युहान्ना 11
11
लाजारस सियाना
1हिट्नि ठिबाङ् लाजारस उनिङ् लिसाना याप्मि डाना, हिट्नाङाना ओयेम् टुगेइसाना॥ हिट्ना बेथानिया युक्टाम्ङि युङाना डाना, हिट्नुङ् उनाचि मारियाम लोक् मारथा चा हिट्नि डोक् युङाचिगा॥#लुका १०:३८-३९ 2ना मारियामङा डोक् येसु डाङ्बाङाना ओलाङ्ङि आट्टार नेक्टुबिडुङ् ओफ्याक्ङा टुगुबिडुना डाना॥#युहान्ना १२:३ हिट्नाङाना उन्झा लाजारसङाना डोक् ओयेम् टुगेसाना॥ 3हिट्नागाचि मारथा लोक् मारियामङा येसु नाड्डेना खाबोर हाङ्साचुए, “टाङ्बा, खान्ङा माया आचोगुना कासाइबाङाना ओयेम् टुक्येट्॥”
4येसुङा ना रिङ् खेम्सुङ् माट्टुए, “लाजारसङाना ओयेम् टुक्येट्, टरो ना बिमारङा उन् सिनिना॥ उन् ओयेम् टुग्माउम् माङ्हाङ्ङाना माहिमा लाउङ्सा ए, नाड्डेउङ् हिट्नालाम्मा माङ्हाङ् छाङा माहिमा लाडुटु॥” 5येसुङा मारथा, मारियाम लोक् लाजारस माया चोगुचिगा डागा॥ 6उन्ङा लाजारसङाना ओयेम् टुगाना खाबोर खेम्सु चा उन् युङ्ना डेन्ङि आझै इप्पोक् लेम्बा हिट्नि डोक् युङे॥ 7हिट्नुङ्ना येसुङा ओचेलाचि लोडुचे, “लु, हाट्ले आनि फेरि याहुदिया छेट्राङि नोक्टि खाडि॥”
8चेलाचिङा ओलोडुए, “काहिसिक्बा, आम्टेप्मा लेम्बा पाइले एडोक् याहुदिचिङा खान् लुङ्गेॽवाङा लेप्मा माकोलाना, पाक् फेरि खान् हिट्ना डेन्ङि आखाट्युक्नि?”
9येसुङा लोडुचे, “पाक् लेन्ङि बारो घान्टा लिनिनै टे? लेम्बा लाम्टिना याप्मिम्बाक् टोक्निना, पोङ्भोने हिट्नागालोक् नाराङिना व्हाङ् लियुक्॥ 10टरो युसाना पाका जुन् याप्मि लाम्टियुक् हिट्ना टोक्युक्, पोङ्भोने युसाना पाका उन्लोक् व्हाङ् लिनिना॥” 11हिट्नुङ्ना उन्ङा हिट्नागा नाड्डे लोडुचे, “आनि साइबा लाजारस उमिक्युमाङा इम्साइसे, टरो हिट्ना उमिक्युमालाम्मा फोग्ङा आङा हिट्नि खाट्नाँ॥”
12ओचेलाचिङा ओलोडुए, “टाङ्बा, उन् उमिक्युमाङा इम्साइसे भोने उन् नुमानिङ् लियुक्॥”
13येसुङा हिट्नागा लाजारस सियाडाना बारेङि लोडुचिगा डागा, टरो हिट्नागाम्बाक् लाजारस उमिक्युमाङा इम्साना एडोक् माट्टुना नुङ् उमिट्टुए॥ 14हिड्नाड्डेउङ् येसुङा हिट्नागा पारचिन्दा लोडुचे, “लाजारस सियाइसे॥ 15हिट्नुङ् खानिङा बिस्वास आचोगुम् नुङ् डोक् खानि लोङ्सा चा आङा उन्लोक् हिट्नि लिनेट्निङ्नाँ आङा हारका लिसाइसाङे॥ जे लिचा आबानि, आनि उन्ङि खाडि॥” 16हिट्नुङ् थोमा, हिट्ना दिदुमास#११:१६दिदुमासङाना उटुप् केप्छेरेक् लियुक्, ना रिङ्उम्बाक् गिरिक् रिङ् ए॥ चा ओलोडुए, हिट्नाङा आरु चेला ओसाइबाचि लोडुचे, “लु, आनि चा काहिसिक्बालोक् खाडि, हिट्नुङ् उन्लोक् डोक् सिइ॥”
