Unangua ai demo ihingahu-ngahu. Angamoi onangoo o nyawa mata-mata yahigiriiri onangika, masara manga demoino de yomakalawana ona de Ma Jou.”
27De ahao o Yesusu wotemo wato, “De ngini abe ka nioigo nitotoihene ahi demoino, naa moi ahi demo ka idadi tinihidumutu nginika. De Ngohi tato kiani ngini niadora nia musuika, de nia datoro ma rorahai dika nidiai onangika abe inidohata ngini. 28De ona abe ihidemo de o koboto ma dorou nginika, onangika gea kiani ngini niahiowa de ma rorahai. De ona abe iniao itorou, gea ona niagahoko Ma Jouiye la yamake ma owa.”
29“De nako womatengo winipoka nia kikihinino, de gea ngini nimaleloro nia pea la ma honongali enangoli ka idadi yapoka. De nako o nyawa inihiribuutu la ato kiani nia baju ma biri-birini niahidoaka onangika, gea Ngohi tato niahidoakoo nia baju biaha onangika.”
30“De nako o nyawa yoboa nginino de naga moi yomagahoko, gea niahidoaka onangika. De nako naga ani kiahonanga abe o nyawa yomahitoona, ufa niloiki de niaribuutu la ihigilio nginika.”
31“De nako ngini nioigo la o nyawa iniao irahai nginika, gea kiani ngini nihira niao irahai onangika.”
32“Ngohi tato nako ngini naa nia dora ko itagiua nia musuika masara itagi ka onangika dika abe inidora nginika, gea done o kiaka ma utumu niamake Ma Jouino? De gea nia utumu ko niamakeua, angamoi genangino de nia hininga ko imakiniikua de to Unangoli ai hininga. Abe ngaro o tobahowo-howono ma nyawa ma ona ka idadi yomakokoona yomakodora ona de manga dodiawo. Masara ngini naa kiani nia dora itagi o nyawa mata-mataika.”
33“De nako ngini nidiai ma rorahai ka onangika dika abe ona gea iniao irahai nginika ho ko iwa nia datoro ma rorahai onangika abe iniao itorou, mode nihititi genangino la nimahigiriiri? Koua! Abe ngaro ona o tobahowo-howono ma nyawa ma ka idadi yomakao irahai ona de manga dodiawoika. Masara ngini kiani nia hininga imakiniiki hoka Ma Jouoli ai hininga abe o nyawa mata-mataika niao irahai!”
34“De ufa niahibauohi o tiwi ka onangika dika abe ahao ka idadi yaturuuru de ihigilio ma tiwi gea nginika. Masara koaho niahibau onangikaoo abe ahao ko idadiua atagali nia tiwi nginika, la gea ahao ka idadi niamake nia utumu Ma Jouino. Angamoi ngaro o tobahowo-howono ma nyawa ma ka idadi yahibauohi o tiwi manga dodiawoika iti ona ihioriki abe ahao manga dodiawo gea atagali onangika.”
35De o Yesusu ka wadotokohi onangika wato, “Masara Ngohi tinidotoko tato nikiani nia musu niadora onangika! De ma rorahai nidiai la onangika niahiowa! De nia tiwi niahibau onangika de ufa nimahinganono abe ahao atagali nginika! De nako nianiiki ahi demo gea, ahao nia utumu duru ma amoko niamake. De hongoli nako hokogea nia datoro, gea ahao nimahitaana abe ngini niagou-goungu Ma Jou Wokokurutiye ai ngofa-ngofaka. Angamoi gea de ahao ti ngini nia hininga imakiniiki de to Unangoli ai hininga ma dora abe ka ihikaika itagi o nyawaika abe ngaro ona ko ihiorikua yotarimakase de abe manga wowango itorou. 36Ho ti ngini nia dora ma hiokoo kiani itagi abe imaketero dika hoka nia Babali ai dora ma hiokoo itagi o nyawa mata-mataika.”
37De o Yesusu wogila-gila wadotoko abe iwinii-niikika wato, “De ngini ufa nimahidadi o tobauru-urusu ma nyawa abe ka de niamake o nyawa manga datoro de ka ngini dika niaputuhu niato kiani to ona gea manga hohowono hokonaa de hokonaa. Angamoi nako ngini nisabaranga dika niahohowono o nyawa utuika, done ahao Ma Jouoli kiani winihohowono nginika. Masara nako ngini ibootohi nimaketehohowono, gea ahao Ma Jou Unangoo ngaro ufa de winihohowono nginika.”
“Masara koaho ngini niaofi o nyawa manga howono nginika la ka idadi nginioo nia howo-howono aofioka.”
38“De naa ma titi moioli ka idadi tinihigaro nginika. Abe Ngohi tato irahai ngini niahidoaka o nyawaika de nia hininga ma rorahaioka de aino. De nako ahi demo gea nianiiki, ahao ngini niamake ma hibalaha abe nginika. De gea ka ma hohutulua dika ma hibalaha ahao niamake, masara abe de ma boloioka! Abe gea hoka ma ngi moi abe duru aomangiye de ahao ka idogohi hiadono ma boloi ikopoauku! De ma duduga o kia dika abe ngini niapake o nyawaika, enangoo ma duduga abe ona yapake ma oraha ihibalaha nginika.”
