Matius 5
5
Kafoinaꞌu te wawono kabhawo
5:1-2
1Nowoha mie bhahi maitu, Yesus nofonimo te kabhawo. Nengkoha kaowu domaiꞌiemo anaguhuꞌino. 2Yesus nelengkaandamo pugau bhe nofoinaꞌuda ambano,
Wambano dawua
5:3-12
Luk 6:20-23
3“Dokodawua mpuu mie ngkumaasi-asino masandeno ne Ompu,
kapaꞌamo andoamo so mehapino Kafopahintaꞌano Lahataꞌala.
4Dokodawua mpuu mopeano lalo,
kapaꞌamo nalumawesida Lahataꞌala.
5Dokodawua mpuu momaluno lalo,
kapaꞌamo dhunia somo fehebuaꞌando.
6Dokodawua mpuu mokambano lalo ne kabanara,
kapaꞌamo Lahataꞌala namaꞌandae nemokambaꞌaondo.
7Dokodawua mpuu mobhelano lalo ne manusia bhaindo,
kapaꞌamo Lahataꞌala naobhelaanda dua lalo.
8Dokodawua mpuu mongkilono lalo,
kapaꞌamo damoha Lahataꞌala.
9Dokodawua mpuu meowano pometaa,
kapaꞌamo dakumonada anaꞌino Lahataꞌala.
10Dokodawua mpuu mie nefodee-dee hampano doangkafi kapoindalono Lahataꞌala,
kapaꞌamo andoamo so mehapino Kafopahintaꞌano Lahataꞌala.
11Kodawuaꞌomu, ane damewambakikoomu, damodee-deekoomu bhe daꞌumumbuangkoomu modaiꞌano hampano angkafiomu Idi. 12Fowula lalomiu, moꞌiaꞌomu, kapaꞌamo ponambomiu te surugaa nabhahi. Ingka pedamo dua naꞌa defodee-dee ana-anabii dumadino wawo bhe hintimiu.”
O gaha bhe kantaleano dhunia
5:13-16
Mrk 9:50; Luk 14:34-35
13“Hintimiu itu dimbano gaha we dhunia. Ane o gaha naotembe, damekakahaane dua ae? Ingka miinamo nakofahalaaꞌa, tadaꞌumoho maka dapokafindaꞌiane.
14Hintimiu itu kantalea we dhunia. Seꞌonu kota te wawono kabhawo tetewei paise natifebunia. 15Miina dua bhe mesulano kantalea maka dosongkowiane bhengki, tamaka tetewei dohunsae ne kangkailaoꞌano mbali dentaleaꞌane kosasawindo mie weo lambu. 16Pedamo aitu dua tilangamiu tabeano naentalea ne wisendo mie bhaimiu, dowohaꞌao podiumiu metaaꞌano so damudhiꞌao Amamiu te surugaa.”
Yesus bhe Pahintano anabii Musa
5:17-48
Luk 6:27-36
17“Koise kofekihiomu, Idi ini amai amosali tubhono agama Yahudi bhe Kitabindo ana-anabii. Idi amai paise amosaliea tamaka amosusuangkoomu maꞌanano sakotuꞌuno. 18Amohatokoomu, kotu-kotuꞌu ane lani bhe dhunia paeꞌo naosalia, bhe nasehorofu tawa setanda tubhono agama Yahudi pae dua bhe so mosaliꞌano, ampa kosasawiꞌae nakoꞌula. 19Dadiꞌanomo laꞌae so kumamudaino tubhono agama Yahudi mahingga pahinta foliuno kahobu, maka namoguhuandae dua bhaindo, naeꞌawa kaengkohaꞌa foliuno kapanda weo Kafopahintaꞌano Lahataꞌala. Tamaka laꞌae mangkafino bhe fofoguhuꞌaono kosasawiꞌae pahinta anaꞌa, naeꞌawa kaengkohaꞌa foliuno kalangke weo Kafopahintaꞌano Lahataꞌala. 20Amohatokoomu, kotu-kotuꞌu pae bhe kapoolia mesuaꞌomu weo Kafopahintaꞌano Lahataꞌala, simbali podiumiu poangkafiꞌano bhe kapoindalono Lahataꞌala namoliu podiundo pande-pande Kitabi bhe miendo Farisi.
21Ingka fetingkeemoomu nekobhoasaꞌaono Lahataꞌala ne awuaꞌintoomua, ‘Koise fopongko, laꞌae fopongkono dahumukumue’. #Kel 20:13; Ul 5:17 22Tamaka ambaku Idi, laꞌae umamahano ne bhahitieno tetewei dahumukumue. Laꞌae mugauno ne bhahitieno, ‘Hintu itu kaafihi!’ tetewei dabhitahakie Sahano Agama. Laꞌae mugauno, ‘Hintu itu notolau kabhohemu!’ tetewei daꞌumohoe weo efino narakaa ngkalai-laiꞌano.
23Dadiꞌanomo, ane moowa kapopangamu so Lahataꞌala te wawono medha kaefoampeꞌa, gahaꞌa nokofeꞌulai lalomu ingka nandoo bhe bhahitiemu moleano lalo ne hintu, 24hunsa kadeki kapopangamu ne wiseno medha kaefoampeꞌa naꞌa, maka suli pometaa bhe bhahitiemu naꞌa. Namada aitu maka suli foampe kapopangamu.
