युहान्ना 15
15
छेम्बाना आङ्गुरङाना उभुङ्मा
1“छेम्बाना आङ्गुर उभुङ्मा आङा डोक् ए, हिट्नुङ् आङाना माङ्हाङ् पाबाम्बाक् टोॽवालासि काचोक्बा ए॥ 2आङि लिसागा उसा केङुन्गा ओहागेप्पाचि उन्ङा खोक्टुचिचि, हिट्नुङ् उसा ओकेङुगा सोब्बे ओहागेप्पाचिङा आझै जोम् उसा ओकेङुवाक् नुङ् उन्ङा रुबुटु॥ 3आङा खानि लोनानिगा रिङ्ङा खानि हाले डोक् सिङ् उभुङ्मा रुबि गाड्डे डोक् चोखो लिमा आहिडिए॥ 4खानि आङि लिसानि, हिट्नुङ् आङा खानिङि लिङा॥ नाड्डेउङ् ओहागेप्पा आङ्गुर उभुङ्माङि लिन्याट्नि भोने, हिट्नाँ एरोक् टुल्फुल केङ्मा हिडुन्ना, हिड्डे डोक् खानि आङि आलिसेट्टिन् भोने टुल्फुल केङ्मा आहिनिम्ना॥
5“आङ्गुर उभुङ्मा आङा डोक् हिट्नुङ् खानिम्बाक् ओडालाचि ए॥ कोइ आङालोक् लिसे भोने, हिट्नुङ् आङा हिट्नालोक् लिसाङे भोने, हिट्नाँ जोम् टुल्फुल केङुटु, पोङ्भोने आङालाम्मा आसाम्डिउङ् खानिङा पाक्चा चोक्मा आहिनिम्ना॥ 6कोइ याप्मि आङि लिनेट्नि भोने, काम लिनिना हागेप्पा गाड्डे डोक् भारा लेप्युक्, हिट्नुङ् हिट्ना चोप्युएट्युक्॥ नाड्डेगा ओहागेप्पाचि याप्मिचिङा उछुम्सुटु, हिट्नुङ् मिङि ओठेन्डुङ् ओहाट्टुढिसुटु॥ 7खानि आङि आलिसिए भोने, हिट्नुङ् आङा लोनानिगा रिङ् खानिङि लिसे भोने, खानि निङ्ग्वाङि पाक् नाक्मा आमिट्टिटिगा हिट्ना नाक्टानि, हिट्ना खानिङा आटोगुम्टुम्॥ 8खानिङा जोम् टुल्फुल आकेङुमे भोने, ना रिङ्ङा डोक् आङाना पाबाङाना माहिमा लियुक्, हिट्नुङ् खानि आचेलाचि आलिसिटि॥
9“आङाना पाबाङा आङा माया याङ्चोगेसे, हिट्नाडे डोक् आङा चा खानि माया चोक्नाइनाने॥ हाट्ले खानि आङाना मायाङि युङायाक्टानि॥ 10आङा लोनानिगा आग्याँ पालान् आचोगुमे भोने, खानि आङाना मायाङि आलिसियाक्टिटि, हिट्नाडेडोक् आङा आङाना पाबाङाना आग्याँ पालान् चोगुएसुङे, हिट्नुङ् उन्ङाना मायाङि युङ्ङा॥ 11आङाना आनान्दा खानिङि उलियाक् हिट्नुङ् खानि आड्डिक् हारका आलिसियाक् नुङ् डोक् आङा खानि नागा रिङ् लोनानिगा ए॥
12“आङा लोनानिगा आग्याँम्बाक् ना डोक् ए– आङा खानि माया चोक्नानि गाड्डे डोक् खानिङा चा ठिबाङ्ङा आरकोलोङ्सा माया चोग्गा चोग् चोगानि॥#युहान्ना १३:३४; १५:१७; १ युहान्ना ३:२३; २ युहान्ना ५ 13साइबाचि लोङ्सा चोला पिमा नुङ्ना ठेना माया आरु पाक्चा वाइना॥ 14आङा लोनानिगा गाड्डे खानिङा आचोगुम्टुम् भोने, खानि आसाइबाचि ए॥ 15हाट्ले नुङ् आङा खानिलाउङ्सा चाकार लोनेनिन्गा, पोङ्भोने चाकारङा ओडाङ्बाङा पाक् चोगुएट्टुना, हिट्नाँ ठाहा टोगुन्ना॥ आङा खानिलोङ्सा साइबाचि लोनाँनि, पोङ्भोने आङा जे आङाना पाबालाम्मा खेम्सुङे हिट्नागा ख्वाप्पा रिङ्चि आङा खानि लोनेनाँने॥ 16खानिङा आङा आसेगेट्टिन्ना, टरो आङा खानि सेग्नाने॥ हिट्नुङ् खानि खाडानिउङ् सोरोक् लियुयाक्ना टुल्फुल केङानुम् नुङ् खानिलोङ्सा टोॽवा पिनाने॥ हिट्डेउङ् खानिङा पाबालोक् आनिङ्ङि जे आनाक्टुम् चा उन्ङा खानि मापिडिटि॥ 17हाट्ले आङा खानि ना आग्याँ पिनाँनि, ठिबाङ्ङा आरकोलोङ्सा माया चोग्गा चोग् चोगानि॥
येसुङा ओचेलाचि ओछेक्छेक् चोगुचिगा
18“नाराङिगा याप्मिचिङा खानि चिम्मा माफुट्टिटि भोने, खानि चिम्मा फुट्मा पाइले आङा चिम्मा याङ्उफुट्नागा नुङ् खानिङा ठाहा टोगानुम्॥ 19खानि ना नाराङिगा याप्मिचि आलिसानाँ बे हिट्नागाँ खानि आन्याँ याप्मि नुङ् मामिट्टियुङ् माया माचोगिए बे॥ टरो खानि ना नाराङिगा माखाक्, हिट्नुङ् खानि नारालाम्मा आङा सेग्नाने, हिट्डेउङ् नाराङिगा याप्मिचिङा खानि चिम्मा माफुट्टिटि॥ 20आङा खानि लोनानिगा रिङ् मिट्टानुम्, ‘चाकार ओडाङ्बा नुङ्ना ठेना लिनिना॥’#मात्ति १०:२४; लुका ६:४०; युहान्ना १३:१६ हिट्नागाँ आङा याङ्छामा ओचाट्टाङे भोने, खानि चा याङ्छामा माचाट्टिटि॥ हिट्नागाँ आङाना रिङ् ओखेम्सुए भोने, खानिङा आमाटुम्गा रिङ् चा ओखेम्सुटु॥ 21टरो नागा सोब्बे थोक् खानि आङागा आलिसिनाँ खानि हिड्डे मामेट्टिटि, पोङ्भोने हिट्नागाँ आङा कापाङ्बा मिसेन् उनिसुन्ना॥
22“आङा टायाउङ् हिट्नागा लोन्याट्निङ्चिङ्ना बे हिट्नागा पापङाना फाट्टुरङि उठानेयाट्नि बे, टरो हाट्ले उन्चि पापङाना बारेङि हिट्नागाँ माप्माना पाक्चा रिङ् डोक् वाइना॥ 23जुन्ङा आङा चिम्मा याङ्फुट्युक्, हिट्नाङा आङाना पाबा चा चिम्मा फुट्टुटु॥ 24आरु साङा चा ओचोगुन्गेट्टुन्गा टोॽवा आङा हिट्नागा माझै चोक्नेयाट्निङ्नाँ बे हिट्नागा पापङाना फाट्टुरङि उठानेयाट्नि बे॥ टरो हाट्ले आङा चोगुङ्गा टोॽवाचि उनिसुङ् चा आङा लोक् आङाना पाबा आन्च्याँ इप्पाङ् डोक् हिट्नागाँ चिम्मा याप्मि उफुट्टाइसे॥ 25टरो धारमाबिधिङि छेप्टाना ना रिङ् उयुयाक् नुङ् डोक् नागा ख्वाप्पा लिसा टाए, ‘पाक्चा माले हिट्नागाँ आङा चिम्मा उफुट्टाङे॥’#छाम्लोमा छाप्ला ३५:१९; ६९:४
26“आङा पाबालाम्मा छेम्बाना हाङ्सा खानि घुवार काफाबा खानिङि पाङ्सुङ्टुङ्॥ उन् पाबालाम्मा उङ्युक् हिट्नुङ् उन्ङा डोक् आङाना बारेङि ख्वाप्पा साँचि मापिडिटि॥ 27हिट्नुङ् खानिम्बाक् उटुम्लाम्मा डोक् आङालोक् आवासिए, हिट्डेउङ् खानिङा चा आङाना बारेङि साँचि आपिडुम्टुम्॥”
© 2023, Wycliffe Bible Translators, Inc. and Nepal Bible Society
