ଲୁକା 13
13
ପାପ୍ କାମି ବାଗେ ତାପେ ୟାଦୋ ନାଷ୍ଟ୍ଅଃ ପେ
1ଏନ୍ ସାମାୟ୍ ଚିମିନାଙ୍ଗ୍ ହୋଡ଼ୋକୋ ହିଜୁଃ ସେଟେର୍ ଜାନାକୋ, ହାର୍ ୟୀଶୁ କେ ଏନ୍ ଗାଲିଲୀ ଜିଲ୍ଲା ରେନ୍ ହୋଡ଼ୋ କୋୱାଃ ବିଷାୟ୍ ରେ ଉଦୁବ୍ କିଜାକୋ, ଅକନ୍ କୋୱାଃ ମାୟୋମ୍ ପିଲାତୁସ୍ ଇନ୍କୁୱାଃ ଦାଣେ ଲୋଃ ମେଶା ଲେଦାଏ। 2ନେୟା ଆୟୁମ୍କେତେ ଇନିଃ ଇନ୍କୁକେ କାଜିରୁଆଡ଼୍ କେଃକୋୱାଏ, “ଆପେ ଚିନାଃ ପାହୋମ୍ ତାନାପେ, ଚିନାଃ ନେ ଗାଲିଲୀ ଜିଲ୍ଲା ରେନ୍ ହୋଡ଼ୋକୋ ଏଟାଃ ସବେନ୍ ଗାଲିଲୀ ଜିଲ୍ଲା ରେନ୍ ହୋଡ଼ୋକୋ ଏତେ ଥିମ୍ବା ପାପୀକୋ ତାଇକେନା ଏନାତେ ଇନ୍କୁକେ ନେକା ଦୁକୁ ସାହାତିଙ୍ଗ୍ ହୋବାନା? 3ଇଙ୍ଗ୍ ଆପେକେ କାଜିତାନିଙ୍ଗ୍ କାହା, ମେନ୍ଦୋ ଆଗାର୍ ଆପେ ପାପ୍ କାମି କାପେ ବାଗେୟାପେ ଏଣ୍ଡେ ଆପେ ସବେନ୍ କୋ ହଗି ନେଲେକାତେ ନାଷ୍ଟ୍ ଅଗାପେ। 4ଚି, ଆପେ ଚିନାଃ ପାହୋମ୍ ତାନାପେ ଚିନାଃ ନେ ଆଠାରା ହୋଡ଼ୋକୋ ଅକନ୍ କୋୱା ଚେତାନ୍ ରେ ଶିଲୋହ୍ ସାହାର୍ ରେ ଦିରି ତେ ବାଇୟାକାନ୍ ସାଲାଙ୍ଗୀ ଅଡ଼୍ଆଃ ଉୟୁଃଜାନା ଆଡୋଃ ଇନ୍କୁ ଅତାକେତେ ଗୋଏଃ ଜାନାକୋ, ଚିନାଃ ଇନ୍କୁ ୟୀରୁଶାଲେମ୍ ରେନ୍ ସବେନ୍ ତାଇନ୍ ତାନ୍ ହୋଡ଼ୋକୋ କୋଏତେ ଥିମ୍ବାଗି ପାପୀକୋ ତାଇକେନାକୋ? 5ଇଙ୍ଗ୍ ଆପେକେ କାଜିତାନିଙ୍ଗ୍ ଚି କାହା, ମେନ୍ଦୋ ଆଗାର୍ ଆପେ ପାପ୍ କାମି କାପେ ବାଗେୟା ଏଣ୍ଡେ ଆପେ ସବେନ୍ କୋ ହଗି ନେଲେକାଗି ନାଷ୍ଟ୍ ଅଗାପେ।”
କା ଯଅତାନ୍ ଲୋୱା ଦାରୁ ରାଃ ଜୋନୋକା