येसु लाट्निना चोलाङाना उपुन्
17येसु बेथानियाङि होन्डाटायानाङा लाजारस ओहुम्पाङि उयुङ्सुना टेम्बोक् लेम्बा लिसाडाना ठाहा टोगुए॥ 18बेथानिया यरुसलेम खालाङ्गालाम्मा सुम्बोक् किलो मिटार टेप्मा लाप्माङ् डाना॥ 19जोम् याहुदि याप्मिचि मारथा लोक् मारियामङा उन्झा सियानाँ उन्चि याङ्छामाङि टाक् पिमा ओटाइसागा॥ 20येसु टायुगेट्ना रिङ् खेम्सुङ् मारथाम्बाक् उन् टुब्सिङा खाडे, टरो मारियामम्बाक् पाङ्ङि डोक् युङे॥ 21मारथाङा येसु टुबुङ् लोडुए, “टाङ्बा, खान् नाहि आलिसानाम् बे आन्झा सिनेट्नि॥ 22टरो हाट्ले चा आङा ठाहा टोगुङ्टुङ्, खान्ङा माङ्हाङ् जे आनाक्टु चा उन्ङा खान् मापियुक्॥”
23येसुङा हिट्ना लोडुए, “कान्झा फेरि उहिङ्ग्वाट् लियुक्॥”
24मारथाङा उन् लोडुए, “हिट्नाम् ठिक्का डोक्, आखेरि लेम्बाङि उसियागा सोब्बे उहिङ्ग्वाट् उलियुङ् ओकोब्नाँ हिट्ना चा उहिङ्ग्वाट् लियुङ् कोब्युक् नुङ् आङा ठाहा टोगुङ्टुङ्॥”
25येसुङा हिट्ना मेन्झेमा लोडुए, “उसियागा उहिङ्ग्वाट् काचोक्बा हिट्नुङ् चोला कापि आङा डोक् ए॥ आङा बिस्वास काचोक् सिए भोने चा हिङ्युक्॥ 26हिट्नुङ् कोइ याप्मि आङि लियुक् हिट्नुङ् आङि बिस्वास चोगुटु भोने हिट्ना खोना बेला चा सिनिना॥ मारथा, पाक् ना रिङ् खान्ङा बिस्वास आचोगुटुनि?”
27मारथाङा उन् लोडुए, “आए, आटाङ्बा, खान् नाराङि आउङ्ना खिरिस्ट, माङ्हाङ् छा नुङ् आङा बिस्वास चोगुङ्टुङ्॥”
28नाटेप्मा लोडुङ् मारथा खाडालेट्टे, हिट्नुङ् उन्झा मारियाम छेम्डुङ् सोगोप् लोडुए, “काहिसिक्बा होन्डा टाए, हिट्नुङ् खान् माछेम्येट्॥” 29ना रिङ् खेम्सुनामे मारियाम कोबाउङ् उन् सोरि खाडे॥ 30हिट्नुङ् येसु आझै युक्टाम्ङि होन्निटानिगेट्निना डाना, टरो उन् मारथाङा टुबुना डेन्ङि डोक् वासेट्टाना॥ 31उन्चि झान्झा सियाउङ् सान्तोना पिमा मारियाम ओपाङ्ङि ओखाडागा याप्मिचिङा उन् एला एला भारा होन्डाखाडाना उनिसुए, हिट्नागाँ उन्झाङाना ओहुम्पाङि हाब्सिङा खाडेना रैछो नुङ् उमिट्टाउङ् हिट्नागा उन्ङाना ओएङ्-ओएङ् ओखाडे॥
32जब मारियाम येसु लिसाना डेन्ङि टासुए हिट्नुङ् उन् निसुङ् ओटोकानाङि गुङ् चोगाउङ् नाड्डे लोडुए, “टाङ्बा, खान् नाहि आलिसाना बे आन्झा सिनेट्नि॥” 33हिट्नुङ् येसुङा मारियाम हाबाना हिट्नुङ् उन्लोक् ओआबागा याहुदि याप्मिचि चा ओहाबेट्टागा निसुङ् येसुङाना आड्डिक् उनिङ्ग्वा टुगे॥ 34हिट्नुङ् हिट्नागा सिलाप्टुचे, “खानिङा लाजारस खोनि आहुमुएसुम्मेना?”
