མ་ཏི། 13
13
ལི་ཡབ་ཁཱན་ག་དཔེ་གཏམ།
1ཨོ་ཉ་ནོང་ཀ་རང་ ཡི་ཤུ་ཕའི་གེ་ཕིས་ཀ་ཤོན་ཐཱན་ མཚོ་ནེ་མ་ག་ཏཱན་ བྱོན་མ༌ལ། 2ཉི་སོ་ངོ་ གནམ་མེད་ས་མེད་ མང་པུ་ཨ་ཉི་ རོ་ཀ་ཀོ་ལོ་ལོ་ཛོ་མ་ཨ་དེན་གེ་ རོག་གྲུ་ནང་ཀ་བྱོན་ཉི་ གྲུ་ག་བཞུགས་ཐཱན་ མཚོ་ནེ་མ་ག་ཆོ་ཁཱན་ སོ་ངོ་བ་ཀ་ཡེ་ཉི་གནང་མ༌ལ།
3ཉི་རོ་ཀི་ དཔེ་གཏམ་ག་ཐུང་ཀེ་ཨ་ཉི་ མང་པུ་ཐུར་གསུངས་ཉི་གནང་མ༌ལ། རོ་ཀི་གསུངས་མ་ལ་ ལའི་པ་ཐུར་ ལི་ཡ་ཕེ་ག་དི་ཝ༌ལ། 4རོ་ཀི་ལི་ཡབ་ཅ་ཨ་ཉི་ ལི་ཚེ་བང་ལམ་ཐུང་ཀ་ཁེ་ཝ༌ལ། ཉི་ཁ་ག་བ་ཨུན་ཐཱན་ དུང་ཉི་ཟ་ཝ༌ལ། 5ལི་ཚེ་བང་ ས་ད་ཟེ་རེ་ཆོ་ཁཱན་ ལུང་ཆི་ལུ་ཐུང་ཀ་ཁེ་ཝ༌ལ། ཉི་ས་ད་ཟེ་རེ་ཤ་ ཆོ་ཝ་ཨ་དེན་གེ་ དོ་ཟོ་རང་ལིག་པ༌ལ། 6དག་པ་ཀབ་ཉི་ ཙ་ཏིང་ག་མ་དི་ཝ་ཨ་དེན་གེ་ ངམ་ཚ་ལ་ཀབ་ཉི་ དྲེ་ཀི་ཞུམ་ཉི་ཤི་ཝ༌ལ། 7ཉི་ལི་ཚེ་བང་ ཟུ་ཙོང་ག་བར་ཀ་ཁེ་ཝ༌ལ། དག་པ་ཀབ་ཉི་ ཟུ་བུ་ཏབ་ཐུར་ག་ལིག་ཉི་ ཟུ་གི་ཨ་ཉི་ སེ་སེ་ལེ་མ་བི་ཝ༌ལ། 8ལི་ཚེ་བང་ ས་ལེག་པུ་ཐུང་ཀ་ ཁེ་ཝ་ཨ་དེན་གེ་ སེ་སེ་ཝ༌ལ། ཚེ་བང་གི་ 100 སེ་ཝ་ལ་ ཚེ་བང་གི་ 60 སེ་ཝ་ལ་ ཉི་ཚེ་བང་གི་ 30 སེ་ཝ༌ལ། 9ཨི་བི་ག་ན་ཅ་གི་ལ་སྨོ་ ཨོ་ཉ་སོ་ངོ་གི་ཉཱན་ཅེན་དག༌ཉི༎
དཔེ་གཏམ་ག་དེན་ཐ།
10རོ་ཀ་སློ་མ་བ་ཨུན་ཐཱན་ རོ་ཀ་ཇི་མ་ལ་ ནཱན་གི་ སོ་ངོ་བ་ཀ་ཡེ་ལ་ཀབ་ཉི་ ཧང་ཨ་ཉི་ དཔེ་གཏམ་ག་ཐུང་ཀེ་ཨ་ཉི་ ཡེན་ཅ་ཡ་དག༌ཉི།