6ଏନ୍ତେ ୟୀଶୁ ନେ ଜୋନୋକା କାଜିକେଦାଏ, “ମିୟାଃ ହୋଡ଼ ରାଃ ଆଙ୍ଗୁର୍ ବାଖ୍ଡ଼ି ରେ ମିୟାଃ ଲୋୱା ଦାରୁ ରୋଏକାନ୍ ତାଇକେନା। ସବେନ୍ ଶିର୍ମା ଇନିଃ ଏନାରେ ଯଅ ଦାଣା ଲାଗିନ୍ ହିଜୁଃ ଲେନାଏ, ମେନ୍ଦୋ କାଏ ନାମ୍ କେଦା। 7ଏନ୍ତେ ଇନିଃ ଏନ୍ ବାଖ୍ଡ଼ି କେ ହୋରୋତାନ୍ ମାଲି କେ କାଜିକେଦାଏ, ‘ନେଲେମ୍, ଆପି ଶିର୍ମା ଏତେ ଇଙ୍ଗ୍ ନେ ଲୋୱା ଦାରୁ ରେ ଯଅ ଦାଣା ହିଜୁଃ ତାନିଙ୍ଗ୍, ମେନ୍ଦୋ କାଇଙ୍ଗ୍ ନାମ୍ ତାନା। ନେୟା କେ ମାଆ ଖାଣ୍ଡାଅ ତାମେ, ନେୟା ବେଶ୍ ଅତେ କେ ଚିନାଃ ମେନ୍ତେ ଆବ୍ରାଅ କାଦାଏ?’ 8ଇନିଃ ଗୋମ୍କେ କେ କାଜିରୁଆଡ଼୍ କିଜାଏ, ‘ହେ ଗୋମ୍କେ, ନେୟାକେ ନେ ଶିର୍ମା ଆଡୋଃଗି ତାଇନୋଃକା, ଇଙ୍ଗ୍ ନେୟା ରାଃ ସବେନ୍ ପାଡ଼୍ ଉର୍ ବିୟୁର୍ କେତେ ମାଇଦ୍ ଏମେୟାଇଙ୍ଗ୍। 9ଆଗାର୍ ଆୟୁର୍ ତେ ଯଅଃ ୱା ଏଣ୍ଡେ ଦୋ ବେଶ୍ ତାନାଃ କାରେଦୋ ଏନାକେ ମାଆ ଖାଣ୍ଡାଅ ତାଃବୁ।’ ”#13:9 ଲୋୱା ରାଃ ଦାରୁ ଇସ୍ରାଏଲ୍ ହୋଡ଼ୋକୋକେ ଉଦୁବେ ୟାଏ
ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ କୁବ୍ଡ଼ି କୁଡ଼ି କେ ବେଶ୍ ରିକା
10ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ୟୀଶୁ ମିୟାଃ ବିନ୍ତିଅଡ଼୍ଆଃ ରେ ଉପ୍ଦେଶ୍ ଏମ୍ ତାଇନାଏ। 11ଏନ୍ତାଃ ମିୟାଃ କୁଡ଼ି ତାଇକେନାଏ, ଅକନିଃକେ ଆଠାରା ଶିର୍ମା ଏତେ ମିୟାଃ ନାରାଦୁରା ରିକା ବୋଙ୍ଗାଆତ୍ମା ଏସେର୍ ଲିଜାଏ, ହାର୍ ଇନିଃ କୁବ୍ଡ଼ି ବାଇଲେନ୍ ତାଇକେନାଏ ହାର୍ ଅକୋ ଲେକାତେ ହ ସୋଜ୍ ହୋବା କାଏ ଧାଡ଼ି ତାଇନାଏ। 12ୟୀଶୁ ଇନିଃକେ ନେଲ୍କେତେ କେଡ଼ା କିଜାଏ ହାର୍ କାଜିକେଦାଏ, “ହେ କୁଡ଼ି, ଆମ୍ ଆମାଃ ନାରାଦୁରା ତେ ବେଶ୍ ଜାନାମ୍।” 13ଏନ୍ତେ ଇନିଃ ଇନିଜାଃ ଚେତାନ୍ ରେ ତିଈ ମାଣ୍ଡାଅ କେଦାଏ, ଆଡୋଃ ଇନିଃ ଇମ୍ତାଗି ସୋଜ୍ ଜାନାଏ ହାର୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଏଟେଃ କେଦାଏ। 