Jwon 13
13
Yeso Sa Sisai i Fe i Ro Ames ya
1Si mana ɗak Got i Pissihai ru, Yeso tuu shangi myan ames tuu ndok ima ma wa honti naya u hum kyel ta kyel i Dee. Ɓurti Yeso ɓwet ɗufal ames ima si mana naya, kofus ɓweti ames hwak yes dala.
2Ta myan ima Yeso hu fe i ro ames sin cwai ti cwa i fo'. Shatan tuu kin ta mulut i Judas Iskaryot al i Siman, ɓa u nggwes ti Yeso. 3Yeso tuu shangi nyai Deehi tuu kin ɗamam shak ta ra ames, shangi hwak yes i ta kyel i DeeƁwe, a kyel i DeeƁwe hwak ma wa muhum ta. 4Myan ima sin cwai ti cwaii, Yeso lukfit mbwet fagin asus ti saikyel ya, ha' tawul no' na manggiring ames, 5ɗak shu ham ta ɓeleng, tong sati sisai i fe i ro ames ya, yis fyal ti sisai ames ya ti tawul ima no' ta manggiring ames.
6Unai Yeso yes kyel i Siman Pita, ima nyus, “A Deembai, ha wa sa sun sai ya haa?”
7Yeso matussi ni, “Mwashi, ha shang aɗeng ima i masi kwa, na takfai ha wa shangi.”
8Unai Pita nyus, “Wayou! Ha wa sa sun sai ya kwa fweng!”
Yeso matussi ni, “Ou, na i sa hai kwa, ha mati aweng na kyel amen kwa.”
9Unai Siman Pita nyus, “A Deembai, a sisai amen kek ha wa sai kwa, sa ha ra hu hai amen hwak.”
10Unai Yeso ni, “Takfai tima maɗufal sa lo' ames ya, ma wa ɓweti sati lo' hwak kwa, a sisai je ma wa saiya. Hun a som musapai, a shak asui kwa.”
11Ɓurti Yeso tuu shang maɗufal ima matus wa munggwya, ayis kin ni, “A shak asui hu ti sapa kwa.”
12Takfai tima pun sasus sisaiyi ya, ru' fagin asus ɗak humuskyel ta kyel i mute ames tes amun. Unai lulus ni, “Hu shang aɗeng ima i masi ɓursu haa? 13Hu laisun ii ‘Makofiti’ hu ‘Deembai,’ a kiga', ɓurti angga' ima i mata nai. 14Na yin ima i mii Deembai hu makofiti amu, i sahu sisai ya, hun ɗat ɓa hu sa ɗiyai amui ya hwak. 15I kofu aɗeng mai a ɓurti ɓa hun hwak hu masi angga' ima i masui ta. 16I ma laksu mwawei, yere ɓyan mawur ames kwa, mamuro ɓyan maɗufal ima rohus kwa. 17Mwashi ima hu shang ɗamam mii, DeeƁwe ma wa kinsu maɗesi na hu masus.
18“I ma findel a na haisu shak kwa. I shang ima i ben. A kanggang aɗeng ima si worong ta findel i DeeƁwe u hya nyai, ‘A maɗufal ima cu cwa amen hatun hai.’#13:18 Ɗing huni hwak: Nak 41:9.
19“I ma laksu mai kaciwa' tuu ru, ɓurti myan ima ru hu fa mwawei nyai, ayin a yis. 20I ma laksu mwawei, maɗufal ima mat shak ima i rous, matun ayin, maɗufal ima matun, mat a maɗufal ima rohun ndai.”
21Takfai tima mas findel mai, aɗengi kin Yeso tirim ta mulut fwet. Unai lak ya kparara nyai, “I ma laksu mwawei, andek na saa yuti ma wa cwai ti kwinik amen.”
22Unai fe i ro ames si ɗing ɗiyai fo, ɓurti si shang yis ima Yeso ma findel si yis hai kwa. 23Nin ta saa ti fe i ro amesi, ima Yeso ma ɓweti, ma amun ta nggas ti Yeso. 24Unai Siman Pita findelus ti ra nyai, ɓa u lul Yeso u lakus ti ima ma findel si yis hai.
25Unai maɗufal mai her ta nggas ti Yeso lulus ni, “Ayis we ya, a Deembai?”
26Unai Yeso mati ni, “I wa jop ti ɓwai i folok mai na ɓeleng. Maɗufal ima i fas, a yis mii maɗufali.” Unai Yeso zan ɓwai i foloki jop, fa Judas Iskaryot al i Siman. 27Takfai tima mat ɓwai i foloki, unai Shatan lang ta wii ames.
Unai Yeso lak Judas ni, “Aɗeng ima ha wa masi mai, masai kaang.” 28Ta saa ti som ima sima cwai ti cwaii, ɗeng shang aɗeng ima kin Yeso lak Judas andi kwa. 29Judas a yis mati takal i cefi, fe i ro sima ambe' nyai, “Yeso ma laksus ɓa u wa u juwil aɗeng ima sima ɓweti ta gotti, ahun u fa a som i jyel ɗama ɗak.” 30Takfai tima Judas mat ɓwai i foloki, unai langus ya abet. Ta myani fo' tuu mas.
31Takfai tima Judas lang ya, Yeso ni, “A mwashi si ha' Al i Maɗufal fit, si ha' DeeƁwe fit hwak ɓurti Ali. 32Na DeeƁwe mat mbaitat ɓurti Ali, DeeƁwe ma wa fati Ali mbaitat abet.
33“A fe amen, i wa mute akul si hun i myan ndyong. Hu wa farsun, fota angga' ima i lak som Ju ta, angga'i nai ima laksu ta nyai, ‘Kyel ima i ma wa ta, hu wa shang ti yes kwa.’
34“A findel mamwayi ima fasu, ɓwet hun ɗiyai. Fota angga' ima i ɓwetu ta, a kanggang hu ɓwet ɗiyai andi hwak. 35A angga'i nai ɗufal shak si wa shangi hun a fe i ro amen, na hu ɓwet ɗiyai.”
Pita ma wa Ɗanggwya ti Yeso
(Mat 26:31-35; Mak 14:27-31; Luk 22:31-34)
36Siman Pita lul Yeso ni, “A Deembai, ha wa a leya?”
Yeso mat ti ni, “Kyel ima i ma wa ta ha wa shang ti kol tifai asuni mwashi kwa, na takfai ha wa koltifai asuni.” 37Unai Pita nyus, “A Deembai, ami kin i wa shang ti koltifai asai mwashi kwa ya? I wa fati mupwet amen ɓursa.”
38Yeso mat ti ni, “Ha wa fati mupwet asa ɓursun haa? I ma laksa mwawei, kaciwa' korong tuu tutol, ha wa ɓwinggil i shangsun sa ataat.”
© Wycliffe Bible Translators, Inc. and © The Nigeria Bible Translation Trust 2018
