युहान्ना 13
13
येसुङा ओचेलाचिगा लाङ् वासिडुबिडुचिगा
1छुट्कारा चाडा उटुम् लिमा नुङ् पाइले ना नारा नाडुङ् उन्ङाना माङ्हाङ् पाबाङि खाप्माना बेला टाया लाबे नुङ् येसुङा ठाहा टोगुए॥ उन्ङा नाराङि उलिसागा ओयाप्मिचि सोरोक् माया चोगुचे हिट्नुङ् उन्ङा हिट्नागा आखेरि बेला सोम्मा डोक् माया चोगुयाक्टुचे॥
2येसु लोक् ओचेलाचि युसाना पाका चामा ओचोएट्टुना बेला सैतानङा सिमोनङा उइछा याहुदा इस्कारियोतङाना उनिङ्वाङि येसु धोका पिमाना निङ्ग्वा हाले डोक् ठेन्डुबिडुएसुना॥ 3पाबाङा उन् ख्वाप्पा आधिकार पिडुएसुए, हिट्नुङ् माङ्हाङ्लाम्मा उङ्साना हिट्नुङ् माङ्हाङ्ङि डोक् नोक्ङा खाट्नागेट्नाँ नुङ् येसुङा ठाहा टोगुएसुना॥ 4हिट्ना मिट्टुङ् येसुङा चामा नाडुङ् कोबे हिट्नुङ् भारा वाप्माना लोट्लिङ् फेन्डुङ् ओकाम्मोरङि तौलिया रिगुए॥ 5हिट्नुङ्ना उन्ङा भाँडाङि चुवा ठेन्डुङ् चेलाचिगा लाङ् वासिमा ठालाँ चोगुए, हिट्नुङ् ओकाम्मोरङि रिगुना तौलियाङा हिट्नागाँगा लाङ् टुग्माबिमा ठालाँ चोगुए॥ 6जब उन् सिमोन पाटरुस सोरि आबे, हिट्नुङ् हिट्नाङा येसु लोडुए, “आडाङ्बा, पाक् खान्ङा आलाङ् आवासिडुटुनि?”
7येसुङा पाटरुस लोडुए, “ना बेला आङा पाक् चोक्ङेट्ङाना, खान्ङा बुझा आचोगुन्ना, टरो हान्डेङ्म्बाक् खान्ङा बुझा आचोगुटु॥”
8पाटरुसङा उन् लोडुए, “खान्ङा आलाङ् खोना बेला चा वासिमा लिनिना॥”
येसुङा हिट्ना लोडुए, “आङा कालाङ् वासिनेएट्निङ् भोने, खान् आचेला डोक् आलियुयाक्निना॥”
9सिमोन पाटरुसङा लोडुए, “हिट्नाडे भोने आटाङ्बा, आलाङ् एडोक् माखाक्, टरो आमुक् हिट्नुङ् आटेहेक् चा याङ्वासिडाबिडा॥”
10येसुङा हिट्ना लोडुए, “एॽवा लोमा हिडाना याप्मिङा लाङ् नुङ् आरु ओयेम्ङिगा आङ्गाचि वासिमा कोन्निना, पोङ्भोने हिट्नाङाना सोब्बे ओयेम् सेङ्सेङ्ना लियुक्॥ हिट्नुङ् खानिम्बाक् चोख्याँ लिमा आहिडिएसिए, टरो सोब्बेउम् माखाक्॥” 11पोङ्भोने उन् धोका कापिबा उन्ङा मिसेन् निसुएसुना डाना॥ हिड्डेउङ् खानि ख्वाप्पाउम् चोख्याँ आलिसिन्गेट्टिन्गा नुङ् उन्ङा लोडुचिगा डागा॥