14ମେନ୍ଦୋ ୟୀଶୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଇନିଃକେ ବେଶ୍ ଲେଃ ତାଇକେନାଏ, ଏନାମେନ୍ତେ ୟାହୁଦୀ କୋୱାଃ ଦୁନୁବ୍ଅଡ଼୍ଆଃ ରେନ୍ ମୁଖିୟା ଖିସ୍ କେତେ ହୋଡ଼ୋକୋକେ କାଜିକେଦାଏ, ମିୟାଃ ହାପ୍ତା ରେ ଛାଅ ଦିନ୍ ମେନାଃ ଏଣ୍ଡେ ରେ କାମି ଚାହି, ଏନ୍ତେ ଏନ୍ ହୁଲାଙ୍ଗ୍ କୋରେ ଗି ହିଜୁଃକେତେ ବେଶ୍ ହୋବାଃଅନ୍ ପେ, ମେନ୍ଦୋ ଆବୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ କାହା। 15ଏନ୍ତେ ନେୟା ଆୟୁମ୍କେତେ ପ୍ରାଭୁ କାଜିରୁଆଡ଼୍ କେଦାଏ, “ହେ ବେଦାହୋଡ଼ୋକୋ, ଆବୁ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ରେ ଆପେ କୋଏତେ ସବେନ୍ ଚିନାଃ ଆପେୟାଃ ଉରିଃ ୟାଦୋ ଗାଧା କେ ଗୋଣା ଏତେ ରାଡ଼ାକେତେ ଦାଆ ନୁୱେ ଲାଗିନ୍ କାପେ ଇଦିକୋୱା? 16ଏଣ୍ଡେ ଚିନାଃ ଠାଉକା କା ତାଇକେନା ଚି ନେ କୁଡ଼ି ଅକନିଃ ଆବ୍ରାହାମ୍ ବାଂଶ୍ ରାଃ ହୋନ୍କୁଡ଼ି ତାନିଃ ଅକନିଃକେ ଶାଏତାନ୍ ଆଠାରା ଶିର୍ମା ଏତେ ଥୋଲ୍ କେତେ ମାଣ୍ଡାଅ ଲିଃ ତାଇକେନାଏ, ଆରାମେ ହୁଲାଙ୍ଗ୍ ରେ ନେ ଥୋନୋଲ୍ ଏତେ ରାଡ଼ାଅଃ କା ତାଇକେନା?” 17ଚିମ୍ତାଙ୍ଗ୍ ଇନିଃ ନେ କାଜିକୋ କାଜିକେଦାଏ, ଦୋ ଇନିଜାଃ ସବେନ୍ ବିରୋଧୀ କୋ ଗିୟୁଃ ଜାନାକୋ, ହାର୍ ସବେନ୍ ହୋଡ଼ୋକୋ ଏନ୍ ମାନାରାଙ୍ଗ୍ ରାଃ କାମି କେ ଅକନାଃ ଇନିଃ କାମିକେଦାଏ, ରାଶିକା ଜାନାକୋ।
ମାନି ଯାଙ୍ଗ୍ ରାଃ ଜୋନୋକା
(ମାତ୍ତି. 13:31,32; ମାର୍କୁ. 4:30-32)