39De ahao o Yesusu wodiai o hiketero moi la genangino wadotoko onangika ma titi manga wowango ma totiai. De Una woleha wato, “Sarakia, ka idadi womatengo worafi-rafi wihihira-hira ai dodiawo abe unangoo worafi-rafi? Ko idadiua! Angamoi una gea abe wodadi ma hihira ko idadiua wamake o tonaka ma guhu ho ahao ona yahinooto mata-mata yaboriotaka ma guhuku. Ho nako woigo wihihira-hira ai dodiawo, una gea kiani womahioriki la ufa yahinooto yobodito.”
40“De naa moioli ka idadi nimafikiroli. Abe naga o guru womatengo de ai nyawa abe iwitobanii-niiki unangika, gea ka onagonahi yokurutiye? De gea kiani manga guruohi duru wokurutiye. Masara nako ona abe iwitobanii-niiki duru yomadotoko hiadono manga dodotoko yamataka, gea de ahao ona homoi-homoi hatoli yomakadaene hoka manga guruoli ai gurutiye. Ho ngini naa kiani ka ihikaika nimadotoko Ngohino la ka idadi nia wowango imakiniiki de to Ngohioli.”
41“Masara nako nagahi nia wowangoka ma datoro abe duru ko itiaiua, done sarakia ngini ka idadi niaduhunu nia dodiawoika? Abe gea tohiketero ti ngini nia howono gea abe hoka o gota moi abe naga nia lako ma goronaka. Ho gea tohiketero tato nako ti ngini nia lako ma goronaka de naga o gota ma belaka ma ago-agomo, de nako nagali nia dodiawo iwiwaleika abe naga o gota ma belaka ma eteteke dika to una ai lako ma goronaka gea. Ho tanu gea ngini ko idadiuahi niwiduhunu nia dodiawoika gea abe ma titi nihihupu o gota ma wale-wale ai lakoino, angamoi ma gota ma belaka ma ago-agomo nagahi ti ngini nia lakoka ho ka yatatokokahi nia lako ho ko nimahimakeokaua. 42Ho done sarakia de ngini nitemo nia dodiawoika niato, ‘Abeika nainohi la ma gota ma belaka ma eteteke gea tohihupuohi ani lakoino.’ Ho gea mode ko nimahiorikua abe ma gota ma belaka ma ago-agomo gea ti ngini ma hirete naga nia lakoka?”
“De nako ti ngini nia hininga la ti ngini ma hirete nia howo-howono ko niolegaikaua masara nioigo nihidaere nia dodiawo manga howono, gea ngini duru nimadokangeluku dika! Ho kiani ihira niahihupuokahi nia howono abe hoka ma gota ma belaka ma ago-agomo naga ti ngini nia lakoka, de gea ipahaino ahao ka idadi nimahioriki itararonokali la nia dodiawo onangikali niaduhunu abe manga gota ma belaka ma eteteke dika gea nihihupu to ona manga lakoino, abe niaduhunu ma titi manga howono gea.”
43De ahao o Yesusu wahingahu o hiketero moioli wato, “Nako o gota ma rahai, gea ko ihihofokua de ma hofoko ma dorou. De abe o gota itotorou, gea ko idadiua ihihofoko ma hofoko ma rorahai. 44Angamoi ngone hohioriki nako o gota, gea ka idadi homalega to ena ma hofokika de hohiorikoka gea ma gota ma rupa hokokia. Abe nako ngini nioigo niatofi o angguru ma hofoko, gea ko o take ma datominoua niamake. De nako nioigo o lukama ma hofoko, gea ufa o ngabau ma datomika niloiki.”
45“De hokogenangoo o nyawa yororahai to ona manga wowango ma hofoko ma rorahai naga angamoi ihititi manga hininga ma rorahaioka de aino. De abe o nyawa yototorou to ona manga wowango ma hofoko itotorou angamoi manga hininga ma dodorouoka de aino iboa. Ho abe hokokia dika naga nia hininga ma dolaka, hokogenangoo ma demo abe nitemo-temo nia uruoka de aino.”
46De ma moioli o Yesusu wohiketero wato, “Masara ngini utu ko nihingounua ahi demoino, ho naa moi tinileha. Adodoa ho ngini nimahibaluhu Ngohino de nihiahoko niato, ‘Ahi Baluhu,’ masara ngaro hokogea de ngini ko nianiikua ahi demo nginika?”
47“Ho naa tihiketero womatengo abe naga woboa Ngohino, de ahi demoino wotoihene, de ahao wohigihene de waniiki ahi demoika. 48Abe una gea tihiketero de womatengo womaatau o hakaru ma dengeoti ma lokuoka la duru ibitumu ai tau. De ipaha abe ma oraha yonguihi ho ma akere yadaene ai tauika masara ko itoropahua angamoi wohigoko irahai o hakaruoka. De hokogea ona abe naga manga hingounu ahi demoika.”
49“Ma nako o nyawa abe yoihene dika ahi demoino de ko yodiaiua, ona gea tahiketero hoka womatengoli womaatau ko o hakaruokaua. De ma oraha o nguihi ma akere yadaene ai tauika de ka ikokitoropahoka ho duru ihikiliangoka.” Hokogea o Yesusu ai hiketero ma demo wadotoko iwinii-niikika.
Gereja Firman Allah, Yayasan Misi Masyarakat di Pedalaman