12चेलाचिगा लाङ् वासिमा हिडुङ् भारा वाप्माना लोट्लिङ् वाडुङ् उन् फेरि युङे, हिट्नुङ् हिट्नागा लोडुचे, “आङा खानि लोङ्सा पाक् चोगुङेना हिट्ना रिङ् खानिङा बुझा आचोगुमे नि? 13खानिङा आङा काहिसिक्बा हिट्नुङ् टाङ्बा आलोडिङागा, ना रिङ् छेम्बा डोक् ए, पोङ्भोने आङा हिट्ना डोक्॥ 14आङा खानि टाङ्बा हिट्नुङ् काहिसिक्बा लिसाउङ् चा खानिगा लाङ् वासिडुङे भोने, खानिङा चा ठिबाङ्ङा आरकोङाना लाङ् वासिमा कोन्युक्॥ 15आङा चोगुङ्ना गाड्डे डोक् खानिङा चा चोगानुम् नुङ् डोक् आङा खानि लोङ्सा ठिक् नामुना निमेट्नानिगा॥#लुका २२:२७ 16छेम्बा डोक्, आङा खानि लोनाँनि, डाङ्बा नुङ्ना चाकार ठेना लिनिना हिट्नुङ् खाबोर काहाक्बा नुङ्ना खाबोर काटाप्बा ठेना लिनिना॥#मात्ति १०:२४; लुका ६:४०; युहान्ना १५:२० 17खानिङा ना रिङ् बुझा आचोगुमुङ् ना गाड्डे डोक् आचोगिए भोने, माङ्हाङ्ङा खानि आसिक् मापिडिटि॥
येसु धोका पिडुना चेला
(मात्ति २६:२०-२५; मारकुस १४:१७-२१; लुका २२:२१-२३)
18“आङा खानि ख्वाप्पाङाना बारेङि माट्टुङ्ना माखाक्, आङा सेगुङ्चिङ्गा लाउङ्सा मिसेन् निसुङ्चिङ्चिङ्॥ टरो ‘आङाना चालेपा काचाबा आङाना बिरुद्दाङि कोबे’#छाम्लोमा छाप्ला ४१:९ नुङ् धारमाछाप्लाङि छेप्बालाक् रिङ् युमा डोक् कोन्युक्॥ 19ना लिमा नुङ् पाइले डोक् आङा खानि लोनाँनि, हिट्डेउङ् जब ना घाट्ना लियुक्, आङा उन् नुङ् खानिङा बिस्वास आचोगुम्टुम्॥ 20छेम्बा डोक्, आङा खानि लोनाँनि, आङा पाङ्सुङ्ना स्वागाट् काचोक्बाङा आङा चा स्वागाट् याङ्चोक्युक्, हिट्नुङ् आङा स्वागाट् काचोक्बाङा आङा कापाङ्बा पाबा चा स्वागाट् चोगुटु॥”#मात्ति १०:४०; मारकुस ९:३७; लुका ९:४८; १०:१६
21नाटेप्मा माप्मा हिडुङ् येसुङाना उनिङ्ग्वा आड्डिक् टुगे हिट्नुङ् हिट्नागा पारचिन्दा लोडुचे, “छेम्बा डोक्, आङा खानि लोनाँनि, खानि माड्डे ठिबाङ्ङा आङा धोका याङ्पियुक्॥” 22येसुङा ना रिङ् साङाना बारेङि माट्टुना नुङ् चेलाचिङा बुझा ओचोग्वाट्टुन्, हिट्नुङ् उन्चि उन्चि एरोक् पुगा-पु ओचोगे॥ 23येसुङा ओचेलाचि माड्डे उन्ङा माया चोगुना चेलाम्बाक् उन् सोरि डोक् युङासाना॥ 24सिमोन पाटरुसङा हिट्ना चेला उमिक्ङा इसारा चोगुङ् लोडुए, “सिलाप्टु लो, उन्ङा ना रिङ् साङाना बारेङि माट्टुना?” 25हिट्ना चेला येसुङि लेखेप् लिसाउङ् सिलाप्टुए, “टाङ्बा, हिट्ना याप्मि साइना टे?”