11རོ་ཀི་ རོག་ཏེ་བ་ཀ་ གསུངས་མ་ལ་ ན་ཧ་བ་ཤོ་ ཞིང་ཁམས་ག་རྒྱལ་སྲིད་ག་ གུམ་ནང་ཡོན་ཏན་ སེ་ལེ་ག་གནང་མ༌ཅ། བཱརའ་ག་གི་ནེ་ལ་ མ་གནང་མ་ཅ་དག༌ཉི། 12ཨི་བི་ག་ཆོ་ཝ་ཐུར་ མང་པུ་གནང༌མེ། ཉི་རོ་ཀ་ཇོབ་ཇོབ་རི༌ལེ། དག་པ་ཀབ་ཉི་ ཨི་བི་ག་མ་ཝ་ཐུར་ རོ་ཀ་ད་སུར་ཆོ་ཁཱན་བུ་ རོ་ཀེ་བུ༌ལེ། 13ཨོ་ཉི་ཨ་དེན་གེ་ ཇི་གི་དཔེ་གཏམ་ག་ཐུང་ཀེ་ཨ་ཉི་ ཡེན༌ཅ། ཧང་ཡ་དག་ནེ་ལ་ རོག་ཏེ་བ་ཀི་ གོད་ནེ་བུ་མ་ཐོང་མ། ཉཱན་ནེ་བུ་ན་མ་ཐ་ལ་ ཉི་ཧ་མ་གོ༌ལ། 14ལུང་བསྟན་པ་ ཡ་ཤའི་ཡ་གི་ ལུང་བསྟན་ཁཱན་ཁེ་པ་ རོག་ཏེ་བ་ཀེ་ཨ་ཉི་ དེན་ཐ་འགྲུབ༌ཅ། ལུང་བསྟན་པ་གི་ ཨོ་ཐེན་ལུང་བསྟན་མ་ཆོ་ཝ༌ལ།
ན་ཤི་ཉཱན་པུ་ཏ་ཉཱན༌པེ། དག་པ་ཀབ་ཉི་ ཧ་མ་གོ༌ལ། ཉི་ན་ཤི་ གོད་པུ་ཏ་གོད༌པེ། དག་པ་ཀབ་ཉི་ མ་ཐོང་མ། 15ཧང་ཡ་དག་ནེ་ལ་ ཨོ་ཐ་སོ་ངོ་བ་ཀ་སེམས་ ཀག་ཏར་རི་ཝ༌ཅ། ཉི་རོག་ཏེ་བ་ཀ་ ན་གི་ཐ་ལུ་མཱན༌ཅ། ཉི་རོག་ཏེ་བ་ཀ་ མིང་ཙུམ་པ་ཨ་དེན་གེ་ རོག་ཏེ་བ་ཀི་ ཐོང་མུ་མཱན༌ཅ། ཨུ་ཉུ་མ་ནེ་ཏ་ རོག་ཏེ་བ་ཀ་ མིང་གི་ཐོང་མེ་ཆོ་ཝ། ཉི་རོག་ཏེ་བ་ཀ་ ན་གི་ཐ་ལེ་ཆོ་ཝ། ཉི་རོག་ཏེ་བ་ཀ་ སེམས་ཀི་ཧ་གོ་ལེ་ཆོ་ཝ། ཉི་རོག་ཏེ་བ་ ཇ་ག་ལོ་ཀ་ཏཱན་ ལོག་ཉི་གིར་ནེ་ལ་ ཇི་གི་ རོག་ཏེ་བ་ དྲག་ཉི་བི་ཝ་ཨོ་ཕེ་#13:15 ཡ་ཤའི་ཡ་ག་དཔེ་ཆ་ 6:9, 10 དག༌ཉི།
16དག་པ་ཀབ་ཉི་ ན་ཧ་མིང་ཤོ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ ན་ཧ་མིང་གི་ཐོང༌ཅ། ཉི་ན་ཧ་ན་ཤོ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ ན་ཧ་ན་གི་ཐཱན༌ཅ། 17ཧང་ཡ་དག་ནེ་ལ་ ཇི་གི་ ན་ཧ་ཐྲང་ཉི་ཡེག་ཅ་ ལུང་བསྟན་པ་དང་ སོ་ངོ་དྲང་པུ་མང་པུ་ཐུར་གི་ ན་ཤི་ཐོང་ཁཱན་ཁེ་པ་ མཇལ་བེ་ག་ སེམས་ཨ་ཝ་ཆོ་ཝ། དག་པ་ཀབ་ཉི་ མཇལ་བེ་མར་ཤི། ཉི་ན་ཤི་ ཉཱན་ཁཱན་ཁེ་པ་ ཉཱན་པེ་ག་ སེམས་ཨ་ཝ་ཆོ་ཝ། དག་པ་ཀབ་ཉི་ ཉཱན་པེ་མར་ཤི།