18ଏନ୍ତେ ୟୀଶୁ କାଜିକେଦାଏ, “ପାର୍ମେଶ୍ଵାର୍ ରାଃ ରାଇଜ୍ ଅକେୟାଃ ଲେକା ମେନାଃ? ହାର୍ ଇଙ୍ଗ୍ ଏନା କେ ଅକନାଃ ତେ ଜୋକା ୟାଇଙ୍ଗ୍? 19ଏନା ମାନି ରାଃ ମିୟାଃ ଯାଙ୍ଗ୍ ଲେକା ତାନାଃ, ଅକନାଃକେ ମିୟାଃ ହୋଡ଼ ଇଦିକେତେ ଆଜାଃ ବାଖ୍ଡ଼ି ରେ ହେର୍ କେଦାଏ, ଆଡୋଃ ଏନା ହାରା କେତେ ଦାରୁ ବାଇଜାନା ହାର୍ ରିମିଲ୍ଦିଶୁମ୍ ରେନ୍ ଅଡ଼େକୋ ଏଣ୍ଡେରାଃ କୋତୋକୋ ରେ ତୂକାକୋ ବାଇକେଦାକୋ।”
ଖାମୀର୍ ରାଃ ଜୋନୋକା
(ମାତ୍ତି. 13:33)
20ଇନିଃ ଆଡୋଃଗି କାଜିକେଦାଏ, “ଇଙ୍ଗ୍ ପାର୍ମେଶ୍ଵାର୍ ରାଃ ରାଇଜ୍ କେ ଅକନାଃ ତେ ଜୋକା ୟାଇଙ୍ଗ୍? 21ଏନା ଖାମୀର୍ ରାଃ ଲେକା ତାନାଃ, ଅକନାଃକେ ମିୟାଃ କୁଡ଼ି ଇଦିକେତେ ଆପି ନାପ୍ ଆଟା ରେ ମେଶା କେଦାଏ, ଆଡୋଃ ସିପୁଃ-ସିପୁଃ ଲୋଃ ସବେନ୍ ଆଟା ରେ ଖାମୀର୍ ମେଶା ଜାନା।”
ସାକୁର୍ ଦୁହାର୍
22ଏନ୍ତେ ୟୀଶୁ ଆଜାଃ ଚେଲାକୋ ଲୋଃ ସାହାର୍-ସାହାର୍ ଆଡୋଃ ହାତୁ-ହାତୁ ସେନ୍ କେତେ ଉପ୍ଦେଶ୍ ତାନ୍ ଲୋଃ ୟୀରୁଶାଲେମ୍ ପାଡ଼୍ ସେନ୍ ତାଇକେନାଏ। 23ଇମ୍ତା ଜାହାଁଏ ମିହୋଡ଼୍ ଇନିଃକେ କୁଲିକିଜାଏ, “ହେ ପ୍ରାଭୁ, ଚିନାଃ ପାର୍ମେଶ୍ଵାର୍ ହୁଡିଙ୍ଗ୍ ଗି ହୋଡ଼ୋକୋକେ ଜାନାଓ ଦାଣ୍ଡ୍ ଏତେ ବାଞ୍ଚାଅ କୋୱାଏ?” ଇନିଃ ଇନ୍କୁକେ କାଜିକେଦାଏ, 24“ସାକୁର୍ ଦୁହାର୍ ରେ ବୋଲୋ ଲାଗିନ୍ ପେଡ଼େଏ ଲାଗାୱେପେ, ଚିୟାଃଚି ଇଙ୍ଗ୍ ଆପେକେ କାଜିତାନିଙ୍ଗ୍, ଚି ମିଃଥିମ୍ବା ହୋଡ଼ୋକୋ ବୋଲୋ କୋ ସାନାଙ୍ଗା, ହାର୍ କାକୋ ଧାଡ଼ିୟା। 