26येसुङा लोडुचे, “चालेप्पा लुमुङ् आङा जुन् पिडुङ्टुङ्, आङा माट्टुङ्ना याप्मि हिट्ना डोक् ए॥” हिट्नुङ् उन्ङा चालेप्पाङाना ओखान्डा लुमुङ् सिमोन इस्कारियोतङाना उइछा याहुदा पिडुए॥ 27याहुदाङा चालेपा टाक्टुनामे उनिङ्ग्वाङि सैतान लिगे॥ हिट्नुङ् येसुङा याहुदा लोडुए, “खान्ङा पाक् चोक्मा आइट्टुएना, एला डोक् चोगुएट्टु॥” 28टरो येसुङा हिट्ना पोङ् हिट्डे लोडुएना हिट्ना रिङ् चामा चासिङा उयुङागा साङा चा बुजा ओचोग्वाट्टुन्॥ 29पोङ्भोने याहुदालोक् ओफाबा युङ्माना चाम्सुप्मा युङ्ग्वा, हिट्डेउङ् येसुङा हिट्नालाउङ्सा चाडाङि चाहाब् लिना पालोवालो इम्माउङ्सा पाङ्सुना आथाबा पाक्चा वानिगालोङ्सा पालोवालो पिमाउङ्सा पाङ्सुना नुङ् कोइ-कोइ उमिट्टे॥ 30हिट्नुङ् याहुदाङाम्बाक् चालेपा चामा हिडुनामे भारा होन्डारे॥ हिट्ना बेला युसा लिसेसाना॥
येसुङा ठिक् ओछोङ्ग्वाट् आग्याँ पिडुचिगा
31जब याहुदा भारा खाडालेट्टे, हिट्नुङ् येसुङा लोडुचे, “हाट्ले याप्मि छाङाना माहिमा ठेट्ना बेला लिसे, हिट्नुङ् उन्लाम्मा माङ्हाङ्ङाना माहिमा लियुक्॥ 32उन्लाम्मा माङ्हाङ्ङाना माहिमा लिसेसे भोने, माङ्हाङ् आप्पेङा छाङाना माहिमा चोगुटु, हिट्नुङ् उन्ङा एला डोक् छाङाना माहिमा चोगुटु॥
33“हाउ खाट्टियुगा आइछाचि, आङा छोप्मोङ् धारि एडोक् खानिलोक् वाङा॥ खानिङा आङा आकोलिटिङा, हिट्नुङ् आङा याहुदिचि लोडुङ्चिङ्गा गाड्डे डोक् खानि चा लोनाँनि, ‘आङा खोनाइ खाट्नागेट्नाँ हिट्नि खानि खाप्मा आहिडिन्गा॥’#युहान्ना ७:३४ 34हाट्ले आङा खानि ओछोङ्ग्वाट् आग्याँ पिनाँनि, खानि खानिङि माया चोगाजानि॥ आङा खानि माया चोक्नानि गाड्डे डोक् खानिङा चा ठिबाङ्ङा आरको माया चोक्मा कोन्युक्॥#युहान्ना १५:१२,१७; १ युहान्ना ३:२३; २ युहान्ना ५ 35खानिङा ठिबाङ्ङा आरको माया चोक्गा चोक् आचोगिटि भोने, खानि आचेलाचि नुङ् सोब्बेङा ठाहा माटोगिटि॥”
पाटरुसङा इन्कार चोगुना बारे
(मात्ति २६:३१-३५; मारकुस १४:२७-३१; लुका २२:३१-३४)
36सिमोन पाटरुसङा उन् सिलाप्टुए, “टाङ्बा, खान् खोनि आखाट्युगेट्ना?”
येसुङा लोडुए, “ना बेला आङा खोनि खाट्नागेट्नाँ हिट्नि खान् आङालोक् खाप्मा आहिनिना, टरो हान्डेङ्म्बाक् खान्ङा आङा रोक् आरिक्ङा॥”
37पाटरुसङा लोडुए, “टाङ्बा, ना बेला आङा पोङ् खान् रोक् रिक्मा हिनेन्ना? आङा खान् लोङ्सा सिमा चा टेयार लिङा॥”
38येसुङा लोडुए, “पाक् खान् आङालोङ्सा सिमा टेयार आलियुक्नि? छेम्बा डोक्, आङा खान् लोनाँ, खान्ङा आङा सुम्बोक् खेप् सोम्मा इन्कार मिचोक्ङे सोम्मा कोक्साबा ओक्निना॥”
© 2023, Wycliffe Bible Translators, Inc. and Nepal Bible Society