18ཉི་ཨོམ་ ལི་ཡབ་ཁཱན་ག་ དཔེ་གཏམ་ག་དེན་ཐ་ ཉཱན་ཅོ། 19ལམ་ཐུང་ཀ་ཁེ་ཁཱན་ལི་གི་ཤོ་ རྒྱལ་སྲིད་ག་ཀོར་གེ་ འཐེན་ལེག་པུ་ ན་ཐ་ལ་ཀབ་ཉི་ ཧ་མ་གོ་ཁཱན་ སོ་ངོ་ག་གེན་ཅ་གི༌ལ། བདུད་ཨུན་ཐཱན་ རོ་ཀ་སེམས་ཀེ་ གསུང་ཤོ་ཉི་བུན༌ཅ། 20ས་ད་ཟེ་རེ་ཆོ་ཁཱན་ ལུང་ཆི་ལུ་ཐུང་ཀ་ཁེ་ཁཱན་ ལི་གི་ཤོ་ གསུང་ན་ཐ་ལ་ཀབ་ཉི་ གནམ་མེད་ས་མེད་ ཤོ་ནང་ཕེ་ཉི་ཞུ་ཁཱན་ག་གེན༌ཅ། 21དག་པ་ཀབ་ཉི་ རོ་ཀ་ཙ་ས་ཏིང་པུ་ནང་ཀ་ མ་དི་ཝ་ཨ་དེན་གེ་ ད་སུར་ཤ་ཐེས༌པེ། དག་པ་ཀབ་ཉི་ གསུང་ག་ཡོར་ཀེ་ ཀ་ལུ་ཏཱད་ཉི་ ཏབ་མ་ཉམ་པ་ཤོ་ལ་ཀབ་ཉི་ དོ་ཟོ་རང་རོ་ཁེ་དི༌ལེ། 22ཟུ་ཙོང་ནང་ཀ་ཁེ་ཁཱན་ ལི་གི་ཤོ་ འཐེན་ལེག་པུ་ཉཱན་ཐཱན་ འཐེན་ལེག་པུ་ག་ དད་པ་ཨ་ཁཱན་ག་ གེན་ཅ་གི༌ལ། དག་པ་ཀབ་ཉི་ འཛམ་གླིང་ག་ བག་ཆགས་དང་ རྒྱུ་ཅ་ལ་ག་རེ་ཆ་གི་ གསུང་ལོམ་ཉི་ ཉི་སེ་མ་སེ་ཝ་རི༌ལེ། 23ས་ལེག་པུ་ཐུང་ཀ་ཁེ་ཁཱན་ ལི་གི་ཤོ་ འཐེན་ལེག་པུ་ཉཱན་ཐཱན་ ཧ་གོ་ཁཱན་ག་གེན་ཅ་གི༌ལ། རོ་ཀི་ཏེན་ཏེན་རང་སེ་སེ༌ལེ། ཚེ་བང་གི་ 100 སེ༌ལེ། ཉི་ཚེ་བང་གི་ 60 སེ༌ལེ། ཉི་ཚེ་བང་གི་ 30 སེ་ལེ་དག༌ཉི༎
བོ་ཆར་དང་བོང་ག་དཔེ་གཏམ།
24ཡི་ཤུ་གི་ ཨོམ་ཆང་རང་ དཔེ་གཏམ་ཐུར་ གསུངས་ཉི་གནང་མ་ལ་ ཞིང་ཁམས་ག་རྒྱལ་སྲིད་ཤོ་ སོ་ངོ་ཐུར་གི་ རོ་ཀ་ཨུང་ནང་ཀ་ ལི་ལེག་པུ་ཡ་ཕ་ད་བུ་གི༌ལ། 25དག་པ་ཀབ་ཉི་ བི་ནང་ག་ སོ་ངོ་བ་ ཡིབ་ཉི་ཆོ་ལ་ཀབ་ཉི་ རོ་ཀ་དགྲ་བྱང་ཕིཤི་ཨུན་ཐཱན་ བོང་ག་བར་ཀ་ བོ་ཆར་ཡབ་ཐཱན་ ཇོང་ཐ་ཝ༌ལ། 26ཨོ་ཉི་ཨ་དེན་གེ་ བོང་ལིག་ཉི་ ནམ་ནང་ཤོ་ལེ་གང་ཀ་ བོ་ཆར་བུ་ལིག་པ༌ལ།
