Jwon 14
14
Yeso Fisel ti Wa Kyel i DeeƁwe
1“Ka hu hon mulwat amu si tirim kwa. Fahun mulut si DeeƁwe, fahun mulut si yin hwak. 2Ta wur i Deen ɗwam si ta hyang. Naɗin andi kwa, naɗin i laku. I wa ta te'i ɓa i ɗaku ti kyel ta. 3Na i wa i ɗak ti kyel ta, i wa yes ti haisun i kolu ta kyeli, ɓurti kyel ima yin i mata, hun hwak ɓa hu te ta kyeli. 4Hu shang fisel ti wa kyel ima i ma wa ta.”
5Unai Toma lakus ni, “A Deembai, ni shang kyel ima ha wa ta kwa. Atini ni wa shang ti fiseli ya?” 6Yeso matussi ni, “Ayin a fiseli, ayin a mwawei, ayin a mupwet. Ɗeng ma wa kyel i Dee kaciwa' sa na kyel amen kwa. 7Naɗin hu shangun ndere, naɗin hu shang Deen hwak. Nasi mwashi hu shangus, hu ɗingus hwak.”
8Unai Filip ni, “A Deembai, kofa nin ti Deehi, myatat asinin tima tal.”
9Yeso humus ti kyel ni, “A Filip, hal mwashi ha shangun kwa ha, ta male' mute ima i masi na saa yuti mai haa? Shak maɗufal ima ɗingun, ɗing Dee dai. Atini ha ni, ‘Kofa nin ti Deehi ya?’ 10Ha fa mwawei nyai yin ima ta wii i Dee, Dee hwak mana wii yunti kwani? Findelal ima i laksa mii, amen kwa. A findelal i Dee ima mana wii yunti ma masti ro ames. 11Faha mwawei si yin hai i mata wii i Dee, Dee hwak mana wii yunti. Na andi kwa, Faha mwawei nasi ɗamam ima i masus. 12I ma laksu mwawei, shak maɗufal ima fa mwawei na hai yunti ma wa masti ɗamam ima i wo yin masus. Ma wa masti mbayai i ɗamam ima si ɓin mii, ɓurti i wa kyel i Dee. 13I wa masti ɗamam ima hu fwal ti asum amen, ɓurti Al u yes ti ngye wa kyel i Dee. 14Hu wa lul ti shak ɗamam ti asum amen, yin i wa masi.
Kintiɓwi Rin Masapai Ma Yes
15“Na hu ɓwetun, hu wa hal ti aɗeng ima i laku. 16Yin i wa fwal ti Dee, yis ma wa fasu nin Mataɓaki ɓa u te akul si hun myan hu myan. 17Yis Mataɓak mai a Rin i mwawei. Naya ti wa matsus kwa, ɓurti ti ti shit tima ɓa ti ɗingus ti kwa, ahun ti ni ti shangus. Shak ta andi, hun hu shangus, ɓurti yis te akul hu hun, ma wa mute ta wii yuti. 18I wa honsu fota mushiya kwa, i wa yes kyel amu. 19Myan si kat ndyong, naya ti wa muhum ɗingsun kwa fweng, hun hu wa ɗingsun. Ɓurti i mana ti mupwet, hun hwak hu wa mute ti mupwet. 20Mwen andi hu wa shangi nyai yin ima ta wii i Dee, hun huna wii yunti, yin hwak i mata wii yuti. 21Shak maɗufal ima mat findel amen ɗak masti ro, a yis mi maɗufal ima ɓwetun. Maɗufal ima ɓwetun, Deen ma wa ɓwetsus, yin hwak i wa ɓwetsus i kofus haisun.”
22Unai Judas (a Judas i ta' ti Iskaryot kwa) ni, “Unai, a Deembai, a ɓurti mi ha kof sinin haisa, ha nggwya ti naya ya?”
23Yeso humustikyel ni, “Shak maɗufal ima ɓwetun, ma wa hal ti findel amen. Deen ma wa ɓwetsus, ni wa yes kyel i maɗufali ni hatus i wur aminin akul hu yis. 24Maɗufal ima ɓwetun kwa ma wa hal ti findel ima i laki kwa. Findelal ima ha halsus mii amen kwa, ii Deen ima rohun.
25“I lak findelal mii shak yin ɗiri akul hu hun. 26Shak ta andi, Deen ma wa tuksu Mataɓaki, Rin Masapai ti asum amen, a yis ma wa kofsu shak ɗamam u kinu hu mbe' shak ɗamam ima i laku. 27I honsu ti murak i mulut. Murak i mulut amen i fu. Murak i mulut mai naya ti ndok ti fu kwa. Ka hu hon mulwat amu si tirim kwa, kan hu mwen kwa.
28“Hu halun i ni, ‘I ma yun wa, i wa muhumkyel na kyel amu.’ Na hu ɓwetun, hu jakak ɓurti i wa kyel i Dee, ɓurti Dee ɓinun yin mbaitat. 29I laku ndai kaciwa' ɗama fur fisha, ɓurti myan ima ɗama fur fisha hu fa mwawei. 30I wa muhum findel ti hun fwet kwa, ɓurti Shatan makai i naya moti nai yes. Shak ta andi, mati mbaitat na hai yunti kwa. 31Naya ti wa shangi nyai i ɓwet Dee, aɗeng ima kin i mas shak aɗeng ima lakun nai. Luk hun fit mwashi, ka her ya nanati.”
© Wycliffe Bible Translators, Inc. and © The Nigeria Bible Translation Trust 2018
