Like 4

Jabɨri asaha olehe Jesu nca eciniŋi me ebi

1Jesu awa na Jurde, Oduduma Santi oma luula o nde, Oduduma obiri nde nca kayi. 2O kwa, Jabɨri osoŋi nde ekuumi me ecuhu ena. Nca ecuhu bya nde aka aja biila ni, emana ŋa njala esi nde. 3Jabɨri na nde ndi: «Yuhu we mwana a Njyami, wobo na kele ji ekiriha biila.» 4Jesu okaali ndi: «Amateende nca Osaangumu o Njyami ndi, “Mvuuru omwo aka baha lebihi ma lempeembe letu ni.”»

5Jabɨri obiri nde nkara yulu, olahi nde esi e yulu a ncye eso. 6Nde na Jesu ndi: «Me eje ompa we onkʉmu bɨla osolo e me esi bi, jo eso aki amampa me. Me se ompa na mvuuru a me edya. 7We owʉra avwo o miisi a me, jo eso me eje oka e we.» 8Jesu okaali ndi, amateende nca Osaangumu o Njyami ndi: «We owʉra avwo eso o miisi a Njyami a Nkʉmu a we, we ovwono eso nde otu.»

9Jabɨri obiri Jesu Jerusaleme, nde ocuusi nde o yula njo e Njyami. Nde na nde ndi: «Yuhu we Mwana Njyami va o ncye! 10Obila amateende nca Osaangumu o Njyami ndi: “Njyami aje oduha na abaanji a nde asuha we.” 11Bo ma aje obira we nca jyala e bo mo odʉma nyiili e we ematiila o kele.» 12Jesu okaali ndi: «Ateende nca Osaangumu o Njyami ndi: “We i soŋo Njyami a Nkʉmu a we ni.”» 13Nde omamana osoŋo Jesu ma angulu aso, Jabɨri olabihi na nde mo odɨla oya na avuriha ntini nkɨma.

Jesu ovurihi Ngalili

14Jesu ovurihi Ngalili, mpari Oduduma Santi eki ema luula o nde. Baari aya ma wobo o nde o nca ngaala jya eso. 15Nde oyisihi mbari o nca sinagoge#4.15 Sinagoge oma kaha njo Ajife ma vwonoŋo. , njo mavwonoŋo. Baari ajuusi nde.

Acuuri Jesu o Najarete

16Jesu oyeni Najarete, mpili ma kuusi nde. Nde onyunihi nca njo mavwonoho, o cuhu mawuumaha, me esihi e nde e kala. Nde otemihi mo oliira Osaangumu o Njyami. 17Ampi nde osaangumu owobi a mbari e Njyami Esayi. Nde onaani, oliiri biri ma amateende ndi:

18«Oduduma a Nkʉmu oli o me.

Nde amaswolo me, mo otooso Ncya e Mve na baari ma ali nca owuha.

Nde atuma me mo ovusiha baari ma ali nca engeneŋe,

mo onaana miisi a baari ma ali i mono ni,

mo ovusiha baari ma ali nca ampasi,

19mo oduha ndi ki osibi o be lemono eve e Nkʉmu.»

20Jesu ovuuri osaangumu na ojanji, oya o nci. Baari aso ma aki nca njo mavwonoho, makeese nde. 21Nde na bo ndi: «Maami a be leyuhi nca Osaangumu ki, amimono mo lobi.» 22Baari aso a siisi enywa e nde, aya kimimi mo mbari e nde e mve. Bo ndi: «Saabe yu ka mwana a Jusefe ni?»

23Ŋa nde na bo ndi: «Be lebuuna ota me ncincami ji mbɨri: “Osalihi, salaha nyuru e we, we ankulu.” Ŋa be se lebuuna oduha me mbɨri: “Bisi lemayuha maami a we asi mo onguundu o Kaprenaume. Sa mo osuumbu jwa nca onguundu o we.”» 24Nde oluusi ndi: «Ee me eduha be, owobi a mbari e Njyami se omo ma aka yambaha mo osi o nde ankulu ni. 25Sisyele me eduha be, ntini owobi a mbɨri e Njyami Eli akihi nca osi o Isayele, mvʉla aki aka noho esibi etari na otini ni, mpuhu evi njala. Ntini jya se eki na akuuli. 26Ŋa Njyami aka tuma Eli mpili e bo aso ni. Nde oswoli okuuli omo akihi nca onguundu o Sareta mo osi o Sido. 27O ntini owobi a mbari e Njyami Elije akihi o Isayele, eki na se anga ebila, nde aka salaha bo ni. Nde asalihi Naman, osi Siri.»

28Aso mayuhi nde nca njo mavwonoho, abye nkala. 29Bo atemihi, acuuri nde. Ayeni na nde ncwo onguundu yulu okuri, obiri ma amacwa onguundu o Najarete. Bo asahi ociniŋa nde nca mbye. 30Nde oyiri o mpaniŋi e bo, oyeni.

Jesu ovusihi mvuuru aki na edidima me ebi

31Jesu osurihi Kaprenaume, onguundu o nca ngaala e Ngalili, nde aki ayisiha o cuhu mawuumaha. 32Baari aya kimimi mo osuumbu eyisihi nde bɨla mpari e Njyami. 33«Nca njo mavwonoho balaha mo eki na odidima obi. Owuli nkɨma na nkala.» 34«Aa! We Jesu a Najarete, we na bisi oma? We omi ya na apama bisi. Me eyaa we, we opeende a Njyami atumi!» 35Jesu obye na nde ndi: «Cuuha o nde!» Oduduma obi obali mvuuru jwa o ncye, o mwa okuha. Ocuuhi o nde, aka yusaha nde ngaa ni. 36Bo aso aya kimimi, aya maŋiina o mpaniŋi ebo ndi: «Saabe ji mbari ma? Nde awobo na edidima me ebi na mpari bɨla lila, jo ma ecuuha.» 37Okuumu o nde oyeni nca ngaala jya eso.

Jesu Osalihi abyeri

38Jesu ocyehi njo mavwonoho, oyeni njo e Simo. Nde obasihi oko o Simo okaasi na obaa o nkala. Bo apɨsi Jesu mo osalaha nde. 39Nde okumihi o yula okaasi, obye na obaa, obaa owi. O nci na nci ŋa, nde otemihi, oya ampa bo biila.

40Tari emava, baari ma aki na abyeri ayi na laha bo na Jesu, nde olehi jyala o yula bo, bo awuumi. 41Edidima me ebi ecuuhi na owʉla ankɨma: «We Mwana Njyami.» Jesu obye na bo mo oka pi. Obila bo ajyabi ndi nde Krisi.

Jesu atooso mbari e Njyami nca anjo mavwonoho

42Eto na encyere, Jesu ocuuhi nca onguundu mo oje nca kayi. Baari aya masaha nde, bo ayi mpili e nde. Bo akanihi nde mo oduma nde oma aje. 43Nde na bo ndi: «Ove me se yeni na otooso Ncya e Mve Onkani o Njyami, nca enguundu ekɨma. Kya obila o Njyami atumi me o yula ncye.» 44Ŋa nde atoosihi mbari jya nca anjo mavwonoho a Jide.

選択箇所:

Like 4: MDT

ハイライト

コピー