27ཨུང་ཡོན་ད་ག་ གཡོག་པ་བ་ཨུན་ཐཱན་ ཇི་མ་ལ་ སྦྱིན་བདག་ ནཱན་གི་ བོང་ག་ལི་ལེག་པུ་ ཡ་ཕ་མང་གི་སྨོ། ཨོ་ཐ་ཨུང་ག་བོ་ཆར་ཤོ་ ཨོ་གེ་ཨོ་ཕ་ཡ་དག༌ཉི།
28ཨུ་ཐུ་ཤོ་ དགྲ་བྱང་ཕིཤི་ག་ ལའི་གི་ལ་དག་ཉི་ རོ་ཀི་ རོ་ཀ་གཡོག་པ་བ་ཀ་ ཡེག་པ་ཀབ་ཉི་ རོག་ཏེ་བ་ཀི་ ཇི་མ་ལ་ ཧང་ཨའི་དིན་ཐཱན་ ཨོ་ཉ་བ་ཝུས་ཉི་གེམ་ཤོ་སྨོ་དག༌ཉི།
29དག་པ་ཀབ་ཉི་ སྦྱིན་བདག་གི་ཡེག་པ་ལ་ མ་ཁེ༌ལ། ཧང་ཡ་དག་ནེ་ལ་ ན་ཤི་བོ་ཆར་བ་ཝུས་པ་ཀབ་ཉི་ བོང་ག་བ་བུ་ཝུས་ཇོང་དུ། 30བོང་དུང་མེ་མ་རེན་པ་སག་པུ་ བོ་ཆར་བ་བུ་ བོང་ཀབ་ཉི་རང་ལིག་པེ་བི། ཉི་བོང་དུང་མེ་གང་ཀ་ ཇི་གི་བོང་དུང་ཁཱན་བ་ཀ་ གོ་མ་རང་ བོ་ཆར་ག་བ་ཅཱད་ཐཱན་ མི་ག་གོག་པེ་དེན་གེ་ ཏོམ་པང་ཏོམ་པང་ཨ་ཉི་ཅོད་ཅོ། དག་པ་ཀབ་ཉི་ བོང་ཤོ་ ཇ་ག་རུང་ནང་ཀ་གོའི་དག་ཉི་ ཡེག༌པེ༎
མེམ་བ་ལི་དང་བི་ཏོ་ག་དཔེ་གཏམ།
31ཉི་ཡི་ཤུ་གི་ བཱརའ་དཔེ་གཏམ་ཐུར་ གསུངས་གནང་མ་ལ་ ཞིང་ཁམས་ག་རྒྱལ་སྲིད་ཤོ་ སོ་ངོ་ཐུར་གི་ མེམ་བ་ལི་བུན་ཐཱན་ རོ་ཀ་ཨུང་ནང་ཀ་ ཡ་ཕ་ད་བུ་གི༌ལ། 32མེམ་བ་ལི་ཁེ་པ་ ལི་ཐམས་ཅན་གེ་ ཟེ་མུ་གི༌ལ། དག་པ་ཀབ་ཉི་ ཨོ་ཉ་ལི་ལིག་ཉི་ ཟོག་ཏེན་གེ་ ཤིང་ཟེ་མུ་བ་ཀ་པོང་ཀེ་ རོག་རང་ཆི་ལུ་རིན༌ཅ། ཉི་ངབ་ཀེ་ཕེན་ཁཱན་ ཁ་ག་བ་ཨུན་ཐཱན་ ཨོ་ཉ་ཤིང་ཐུང་ཀ་ ཤུམ་ཅོད་ཉི་ཆོན་ཅ་དག༌ཉི།
