Kejadian 6
6
Ila mokon deipudi, tuai mutu yuma jepropu upu
1Tuai nesala pio weik kupbarami taru neitamaida, sun ner nyapu weik derirami. 2‘Allahda ila mambule’ tenen, er tara dumsisi kurami nengdi, yuk tali nengdi derirami ner nyapu dirtereramidi, ‘Uo, anerapuda pio telepe’ tenen, sun teneramidi, putaramu nerapupu, tali lupra dodarami. 3Ukupra kuramipa, Allah er si Yahwehdi upepu. “Gume, ne Lek Sambaladi nimi tuai nesala tep, ‘Ukupso, ukupra kunkamrume,’ pepra, pio piripetepra pel men donkamre. Tuai nesala yumada, denapu kununge. Sun keteng tamunda denge weik, 120 tahun kupkamre,” pepu.
4Atarupuda, sun Nepilim mutu neng ton mutu-mutu yuma kurami. Ada Allah er tara nengdi, talipu kurami nesala, sun ner nyapu damai bena doramidi, kikiman kuramidi, nyapu derirami taru tep pepne. Tonda, amenda taru ton tuai mutu kurami. Yuk tali nesala yumadi, sun nong weik nerami neng, ada sun Nepilim mutu neng tep, ‘Uo, sunda ila mambul kununge’ teneramidi, aneng kurami keca tep, nungna upu weik nungdarami.
5Nimi tuai nesala ban-ban yumadi, sun kange dipru neitamai tenerami keca yuma pio malipu kurami. Ataru-ataru yuma, telep keca tenena gum dipapu, pio mali kecapu tenepra putaramupa, mali-mali pio weik kupbarami. Malipu kurami ngeda, Allah er si Yahwehdi dipetepudi, kael keamu.
6Ange kael keamudi Yahwehdi, ‘Uo, nimida ketekepra tuai mutu neitamai deipsada, pio mali kupsi,’ tenepudi, er dipru pu jeramupa, mali kange doupudi, dabal kupupa upepu. 7“Nimi tuai nesala ketekepra deipsidi, tuai mutu neitamai deipsada, gum kupra deipnepa, tuai mutuda tali dempu kunkamre. Tonda, nimipu gum dinin, nerapu cap, tuai deiki embare gam kun keca yala-yala yuma cap, po cap, bal cap, ma cap, akeca yala-yala yuma cap, gum kupra deipkamne. Akeca-keca yuma ketekepra deipsada, dabal weik kunerepa, mali kange doupne,” Allah er si Yahwehdi pepu. 8Allah er si Yahwehdi tuai nesala yuma tep, angepu teneramu dinin, Nuh er tenpu tep nengeda, mali men kuramnga cadi, er kuramu keca dipetepudi, kange deipu.
9Acada, Nuh er kuramu keca tep sekeipsene. Nuhda, pio dumsisipu kuramudi, er kuramu taru kurami nengdi er tep, ‘E, er mali kure kecada aca, aca,’ pio men pepmanto kurami. Tonda, Allahdi, teneramemeutopu, Nuhdi dumsisipu kuramudi, Allah cap dipru dukdongopra teleppu kuramu. 10Nuhdi deiamu nyapuda, weneri deriramu. Sun sida, Sem cap, Ham cap, Yafet cap si pepu.
11Uda, ataru neitamaida, Allah er kangeda, ‘Gume, tuai nesala ban-ban yuma, pio mali-malipu kuramengedi, pangdana weik, podana weik kununge,’ teneramu. 12Tuai mutu nesala yumadi, dumsisi men kuramidi, mali bisipu lerekra konum barami. 13Ukuramya tep, Allahdi Nuh tep upepu. “Ukuda konuma, tuai nesala ban-ban yuma, pio mali-malipu kunga deiki di, tuai mutu yuma pangdana cap, podana cappu kununga tep nengeda, tuai nesala yuma poptapnedi, sun cap, tuai mutu yuma cap, gum kupra deipkamne,” pepu.
14“Ukupkamna tep, kandi gopir co kwepra cakmemdi, ila nong weik gapung co dopkurume. Agapung co neitamaida, ati dopra, dela yuk-yuk wilipra dopmem dingeda, aco lase deiki yumada, co pe dopra likeipkurume. Ada ati pumbon cap, bura tara cap, gapung co bol deiki cap yuma, tenpai pe tara gum di, yuma co pe dopra, bon yuma dekdongopkamrume.”
15“Agapung coda, ukupra dopkamreme. Er lyom tara kiklipmempa, 14 meter panjang kepkamre. Er pala tara kiklipmempa, 23 meter lebar kepkamre. Akati lana di kiklikrap, arum deiki udini lyomda, 13 setengah meter tinggi kupkamre. 16Agapung co cap, ati cap dopmem dingeda, er arum ton kapkamreme. Akati arum dice, gapung co dela duce, daneitamaida yambul gopu tapkurume. Agoda, setengah meterpu, 50 senti kupkamre. Agapung co nonge neitamaida, tenpu buplan bisi ton potokurume. Agapung co ati neitamaida, lana weneri nukra dopkamrume. Menmenange deiki tara, butenenge neitamai tara, weneri ngeda dutarapu dopkamrume.” Allahdi pepu.
17Upepu dingeda, aupu ton dukdongopra pepu. “Uda, ila mokon weik deipnyopda, im neitamai dice dinin, im iriamu tara tuai mutu ban-ban yuma neitamai, gam kure keca yala-yala yuma mokon jeprepa, depkamenge. Ware yala keca do yuma, gam kure keca yuma cap, isine kure keca yuma cap depkamenge. Tenpu keca peda men tapkamne.
18Dinino, kan Nuhpuda, kan tep ne pedina upu karepkene. Ada, kan cap, kandi deiamum nyapu cap, kan ner cap, kan nyapudi domi nerapu cap, sun yumada, gapung co deiki dopkamrem ati pumbonpu wekamrume. 19Tonda, ‘Akeca-keca yuma pio gum kuprur’ tenen, tuai mutu neitamai di, gam kure keca yala-yala yumada, nernge tenpu, gemnge tenpu bulupmemdi dopra, agapung co ati neitamai dongopkamrume.”
20“Ma yala-yala yuma cap, bisam yala-yala yuma cap, tu deiki yanipra embare keca yala-yala yuma cap, butene-butene kepra, kan damai yakankamenge. Yangopda, kan cap kikiman gam kunkamruma tep, akeca dopra, akati pumbonpu dongopkamrume. 21Tonda, ware jen keca do, yala-yala yuma dopra, akati pumbonpu dongopkamrume. Ada, sun nimi cap, atali bura tara gam kure keca cap, sun jen keca ketenemna tep pepkene.” Allahdi Nuh tep pepu. 22Allahdi Nuh tep, “Ange ukupkurum, ukupkurum,” pepra deiputopu, Nuhdi ange utopu pel doramu.
©2022 Wycliffe Bible Translators, Inc