25ଚିମ୍ତା ପାର୍ମେଶ୍ଵାର୍ ଅଡ଼୍ଆଃ ରେନ୍ ଗୋମ୍କେ, ବିରିଃ କେତେ ଦୁହାର୍ ହାଣ୍ଡେଃ ଛାବା କେଦାଏ, ଏନ୍ତେ ଆପେ ବାହାରି ତିଙ୍ଗୁ କେତେ ଦୁହାର୍ ଟୋଅ-ଟୋଅ ୟାପେ ହାର୍ ଆର୍ଜି କେତେ କାଜିୟାପେ, ‘ହେ ପ୍ରାଭୁ, ଆଲେୟାଃ ଲାଗିନ୍ ଖଲାଅ ତାମ୍,’ ହାର୍ ଇନିଃ କାଜିରୁଆଡ଼୍ ୟାଏ, ‘ଇଙ୍ଗ୍ ଆପେକେ କାଇଙ୍ଗ୍ ସାରିୟା, ଆପେ କୋତାଃ ରେନ୍ ତାନ୍ପେ?’ 26ଇମ୍ତା ଆପେ କାଜିୟାପେ, ‘ଆଲେ ଆମାଃ ନାଡ଼େଏ ରେ ଜୋମ୍ ନୁ କେଦାଲେ ଆଡୋଃ ଆମ୍ ଆଲେୟାଃ ପିଟ୍ କୋରେ ଉପ୍ଦେଶ୍ କେଦାମ୍।’ 27ମେନ୍ଦୋ ଇନିଃ କାଜିୟାଏ, ‘ଇଙ୍ଗ୍ ଆପେକେ କାଇଙ୍ଗ୍ ସାରିତାନା, ଆପେ କୋତାଃ ରେନ୍ ତାନ୍ପେ? ହେ ଶିତୃ-କାମି ରିକାତାନ୍କୋ, ଆପେ ସବେନ୍ କୋ ଇଙ୍ଗ୍ଆଃ ନାଡ଼େଏ ତେ ଆତୋମେନ୍ ପେ।’ 28ହେନ୍ତାଃରେ ରାଆ ହାର୍ ଡାଟା ରିଦ୍ ହୋବାଅଃୱା, ଚିମ୍ତାଙ୍ଗ୍ ଆପେ ଆବ୍ରାହାମ୍ ହାର୍ ଇସାହାକ୍, ହାର୍ ୟାକୁବ୍ ହାର୍ ସବେନ୍ ନାବୀ କୋକେ ପାର୍ମେଶ୍ଵାର୍ ରାଃ ରାଇଜ୍ ରେ ଦୁବାକାନ୍, ଆଡୋଃ ଆପେ ଆପାନ୍ କେଗି ବାହାରି ଅଡୋଙ୍ଗ୍ କାନ୍ ନେଲେୟାପେ। 29ଆଡୋଃ ପୁରାବ୍ ହାର୍ ପାଶ୍ଚିମ୍, ଉତ୍ତାର୍ ହାର୍ ଦାଖିନ୍ ସବେନ୍ ଅତେଦିଶୁମ୍ ଏତେ ହୋଡ଼ୋକୋ ହିଜୁଃକେତେ ପାର୍ମେଶ୍ଵାର୍ ରାଃ ରାଇଜ୍ ରାଃ ଭୋଜ୍ ରେ ଦୁବାକୋ। 30ଆଡୋଃ ନେଲେପେ ଚିମିନାଙ୍ଗ୍ ହୁଡିଙ୍ଗେନ୍ ହୋଡ଼ୋକୋ ସିଦାରେ ମାରାଙ୍ଗ୍ ଅଗାକୋ, ହାର୍ ଚିମିନାଙ୍ଗ୍ ମାରାଙ୍ଗେନ୍ ହୋଡ଼ୋକୋ ତାୟୋମ୍ତେ ହୁଡିଙ୍ଗ୍ ଅଗାକୋ।”
ୟୀଶୁ ରାଃ ବାଇରୀ ହେରୋଦ୍ ରାଜା
31ଏନ୍ ସାମାୟ୍ ରେଗି ଚିମିନାଙ୍ଗ୍ ଫାରିସୀ ହୋଡ଼ୋକୋ ହିଜୁଃକେତେ ୟୀଶୁ କେ କାଜିକିଜାକୋ, “ନେତାଃ ଏତେ ଅଡୋଙ୍ଗ୍ କେତେ ସେନୋଃ କୋମେ, ଚିୟାଃଚି ହେରୋଦ୍ ରାଜା ଆମ୍କେ ଗୋଏଃ ଲାଗିନ୍ ସାନାଙ୍ଗ୍ ତାନାଏ।” 