25Ane bhe so mobhieangko, lasao pometaaꞌane tinangke we laano sala, keana nosungkuangko ne pande bhitaha. Kapaꞌamo ane nahumatomo ne pande bhitaha, namowako ne limando dhagano katohongku maka damopesuako weo katohongku. 26Amohatokoomu, kotu-kotuꞌu paise sepaliꞌa damolimbakoomua ane paeꞌo momeaꞌe kosasawiꞌae dosamu.
27Ingka fetingkeemoomu dua, ‘Koise monsulea!’ #Kel 20:14; Ul 5:18 28Tamaka ambaku Idi, ane seemie moꞌane nowoha hobhine maka lasao gaono napomoodofiane, ingka nomonsuleanemo weo totono lalono. 29Ane matamu suana naehabuangko dhosa, sungkie maka ohoe! Naetaa mobunto sembali bhe nasumangka mbadhamu, tamaka daꞌumohoko weo narakaa. 30Ane limamu suana naehabuangko dhosa, totoe maka ohoe! Naetaa kolima sembali bhe nasumangka mbadhamu, tamaka mesua narakaa.
31Nokobhoasaane dua Lahataꞌala peda aini, ‘Ane dohunsa mieno lambudo tetewei debuhiane bhe suhano’. #Ul 24:1 32Tamaka ambaku Idi, ane seemie moꞌane nohunsa mieno lambuno gahaꞌa mieno lambuno maitu miina namonsule, ingka nehabuanemo dhala so namonsuleꞌao ane hobhine anaꞌa nogaa toha. Laꞌae gumaano bhe hobhine nehunsa, nomonsulemo dua.
33Ingka fetingkeemoomu dua nekobhoasaꞌaono Lahataꞌala ne awuaꞌintoomu, ‘Koise podhandi sampe femata, tamaka o ae nepodhandiꞌaomu ne wiseno Ompu tetewei dhalangie’. #Im 19:12; Bil 30:2; Ul 23:21 34Tamaka ambaku Idi, koise sepaliꞌa podhandi bhe femata putae nandoo bhe foꞌondo-ondono, ibahano nandoo bhe lani foꞌondo-ondono, kapaꞌamo lani kaengkohaꞌano Lahataꞌala. 35Koise dua podhandi bhe femata nandoo bhe wite fofetingkeno, kapaꞌamo wite kafindaꞌano Lahataꞌala. Koise dua podhandi bhe femata sambili kotano Yerusalem, kapaꞌamo Yerusalem kota kaeateꞌano Omputo Bhalano. 36Koise dua podhandi bhe femata sambili fotumu, kapaꞌamo miina bhe kuasamu mekapute tawa mekaꞌito wuluno fotumu mahingga nasetangke. 37Dadiꞌanomo ane patudhumu uumbe, tafokoꞌuumbemo; ane patudhumu paise, tafokopaisemo. Labhino anaꞌa, nomaiꞌao ne Kafeompuꞌando seetani.
38Fetingkeemoomu dua bhoasaono Lahataꞌala, ‘Mata dololiane mata, wangka dololiane wangka’. #Kel 21:24; Im 24:20; Ul 19:21 39Tamaka ambaku Idi, koise bholosia ne mie humabu modaino ne hintu. Ane dotofa bhagamu we suana, fodoliane dua bhe kemamu. 40Ane mie nosungkuangko mbaꞌinomo nopoindalo namala bhadhumu, waꞌane dua bhe bhetamu. #5:40 Sakotuꞌuno: dhubamu. 41Ane seemie kafeompuꞌa nofosuhuko tumongkuane wowoꞌono nasekilo kakodoꞌono, poangkafiane nahaa kilo. 42Ane bhe konisalono, waꞌanda; koise mokiido ane dakoniada.
43Fetingkeemoomu dua bhoasaono Lahataꞌala, ‘Moasianda mie bhaimu, bansida kaewamu’. #Im 19:18 44Tamaka ambaku Idi, moasianda kaewamu bhe sambaheaꞌanda mie modee-deeko. 45Kapaꞌamo nadamo aini so membaliꞌaoꞌomu anaꞌino Amamiu te surugaa. Anoa nofofoni oleono so mie modai bhe so mie metaa, nofosampu useno so mie banara bhe so mie pata banara. 46Ane moasiꞌaoꞌomu kaowu mie moasiangkoomu, so dua ae Lahataꞌala namonambokoomu? Ingka mahingga mie mesalono sewa dohabu dua peda naꞌa. 47Ane pofendeꞌaoꞌomu kaowu bhe bhahitieꞌimiu, o ae poꞌalaꞌano bhe habundo mie bhaimiu? Ingka mahingga mie pata mandeꞌaono Lahataꞌala dohabu dua peda naꞌa. 48Dadiꞌanomo tabeano nasumangka totono lalomiu, peda Amamiu te surugaa.”
© 2022, Wycliffe Bible Translators, Inc. All rights reserved.