हिट्नागाँ उन् ओलोडुए, “टाङ्बा, आबाउङ् पुयु॥” 35हिट्नुङ् येसु हाबे॥ 36ना उनिसुङ् याहुदिचि उन्चि उन्चि नाड्डे उपिगे, “पुयानुम्, उन्ङा लाजारस आम्टेप्मा याप्मा माया चोगुना रैछो॥” 37टरो कोइ-कोइ उपिगे, “ना याप्मिङा याङ्कानिनिबा नुमानिङ् चोगुए, पाक् लाजारस चा सिमालाम्मा हिङ्मा हिडुवाट्टुन्नि बे?”
येसुङा लाजारस उहिङ्ग्वाट् चोगुना
38फेरि येसुङाना उनिङ्ग्वा औधि टुगाउङ् उन् ओहुम्पालेङ् खाडे॥ हिट्ना ओहुम्पा ठिक् लुम्भुक्ङि डाना, हिट्नुङ् हिट्नाङाना ओयासि ठिक् ठेना लिङ्गेॽवाङा ओटेप्टुएसुना॥ 39येसुङा हिट्नागा लोडुचे, “हिट्ना लिङ्गेॽवा सोन्डानुम्॥”
सियाना लाजारसङाना उना मारथाङा उन् लोडुए, “आटाङ्बा, हिट्ना ओहुम्पाङि युङ्बालाक् हाट्ले टेम्बोक् लेम्बा लिमाइडे, ना बेला सोम्माउङ् नाम्माइडे होला॥”
40येसुङा हिट्ना लोडुए, “बिस्वास आचोगुए भोने, खान्ङा माङ्हाङ्ङाना माहिमा आनिसुटु नुङ् आङा लोनाना माखाइ टे?”
41हिट्नुङ् हिट्नागाँ उहुम्पा ओटेप्टुना लुङ्गेॽवा ओसोन्डुए॥ हिट्नुङ् येसुङा टोनालोग्लेङ् पुयुङ् माट्टुए, “हाउ आप्पो, आङा खान् पोए-पोए लोनाँ, पोङ्भोने खान्ङा आङा ठाङ्सुङ्ना बिन्टि आखेम्सुए॥ 42खान्ङा आरिङ् सोरोक् आखेम्सुगा नुङ् आङा ठाहा टोगुङ्टुङ्, टरो खान्ङा आङा याङ्आपाङ्साङ्ना नुङ् नाहि ओयेबागा जोम् याप्मिचिङा बिस्वास ओचोगु नुङ् आङा खान् लोनाना॥” 43नाट्टेप्मा माप्मा हिडुङ् येसुङा ठेना ओसोरा चोगुङ् माट्टुए, “लाजारस, एला भारा होन्डाकाडा॥” 44टब हिट्ना सियाना लाजारस उलाङ्-उमुक् कापाडाङा, हिट्नुङ् ओनाभाक् लोट्लिङ्ङा उरिगुनालोक् भारा कोबा काडे॥ येसुङा हिट्नागा लोडुचे, “हिट्ना ओरेक्टुना कापाडा फेन्डाबिडानुम्, हिट्नुङ् खाप्मा पिडानुम्॥”
येसु सेप्माना योजाना
(मात्ति २६:१-५; मारकुस १४:१,२; लुका २२:१,२)
45येसुङा चोगुना टोॽवा उनिसुङ् मारियाम टुब्मा ओटायागा जोम् याहुदि याप्मिचिङा उन्ङि बिस्वास ओचोगुए॥ 46टरो हिट्नागा माड्डे आम्टेप्माम्बाक् फारिसि याप्मिचि सोरि ओखाडाउङ् येसुङा चोगुना टोॽवाङाना बारेङि हिट्नागा ओखेम्मेट्टुचे॥ 