33རོ་ཀི་དཔེ་གཏམ་ ཨོམ་ཆང་ཐུར་ གསུངས་གནང་མ་ལ་ ཞིང་ཁམས་ག་རྒྱལ་སྲིད་ཤོ་ མེ་ཝག་ཙ་ཐུར་གི་ བི་ཏོ་བུན་ཐཱན་ བོག་པི་མང་པུ་ཀབ་ཉི་ཡཱན་ཐཱན་ མ་ཕོར་པ་སག་པུ་ ཐ་ཝ་ད་བུ་གི་ལ་དག༌ཉི། 34སོ་ངོ་མང་པུ་ཛོམ་ཁཱན་ག་ གསུངས་མེ་གང་ཀ་ ཡི་ཤུ་གི་ ཧ་ལ་ཨ་ནེ་བུ་ ཨུ་ཐུ་ད་བུ་དཔེ་གཏམ་དང་ གཏམ་བ་ཀ་ཐུང་ཀེ་ཨ་ཉི་ གསུངས་གནང་མ༌ལ། ཉི་རོ་ཀི་ རོག་ཏེ་བ་ཀ་ གསུངས་མ་ཀབ་ཉི་ དཔེ་གཏམ་མ་ཝ་ཨ་ཉི་ ཧ་ལ་རང་མ་གསུངས་མ༌ལ། 35ཨོ་ཐེན་ཨ་ཉི་ ལུང་བསྟན་པ་གི་ གསུངས་ཁཱན་ཁེ་པ་ དེན་ཐ་འགྲུབ་ཕ་གི་ཝ་ལ་
ཇི་གི་དཔེ་གཏམ་བ་ཀ་ཐུང་ཀེ་ཨ་ཉི་ ཆཱས་ཨ༌ལེ། ཉི་འཛམ་གླིང་བཀོད་པ་གེ་ག་ཏཱན་ གུམ་ཉི་ཐ་ཁཱན་ཆཱས་བ་ ཇི་གི་ཡེག༌པེ།#13:35 མགུར་མ་ག་དཔེ་ཆ་ 78:2 དག༌ཉི༎
བོང་དང་བོ་ཆར་ག་ དེན་ཐ་ཁྲེ་ཉི་གནང་མ༌ལ།
36སོ་ངོ་མང་པུ་ཛོམ་ཁཱན་ཁེ་པ་ ཐུབ་ཐཱན་ཐཱན་ ཡི་ཤུ་ཕའི་ནང་ཀ་བྱོན་མ༌ལ། ཉི་རོ་ཀ་ སློ་མ་བ་ རོ་ཀ་སྐུན་མདུན་ག་དིན་ཐཱན་ ཞུ་ཝ་ལ་ བོང་དང་བོ་ཆར་ག་ དཔེ་གཏམ་ག་དེན་ཐ་ ཁྲེ་ཉི་གནང་ཤོ་དག༌ཉི།
37རོ་ཀི་གསུངས་མ་ལ་ ལི་ལེག་པུ་ཡབ་ཁཱན་ཤོ་ སོ་ངོ་ག་ཟ་གི༌ལ། 38ཨུང་ཤོ་ འཛམ་གླིང་གི༌ལ། ཉི་ལི་ལེག་པུ་བ་ཤོ་ རྒྱལ་སྲིད་ག་སོ་ངོ་བ་གི༌ལ། ཉི་བོ་ཆར་བ་ཤོ་ ངན་པ་ག་ཝག་ཙ་བ་གི༌ལ། 39ཉི་བོ་ཆར་བ་ཡབ་ཁཱན་ དགྲ་བྱང་ཕིཤི་ཤོ་ བདུད་གི༌ལ། ཉི་ཐོག་དུང་ཅ་ཨ་ཉི་ འཛམ་གླིང་བརྟན་པ་ལུ་ཕེ་གི༌ལ། ཉི་ཐོག་དུང་ཁཱན་བ་ཤོ་ ཞིང་ཁམས་ག་འཐེན་པ་བ་གི༌ལ།
40བོ་ཆར་ག་བ་ཅཱད་ཐཱན་ མི་ག་གོག་པ་པུརུས་ཀིན་ཨ་ཉི་ བརྟན་པ་ལུ་ཕ་ཀབ་ཉི་བུ་ ཇུང༌མེ། 41སྡིག་པ་ཨ་ལེ་བི་ཁཱན་དང་ ལའི་ངན་པ་ཨ་ཁཱན་བ་ རོ་ཀ་རྒྱལ་སྲིད་གེ་ ཤོན་གེ་མེ་དེན་གེ་ སོ་ངོ་ག་ཟ་གི་ རོ་ཀ་ཞིང་ཁམས་ག་འཐེན་པ་བ་ ཀུན་ཏི༌ལེ། 42ཉི་ཞིང་ཁམས་ག་འཐེན་པ་བ་ཀི་ རོག་ཏེ་བ་ ཐམས་ཅན་རང་ མི་ཙང་ནང་ཀ་ཏཱན་ ཐུབ་ཀུན་ཏི༌ལེ། ཉི་ཨོ་ཉ་མི་ཙང་ནང་ཀ་ རོག་ཏེ་བ་ གེབ་ཉི་ ཤ་ཟེང་མེ་ཁེ༌ལེ། 43ཉི་སོ་ངོ་དྲང་པུ་བ་ རོག་ཏེ་བ་ཀ་ ཡབ་ག་རྒྱལ་སྲིད་ནང་ཀེ་ ངམ་ད་བུ་རང་ འོད་ཆར་ཉི་ཆོ༌ལེ། ཨི་བི་ག་ ན་ཆོ་ཝ་ཐུར་ཉཱན་ཅོ༎
གུམ་ཉི་ཐ་ཁཱན་ རྒྱུ་ལེག་པུ་ག་དཔེ་གཏམ།
44ཞིང་ཁམས་ག་རྒྱལ་སྲིད་ཤོ་ ཨུང་ནང་ཀ་གུམ་ཉི་ཐ་ཁཱན་ རྒྱུ་ལེག་པུ་ཐུར་ སོ་ངོ་ཐུར་གི་ ཐོང་མ་ད་བུ་གི༌ལ། ཉི་རོ་ཀི་ ཨོ་ཉ་རྒྱུ་ལེག་པུ་ཁེ་པ་ ལོག་ཉི་རང་གུམ་ཐཱན་ རོག་གནམ་མེད་ས་མེད་ ཤོ་ནང་ཕེ་ཝ་ཨ་དེན་གེ་ རོ་ཀ་ཆོ་ཁཱན་ ཐམས་ཅན་རང་ ཙོང་ཐཱན་ ཨོ་ཉ་ཨུང་ངོན༌ཅ།
45ཉི་ཨོམ་ཆང་རང་ ཞིང་ཁམས་ག་རྒྱལ་སྲིད་ཤོ་ ཚོང་པ་ཐུར་གི་ མོ་ཏི་ལ་མ་ད་བུ་གི༌ལ། 46ཉི་རོ་ཀི་ མོ་ཏི་ གནམ་མེད་ས་མེད་ ལེག་པུ་ཨ་ཝ་ཐོང་དེན་གེ་ རོ་ཀ་ཆོ་ཁཱན་ ཐམས་ཅན་རང་ ཙོང་ཐཱན་ ཨོ་ཉ་མོ་ཏི་ངོན༌ཅ༎
ང་ཅོང་ག་དཔེ་གཏམ།
47ཨོམ་ཆང་རང་ ཞིང་ཁམས་ག་རྒྱལ་སྲིད་ཤོ་ ང་ཅོང་རྒྱམ་མཚོ་ནང་ཀ་ཚབ་ཐཱན་ ང་མ་འདྲ་ཝ་ཆོ་ཁཱན་ ཐམས་ཅན་རང་ ཙུང་མ་ད་བུ་གི༌ལ། 48ང་ཅོང་ཕུང་དེན་གེ་ མཚོ་ནེ་མ་ག་ཏཱན་ ཇང་ཉི་བུན༌ཅ། ཉི་ས་ག་ལང་ཐཱན་ ང་ལེག་པུ་ཆོ་ཁཱན་བ་ རོ་ཀ་ཕོརོག་པ་ནང་ཀ་གོན༌ཅ། དག་པ་ཀབ་ཉི་ ང་མ་ལེག་པ་ཆོ་ཁཱན་བ་ གེམ་ཀུན་ཏིན༌ཅ། 49ཨུ་ཉུ་ད་བུ་རང་ འཛམ་གླིང་བརྟན་པ་ལུ་ཕེ་གང་ཀ་བུ་ ཇུང༌མེ། ཞིང་ཁམས་ག་འཐེན་པ་བ་ཨུན་ཐཱན་ སོ་ངོ་དྲང་པུ་དང་ ངན་པ་བ་པེ༌བེ། 50སོ་ངོ་ངན་པ་བ་ མི་ཙང་ནང་ཀ་གོག༌པེ། ཉི་རོག་ཏེ་བ་ གེབ་ཉི་ ཤ་ཟེང་ཉི་ཆོ་ལེ་ཁེ༌ལེ། 51ཡི་ཤུ་གི་ རོག་ཏེ་བ་ཀ་ ཧ་གོ་ན་སྨོ་དག་ཉི་ ཇི་མ་ཀབ་ཉི་ ཨ་ཤི་ཧ་གོ་ཝ་དག་ཉི་ ཞུ་ཝ༌ལ།