32ଇନିଃ ଇନ୍କୁକେ କାଜିକେଦାଏ, “ସେନ୍ କେତେ ଏନ୍ ତୁୟୁ ଲେକା ଚାତୁର୍ ହୋଡ଼ କେ କାଜିୟାଇପେ ଚି, ନେଲେମ୍, ଇଙ୍ଗ୍ ଇସିଙ୍ଗ୍ ହାର୍ ଗାପା ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋ ତାନିଙ୍ଗ୍ ଆଡୋଃ ବିମାରୀ କୋକେ ବେଶ୍ କୋ ତାନିଙ୍ଗ୍, ହାର୍ ଆପି ହୁଲାଙ୍ଗ୍ ରେ ଇଙ୍ଗ୍ଆଃ କାମି କେ ପୁରା କେୟାଇଙ୍ଗ୍। 33ଏଣ୍ଡେ ହ ଇଙ୍ଗ୍କେ ଇସିଙ୍ଗ୍ ହାର୍ ଗାପା ହାର୍ ମେୟାଙ୍ଗ୍ ସେନୋଃ ଲାଗାତିଙ୍ଗ୍ ମେନାଃ, ଚିୟାଃଚି ୟୀରୁଶାଲେମ୍ ସାହାର୍ ବାହାରି ରେ ଜେତାନ୍ ନାବୀ ଗୋଜୋଗାଏ ଏନ୍କା ହୋବା କା ଧାଡ଼ିୱା।”
ୟୀରୁଶାଲେମ୍ ସାହାର୍ ରେନ୍ ହୋଡ଼ୋକୋ ଲାଗିନ୍ ରାଆ
(ମାତ୍ତି. 23:37-39)
34“ହେ ୟୀରୁଶାଲେମ୍ ସାହାର୍ ରେନ୍ ହୋଡ଼ୋକୋ! ହେ ୟୀରୁଶାଲେମ୍ ସାହାର୍ ରେନ୍ ହୋଡ଼ୋକୋ! ଆପେ ଜେ ନାବୀ କୋକେ ଗୋଏଃ କୋ ତାନାମେ, ଆଡୋଃ ଅକନ୍କୋ ଆପେତାଃ କୁଲ୍ ଲେନାକୋ ଇନ୍କୁୱାଃ ଚେତାନ୍ ରେ ଦିରି ଥେର୍ ୟାପେ। ଚିମିନ୍ ଥର୍ ଇଙ୍ଗ୍ ନେୟା ସାନାଙ୍ଗ୍ କେଦାଇଙ୍ଗ୍ ଚି ଚିଲ୍କା ସିମ୍ ଆଜାଃ ହୋନ୍ କୋକେ ଆଜାଃ ଆପ୍ରୋବ୍ ଲାଥାର୍ ରେ ହୁଣ୍ତି କୋୱାଏ, ଏନ୍ଲେକାଗି ଇଙ୍ଗ୍ ହଗି ଆପେ କେ ହୁଣ୍ତି କୋୱାଇଙ୍ଗ୍, ମେନ୍ଦୋ ଆପେ ନେୟା କାପେ ସାନାଙ୍ଗ୍ କେଦା। 35ନେଲେପେ, ଆପେୟାଃ ଅଡ଼୍ଆଃ ଆପେୟାଃ ଲାଗିନ୍ ଉଜ୍ଡ଼ାଅ ବାଗିୟଃ ତାନା, ଆଡୋଃ ଇଙ୍ଗ୍ ଆପେକେ କାଜିତାନିଙ୍ଗ୍, ଚିମ୍ତା ସାନ୍ତେ ଆପେ କାପେ କାଜିୟା, ‘ଧାନ୍ୟା ଇନିଃ ତାନିଃ, ଅକନିଃ ପ୍ରାଭୁ ଆଃ ନୁତୁମ୍ ତେ ହିଜୁଃ ତାନାଏ, ଇମିନ୍ ସାନ୍ତେ ଆପେ ଇଙ୍ଗ୍କେ ଆଡୋଃ ଚିଉଲା ହ କାପେ ନେଲିଙ୍ଗ୍ୟା।’ ”
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