47हिट्नुङ् गाडुवाडाङ्बाचि लोक् फारिसि याप्मिचिङा काचाहारि-कुन्डालङिगा सादास्सेचि ओछेम्डुचिउङ् बैठाक् ओचोगे हिट्नुङ् ओमाट्टुए, “हाट्ले आनि पाक् चोगिगा? पोङ्भोने ना याप्मिङा याप्मा डोङ् ठोङ्डिगा टोॽवा चोगुएट्टु॥ 48आनि ना याप्मि नाड्डे डोक् चोक्मा पिडुम्याक्टुम्मे भोने सोब्बे याप्मिचिङा हिट्ना बिस्वास ओचोगुटु, हिट्नुङ् रोमि टिलिङ्गाचि ओटायुङ् आनि माङ्ठाना हिट्नुङ् आनि छोङ्चि चा जाखाम् ओचोगुटु॥”
49टरो हिट्नागा माड्डे ठिबाङ् कैयाफा उनिङ् लिसाना याप्मि डाना॥ उन् डोक् हिट्ना बेलाना सानिङ्डाङ्बा डाना, उन्ङा हिट्नागा लोडुचे, “खानिङा पाक्चा ठाहा आटोक्निम्ना॥ 50सोब्बे छोङ्बा जाखाम् लिमा नुङ्ना याप्मिचि लाउङ्सा ठिबाङ् याप्मि सिमाङि डोक् खानि लाउङ्सा नुना लियुक् नुङ् खानिङा बुजा आचोक्निम्ना॥”
51ना रिङ् उन्ङा आप्पे उनिङ्ग्वालाम्मा माट्टुना माखाक्, टरो हिट्ना बेला सानिङ्डाङ्बा लिसानाँ याहुदि छोङ्बाचि लाउङ्सा येसु सिमा कोन्युक् नुङ् उन्ङा माङ्हाङ्लाम्माना रिङ् माट्टुना डाना॥ 52याहुदिचिगा लाउङ्सा एडोक् उन्ङा हिट्नाड्डे माट्टुना माखाक्, टरो उछिन्डाउङ् चेम्बेलेङ् उलिसागा माङ्हाङ्ङाना ओयाप्मिचि चा एक्केउ छुम्माचि लाउङ्सा हिट्नाड्डे माट्टुना डाना॥ 53हिड्डेउङ् हिट्ना लेम्बालाम्मा याहुदि ओठेडाङ्चिङा येसु सेप्मा लाउङ्सा योजाना ओचोगुए॥ 54हिड्डेउङ् येसु फेरि याहुदिचिङि सोब्बेङा ठाहा ओटोगुलोक् वानेट्नि, टरो हिट्निलाम्मा साक्चा उयुङ्निना डेन् नेहेट्टाङ् लिसाना एफराइम ओलोडुना युक्टाम्ङि खाडे, हिट्नुङ् हिट्नि ओचेलाचिलोक् युङे॥
55याहुदिचिगा छुट्काराङाना चाडा टाया लाबाना डाना, हिट्नुङ् युक्टाम्लाम्मा याप्मा याप्मिचि छुट्कारा चाडा टामा नुङ्ना पाइला डोक् आप्पे-आप्पे लोङ्सा चोख्याँ लिमा नुङ् यरुसलेमङि ओटाए॥ 56हिट्नागाँ येसु टाना ओलाम्बो उपुयुए, हिट्नुङ् हिट्नागा माङ्ठानाङि उलिसानाँ उन्चि उन्चि नाड्डे उपिगे, “खानि खोड्डे आमिट्टिटिगा? पाक् उन् चाडाङि टायुक्नि टे?” 57गाडुवाडाङ्बाचि हिट्नुङ् फारिसि याप्मिचिङाम्बाक् येसु लाब्मा ओकोलुना डाना॥ हिट्डेउङ् हिट्नागाँ “येसु खोनाइ वाहेट्ना नुङ् ठाहा काटोक्बाचिङा खाबोर चोगानुम्” पिक्सा आग्याँ उपिडुएसुचिगा डागा॥
© 2023, Wycliffe Bible Translators, Inc. and Nepal Bible Society