52ཉི་རོ་ཀི་གསུངས་མ་ལ་ ཞིང་ཁམས་ག་རྒྱལ་སྲིད་ག་ སློ་མ་རི་ཁཱན་ བཀའ་ཁྲིམས་ག་ སློབ་དཔོན་བ་ཤོ་ ཕའི་ནང་ཀེ་ ནོ་ཙང་མཱན་མ་དང་ སིང་མ་ཉིག་ཙིང་རང་ ཕིས་ཀ་ཏཱན་ཤོ་ཁཱན་ ཕའི་ཡོན་ད་ད་བུ་གི་ལ་དག༌ཉི༎
ཡི་ཤུ་ནཱས་རཱད་ག་མ་ཞུ་ཝ༌ལ།
53ཡི་ཤུ་གི་ ཨོ་ཐ་དཔེ་གཏམ་བ་ གསུངས་ཉི་ཆུམ་དེན་གེ་ རོག་ཨོ་ཉ་ས་ཆ་གེ་ བྱོན་མ༌ལ། 54ཉི་རོག་ལོག་ཉི་རང་ རོ་ཀ་དུང་ནཱས་རཱད་ག་ཏཱན་ བྱོན་མ༌ལ། རོ་ཀི་ཆོས་འཛོམས་ག་ ཡེ་ཉི་གནང་ཅ་ཨ་ཉི་ རོ་ཀ་གསུང་ན་ཐ་ཁཱན་བ་ གནམ་མེད་ས་མེད་ ཡིད་ཆི་ཉི་ ཨོ་ཐ་སོ་ངོ་གི་ རིག་པ་དང་རྫུ་འཕྲུལ་ ཨོ་གེ་ཉོང་པ་གི་ས། 55རོག་ཤིང་བཟོ་པ་ག་ཟ་མང་གི་སྨོ། ཉི་རོ་ཀ་ཨ་མ་ག་མིང་ མ་རི་ཡམ་མང་གི་སྨོ། ཉི་རོ་ཀ་བོ་ཉིང་བ་ ཡ་ཀུབ་དང་ཡོ་སེཕ་ ཉི་སི་མོན་དང་ཡ་ཧུ་ད་མང་གི་སྨོ། 56ཉི་རོ་ཀ་ཟི་ག་བ་ ཐམས་ཅན་རང་ ཨའི་ཀབ་ཉི་ཅ་མང་གི་སྨོ། དག་པ་ཀབ་ཉི་ ཨོ་ཐ་སོ་ངོ་གི་ ཨོ་ཐ་རིག་པ་དང་རྫུ་འཕྲུལ་བ་ ཐམས་ཅན་རང་ ཨོ་གེ་ཉོང་པ་གི་ས་དག་ཉི་ ཡེག་པ༌ལ།
57ཨོ་ཐེན་ཨ་ཉི་ རོག་ཏེ་བ་ རོག་ཀབ་ཉི་ ཤོ་ནང་མ་ཕེ་ལཱན་ རོག་མ་ཞུ་ཝ༌ལ། ཉི་ཡི་ཤུ་གི་གསུངས་མ་ལ་ ཨོ་ག་རང་གི་ནེ་བུ་ ལུང་བསྟན་པ་ག་ གུས་ཞབས་ཨན༌ཅ། དག་པ་ཀབ་ཉི་ རོ་ཀ་དུང་དང་ རོ་ཀ་ཕའི་ག་སོ་ངོ་བ་ཀི་གི་ནེ་ལ་ གུས་ཞབས་ཨ་ལུ་མཱན་ཅ་དག༌ཉི། 58ཉི་རོག་ཏེ་བ་ཀི་ དད་པ་མ་ཨ་ཝ་ཨ་དེན་གེ་ རོ་ཀི་ཉ་ག་ རྫུ་འཕྲུལ་མང་པུ་ཐུར་ མཛད་ཉི་མ་གནང་མ༌ལ༎
Tshangla New Testament
© 2023, The Bible Society of India
all rights reserved
